Saṁyutta Nikāya
I. Sagātha Vagga
1. Devatā-Saṁyutta
IV. Satulla-Pakāyika Vagga

Adapted from the 1995 edition of the digital version of the
Sri Lanka Buddha Jayanti Tripitaka Series.

 

---

[16]

Sutta 31

Sabbhi Suttaṁ

[31.1][rhyc][bodh] Evam me sutaṁ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

2. Atha kho sambahulā satullapakāyikā devatāyo abhikkantāya rattiyā abhikkantavaṇnā kevala-kappaṁ Jetavanaṁ obhāsetvā yena Bhagavā ten'upasaṅkamiṁsu,||
upasaṅkamitvā Bhagavantaṁ abhivādetvā eka-m-antaṁ aṭṭhaṁsu.|| ||

[17] 3. Eka-m-antaṁ ṭhitā kho ekā devatā Bhagavato santike imaṁ gāthaṁ abhāsi:|| ||

"Sabbhi-r-eva samāsetha sabbhi kubbetha santhavaṁ,||
Sataṁ Sad'Dhammam aññāya seyyo hoti na pāpiyo" ti.|| ||

4. Atha kho aparā devatā Bhagavato santike imaṁ gāthaṁ abhāsi:|| ||

"Sabhi-r-eva samāsetha sabbhi kubbetha santhavaṁ,||
Sataṁ Sad'Dhammam aññāya paññā labbhati1 nāññato" ti.|| ||

5. Atha kho aparā devatā Bhagavato santike imaṁ gāthaṁ abhāsi:|| ||

"Sabbhi-r-eva samāsetha sabbhi kubbetha santhavaṁ,||
Sataṁ Sad'Dhammam aññāya sokamajjhe na socatī" ti.|| ||

6. Atha kho aparā devatā Bhagavato santike imaṁ gāthaṁ abhāsi:|| ||

"Sabbhi-r-eva samāsetha sabbhi kubbetha santhavaṁ,||
Sataṁ Sad'Dhammam aññāya ñātimajjhe virocatī" ti.|| ||

7. Atha kho aparā devatā Bhagavato santike imaṁ gāthaṁ abhāsi:|| ||

"Sabbhi-r-eva samāsetha sabbhi kubbetha santhavaṁ,||
Sataṁ Sad'Dhammam aññāya sattā gacchanti suggatin" ti.|| ||

8. Atha kho aparā devatā Bhagavato santike imaṁ gāthaṁ abhāsi:|| ||

"Sabhi-r-eva samāsetha sabhi kubbetha santhavaṁ,||
Sataṁ Sad'Dhammam aññāya sattā tiṭṭhanti sātatan" ti.|| ||

9. Atha kho aparā devatā Bhagavantaṁ etad avoca: kassa nu kho Bhagavā su-bhāsitanti.|| ||

"Sabbāsaṁ vo su-bhāsitaṁ pariyāyena.||
Api ca mamāṁ pi suṇātha:|| ||

[18] Sabhi-r-eva samāsetha sabhi kubbetha santhavaṁ,||
Sataṁ Sad'Dhammam aññāya sabba-dukkhā pamuccatī" ti.|| ||

Idam avoca Bhagavā.|| ||

Attamanā tā devatāyo Bhagavantaṁ abhivādetvā padakkhiṇaṁ katvā tatth'evantara-dhāyiṁsūti.|| ||

 

---

 

Sutta 32

Maccharī Suttaṁ

[32.1][rhyc][bodh] Evam me sutaṁ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

2. Atha kho sambahulā satullapakāyikā devatāyo abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkamiṁsu.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhaṁsu.|| ||

3. Eka-m-antaṁ ṭhitā kho ekā devatā Bhagavato santike imaṁ gāthaṁ abhāsi:|| ||

"Maccherā ca pamādā ca evaṁ dānaṁ na diyyati,||
Puññam ākaṅkha-mānena deyyaṁ hoti vijānatā" ti.|| ||

