Aṅguttara Nikāya
Pañcaka-Nipāta
XX. Brāhmaṇa Vagga

Sutta 191

Soṇa Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[221]

[1][pts][than] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Pañc'ime bhikkhave porāṇā brāhmaṇa-dhammā etarahi sunakhesu sandissanti||
no brāhmaṇesu.|| ||

Katame pañca?|| ||

2. Pubbe sudaṁ bhikkhave brāhmaṇā brāhmaṇiṁ yeva gacchanti,||
no abrāhmṇiṁ.|| ||

Etarahi bhikkhave brāhmaṇā brāhmaṇim pi gacchanti||
abrāhmṇim pi gacchanti.|| ||

Etarahi bhikkhave sunakhā sunakhiṁ yeva gacchanti,||
no asunakhiṁ.|| ||

Ayaṁ bhikkhave paṭhamo porāṇo brāhmaṇa-dhammo etarahi sunakhesu sandissati,||
no brāhmaṇesu.|| ||

■

3. Pubbe sudaṁ bhikkhave brāhmaṇā brāhmaṇiṁ utuniṁ yeva gacchanti,||
no anutuniṁ.|| ||

Etarahi bhikkhave brah- [222] maṇā brāhmaṇiṁ utunim pi gacchanti,||
anutunim pi gacchanti.|| ||

Etarahi bhikkhave sunakhā sunakhiṁ utuniṁ yeva gacchanti,||
no anutuniṁ.|| ||

Ayaṁ bhikkhave dutiyo porāṇo brahmaṇa dhammo etarahi sunakhesu sandissati,||
no brāhmaṇesu.|| ||

■

4. Pubbe sudaṁ bhikkhave brāhmaṇā brahmaṇiṁ n'eva kiṇanti,||
no vikkiṇanti||
sampiyen'eva saṁvāsaṁ saṁsaggatthāya sampavattenti.|| ||

Etarahi bhikkhave brahmaṇā brāhmaṇiṁ kiṇanti pi,||
vikkiṇanti pi||
sampiyena pi||
saṁvāsaṁ saṁsaggatthāya sampavattenti||
asampiyena pi saṁvāsaṁ saṁsaggatthāya sampavattenti.|| ||

Etarahi bhikkhave sunakhā sunakhiṁ n'eva kiṇanti,||
no vikkiṇanti||
sampiyen'eva saṁvāsaṁ saṁsaggatthāya sampavattenti.|| ||

Ayaṁ bhikkhave tatiyo porāṇo brāhmaṇa-dhammāo etarahi sunakhesu sandissati,||
no brāhmaṇesu.|| ||

■

5. Pubbe sudaṁ bhikkhave brāhmaṇā na sannidhiṁ karonti dhanassa pi||
dhaññassa pi||
rajatassa pi||
jāta-rūpassa pi.|| ||

Etarahi bhikkhave brahmaṇā sannidhiṁ karonti dhanassa pi||
dhaññassa pi||
rajatassa pi||
jāta-rūpassa pi.|| ||

Etarahi bhikkhave sunakhā sannidhiṁ na karonti dhanassa pi||
dhaññassa pi||
rajatassa pi||
jāta-rūpassa pi.|| ||

Ayaṁ bhikkhave catuttho porāṇo brāhmaṇa-dhammo etarahi sunakhesu sandissati,||
no brāhmaṇesu.|| ||

■

6. Pubbe sudaṁ bhikkhave brahmaṇā sāyaṁ sāya-m-āsāya,||
pāto pātarāsāya bhikkhaṁ pariyesanti.|| ||

Etarahi bhikkhave brahmaṇā yāva-datthaṁ udarāvadehakaṁ bhuñjitvā avasesaṁ ādāya pakkamanti.|| ||

Etarahi bhikkhave sunakhā sāyaṁ sāya-m-āsāya,||
pāto pātarāsāya bhikkhaṁ pariyesanti.|| ||

Ayaṁ bhikkhave pañcamo porāṇo brāhmaṇa-dhammāo etarahi sunakhesu sandissanti,||
no brāhmaṇesu.|| ||

Ime kho bhikkhave pañca porāṇā brāhmaṇa-dhammā etarahi sunakhesu sandissanti,||
no brāhmaṇesū" ti.|| ||