Saṃyutta Nikāya
I. Sagātha Vagga
2. Devaputta Saṃyutta
3. Nānātitthiya Vagga
Adapted from the 1995 edition of the digital version of the Sri Lanka Buddha Jayanti Tripitaka Series.
Sutta 21
Siva Suttaṃ
[21.1][rhyc] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
2. Atha kho Sivo deva-putto abhikkantāya rattiyā abhikkanta-vaṇṇo keḷakappaṃ Jetavanaṃ obhāsetvā yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ aṭṭhāsi.|| ||
Eka-m-antaṃ ṭhito kho Sivo deva-putto Bhagavato santike imā gāthāyo abhāsi:|| ||
"Sabbhi'r'eva samāsetha sabbhi kubbetha santhavaṃ,||
Sataṃ Sad'Dhammam aññāya seyyo hoti na pāpiyo.|| ||
Sabbhi'r'eva samāsetha sabbhi kubbetha santhavaṃ,||
Sataṃ Sad'Dhammam aññāya paññā labbhati nāññato.|| ||
Sabbhi'r'eva samāsetha sabbhi kubbetha santhavaṃ,||
Sataṃ Sad'Dhammam aññāya sokamajjhe na socati.|| ||
Sabbhi'r'eva samāsetha sabbhi kubbetha santhavaṃ,||
[57] Sataṃ Sad'Dhammam aññāya ñātimajjhe virocati.|| ||
Sabbhi'r'eva samāsetha sabbhi kubbetha santhavaṃ,||
Sataṃ Sad'Dhammam aññāya sattā gacchanti suggatiṃ.|| ||
Sabbhi'r'eva samāsetha sabbhi kubbetha santhavaṃ,||
Sataṃ Sad'Dhammam aññāya sattā tiṭṭhanti sātatan" ti.|| ||
3. Atha kho Bhagavā Sivaṃ deva-puttaṃ gāthāya paccabhāsi:|| ||
"Sabbhi'r'eva samāsetha sabbhi kubbetha santhavaṃ,||
Sataṃ Sad'Dhammam aññāya sabba-dukkhā pamuccatī" ti.|| ||
Sutta 22
Khema Suttaṃ
[22.1][rhyc][than] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho Khemo deva-putto abhikkantāya rattiyā abhikkanta-vaṇṇo keḷakappaṃ Jetavanaṃ obhāsetvā yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ aṭṭhāsi.|| ||
Eka-m-antaṃ ṭhito kho Khemo deva-putto Bhagavato santike imā gāthāyo abhāsi:|| ||
"Caranti bālā dummedhā amitten'eva attanā,||
Karontā pāpakaṃ kammaṃ yaṃ hoti kaṭukapphalaṃ.|| ||
Na taṃ kammaṃ kataṃ sādhu yaṃ katvā anutappati,||
Yassa assumukho rodaṃ vipākaṃ paṭisevati.|| ||
Tañ ca kammaṃ kataṃ sādhu yaṃ katvā nānutappati,||
Yassa patīto sumano vipākaṃ paṭisevatī" ti.|| ||
(Bhagavā:)|| ||
"Paṭigacc'eva taṃ kayirā yaṃ jaññā hitam attano,||
Na sākaṭikacintāya mantā dhīro parakkame.|| ||
Yathā sākaṭiko patthaṃ samaṃ hitvā mahā-pathaṃ,||
Visamaṃ Maggam āruyha akkhacchinno va jhāyati.|| ||
Evaṃ dhammā apakkamma adhammam anuvattiya,||
Mando maccumukhaṃ patto akkhacchinno va jhāyatī" ti.|| ||
Sutta 23
Serī Suttaṃ
[23.1][rhyc] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho Serī deva-putto abhikkantāya rattiyā abhikkanta-vaṇṇo keḷakappaṃ Jetavanaṃ obhāsetvā yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ aṭṭhāsi.|| ||
Eka-m-antaṃ ṭhito kho Serī deva-putto Bhagavantaṃ gāthāya ajjhabhāsi:|| ||