4. Atha kho aparā devatā Bhagavato santike imā gāthāyo abhāsi:|| ||

"Yass'eva bhīto na dadāti maccharī tadevādadato bhayaṁ,||
Jighacchā ca pipāsā ca yassa bhāyati maccharī,||
Tam eva bālaṁ phusati asmiṁ loke paramhi ca.|| ||

Tasmā vineyya maccheraṁ dajjā dāna malābhibhu,||
Puññāni paralokasmiṁ patiṭṭhā honti pāṇinan" ti.|| ||

5. Atha kho aparā devatā Bhagavato santike imā gāthāyo abhāsi:|| ||

"Te matesu na mīyanti addhānaṁ va sahabbajaṁ,||
Appasmiṁ ye pavecchanti esa dhammo sanantano.|| ||

Appasmeke pavecchanti bahuneke nadicchare,||
Appasmā dakkhiṇā dinnā sahassena samaṁ mitā" ti.|| ||

[19] 6. Atha kho aparā devatā Bhagavato santike imā gāthāyo abhāsi:|| ||

"Duddadaṁ dadamānānaṁ dukkaraṁ kamma kubbataṁ,||
Asanto nānukubbanti sataṁ dhammo durannayo.|| ||

Tasmā satañ ca asatañ ca nānā hoti ito gati,||
Asanto Nirayaṁ yanti santo saggaparāyaṇā" ti|| ||

7. Atha kho aparā devatā Bhagavantaṁ etad avoca:|| ||

"Kassa nu kho Bhagavā su-bhāsitan" ti?|| ||

"Sabbāsaṁ vo su-bhāsitaṁ pariyāyena.|| ||

Api ca mamāṁ pi suṇātha:|| ||

Dhammaṁ care yopi samuñchakaṁ caraṁ dārañca posaṁ dadamappakasmiṁ,||
Sataṁ sahassānaṁ sahassayāginaṁ kalampi nāgghanti tathāvidhassa te" ti.|| ||

8. Atha kho aparā devatā Bhagavantaṁ gāthāya ajjhabhāsi:|| ||

"Ken'esaṁ yañño vipulo mahaggato Samena dinnassa na agghameti,||
Kathaṁ sataṁ sahassānaṁ sahassayāginaṁ||
Kalam pi nāgghanti tathāvidhassa te" ti.|| ||

9. Atha kho Bhagavā taṁ devataṁ gāthāya ajjhabhāsi:|| ||

"Dadanti heke visame niviṭṭhā||
Chetvā vadhitvā atha socayitvā,||
Sā dakkhiṇā assumukhā sadaṇḍā||
Samena dinnassa na aggham eti.||
Evaṁ sataṁ sahassānaṁ sahassayāginaṁ||
Kalam pi nāgghanti tathāvidhassa te" ti.|| ||

 

---

[20]

Sutta 33

Sādhu Suttaṁ

[33.1][rhyc][bodh] Evam me sutaṁ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

2. Atha kho sambahulā satullapakāyikā devatāyo abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkamiṁsu.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhaṁsu.|| ||

3. Eka-m-antaṁ ṭhitā kho ekā devatā Bhagavato santike imaṁ udānaṁ udānesi:|| ||

"Sādhu kho mārisa dānaṁ.||
Maccherā ca pamādā ca evaṁ dānaṁ na diyyati.||
Puññam ākaṅkha-mānena deyyaṁ hoti vijānatā" ti.|| ||

4. Atha kho aparā devatā Bhagavato santike imaṁ udānaṁ udānesi:|| ||

"Sādhu kho mārisa dānaṁ.||
Api ca appasmimpi sādhu dānaṁ.||
Appasmeke pavecchanti bahuneke na dicchare,||
Appasmā dakkhiṇā dinnā sahassena samaṁ mitā" ti.|| ||

5. Atha kho aparā devatā Bhagavato santike imaṁ udānaṁ udānesi:|| ||

"Sādhu kho mārisa dānaṁ.||
Appasmim pi sādhu dānaṁ.||
Api ca saddhāya pi sādhu dānaṁ||
Dānañ ca yuddhañ ca samānamāhu appā pi santā bahuke jinanti,||
Appam pi ce saddahāno dadāti ten'eva so hoti sukhī paratthā" ti.|| ||

