Saṁyutta Nikāya
I. Sagātha Vagga
1. Devatā-Saṁyutta
V. Āditta Vagga

Adapted from the 1995 edition of the digital version of the
Sri Lanka Buddha Jayanti Tripitaka Series

 

---

[31]

Sutta 41

Aditta Suttaṁ

[41.1][rhyc][than][bodh] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkami.||
Upasaṅkamitvā Bhagavantaṁ abhivādetvā eka-m-antaṁ aṭṭhāsi.|| ||

Eka-m-antaṁ ṭhitā kho sā devatā Bhagavato santike imā gāthāyo abhāsi:|| ||

"Ādittasmiṁ agārasmiṁ||
yaṁ nīharati bhājanaṁ,||
Taṁ tassa hoti atthāya||
no ca yaṁ tattha ḍayhati" ti.|| ||

"Evam ādipito loko||
jarāya maraṇena ca,||
Nīharetheva dānena||
[32] dinnaṁ hoti sunīhataṁ.|| ||

Dinnaṁ sukhaphalaṁ hoti||
nādinnaṁ hoti taṁ tathā,||
Corā haranti rājāno||
aggi ḍahati nassati.|| ||

Atha antena jahati||
sarīraṁ sapariggahaṁ,||
Etad aññāya medhāvī||
bhuñjetha ca dadetha ca. Datvā ca bhutvā ca yathānubhāvaṁ||
anindito saggamupeti ṭhānan" ti.|| ||

 

---

 

Sutta 42

Kiṁdada Suttaṁ

[42.1][rhyc][than][bodh] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

(Devatā:)|| ||

"Kiṁdado balado hoti||
kiṁdado hoti vaṇṇado.||
Kiṁdado sukhado hoti||
kiṁdado hoti cakkhudo.||
Yo ca sabbadado hoti||
taṁ me akkhāhi pucchito" ti.|| ||

(Bhagavā:)|| ||

"Annado balado hoti||
vatthado hoti vaṇṇado,||
Yānado sukhado hoti||
dīpado hoti cakkhudo||
So ca sabbadado hoti||
yo dadāti upassayaṁ,||
Amataṁdado ca so hoti||
yo dhammamanusāsatī" ti.|| ||

 

---

 

Sutta 43

Anna Suttaṁ

[43.1][rhyc][bodh] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

(Devatā:)|| ||

"Annam evābhinandanti||
ubhaye devamānusā,||
Atha ko nāma so yakkho||
yaṁ annaṁ nābhinandatī" ti.|| ||

(Bhagavā:)|| ||

"Ye naṁ dadanti saddhāya||
vi-p-pasannena cetasā,||
Tam eva annaṁ bhajati||
asmiṁ loke parambhi ca,||
Tasmā vineyya maccheraṁ||
dajjā dānaṁ malābhibhū,||
Puññāni paralokasmiṁ||
patiṭṭhā honti pāṇinan" ti.|| ||

 

---

 

Sutta 44

Ekamūla Suttaṁ

[44.1][rhyc][bodh] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

(Devatā:)|| ||

"Ekamūlaṁ dvirāvaṭṭaṁ||
timalaṁ pañcapattharaṁ,||
Samuddaṁ dvādasāvaṭṭaṁ||
pātālaṁ atarī isī" ti.|| ||

 

---

[33]

Sutta 45

Anoma Suttaṁ

[45.1][rhyc][bodh] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

(Devatā:)|| ||

"Anomanāmaṁ nipuṇatthadassiṁ||
paññādadaṁ kāmālaye asattaṁ||
Taṁ passatha sabba-viduṁ su medhaṁ||
ariye pathe kamamānaṁ mahesin" ti.|| ||

 

---

 

Sutta 46

Accharā Suttaṁ

[46.1][rhyc][bodh] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

(Devatā:)|| ||

"Accharāgaṇasaṅghuṭṭaṁ||
pisācagaṇasevitaṁ||
Vanan taṁ mohanaṁ nāma||
kathaṁ yātrā bhavissatī" ti.|| ||

(Bhagavā:)|| ||

"Ujuko nāma so Maggo||
abhayā nāma sā disā,||
Ratho akūjano nāma||
Dhamma-cakkehi saṁyuto.|| ||

Hiri tassa apālambo||
satassa parivāraṇaṁ,||
Dhammāhaṁ sārathiṁ brūmi||
sammā-diṭṭhi-pure javaṁ|| ||

Yassa etādisaṁ yānaṁ||
itthiyā purisassa vā,||
Sa ve etena yānena||
nibbāṇasseva santike" ti.|| ||

 

---

 

Sutta 47

Vanaropa Suttaṁ

[47.1][rhyc][bodh] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

(Devatā:)|| ||

"Kesaṁ divā ca ratto ca||
sadā puññaṁ pavaḍḍhati||
Dhammaṭṭhā sīla-sampannā||
ke janā saggagāmino" ti.|| ||

(Bhagavā:)

"Ārāmaropā vanaropā||
ye janā setukārakā,||
Papañca udapānañca||
ye dadanti upassayaṁ.||
Tesaṁ divā ca ratto ca||
sadā puññaṁ pavaḍḍhati,||
Dhammaṭṭhā sīla-sampannā||
te janā saggagāmino" ti.|| ||

 

---

 

Sutta 48

Jetavana Suttaṁ

[48.1][rhyc][bodh] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

"Idañ hi taṁ Jetavanaṁ||
isiSaṅghanisevitaṁ||
Āvutthaṁ dhammarājena||
pītisañjananaṁ mama."|| ||

