Aṅguttara-Nikāya
III. Tika Nipāta
IX. Samaṇa Vagga

Sutta 81

Samaṇa Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[229]

[1][pts][than] Evaṁ me sutaṁ.|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Tīṇ'imāni bhikkhave samaṇassa samaṇa karaṇīyāni.|| ||

Katamāni tīṇi?|| ||

Adhisīla-sikkhā-samādānaṁ,||
adhicitta-sikkhā-samādānaṁ,||
adhipaññā-sikkhā-samādānaṁ.|| ||

Imāni kho bhikkhave tīṇi samaṇassa samaṇakaraṇīyāni.|| ||

■

Tasmātiha bhikkhave evaṁ sikkhitabbaṁ:|| ||

'Tibbo no chando bhavissati adhisīla-sikkhā-samādāne,||
tibbo no chando bhavissati adhicitta-sikkhā-samādāne,||
tibbono chando bhavissati adhipaññā-sikkha-samādāne' ti.|| ||

Evaṁ hi ve bhikkhave sikkhitabban.|| ||

 

§

 

2. Seyyathā pi, bhikkhave,||
gadubho gogaṇaṁ piṭṭhito piṭṭhito anubaddho hoti:

'Aham pi amhā! Aham pi amhā!' ti.|| ||

Tassa na tādiso vaṇṇo hoti seyyathā pi gunnaṁ,||
na tādiso saro hoti seyyathā pi gunnaṁ,||
na tādisaṁ padaṁ hoti seyyathā pi gunnaṁ.|| ||

So gogaṇaṁ yeva piṭṭhito piṭṭhito anubaddho hoti:|| ||

'Aham pi amhā! Aham pi amhā!' ti.|| ||

■

Evam eva kho bikkhave idh'ekacco bhakkhu bhikkhu-saṅghaṁ piṭṭhito piṭṭhito anubaddho hoti:|| ||

'Aham pi bhikkhu! Aham pi bhikkhū!' ti.|| ||

Tassa na tādiso chando hoti adhisīla-sikkhā-samādāne,||
seyyathā pi aññesaṁ bhikkhūnaṁ,||
na tādiso chando hoti adhicitta-sikkhā-samādāne,||
seyyathā pi aññesaṁ bhikkhūnaṁ||
na tādiso chando hoti adhipaññā-sikkhā-samādāne,||
seyyathā pi aññesaṁ bhikkhūnaṁ.|| ||

So bhikkhū-Saṅghaṁ yeva piṭṭhito-piṭṭhito anubaddho hoti:

'Aham pi bhikkhu! Aham pi bhikkhū!' ti.|| ||

Tasmātiha bhikkhave evi sikkitabbaṁ:|| ||

'Tibbo no chando bhavissati adhisīla-sikkhā-samādāne,||
tibbo no chando bhavissati adhicitta-sikkhā-samādāne,||
tibbo no chando bhavissataadhipaññā-sikkhā-samādāne' ti.|| ||

Evaṁ hi vo bhikkhave sikkhitabban" ti.|| ||