6. Atha kho aparā devatā Bhagavato santike imaṁ udānaṁ udānesi:|| ||

"Sādhu kho mārisa dānaṁ.||
Appasmim pi sādhu dānaṁ.||
[21] Saddhāya pi sādhu dānaṁ.||
Api ca dhamma-laddhassa pi sādhu1 dānaṁ.||
Yo dhamma-laddhassa dadāti dānaṁ||
uṭṭhāna-viriyā-dhiga-tassa jantu,||
Atikkamma so Vetaraṇiṁ Yamassa||
dibbāni ṭhānāni upeti macco" ti.|| ||

7. Atha kho aparā devatā Bhagavato santike imaṁ udānaṁ udānesi:|| ||

"Sādhu kho mārisa dānaṁ.||
Appasmim pi sādhu dānaṁ.||
Saddhāya pi sādhu dānaṁ.||
Dhamma-laddhassa pi sādhu dānaṁ.||
Api ca viceyya dānam pi sādhu.||
Viceyya dānaṁ Sugatappasatthaṁ||
Ye dakkhiṇeyyā idha jīvaloke,||
Etesu dinnāni maha-p-phalāni||
Bījāni vuttāni yathā sukhette" ti.|| ||

8. Atha kho aparā devatā Bhagavato santike imaṁ udānaṁ udānesi:|| ||

"Sādhu kho mārisa dānaṁ.||
Appasmim pi sādhu dānaṁ.||
Saddhāya pi sādhu dānaṁ.||
Dhamma-laddhassa pi sādhu dānaṁ.||
Viceyya dānam pi sādhu.||
Api ca pāṇesu pi sādhu saṁyamo.||
Yo pāṇabhūtesu aheṭhayaṁ caraṁ||
parūpavādā na karoti pāpaṁ,||
Bhīruṁ pasaṁ-santi na hi tattha sūraṁ||
bhayā hi santo na karonti pāpan" ti.|| ||

9. Atha kho aparā devatā Bhagavantaṁ etad avoca:|| ||

[22] "Kassa nu kho Bhagavā su-bhāsitan" ti?|| ||

"Sabbāsaṁ vo su-bhāsitaṁ pariyāyena.|| ||

Api ca mamaṁ pi suṇātha:|| ||

Saddhāhi dānaṁ bahudhā pasatthaṁ||
Dānā ca kho dhamma-padaṁva seyyo.||
Pubbe ca hi pubbatare va santo||
Nibbāṇamevajjhagamuṁ sapaññā" ti.|| ||

 

---

 

Sutta 34

Nasanti Suttaṁ

[34.1][rhyc][bodh] Evam me sutaṁ.

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho sambahulā satullapakāyikā devatāyo abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkamiṁsu.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhaṁsu.|| ||

Eka-m-antaṁ ṭhitā kho ekā devatā Bhagavato santike imā gāthāyo abhāsi:|| ||

"Na santi kāmā manujesu niccā santīdha kamanīyāni yesu baddho,||
Yesu pamatto apunāgamanaṁ||
anāgantā puriso maccudheyyā" ti.|| ||

"Chandajaṁ aghaṁ chandajaṁ dukkhaṁ||
chanda-vinayā agha-vinayo, agha-vinayā dukkha vinayo" ti.|| ||

"Na te kāmā yāni citrāni loke||
saṅkappa-rāgo purisassa kāmo,||
Tiṭṭhanti citrāni tath'eva loke||
ath'ettha dhīrā vinayanti chandaṁ.|| ||

[23] Kodhaṁ jahe vippajaheyya mānaṁ||
saṁyojanaṁ sabbam ati-k-kameyya,||
Taṁ nāma-rūpasmim asajja-mānaṁ||
akiñ canaṁ nānupatanti dukkhā.|| ||

