Aṅguttara-Nikāya
III. Tika Nipāta
VIII. Ānanda Vagga
Sutta 72
Ājīvaka Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][than] Evaṃ me sutaṃ:|| ||
Ekaṃ samayaṃ āyasmā ānavdo Kosambīyaṃ viharati Ghositārāme|| ||
Atha kho aññataro ājīvaka-sāvako gahapati yen'āyasmā Ānanda ten'upasaṅkami|| ||
Upasaṅkamitvā āyasmantaṃ Ānandaṃ abhivādetvā eka-m-antaṃ nisīdi|| ||
Eka-m-antaṃ nisinno kho so ājīvaka-sāvako gahapati āyasmantaṃ Ānandaṃ etad avoca:|| ||
"Kesaṃ ne bhante Ānanda dhammo svākkhāto,||
ke loke su-paṭipannā,||
ke loke sugatā" ti?|| ||
"Tena hi gahapati taṃ yeva ettha paṭipucchissāmi,||
yathā te khameyya,||
tathā naṃ vyākareyyāsi.|| ||
■
Taṃ kiṃ maññasi gahapati?|| ||
Ye rāgassa pahāṇāya dhammaṃ desenti||
dosassa pahāṇāya dhammaṃ desenti,||
mohassa pahāṇāya dhammaṃ desenti;||
tesaṃ dhammo svākkhāto no vā,||
kathaṃ vā te ettha hotī" ti?|| ||
[218] "Ye bhante rāgassa pahāṇāya dhammaṃ desenti||
dosassa pahāṇāya dhammaṃ desenti||
mohassapahāṇāya dhammaṃ desenti||
tesaṃ dhammo jvākkhāto,||
evaṃ me ettha hotī" ti.|| ||
■
"Taṃ kiṃ maññasi gahapati?|| ||
Ye rāgassa pahāṇāya paṭipannā,||
dosassa pahānāya paṭipannā,||
mohassa pahāṇāya paṭipannā,||
te loke su-paṭipannā,||
no vā kathaṃ vā te ettha hotī" ti?|| ||
"Ye bhante rāgassa pahāṇāya paṭipannā,||
dosassa pahāṇāya paṭipannā,||
mohassa pahāṇāya paṭipannā,||
te loke su-paṭipannā,||
evaṃ me ettha hotī" ti.|| ||
■
"Taṃ kiṃ maññasi gahapati?|| ||
Yesaṃ rāgo pahīno ucchinna-mūlo tālā-vatthu-kato anabhāva-kato āyatiṃ anuppāda-dhammo,||
yesaṃ doso pahīṇo ucchinnamulo tālā-vatthu-kato anabhāva-kato āyatiṃ anuppāda-dhammo||
yesaṃ moho pahīṇo ucchinnamulo tālā-vatthu-kato anabhāva-kato āyatiṃ anuppāda-dhammo,||
te loke sugatā,||
no vā kathaṃ vā te ettha hotī" ti?|| ||
"Yesaṃ bhante rāgo pahīṇo ucchinna-mūlo tālā-vatthu-kato anabhāva-kato āyatiṃ anuppāda-dhammo,||
yesaṃ doso pahīṇo ucchinna-mūlo talālāvatthu-kato anabhāva-kato āyatiṃ anuppāda-dhammo,||
moho pahīno ucchinna-mūlo tālā-vatthu-kato anabhāva-kato āyatiṃ anuppāda-dhammo,||
te loke sugatā evaṃ me ettha hotī" ti.|| ||
■
Iti kho gahapati tayā c'etaṃ vyākataṃ:|| ||
'Ye bhante rāgassa pahāṇāya dhammaṃ desenti,||
dosassa pahāṇāya dhammaṃ desenti mohassa pahāṇāya dhammaṃ desenti tesaṃ dhammo jvākkhātoti,||
tayā c'etaṃ vyākataṃ.|| ||
Ye bhante rāgassa pahāṇāya paṭipannā,||
dosassa pahāṇāya paṭipannā,||
mohassa pahāṇāya paṭipannā,||
te loke su-paṭipannāti,||
tayā c'etaṃ vyākataṃ.|| ||
Yesaṃ bhante rāgo pahīṇo ucchinna-mūlo tālā-vatthu-kato anabhāva-kato āyatiṃ anuppāda-dhammo,||
yesaṃ doso pahīṇo ucchinanamūlo tālā-vatthu-kato anabhāva-kato āyatiṃ anuppāda-dhammo,||
moho pahīṇo ucchinna-mūlo tālā-vatthu-kato anabhāva-kato āyatiṃ anuppāda-dhammo,||
te loke sugatā" ti.|| ||
"Acchariyaṃ bhante,||
abbhutaṃ bhante,||
na c'eva nāma sadhammukkaṃsanā bhavissati,||
na ca paradhammāpasādanā,||
āyatan'eva Dhamma-desanā|| ||
Attho ca vutto|| ||
Attā ca anupanīto.|| ||
§
Tumbhe bhante Ānanda rāgassa pahāṇāya dhammaṃ desetha,||
dosassa pahāṇāya dhammaṃ desetha,||
mohassa pahāṇāya [219] dhammaṃ desetha.|| ||
Tumbhākaṃ bhante Ānanda dhammo svākkhāto.|| ||
Tumbhe bhante Ānanda rāgassa pahāṇāya paṭipannā dosassa pahāṇāya paṭipannā mohassa pahāṇāya paṭipannā.|| ||
Tumbhe loke su-paṭipannā.|| ||
Tumbhākaṃ bhante Ānanda rāgo pahīṇo ucchinnamulo tālā-vatthu-kato anabhāva-kato āyatiṃ anuppāda-dhammo.|| ||
Tumbhākaṃ dose pahīṇo ucchinnamalo talālavatthu-kato anabhāva-kato āyatiṃ anuppāda-dhammo.|| ||
Tumbhākaṃ moho pahīṇo ucchinna-mūlo tālā-vatthu-kato anabhāva-kato āyatiṃ anuppāda-dhammo.|| ||
Tumbhe loke sugatā.|| ||
§
Abhikkantaṃ bhante,||
abhikkantaṃ bhante|| ||
Seyyathā pi bhante nikkujjitaṃ vā ukkujjeyya,||
paṭi-c-channaṃ vā vivareyya,||
mūḷhassa vā Maggaṃ ācikkheyya,||
avdhakāre vā tela-pajjotaṃ dhāreyya||
'cakkhu-manto rūpāni dakkhintī' ti.|| ||
Evam evaṃ ayyena Ānandena aneka-pariyāyena dhammo pakāsito.|| ||
Es'āhaṃ bhante Ānanda taṃ Bhagavantaṃ saraṇaṃ gacchāmi,||
dhammaṃ ca bhikkhu-saṅghaṃ ca.|| ||
Upāsakaṃ maṃ ayyo Ānanda dhāretu ajja-t-agge pāṇupetaṃ saraṇaṃ gatan" ti.|| ||