(Bhagavā:)|| ||

[34] "Kammaṁ vijjā ca dhammo ca||
sīlaṁ jīvitamuttamaṁ,||
Etena maccā sujjhanti||
na gottena dhanena vā.||
Tasmā hi paṇḍito poso||
sampassaṁ atthamattano,||
Yoniso vicine dhammaṁ||
evaṁ tattha visujjhati.||
Sāriputto va paññāya||
sīlenupasamena ca,||
Yo pi pāragato bhikkhu||
etāva paramo siyā" ti.|| ||

 

---

 

Sutta 49

Macchari Suttaṁ

[49.1][rhyc][bodh] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

(Devatā:)|| ||

"Ye'dha maccharino loke||
kadariyā paribhāsakā,||
Aññesaṁ dadamānānaṁ||
antarāya-karā narā.||
Kīdiso tesaṁ vipāko||
samparāyo ca kīdiso,||
Bhagavantaṁ puṭṭhum āgamma||
kathaṁ jānemu taṁ mayan" ti.|| ||

(Bhagavā)|| ||

"Ye'dha maccharino loke||
kadariyā paribhāsakā,||
Aññesaṁ dadamānānaṁ||
antarāya-karā narā.||
Nirayaṁ tiracchāna-yoniṁ||
yamalokañ upapajjare,||
Sace enti manussattaṁ||
dalidde jāyare kule,||
Co'aṁ piṇḍo ratī khiḍḍā||
yattha kicchena labbhati.||
Parato āsiṁsare bālā||
tam pi tesaṁ nalabbhati,||
Diṭṭh'eva-dhamme sa vipāko||
samparāye ca duggatī" ti.|| ||

(Devatā:)|| ||

"Iti h'etaṁ vijānāma||
aññaṁ pucchāma Gotama,||
Ye'dha laddhā manussattaṁ||
vadaññū vītamaccharā,||
Buddhe pasannā dhamme ca||
saṅghe ca tibba-gāravā.||
Kīdiso tesaṁ vipāko||
samparāyo ca kīdiso,||
Bhagavantaṁ puṭṭhum āgamma||
kataṁ jānemu taṁ mayan" ti.|| ||

(Bhagavā:)|| ||

"Ye'dha laddhā manussattaṁ||
vadaññū vītamaccharā,||
Buddhe pasannā dhamme ca||
saṅghe ca tibba-gāravā,||
Ete sagge pakāsenti||
yattha te upapajjare.|| ||

[35] Sace enti manussattaṁ||
aḍḍhe ājāyare kule,||
Co'aṁ piṇḍo ratī khiḍḍā||
yatthākicchena labbhati.||
Parasambhatesu bhogesu||
vasavattīva modare,||
Diṭṭh'eva-dhamme savipāko||
samparāye va suggatī" ti.|| ||

 

---

 

Sutta 50

Ghaṭīkāra Suttaṁ

[50.1][rhyc][bodh] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

(Ghaṭīkāra devatā:)|| ||

"Avihaṁ upapannāse||
vimuttā satta bhikkhavo,||
Rāgadosa-parikkhīṇā||
tiṇṇā loke visattikan" ti.|| ||

"Ke ca te ataruṁ Saṅghaṁ||
maccudheyyaṁ suduttaraṁ,||
Ke hitvā mānusaṁ dehaṁ||
dibbaṁ yogaṁ upaccaguṁ" ti.|| ||

"Upako palagaṇaḍo ca||
pukkusāti ca te tayo,||
Bhaddiyo bhaddadevo ca||
bāhudanti ca Piṅgiyo.||
Te hitvā mānusaṁ dehaṁ||
dibbaṁ yogaṁ upaccagun" ti.|| ||

(Bhagavā:)|| ||

"Kusalī bhāsasi tesaṁ||
mārapāsappahāyinaṁ,||
Kassa te dhammam aññāya||
acchiduṁ bhavabandhanaṁ" ti.|| ||

(Ghaṭīkāra:)|| ||

"Na aññatra Bhagavatā||
nāññatra tava sāsanā,||
Yassa te dhammam aññāya||
acchiduṁ bhavabandhanaṁ.|| ||

Yattha nāmañ ca rūpañ ca||
asesaṁ uparujjhati,||
Taṁ te dhammaṁ idha ñāya||
acchiduṁ bhavabandhanan" ti.|| ||

(Bhagavā:)|| ||

"Gambhīraṁ bhāsasi vācaṁ||
dubbijānaṁ sudubbudhaṁ,||
Kassa tvaṁ dhammam aññāya||
vācaṁ bhāsasi īdisan" ti.|| ||

(Ghaṭīkāra:)|| ||

"Kumbhakāro pure āsiṁ||
vehaliṅge1 ghaṭīkaro,||
Mātāpettibharo āsiṁ||
Kassapassa upāsako.|| ||

[36] Virato methunā dhammā||
brahma-cārī nirāmiso,||
Ahuvā te sagāmeyyo||
ahuvā te pure sakhā.||
So'haṁ ete pajānāmi||
vimutte satta bhikkhavo,||
Rāgadosa-parikkhīṇe||
tiṇṇe loke visattikan" ti.|| ||

(Bhagavā:)|| ||

"Evam etaṁ tadā āsi||
yathā bhāsasi bhaggava,||
Kumbhakāro pure āsi||
vehaliṅge ghaṭīkaro,||
Mātāpettibharo āsi||
Kassapassa upāsako.||
Virato methunā dhammā||
brahma-cārī nirāmiso,||
Ahuvā me sagāmeyyo||
ahuvā me pure sakhā" ti.|| ||

(Therā:)|| ||

"Evam etaṁ purāṇānaṁ||
sahāyānaṁ ahu saṅgamo,||
Ubhinnaṁ bhāvit'attāṇaṁ||
sarīrantimadhārinan" ti.|| ||

Āditta Vagga Pañcama