Pahāsi saṅkhaṁ na ca vimānam ajjhagā||
acchecchi taṇhaṁ idha nāma-rūpe,||
Taṁ chinna-ganthaṁ anīghaṁ nirāsaṁ||
pariyesamānā na ca ajjhagamuṁ||
Devā manussā idha vā huraṁ vā||
saggesu vā sabba-nivesanesū ti.|| ||

Taṁ ce hi nāddakkhuṁ tathā vimuttaṁ||
  (icc āyasmā Mogharājā:)||
Devā manussā idha vā huraṁ vā.||
Naruttamaṁ atthavaraṁ narānaṁ||
ye taṁ namassanti pasaṁsiyā te" ti?|| ||

Pasaṁsiyā te pi bhavanti bhikkhū||
  (Mogharājā ti Bhagavā:)|| ||

"Ye taṁ namassanti tathā vimuttaṁ,||
Aññāya dhammaṁ vici-kicchaṁ pahāya||
saṅgātigā te pi bhavanti bhikkhū" ti.|| ||

 

---

 

Sutta 35

Ujjhāna-saññi Suttaṁ

[35.1][rhyc][bodh] Evam me sutaṁ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

2.Atha kho sambahulā Ujjhāna-saññikā devatāyo abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkamiṁsu.|| ||

Upasaṅkamitvā vehāsaṁ aṭṭhaṁsu.|| ||

[24] 3. Vehāsaṁ ṭhitā kho ekā devatā Bhagavato santike imaṁ gāthaṁ abhāsi:|| ||

"Aññathā santamattāṇaṁ aññathā yo pavedaye,||
Nikacca kitavass'eva bhūttaṁ theyyena tassa taṁ.||
Yaṁ hi kayirā taṁ hi vade yaṁ na kayirā na taṁ vade,||
Akarontaṁ bhāsa-mānānaṁ paṭijānanti paṇḍitā" ti.|| ||

"Na-y-idaṁ bhāsita-mattena ekanta-savaṇena vā,||
Anukkamitave sakkā yā'yaṁ paṭipadā daḷhā,||
Yāya dhīrā pamuccanti jhāyino Māra bandhanā.|| ||

Na ve dhīrā pakubbanti viditvā loka-pariyāyaṁ,||
Aññāya nibbutā dhīrā tiṇṇā loke visattikan" ti.|| ||

4. Atha kho tā devatāyo paṭhaviyaṁ patiṭṭhahitvā Bhagavato pādesu sirasā nipatitvā Bhagavantaṁ etad avocuṁ.|| ||

"Accayo no bhante accagamā.|| ||

Yathā-bāla||
yathā mūḷhaṁ||
yathā akusala||
yā mayaṁ||
Bhagavantaṁ āsādetabbaṁ amaññimhā.|| ||

Tāsaṁ no bhante Bhagavā accayaṁ accayato patigaṇhātu āyatiṁ saṁvarāyā" ti.|| ||

5. Atha kho Bhagavā sitaṁ pātvākāsi.|| ||

6. Atha kho tā devatāyo bhiyyoso-mattāya ujjhāyantiyo vehāsaṁ abbhuggañchuṁ.|| ||

7. Ekā devatā Bhagavato santike imaṁ gāthaṁ abhāsi:|| ||

"Accayaṁ desayantīnaṁ yo ve na paṭigaṇhati,||
Kopantaro dosagaru sa veraṁ paṭimuccati" ti.|| ||

"Accayo ce na vijjetha no cidhāpagataṁ siyā,||
Verāni ca sammeyyuṁ tenīdha kusalo siyā.|| ||

Kass'accayā na vijjanti kassa n'atthi apāgataṁ||
Ko sammoham āpādi ko ca dhīro sadā sato" ti.|| ||

[25] "Tathāgatassa Buddhassa sabba-bhūtānukampino,||
Tass'accayā na vijjanti tassa n'atthi apāgataṁ,||
So na sammoham āpādi so ca dhīro sadā sato" ti.|| ||