"Annam evābhinandanti ubhayo devamānusā,||
Atha ko nāma so yakkho yaṃ annaṃ nābhinandatī" ti.|| ||
(Bhagavā:)|| ||
"Ye naṃ dadanti saddhāya vi-p-pasannena cetasā,||
Tam eva annaṃ bhajati asmiṃ loke paramhi ca.|| ||
Tasmā vineyya maccheraṃ dajjā dānaṃ malābhibhū,||
Puññāni paralokasmiṃ patiṭṭhā honti pāṇinan" ti.|| ||
[58] 2. "Acchariyaṃ bhante ababhūtaṃ bhante yāva su-bhāsitam idaṃ bhante Bhagavatā:|| ||
'Ye naṃ dadanti saddhāya vi-p-pasannena cetasā,||
Tam eva annaṃ bhajati asmiṃ loke paramhi ca.|| ||
Tasmā vineyya maccheraṃ dajjā dānaṃ malābhibhū,||
Puññāni paralokasmiṃ patiṭṭhā honti pāṇinan' ti.|| ||
3. Bhūtapubbāhaṃ bhante Serī nāma rājā ahosiṃ dāyako dāna-pati dānassa vaṇṇa-vādī.|| ||
Tassa mayhaṃ bhante catusu dvāresu dānaṃ dīyittha samaṇa-brāhmaṇakapaṇ'iddhika-vaṇibbaka-yā cakānaṃ.|| ||
4. Atha kho maṃ bhante itthāgaraṃ upasaṅkamitvā etad avoca:|| ||
'Devassa kho dānaṃ dīyati.|| ||
Amhākaṃ dānaṃ na dīyati.|| ||
Sādhu mayam pi devaṃ nissāya dānāni dadeyyāma puññāni kareyyāmā' ti.|| ||
5. Tassa mayhaṃ bhante etad ahosi:|| ||
'Ahaṃ kho'smi dāyako dāna-pati dānassa vaṇṇa-vādī.|| ||
'Dānaṃ dassāmā' ti 'vadantānaṃ kin' ti 'vadeyyan' ti.|| ||
So khv'āhaṃ bhante paṭhamaṃ dvāraṃ itthāgarassa adāsiṃ.|| ||
Tattha itthāgārassa dānaṃ dīyittha.|| ||
Mama dānaṃ paṭikkami.|| ||
6. Atha kho maṃ bhante khattiyā anuyuttā upasaṅkamitvā maṃ etad avocuṃ:|| ||
'Devassa kho dānaṃ dīyati.|| ||
Itthāgārassa dānaṃ dīyati.|| ||
Amhākaṃ dānaṃ no dīyati.|| ||
Sādhu mayam pi devaṃ nissāya dānāni dadeyyāma,||
puññāni kareyyāmā' ti.|| ||
Tassa mayhaṃ bhante etad ahosi:|| ||
Ahaṃ kho'smi dāyako dāna-pati dānassa vaṇṇa-vādī.|| ||
'Dānaṃ dassāmā' ti 'vadantānaṃ kin' ti 'vadeyyan' ti.|| ||
So khv'āhaṃ bhante dutiyaṃ dvāraṃ khattiyānaṃ anuyuttānaṃ adāsiṃ.|| ||
Tattha khattiyānaṃ anuyuttānaṃ dānaṃ diyittha.|| ||
Mama dānaṃ paṭikkami.|| ||
7. Atha kho maṃ bhante balakāyo upasaṅkamitvā maṃ etad avoca:|| ||
'Devassa kho dānaṃ dīyati.|| ||
Itthāgārassa dānaṃ dīyati.|| ||
Khattiyānaṃ anuyuttānaṃ dānaṃ dīyati.|| ||
Amhākaṃ dānaṃ na dīyati.|| ||
Sādhu mayam pi devaṃ nissāya dānāni dadeyyāma,||
puññāni kareyyāmā' ti.|| ||
[59] Tassa mayhaṃ bhante etad ahosi:|| ||
Ahaṃ kho'smi dāyako dāna-pati dānassa vaṇṇa-vādī.|| ||
'Dānaṃ dassāmā' ti 'vadantānaṃ kin' ti 'vadeyyan' ti.|| ||
So khv'āhaṃ bhante tatiyaṃ dvāraṃ balakāyassa adāsiṃ.|| ||
Tattha balakāyassa dānaṃ dīyittha.|| ||
Mama dānaṃ paṭikkami.|| ||
8. Atha kho maṃ bhante brāhmaṇa-gahapatikā upasaṅkamitvā maṃ etad avocuṃ:|| ||
'Devassa kho dānaṃ dīyati.|| ||
Itthāgārassa dānaṃ dīyati.|| ||
Khattiyānaṃ anuyuttānaṃ dānaṃ dīyati.|| ||
