Aṅguttara Nikāya
4. Catukka Nipāta
VI. Puññābhisanda Vagga

Sutta 57

Suppavāsā Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[62]

[1][pts][bodh] Evaṁ me sutaṁ:|| ||

Ekaṁ samayaṁ Bhagavā Koliyesu viharati||
Sajjanelaṁ nāma Koliyānaṁ nigamo.|| ||

Atha kho Bhagavā pubbaṇha-samayaṁ nivāsetvā patta-cīvaram ādāya yena Suppavāsāya Koliyadhītāya nivesanaṁ tenepasaṅkami.|| ||

Upasaṅkamitvā paññatte āsane nisīdi.|| ||

Atha kho Suppavāsā [63] Koliyadhītā Bhagavantaṁ paṇītena khādanīyena bhojanīyena sahatthā santappesi,||
sampavāresi.|| ||

Atha kho Suppavāsā Koliyadhītā Bhagavantaṁ bhuttāviṁ onīta-patta-pāṇiṁ eka-m-antaṁ nisīdi.|| ||

Eka-m-antaṁ nisinnaṁ kho Suppavāsaṁ Koliyadhītaraṁ Bhagavā etad avoca:|| ||

2. Bhojanaṁ Suppavāse dentī ariya-sāvikā paṭiggāhakānaṁ cattāri ṭhānāni deti.|| ||

Katamāni cattāri?|| ||

Āyuṁ deti,||
vaṇṇaṁ deti,||
sukhaṁ deti,||
balaṁ deti.|| ||

Āyuṁ kho pana datvā||
āyussa bhāginī hoti||
dibbassa vā mānusassa vā.|| ||

Vaṇṇaṁ datvā||
vaṇṇassa bhāginī hoti||
dibbassa vā mānussa vā.|| ||

Sukhaṁ datvā||
sukhassa bhāginī hoti||
dibbassa vā mānusassa vā.|| ||

Balaṁ datvā||
balassa bhāginī hoti||
dibbassa vā mānussasa vā.|| ||

Bhojanaṁ Suppavāse dentī ariya-sāvikā paṭiggāhakānaṁ imāni cattāri ṭhānāni detī ti.|| ||

Susaṅkhataṁ bhojanaṁ yā dadāti suciṁ paṇītaṁ rasasā upetaṁ,||
Sā dakkhiṇā ujjugatesu dinnā caraṇopapannesu mahaggatesu,||
Puññena puññaṁ saṁsandamānā maha-p-phalā loka-vidūna vaṇṇitā.|| ||

Etādisaṁ yaññam anussarantā ye vedajātā vicaranti loke||
Vineyya macchera-malaṁ samūlaṁ aninditā saggam utapenti ṭhānan ti.