Saṁyutta Nikāya
I. Sagātha Vagga
2. Devaputta Saṁyutta
2. Anāthapiṇḍika Vagga

 

---

[51]

Sutta 11

Candimasa Suttaṁ

[11.1][rhyc] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho Candimaso deva-putto abhikkantāya rattiyā abhikkanta-vaṇṇo kevala-kappaṁ Jetavanaṁ obhāsetvā yena [52] Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhāsi.|| ||

Eka-m-antaṁ ṭhito kho Candimaso deva-putto Bhagavato santike imaṁ gāthaṁ abhāsi:|| ||

"Te hi sotthiṁ gamissanti kacche vāmakase magā,||
Jhānāni upasampajja ekodīnipakā satā" ti.|| ||

(Bhagavā:)|| ||

"Te hi pāraṁ gamissanti chetvā jālaṁ va ambujo,||
Jhānāni upasampajja appamattā raṇañjahā" ti.|| ||

 

§

 

Sutta 12

Vendu Suttaṁ

[12.1][rhyc] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Eka-m-antaṁ ṭhito kho veṇhu1 deva-putto Bhagavato santike imaṁ gāthaṁ abhāsi:|| ||

"Sukhitā vata te manujā Sugataṁ payirupāsiya,||
Yuñjaṁ Gotama sāsane appamattānusikkhare" ti.|| ||

"Ye me pavutte satthipade (veṇhoti Bhagavā) anusikkhanti jhāyino,||
Kāle te appamajjantā na maccuvasagā siyun" ti.|| ||

 

§

 

Sutta 13

Dīghalaṭṭhi Suttaṁ

[13.1][rhyc] Evaṁ me sutaṁ.|| ||

Ekaṁ samayaṁ Bhagavā Rājagahe viharati Veḷuvane Kalandakanivāpe.|| ||

Atha kho Dīghalaṭṭhi deva-putto abhikkantāya rattiyā abhikkanta-vaṇṇo kevala-kappaṁ Veḷuvanaṁ obhāsetvā yena Bhagavā ten'upasaṅkami. Upasaṅkamitvā Bhagavantaṁ abhivādetvā eka-m-antaṁ aṭṭhāsi. Eka-m-antaṁ ṭhito kho Dīghalaṭṭhi deva-putto Bhagavato santike imaṁ gāthām abhāsi:|| ||

"Bhikkhu siyā jhāyī vimutta-citto||
Ākaṅkhe ce hadayassānupattiṁ,||
Lokassa ñatvā udayabbayañ ca||
Sucetaso asito tadānisaṁso" ti.|| ||

 

§

 

Sutta 14

Nandana Suttaṁ

[14.1][rhyc] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Eka-m-antaṁ ṭhito kho Nandano deva-putto Bhagavantaṁ gāthāya ajjhabhāsi:|| ||

"Pucchāmi taṁ Gotama bhūripaññaṁ||
Anāvaṭaṁ Bhagavato ñāṇa-dassanaṁ||
[53] Kathaṁvidhaṁ sīlavantaṁ vadanti||
Kathaṁvidhaṁ paññavantaṁ vadanti||
Kathaṁvidho dukkhamaticca irīyati.||
Kathaṁvidhaṁ devatā pūjayantī" ti.|| ||

(Bhagavā:)|| ||

"Yo sīlavā paññavā bhāvitatto||
Samāhito jhānarato satīmā,||
Sabb'assa sokā vigatā pahīṇā||
Khīṇ'āsavo antimadehadhārī.|| ||

Tathāvidhaṁ sīlavantaṁ vadanti||
Tathāvidhaṁ paññavantaṁ vadanti.||
Tathāvidho dukkham aticca irīyati||
Tathāvidhaṁ devatā pūjayantī" ti.|| ||

 

§

 

Sutta 15

Candana Suttaṁ

[15.1][rhyc] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Eka-m-antaṁ ṭhito kho Candano deva-putto Bhagavantaṁ gāthāya ajjhabhāsi:|| ||

