Aṅguttara Nikāya
VIII. Aṭṭhaka Nipāta
VI. Gotamī Vagga aka Sa-ādhāna-Vagga

Sutta 53

Saṅkhitta Gotami-y-Ovāda Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[280]

[1][pts][than] Evaṁ me sutaṁ:|| ||

Ekaṁ samayaṁ Bhagavā Vesāliyaṁ viharati Mahāvane Kūṭāgāra-sālāyaṁ.|| ||

Atha kho Mahā-Pajāpatī Gotamī yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhāsi.|| ||

Eka-m-antaṁ ṭhitā kho Mahā-Pajāpatī Gotamī Bhagavantaṁ etad avoca:|| ||

"Sādhu me bhante,||
Bhagavā saṅkhittena dhammaṁ desetu,||
yam ahaṁ Bhagavato dhammaṁ sutvā ekā vūpakaṭṭhā appamattā ātāpinī pahit'attā vihareyyan" ti.|| ||

 

§

 

2. "Ye kho tvaṁ Gotamī,||
dhamme jāneyyāsi:|| ||

'Ime dhammā sa-rāgāya saṁvaṭṭanti||
no virāgāya;||

■

saṁyogāya saṁvaṭṭanti||
no visaṁyogāya;||

■

acayāya saṁvaṭṭanti||
no apacayāya;||

■

mah'icchatāya saṁvaṭṭanti||
no appicchatāya;||

■

a-santuṭṭhiyā saṁvaṭṭanti||
no santuṭṭhiyā;||

■

saṅgaṇ'ikāya saṁvaṭṭanti||
no pavivekāya;||

■

kosajjāya saṁvaṭṭanti||
no viriy'ārambhāya;||

■

dubharatāya saṁvaṭṭanti||
no subharatāya' ti.|| ||

Ekaṁsena Gotami, dhāreyyāsi:|| ||

'N'eso Dhammo||
n'eso Vinayo||
n'etaṁ Satthu sāsanan' ti.|| ||

 

§

 

3. Ye ca kho tvaṁ Gotamī,||
dhamme jāneyyāsi:|| ||

'Ime dhammā virāgāya saṁvaṭṭanti||
no sārāgāya;||

■

visaṁyogāya saṁvaṭṭanti||
no saṁyogāya;||

■

apacayāya saṁvaṭṭanti||
no ācayāya;||

■

appicchatāya saṁvaṭṭanti||
no mah'icchatāya;||

■

santuṭṭhiyā saṁvaṭṭanti||
no a-santuṭṭhiyā;||

■

pavivekāya saṁvaṭṭanti||
no [281] saṅgaṇ'ikāya;||

■

viriy'ārambhāya saṁvaṭṭanti||
no kosajjāya;||

■

subharatāya saṁvaṭṭanti||
no dubharatāyā' ti.|| ||

Ekaṁsena Gotamī, dhāreyyāsi:|| ||

'Eso Dhammo||
eso Vinayo||
etaṁ Satthu sāsanan'" ti.|| ||