Balakāyassa dānaṃ dīyati.|| ||
Amhākaṃ dānaṃ na dīyati.|| ||
Sādhu mayam pi devaṃ nissāya dānāni dadeyyāma,||
puññāni kareyyāmā' ti.|| ||
Tassa mayhaṃ bhante etad ahosi:|| ||
Ahaṃ kho'smi dāyako dāna-pati dānassa vaṇṇa-vādī.|| ||
'Dānaṃ dassāmā' ti 'vadantāna kin' ti 'vadeyyan' ti.|| ||
So khv'āhaṃ bhante catutthaṃ dvāraṃ brāhmaṇa-gahapatikānaṃ adāsiṃ.|| ||
Tattha brāhmaṇa-gahapatikānaṃ dānaṃ dīyittha.|| ||
Mama dānaṃ paṭikkami.|| ||
9. Atha kho maṃ bhante purisā upasaṅkamitvā etad avocuṃ:|| ||
'Na kho dāni devassa koci dānaṃ diyatī' ti.|| ||
Evaṃ vutto'haṃ bhante te purise etad avocuṃ:|| ||
'Tena hi bhaṇe yo bāhiresu jana-padesu āyo sañjāyati,||
tato upaḍḍhaṃ antepuraṃ pavesetha.|| ||
Upaḍḍhaṃ tatth'eva dānaṃ detha samaṇa-brāhmaṇakapaṇ'iddhika-vaṇibbakayā cakānan' ti.|| ||
10. So khv'āhaṃ bhante evaṃ dīgha-rattaṃ katānaṃ puññānaṃ evaṃ dīgha-rattaṃ katānaṃ kusalānaṃ pariyantaṃ nādhigacchāmi,||
'ettakaṃ puññan' ti vā||
'ettako puñña-vipāko' ti vā||
'ettakaṃ sagge ṭhātabban' ti vā.|| ||
11. Acchariyaṃ bhante,||
abbhūtaṃ bhante yāva su-bhāsitam idaṃ Bhagavatā.|| ||
'Ye naṃ dadanti saddhāya vi-p-pasannena cetasā,||
Tam eva annaṃ bhajati asmi loke paramhi ca.|| ||
Tasmā vineyya maccheraṃ dajjā dānaṃ malābhibhū,||
Puññāni paralokasmiṃ patiṭṭhā honti pāṇinan'" ti.|| ||
Sutta 24
Ghaṭīkāra Suttaṃ
[24.1][rhyc] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho Ghaṭīkāro deva-putto abhikkantāya rattiyā abhikkanta-vaṇṇo keḷakappaṃ Jetavanaṃ obhāsetvā yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ aṭṭhāsi.|| ||
Eka-m-antaṃ ṭhito kho Ghaṭīkāro deva-putto Bhagavato santike imaṃ gāthaṃ abhāsi:|| ||
"Avibhaṃ upapannāse vimuttā satta bhikkhavo,||
Rāgadosa-parikkhīṇā tiṇṇā loke visattikan" ti.|| ||
(Bhagavā:)|| ||
"Ke ca te ataruṃ maccudheyyaṃ suduttaraṃ,||
Ke hitvā mānusaṃ dehaṃ dibbayogam upaccagun" ti.|| ||
(Devaputto:)|| ||
"Upako Palagaṇaḍo ca Pukkusāti ca te tayo,||
Bhaddiyo Khaṇḍadevo ca Bāhuraggi ca Piṅgiyo,||
Te hitvā mānusaṃ dehaṃ dibbayogam upaccagun" ti.|| ||
(Bhagavā:)|| ||
"Kusalaṃ bhāsasi tesaṃ mārapāsappahāyinaṃ,||
Kassa te dhammam aññāya acchiduṃ bhavabandhanan" ti.|| ||
(Devaputto:)|| ||
"Na aññatra Bhagavatā nāññatra tava sāsanā,||
Yassa te dhammam aññāya acchiduṃ bhavabandhanaṃ.|| ||
Yattha nāmaṃ ca rūpaṃ ca asesam uparujjhati,||
Taṃ te dhammaṃ idh'aññāya acchiduṃ bhavabandhanan" ti.|| ||
(Bhagavā:)|| ||
"Gambhīraṃ bhāsasi vācaṃ dubbijānaṃ sudubbudhaṃ,||
Kassa tvaṃ dhammam aññāya vācaṃ bhāsasi īdisan" ti.|| ||
(Devaputto:)|| ||
"Kumbhakāro pure āsiṃ Vehaliṅge Ghaṭīkaro,||
Mātāpettibharo āsiṃ Kassapassa upāsako.|| ||
Virato methunā dhammā brahma-cārī nirāmiso,||
