Saṃyutta Nikāya
I. Sagātha Vagga
1. Devatā-Saṃyutta
VII. Addha Vagga
Adapted from the 1995 edition of the digital version of the
Sri Lanka Buddha Jayanti Tripitaka Series.
Sutta 61
Nāma(anvabhavi) Suttaṃ
[61.1][rhyc][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
(Devatā:)|| ||
[39] "Kiṃ su sabbaṃ anvabhavi kismā||
bhiyyo na vijjati,||
Kissassa ekadhammassa||
sabb'eva vasamanvagū" ti.|| ||
(Bhagavā:)|| ||
"Nāmaṃ sabbaṃ anvabhavi||
nāmā bhiyyo na vijjati,||
Nāmassa ekadhammassa||
sabb'eva vasamanvagū" ti.
Sutta 62
Citta Suttaṃ
[62.1][rhyc][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
(Devatā:)|| ||
"Kenassu nīyati loko||
kenassu parikassati,||
Kissassa ekadhammassa||
sabb'eva vasamanvagū" ti.|| ||
(Bhagavā:)|| ||
"Cittena nīyati loko||
cittena parikassati,||
Cittassa ekadhammassa||
sabb'eva vasamanvagū" ti.|| ||
Sutta 63
Taṇhā Suttaṃ
[63.1][rhyc][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
(Devatā:)|| ||
"Kenassu nīyati loko||
kenassu parikassati,||
Kissassa ekadhammassa||
sabb'eva vasamanvagū" ti,|| ||
(Bhagavā:)|| ||
"Taṇhāya nīyati loko||
taṇhāya parikassati,||
Taṇhāya ekadhammassa||
sabb'eva vasamanvagū" ti.|| ||
Sutta 64
Saṅyojana Suttaṃ
[64.1][rhyc][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
(Devatā:)|| ||
"Kiṃ su saṃyojano loko||
kiṃ su tassa vicāraṇaṃ,||
Kissassa vippahāṇena||
nibbāṇam iti vuccatī" ti.|| ||
(Bhagavā:)|| ||
"Nandī-saṃyojano loko||
vitakk'assa vicāraṇam||
taṇhāya vippahānam||
iti vuccantī" ti.|| ||
Sutta 65
Bandhana Suttaṃ
[65.1][rhyc][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
(Devatā:)|| ||
"Kiṃ su sambandhano loko||
kiṃ su tassa vicāraṇaṃ,||
Kissassa vippahāṇena||
sabbaṃ chindati bandhanan" ti.|| ||
(Bhagavā:)|| ||
[40] "Nandi sambandhano loko||
vitakkassa vicāraṇaṃ,||
Taṇhāya vippahāṇena||
sabbaṃ chindati bandhanan" ti.|| ||
Sutta 66
Abbhāhata Suttaṃ
[66.1][rhyc][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
(Devatā:)|| ||
"Kenassu uḍḍito loko||
kenassu parivārito,||
Kena sallena otiṇṇo||
kissa dhūmāyito sadā" ti.|| ||
(Bhagavā:)|| ||
"Maccunā'bbhāhato loko||
jarāya parivārito,||
Taṇhāsallena otiṇṇo||
icchādhūmāyito sadā" ti.|| ||
Sutta 67
Uḍḍita Suttaṃ
[67.1][rhyc][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
(Devatā:)|| ||
"Kenassu uḍḍito loko||
kenassu parivārito,||
Kenassu pihito loko||
kismiṃ loko pati-ṭ-ṭhito" ti.|| ||
(Bhagavā:)|| ||
"Taṇhāya uḍḍito loko||
jarāya parivārito,||
Maccunā pihito loko||
dukkhe loko pati-ṭ-ṭhito" ti.|| ||
Sutta 68
Pihita Suttaṃ
[68.1][rhyc][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
(Devatā:)|| ||
"Kenassu pihito loko||
kismiṃ loko pati-ṭ-ṭhito,||
Kenassu uḍḍito loko||
kenassu parivārito" ti.|| ||
(Bhagavā:)|| ||
"Maccunā pihito loko||
dukkhe loko pati-ṭ-ṭhito,||
Taṇhāya uḍḍito loko||
jarāya parivārito" ti.|| ||
Sutta 69
Icchā Suttaṃ
[69.1][rhyc][than][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
(Devatā:)|| ||
"Kenassu bajjhati loko||
kissa vinayāya muccati,||
Kissassa vippahāṇena||
sabbaṃ chindati bandhanan" ti.|| ||
(Bhagavā:)|| ||
"Icchāya bajjhati loko||
icchā-vinayāya muccati,||
Icchāya vippahāṇena||
sabbaṃ chindati bandhanan" ti.|| ||
Sutta 70
Loka Suttaṃ
[70.1][rhyc][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
(Devatā:)|| ||
[41] "Kismiṃ loko samuppanno||
kismiṃ kubbati santhavaṃ,||
Kissa loko upādāya||
kismiṃ loko vihaññatī" ti.|| ||
(Bhagavā:)|| ||
"Chasu loko samuppanno||
chasu kubbati santhavaṃ,||
Channameva upādāya||
chasu loko vihaññatī" ti.|| ||
Anva Vagga Sattama