"Accayaṁ desayantīnaṁ yo ce na paṭigaṇhati,||
Kopantaro dosagaru yaṁ veraṁ paṭimuccati,||
Taṁ veraṁ nābhinandāmi patigaṇhāmi vo'ccayan" ti.|| ||

 

---

 

Sutta 36

Saddhā Suttaṁ

[36.1][rhyc][bodh][than] Evam me sutaṁ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

2. Atha kho sambahulā Satulla-pakāyikā devatāyo abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkamiṁsu.|| ||

Upasaṅkamitvā Bhagavantam abhivādetvā abhivādetvā aṭṭhaṁsu.|| ||

3. Eka-m-antaṁ ṭhitā kho ekā devatā Bhagavato santike imaṁ gāthaṁ abhāsi:|| ||

"Saddhā dutiyā purisassa hoti||
no ce assaddhiyaṁ avatiṭṭhati||
Yaso ca kittī ca tatv assa hoti||
Saggañ ca so gacchati sarīraṁ pahāyā" ti.|| ||

"Kodhaṁ jahe vippajaheyya mānaṁ||
saṁyojanaṁ sabba-mati-k-kameyya,||
Taṁ nāma-rūpasmim asajja-mānaṁ||
akiñ canaṁ nānupatanti saṅgā" ti.|| ||

"Pamādam anuyuñjanti bālā dummedhino janā||
Appamādañ ca medhāvī dhanaṁ seṭṭhaṁ va rakkhati.||
Mā pamādam anuyuñjetha mā kāma-rati-santhavaṁ||
Appamatto hi jhāyanto pappoti paramaṁ sukhan" ti.|| ||

 

---

[26]

Sutta 37

Samaya Suttaṁ

[37.1][rhyc][bodh] Evaṁ me sutaṁ.|| ||

Ekaṁ samayaṁ Bhagavā Sakkesu viharati Kapilavatthusmiṁ Mahāvane mahatā bhikkhu-saṅghena saddhiṁ pañca-mattehi bhikkhu-satehi sabbeh'eva Arahantehi.|| ||

Dasahi ca lokadhātūhi devatā yebhuyyena sanni-patitā honti Bhagavantaṁ dassanāya bhikkhu-saṅghañ ca.|| ||

2. Atha kho catunnaṁ Suddhāvāsa-kāyikānaṁ devānaṁ etad ahosi.|| ||

Ayaṁ kho Bhagavā Sakkesu viharati Kapilavatthusmiṁ Mahāvane mahatā bhikkhu-saṅghena saddhiṁ pañca-mattehi bhikkhu-satehi sabbeh'eva Arahantehi.|| ||

Dasahi ca loka dhātūhi devatāyo yebhuyyena sanni-patitā honti Bhagavantaṁ dassanāya bhikkhu-saṅghañ ca.|| ||

Yaṁ nūna mayam pi yena Bhagavā ten'upasaṅkameyyāma.|| ||

Upasaṅkamitvā Bhagavato santike pacceka-gāthaṁ bhāseyyāmā ti.|| ||

3. Atha kho tā devatā seyyathā pi nāma balavā puriso sammiñjitaṁ vā bāhaṁ pasāreyya,||
pasāritaṁ vā bāhaṁ sammiñjeyya,||
evam evaṁ Suddhāvāsesu devesu antara-hitā Bhagavato purato pātu-r-ahesuṁ.|| ||

4. Atha kho tā devatā Bhagavantaṁ abhivādetvā eka-m-antaṁ aṭṭhaṁsu.|| ||

Eka-m-antaṁ ṭhitā kho ekā devatā Bhagavato santike imaṁ gāthaṁ abhāsi:|| ||

"Mahā-samayo pavanasmiṁ deva-kāyā samāgatā,||
Āgat'amha imaṁ dhamma-samayaṁ||
dakkhitāye aparājita-Saṅghan" ti.|| ||

5. Atha kho aparā devatā Bhagavato santike imaṁ gāthaṁ abhāsi:|| ||

"Tatra bhikkhavo samādahaṁsu||
cittaṁ attano ujukam akaṁsu,||
Sārathī va nettāni gahetvā||
indriyāni rakkhanti paṇḍitā" ti.|| ||