Ahuvā te sagāmeyyo ahuvā te pure sakhā.|| ||
So'haṃ ete pajānāmi vimutte satta bhikkhavo,||
Rāgadosa-parikkhiṇe tiṇṇe loke visattikan" ti.|| ||
(Bhagavā:)|| ||
"Evam etaṃ tadā āsi yathā bhāsasi Bhaggava,||
Kumbhakāro pure āsi Vehaliṅge Ghaṭīkaro,||
Mātāpettibharo āsi Kassapassa upāsako.|| ||
Virato methunā dhammā brahma-cārī nirāmiso,||
Ahuvā me sagāmeyyo ahuvā me pure sakhā" ti.|| ||
(Therā:)|| ||
"Evam evaṃ purāṇānaṃ sahāyānaṃ ahu saṅgamo,||
Ubhinnaṃ bhāvit'attāṇaṃ sarīrantimadhārinan" ti.|| ||
Sutta 25
Jantu [Chantu] Suttaṃ
[25.1][rhyc] Evam me sutaṃ ekaṃ samayaṃ sambahulā bhikkhū Kosalesu viharanti Himavannapasse arañña-kuṭi-kāyaṃ uddhatā unnaḷā capalā mukharā vikiṇṇa-vācā muṭṭha-s-satino asampajānā asamāhitā vibbhanta-cittā pākat'indriyā.|| ||
2. Atha kho Jantu deva-putto tadah'uposathe paṇṇarase yena te bhikkhū ten'upasaṅkami.|| ||
Upasaṅkamitvā te bhikkhū gāthāhi ajjhabhāsi:|| ||
"Sukhajivino pure āsuṃ bhikkhū Gotama-sāvakā,||
Anicchā piṇḍam esanā anicchā sayanāsanaṃ,||
Loke aniccataṃ ñatvā dukkhass'antaṃ akaṃsu te.|| ||
Dupposaṃ katvā attāṇaṃ gāme gāmaṇikā viya,||
Bhūtvā bhutvā nipajjanti parāgāresu mucchitā.|| ||
Saṅghassa añjaliṃ katvā idh'ekacce vadām'ahaṃ,||
Apaviddhā anāthā te yathā petā tath'eva te.|| ||
Ye kho pamattā viharanti te me sandhāya bhāsitaṃ,||
Ye appamattā viharanti namo tesaṃ karom'ahan" ti.|| ||
Sutta 26
Rohitassa Suttaṃ
[26.1][rhyc] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho Rohitasso deva-putto abhikkantāya rattiyā abhikkanta-vaṇṇo keḷakappaṃ Jetavanaṃ obhāsetvā yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ aṭṭhāsi.|| ||
2. Eka-m-antaṃ ṭhito kho Rohitasso deva-putto Bhagavantaṃ etad avoca:|| ||
"Yattha nu kho bhante,||
na jāyati||
na jīyati||
na mīyati||
na cavati||
na uppajjati||
sakkā nu kho so bhante gamanena lokassa anto ñātuṃ vā daṭṭhuṃ vā pāpuṇituṃ vā" ti.|| ||
3. "'Yattha kho āvuso||
na jāyati||
na jīyati||
na mīyati||
na cavati||
na uppajjati||
n-ā-haṃ taṃ gamanena lokassa antaṃ ñāteyyaṃ daṭṭheyyaṃ patteyyan' ti vadāmī" ti.|| ||
4. "Acchariyaṃ bhante,||
abbhutaṃ bhante yāva su-bhāsitam idaṃ bhante,||
Bhagavatā:|| ||
'"Yattha kho āvuso||
na jāyati||
na jīyati||
na mīyati||
na cavati||
na uppajjati||
n-ā-haṃ taṃ gamanena lokassa antaṃ ñāteyyaṃ daṭṭheyyaṃ patteyyan" ti vadāmī' ti.|| ||
5. Bhūtapubbāhaṃ bhante, Rohitasso nāma isi ahosiṃ Bhojaputto iddhimā vehāsaṅgamo.|| ||
Tassa mayhaṃ bhante.|| ||
[62] Eva-rūpo javo ahosi:|| ||
Seyyathā pi nāma daḷha-dhammo dhanuggaho sikkhito katahattho katayoggo katūpāsano lahukena asanena appakasiren'eva tiriyaṃ tālacchāyaṃ atipāteyya.|| ||
