Aṅguttara Nikāya
Catukka Nipāta
XVIII: Sañcetaniya Vagga

Sutta 177

Rāhula Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[161]

[1][pts] Atha kho āyasmā Rāhulo yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinnaṁ kho āyasmantaṁ Rāhulaṁ Bhagavā etad avoca:|| ||

"Yā ca Rāhula ajjhattikā paṭhavi-dhātu||
yā ca bāhirā paṭhavi-dhātu,||
paṭhavi-dhātur ev'esā.|| ||

Taṁ 'n'etaṁ mama,||
n'eso'ham asmi,||
na m'eso attā' ti,||
evam etaṁ yathā-bhūtaṁ samma-p-paññāya daṭṭhabbaṁ.|| ||

Evam etaṁ yathā-bhūtaṁ samma-p-paññāya disvā paṭhavi-dhātuyā nibbindati||
paññāya cittaṁ virājeti.|| ||

■

2. Yā ca Rāhula ajjhattikā āpo-dhātu||
yā ca bāhirā [165] āpo-dhātu,||
āpo-dhātur ev'esā.|| ||

Taṁ 'n'etaṁ mama,||
n'eso'ham asmi,||
na m'eso attā' ti,||
evam etaṁ yathā-bhūtaṁ samma-p-paññāya daṭṭhabbaṁ.|| ||

Evam etaṁ yathā-bhūtaṁ samma-p-paññāya disvā āpo-dhātuyā nibbindati||
āpo-dhātuyā cittaṁ virājeti.|| ||

■

3. Yā ca Rāhula ajjhattikā tejo-dhātu||
yā ca bāhirā tejo-dhātu,||
tejo-dhātur ev'esā.|| ||

Taṁ 'n'etaṁ mama,||
n'eso'ham asmi,||
na m'eso attā' ti,||
evam etaṁ yathā-bhūtaṁ samma-p-paññāya daṭṭhabbaṁ.|| ||

Evam etaṁ yathā-bhūtaṁ samma-p-paññāya disvā tejo-dhātuyā nibbindati||
tejo-dhātuyā cittaṁ virājeti.|| ||

■

4. Yā ca Rāhula ajjhattikā vāyo-dhātu||
yā ca bāhirā vāyo-dhātu,||
vāyo-dhātur ev'esā.|| ||

Taṁ 'n'etaṁ mama,||
n'eso'ham asmi,||
na m'eso attā' ti,||
evam etaṁ yathā-bhūtaṁ samma-p-paññāya daṭṭhabbaṁ.|| ||

Evam etaṁ yathā-bhūtaṁ samma-p-paññāya disvā vāyo-dhātuyā nibbindati,||
vāyo-dhātuyā cittaṁ virājeti.|| ||

■

5. Yato kho Rāhula bhikkhu imāsu catusu dhātusu n'eva'attāṇaṁ nāttani yaṁ samanupassati||
ayaṁ vuccati Rāhula bhikkhu acchecchi taṇhaṁ,||
vāvattayī saṁyojanaṁ,||
sammā mān-ā-bhisamayā antam akāsi dukkhassā" ti.|| ||