[27] 6. Atha kho aparā devatā Bhagavato santike imaṁ gāthaṁ abhāsi:|| ||

"Chetvā khilaṁ chetvā palighaṁ||
Inda-khīlaṁ ohacca-m-anejā,||
Te caranti suddhā vimalā||
cakkhu-matā sudantā susunāgā" ti.|| ||

7. Atha kho aparā devatā Bhagavato santike imaṁ gāthaṁ abhāsi:|| ||

"Ye keci Buddhaṁ saraṇaṁ gatāse||
na te gamissanti apāya-bhūmiṁ,||
Pahāya mānusaṁ dehaṁ||
deva-kāyaṁ paripūressantī" ti.|| ||

 

---

 

Sutta 38

Sakalika Suttaṁ

[38.1][rhyc][than][bodh] Evam me sutaṁ.|| ||

Ekaṁ samayaṁ Bhagavā Rājagahe viharati Maddakucchismiṁ Migadāye.|| ||

2. Tena kho pana samayena Bhagavato pādo sakalikāya khato hoti.|| ||

Bhusā sudaṁ Bhagavato vedanā vattanti sārīrikā vedanā dukkhā tibbā kharā kaṭukā asātā amanāpā.|| ||

Tā sudaṁ Bhagavā sato sampajāno adhivāseti avihañña-māno.|| ||

3. Atha kho Bhagavā catugguṇaṁ saṅghāṭiṁ paññā-petvā dakkhiṇena passena sīha-seyyaṁ kappesi pāde pādaṁ accādhāya sato sampajāno.|| ||

4. Atha kho satta-satā Satullapakāyikā devatāyo abhikkantāya rattiyā abhikkanta-vaṇṇā kevala-kappaṁ Maddakucchiṁ obhāsetvā yena Bhagavā ten'upasaṅkamiṁsu.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhaṁsu.|| ||

5. Eka-m-antaṁ ṭhitā kho ekā devatā Bhagavato santike imaṁ udānaṁ udānesi:|| ||

[28] "Nāgo vata bho Samaṇo Gotamo.|| ||

Nāga vatā ca samuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihañña-māno" ti.|| ||

6. Atha kho aparā devatā Bhagavato santike imaṁ udānaṁ udānesi:|| ||

"Sīho vata bho Samaṇo Gotamo.|| ||

Sīha-vatā ca samuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihañña-māno" ti.|| ||

7. Atha kho aparā devatā Bhagavato santike imaṁ udānaṁ udānesi:|| ||

"Ājānīyo vata bho Samaṇo Gotamo.|| ||

Ājānīya-vatā ca samuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihañña-māno" ti.|| ||

8. Atha kho aparā devatā Bhagavato santike imaṁ udānaṁ udānesi:|| ||

"Nisabho vata bho Samaṇo Gotamo.|| ||

Nisabha-vatā ca samuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihañña-māno" ti.|| ||

9. Atha kho aparā devatā Bhagavato santike imaṁ udānaṁ udānesi:|| ||

"Dhorayho vata bho Samaṇo Gotamo.|| ||

Dhorayha-vatā ca samuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihañña-māno" ti.|| ||

10. Atha kho aparā devatā Bhagavato santike imaṁ udānaṁ udānesi:|| ||

"Danto vata bho Samaṇo Gotamo.|| ||

Danta-vatā ca samuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihañña-māno" ti.|| ||

11. Atha kho aparā devatā Bhagavato santike imaṁ udānaṁ udānesi:|| ||

"Passa samādhi-subhāvitaṁ cittañ ca vimuttaṁ na cābhinataṁ na vāpanataṁ na ca sa-saṅkhāraniggayha cārita-vataṁ.|| ||

Yo eva-rūpaṁ purisa-nāgaṁ purisa-sīhaṁ purisājānīyaṁ [29] purisani-sabhaṁ purisa-dhorayhaṁ purisa-dantaṁ ati-k-kamitabbaṁ maññeyya,||
kim aññatra adassanā" ti.|| ||