6. Tassa mayhaṃ bhante, eva-rūpo padavītihāro ahosi:|| ||
Seyyathā pi puratthimasamuddā pacchimo samuddo.|| ||
Tassa mayhaṃ bhante, evarūṃpaṃ icchāgataṃ uppajji:|| ||
'Ahaṃ gamanena lokassa antaṃ pāpuṇissāmi' ti.|| ||
7. So khv'āhaṃ bhante eva-rūpena javena samannāgato eva-rūpena ca padavītihārena aññatr'eva asita-pīta-khāyita-sāyitā aññatra uccāra-passāva-kammā aññatra niddā-kilamatha-paṭivinodanā vassa-satāyuko vassa-satājīvī vassa-sataṃ gantvā appatvā ca lokassa antaṃ antarā va kāla-kato.|| ||
8. Acchariyaṃ bhante, abbhutaṃ bhante yāva su-bhāsitam idaṃ bhante, Bhagavatā:|| ||
'"Yattha kho āvuso||
na jāyati,||
na jīyati,||
na mīyati,||
na cavati,||
na uppajjati||
n-ā-haṃ taṃ gamanena lokassa antaṃ ñāteyyaṃ daṭṭheyyaṃ patteyyan" ti vadāmī"'" ti.|| ||
[26.9][rhyc] "Na kho panāhaṃ āvuso,||
appatvā lokassa antaṃ dukkhassa antakiriyaṃ vadāmi.|| ||
Api khv'āhaṃ āvuso imasmiñ ñeva vyāmamatte kaḷebare sasaññimhi samanake lokaṃ ca paññā-pemi loka-samudayaṃ ca loka-nirodhaṃ ca loka-nirodha-gāminiṃ ca paṭipadan" ti.|| ||
Gamanena na pattabbo lokass'anto kudācanaṃ,||
Na ca appatvā lokantaṃ dukkhā atthi pamocanaṃ.|| ||
Tasmā have loka-vidū sumedho||
lokantagū vusitabrahma-cariyo,||
Lokassa antaṃ samītāvi ñatvā||
n'āsiṃsati lokam imaṃ parañ cā.|| ||
Sutta 27
Nanda Suttaṃ
[27.1][rhyc] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho Nando deva-putto abhikkantāya rattiyā abhikkanta-vaṇṇo keḷakappaṃ Jetavanaṃ obhāsetvā yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ aṭṭhāsi.|| ||
Eka-m-antaṃ ṭhito kho Nando deva-putto Bhagavato santike imaṃ gāthaṃ abhāsi:|| ||
"Accenti kālā tarayanti rattiyo||
vayoguṇā anupubbaṃ jahanti,||
[63] Etaṃ bhayaṃ maraṇe pekkhamāno||
puññāni kayirātha sukhāvahānī" ti.|| ||
(Bhagavā:)|| ||
"Accenti kālā tarayanti rattiyo||
vayoguṇā anupubbaṃ jahanti,||
Etaṃ bhayaṃ maraṇe pekkhamāno||
lokāmisaṃ pajahe santipekkho" ti.|| ||
Sutta 28
Nandivisāla Suttaṃ
[28.1][rhyc] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho Nandivisālo deva-putto abhikkantāya rattiyā abhikkanta-vaṇṇo keḷakappaṃ Jetavanaṃ obhāsetvā yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ aṭṭhāsi.|| ||
Eka-m-antaṃ ṭhito kho Nandivisālo deva-putto Bhagavantaṃ gāthāya ajjhabhāsī:-|| ||
"Catucakkaṃ navadvāraṃ puṇṇaṃ lobhena saṃyutaṃ,||
Paṅkajātaṃ mahāvīra kataṃ yātrā bhavissatī" ti.|| ||
(Bhagavā:)|| ||
"Chetvā naddhiṃ varattañ ca icchālobhañ ca pāpakaṃ,||
Samūlaṃ taṇhaṃ abbuyha evaṃ yātrā bhavissatī" ti.|| ||
Sutta 29
Susīma Suttaṃ
[29.1][rhyc] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
2. Atha kho āyasmā Ānando yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinnaṃ kho āyasmantaṃ Ānandaṃ Bhagavā etad avoca:|| ||