"Kathaṁ sū taratī oghaṁ rattin-divam atandito||
Appatiṭṭhe anālambe ko gambhīre na sīdatī" ti?|| ||

(Bhagavā)|| ||

"Sabbadā sīla-sampanno paññavā susamāhito,||
Āraddha-viriyo pahit'atto oghaṁ tarati duttaraṁ|| ||

Virato kāma-saññāya rūpasaṁyojanātigo,||
Nandibhavāparikkhīṇo so gambhīre na sīdatī" ti.|| ||

 

§

 

Sutta 16

Sudatta Suttaṁ

[16.1][rhyc] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Eka-m-antaṁ ṭhito kho Sudatto deva-putto Bhagavato santike imaṁ gāthaṁ abhāsi:|| ||

"Sattiyā viya omaṭṭho ḍayha-māno va matthake,||
Kāmarāga-p-pahāṇāya sato bhikkhu paribbaje" ti.|| ||

(Bhagavā:)|| ||

"Sattiyā viya omaṭṭho ḍayha-māno va matthake,||
Sakkāya-diṭṭhippahāṇāya sato bhikkhu paribbaje" ti.|| ||

 

§

 

Sutta 17

Subrahma Suttaṁ

[17.1][rhyc] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Eka-m-antaṁ ṭhito kho Subrahmā deva-putto Bhagavantaṁ gāthāya ajjhabhāsi:|| ||

"Niccaṁ utrastam idaṁ cittaṁ niccaṁ ubbiggam idaṁ mano||
[54] Anuppannesu kicchesu atho uppatitesu ca||
Sace atthi anutrastaṁ taṁ me akkhāhi pucchito" ti.|| ||

(Bhagavā:)|| ||

"Na aññatra bojjh'aṅgātapasā nāññatra indriya-saṁvarā,||
Na aññatra sabba-nissaggā sotthiṁ passāmi pāṇinan" ti.|| ||

Tatth'ev'antara-dhāyī.|| ||

 

§

 

Sutta 18

Kakudha Suttaṁ

[18.1][rhyc] Evaṁ me sutaṁ ekaṁ samayaṁ Bhagavā Sākete viharati Añjanavane Migadāye.|| ||

Atha kho Kakudho deva-putto abhikkantāya rattiyā abhikkanta-vaṇṇo kevala-kappaṁ Añjanavanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ aṭṭhāsi.|| ||

Eka-m-antaṁ ṭhito kho Kakudho deva-putto Bhagavantaṁ etad avoca:|| ||

"Nandasi samaṇā" ti?|| ||

"Kiṁ laddhā āvuso" ti?|| ||

"Tena hi samaṇa socasī" ti?|| ||

"Kiṁ jīyittha āvuso" ti?|| ||

"Tena hi samaṇa n'eva nandasi na ca socasī" ti?|| ||

"Evam āvuso" ti.|| ||

"Kacci tvaṁ anigho bhikkhu atho nandī na vijjati,||
Kacci taṁ ekam āsīnaṁ arati nābhikīratī" ti?|| ||

(Bhagavā:)|| ||

"Anīgho ve ahaṁ yakkha atho nandi na vijjati,||
Atho maṁ ekam āsīnaṁ arati nābhikīratī" ti.|| ||

(Devaputto:)|| ||

"Kathaṁ tvaṁ anigho bhikkhu kathaṁ nandī na vijjati,||
Kathaṁ taṁ ekam āsīnaṁ aratī nābhikīratī" ti?|| ||

(Bhagavā:)|| ||

"Aghajātassa ve nandī nandījātassa ve aghaṁ,||
Anandī anagho bhikkhu evaṁ jānāhi āvuso" ti.|| ||

(Devaputto:)|| ||

"Cirassaṁ vata passāmi brāhmaṇaṁ parinibbutaṁ,||
Anandiṁ anaghaṁ bhikkhuṁ tiṇṇaṁ loke visattikan" ti.|| ||

 

§

 