"Pañca vedā sataṁ samaṁ||
Tapassī brāhmaṇā caraṁ,||
Cittañ ca n'esaṁ na sammā vimuttaṁ||
Hīnatta-rūpā na pāraṅgamā te.||
Taṇhādhi-pannā vata sīla-baddhā||
Lūkhaṁ tapaṁ vassa-sataṁ carantā,||
Cittañ ca n'esaṁ na sammā vimuttaṁ||
Hīnatta-rūpā na pāraṅgamā te.||
Na mānakāmassa damo idh'atthi||
Na monam atthi asamāhitassa,||
Eko araññe viharaṁ pamatto||
Na maccudheyyassa tareyya pāraṁ.||
Mānaṁ pahāya susamāhitatto||
Sucetaso sabbadhi vippamutto,||
Eko araññe viharaṁ appamatto||
Sa maccudheyyassa tareyya pāran" ti.|| ||

 

---

 

Sutta 39

Pajjunna Dhītu Suttaṁ

[39.1][rhyc][bodh] Evam me sutaṁ.|| ||

Ekaṁ samayaṁ Bhagavā Vesāliyaṁ viharati Mahāvane Kūṭāgāra-sālāyaṁ.|| ||

2. Atha kho Kokanadā Pajjunnassa dhītā abhikkantāya rattiyā abhikkanta-vaṇṇā kevala-kappaṁ Mahāvanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhāsi.|| ||

3. Eka-m-antaṁ ṭhitā kho sa devatā Kokanadā Pajjunnassa dhītā Bhagavato santike imā gāthāyo abhāsi.|| ||

"Vesāliyaṁ vane viharantaṁ||
Aggaṁ sattassa sambuddhaṁ,||
[30] Kokanadā'ham'asmiṁ abhivande||
Kokanadā Pajjunnassa dhītā.|| ||

Sutam eva me pure āsi||
Dhammo cakkhu-matānubuddho,||
Sā'haṁ dāni sakkhī jānāmi||
Munino desayato Sugatassa.|| ||

Ye hi keci ariya-Dhammaṁ||
VigArahantā caranti dummedhā,||
Upenti Roruvaṁ ghoraṁ||
Cirarattaṁ dukkham anubhavanti|| ||

Ye ca kho ariya-Dhamme||
Khantiyā upasamena upetā,||
Pahāya mānusaṁ dehaṁ||
Devakāyaṁ paripūressantī" ti.|| ||

 

---

 

Sutta 40

Culla Pajjunna Dhītu Suttaṁ

[40.1][rhyc][bodh] Evam me sutaṁ.|| ||

Ekaṁ samayaṁ Bhagavā Vesāliyaṁ viharati Mahāvane Kūṭāgāra-sālāyaṁ.|| ||

2. Atha kho Culla Kokanadā Pajjunnassa dhītā abhikkantāya rattiyā abhikkanta-vaṇṇā kevala-kappaṁ Mahāvanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhāsi.|| ||

Eka-m-antaṁ ṭhitā kho Culla Kokanadā Pajjunnassa dhītā Bhagavato santike imā gāthāyo abhāsi:|| ||

"Idh'āgamā vijjupabhāsavaṇṇā||
Kokanadā Pajjunnassa dhītā,||
Buddhañca Dhammañ ca namassamānā||
Gāthā cimā atthavatī abhāsi.|| ||

[31] Bahunā pi kho naṁ vibhajeyyaṁ||
Pariyāyena tādiso dhammo,||
Saṅkhittamattaṁ lapayissāmi||
Yāvatā me manasā pariyattaṁ.|| ||

Pāpaṁ na kayirā vacasā manasā||
Kāyena vā kiñ cana sabba-loke,||
Kāme pahāya satimā sampajāno||
Dukkhaṁ na sevetha anattha-saṁhitan" ti.|| ||

Satullapakāyika Vagga Catuttha