Sutta 19

Uttara Suttaṁ

[19.1][rhyc][than] Evam me sutaṁ ekaṁ samayaṁ Bhagavā Rājagahe viharati.|| ||

Eka-m-antaṁ ṭhito kho Uttaro deva-putto Bhagavato santike imaṁ gāthaṁ abhāsi:|| ||

[55] "Upanīyati jīvitam appam āyu||
jarūpanītassa na santi tāṇā,||
Etaṁ bhayaṁ maraṇe pekkhamāno||
puññāni kayirātha sukhāvahānī" ti.|| ||

(Bhagavā:)|| ||

"Upanīyati jīvitam appam āyu||
jarūpanītassa na santi tāṇā,||
Etaṁ bhayaṁ maraṇe pekkhamāno||
lokāmisaṁ pajahe santipekkho" ti.|| ||

 

§

 

Sutta 20

Anāthapiṇḍika Suttaṁ

[20.1][rhyc] Evam me sutaṁ ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Eka-m-antaṁ ṭhito kho Anāthapiṇḍiko deva-putto Bhagavato santike imā gāthāyo abhāsi:|| ||

"Idaṁ hi taṁ Jetavanaṁ isiSaṅghanisevitaṁ,||
Āvutthaṁ dhammarājena pītisañjananaṁ mama.|| ||

Kammaṁ vijjā ca dhammo ca sīlaṁ jīvitam uttamaṁ,||
Etena maccā sujjhanti na gottena dhanena vā.|| ||

Tasmā hi paṇḍito poso sampassaṁ attham attano,||
Yoniso vicine dhammaṁ evaṁ tattha visujjhati.|| ||

Sāriputto va paññāya sīlen'upasamena ca,||
Yo pi pāragato bhikkhu etāva paramo siyā" ti.|| ||

2. Idam avoca Anāthapiṇḍiko deva-putto.|| ||

Idaṁ vatvā Bhagavantaṁ abhivādetvā padakkhiṇaṁ katvā tatth'eva antara-dhāyī.|| ||

3. Atha kho Bhagavā tassā rattiyā accayena bhikkhū āmantesi.|| ||

4. Imaṁ bhikkhave rattiṁ aññataro deva-putto abhikkantāya rattiyā abhikkanta-vaṇṇo kevala-kappaṁ Jetavanaṁ obhāsetvā yenāhaṁ ten'upasaṅkami.|| ||

Upasaṅkamitvā maṁ abhivādetvā eka-m-antaṁ aṭṭhāsi.|| ||

Eka-m-antaṁ ṭhito kho bhikkhave so deva-putto mama santike imā gāthāyo abhāsi:|| ||

5. "'Idaṁ hi taṁ Jetavanaṁ isisaṅghanisevitaṁ,||
Āvutthaṁ dhammarājena pītisañjananaṁ mama.|| ||

Kammaṁ vijjā ca dhammo ca sīlaṁ jīvitam uttamaṁ,||
Etena maccā sujjhanti na gottena dhanena vā.|| ||

Tasmā hi paṇḍito poso sampassaṁ attham attano,||
[56] Yoniso vicine dhammaṁ evaṁ tattha visujjhati.|| ||

Sāriputto va paññāya sīlen'upasamena ca,||
Yo pi pāragato bhikkhu etāva paramo siyā' ti.|| ||

6. Idam avoca bhikkhave so deva-putto.|| ||

Idaṁ vatvā maṁ||
abhivādetvā padakkhiṇaṁ katvā tatth'eva antara-dhāyī" ti.|| ||

7. Evaṁ vutte āyasmā Ānando Bhagavantaṁ etad avoca:|| ||

"So hi nūna bhante Anāthapiṇḍiko deva-putto bhavissati.|| ||

Anāthapiṇḍiko gahapati āyasmante Sāriputte abhi-p-pasanno ahosī" ti.|| ||

8. "Sādhu sādhu Ānanda.|| ||

Yāvatakaṁ kho Ānanda takkāya pattabbaṁ anuppattaṁ tayā.|| ||

Anāthapiṇḍiko hi so Ānanda deva-putto" ti.|| ||

Anāthapiṇḍika Vagga Dutiya