"Tuyham pi no Ānanda Sāriputto ruccatī" ti?|| ||
3. "Kassa hi nāma bhante, abālassa aduṭṭhassa amūḷhassa avipallatthacittassa āyasmā Sāriputto na rucceyya.|| ||
Paṇḍito bhante, āyasmā Sāriputto.|| ||
Mahāpañño bhante, āyasmā Sāriputto.|| ||
Puthupañño bhante, āyasmā Sāriputto.|| ||
Hāsupañño bhante, āyasmā Sāriputto.|| ||
Javanapañño bhante, āyasmā Sāriputto.|| ||
Tikkhapañño bhante, āyasmā Sāriputto.|| ||
Nibbedhikapañño bhante, āyasmā Sāriputto.|| ||
Appiccho bhante, āyasmā Sāriputto.|| ||
Santuṭṭho bhante, āyasmā Sāriputto.|| ||
Pavivitto bhante, āyasmā Sāriputto.|| ||
Asaṃsaṭṭho bhante, āyasmā Sāriputto.|| ||
Āraddha-viriyo bhante, āyasmā Sāriputto.|| ||
Vattā bhante, āyasmā Sāriputto.|| ||
Vacanakkhamo bhante, āyasmā Sāriputto.|| ||
Codako bhante, āyasmā Sāriputto.|| ||
Pāpagarahī bhante, āyasmā Sāriputto.|| ||
Kassa hi nāma bhante,||
abālassa aduṭṭhassa amūḷhassa avipallattha-cittassa āyasmā Sāriputto na rucceyyā" ti.|| ||
[64] "Evam etaṃ Ānanda,||
evam etaṃ Ānanda.|| ||
4. Kassa hi nāma Ānanda,||
abālassa aduṭṭhassa amūḷhassa avipallattha-cittassa Sāriputto na rucceyya?|| ||
Paṇḍito Ānanda Sāriputto,||
mahā-pañño Ānanda Sāriputto,||
puthupañño Ānanda Sāriputto,||
hāsupañño Ānanda Sāriputto,||
javanapañño Ānanda Sāriputto,||
tikkhapañño Ānanda Sāriputto,||
nibbedhika-pañño Ānanda Sāriputto,||
appiccho Ānanda Sāriputto,||
santuṭṭho Ānanda Sāriputto,||
pavivitto Ānanda Sāriputto,||
asaṃsaṭṭho Ānanda Sāriputto,||
āraddha-viriyo Ānanda Sāriputto,||
vattā Ānanda Sāriputto,||
vacana-k-khamo Ānanda Sāriputto,||
codako Ānanda Sāriputto,||
pāpagarahī Ānanda Sāriputto.|| ||
Kassa hi nāma Ānanda,||
ābalassa aduṭṭhassa amūḷhassa avipallattha-cittassa Sāriputto na rucceyyā" ti.|| ||
5. Atha kho Susīmo deva-putto āyasmato Sāriputtassa vaṇṇe bhaññamāne mahatiyā deva-puttaparisāya parivuto yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ aṭṭhāsi.|| ||
6. Eka-m-antaṃ ṭhito kho Susīmo deva-putto Bhagavantaṃ etad avoca:|| ||
"Evam etaṃ Bhagavā||
evam etaṃ Sugata.|| ||
Kassa hi nāma bhante,||
abālassa aduṭṭhassa amūḷhassa avipallatthacittassa āyasmā Sāriputto na rucceyya?|| ||
Paṇḍito bhante, āyasmā Sāriputto.|| ||
Mahāpañño bhante, āyasmā Sāriputto.|| ||
Puthupañño bhante, āyasmā Sāriputto.|| ||
Hāsupañño bhante, āyasmā Sāriputto.|| ||
Javanapañño bhante, āyasmā Sāriputto.|| ||
Tikkhapañño bhante, āyasmā Sāriputto.|| ||
Nibbedhikapañño bhante, āyasmā Sāriputto.|| ||
Appiccho bhante āyasmā Sāriputto.|| ||
Santuṭṭho bhante, āyasmā Sāriputto.|| ||
Pavivitto bhante, āyasmā Sāriputto.|| ||
Asaṃsaṭṭho bhante, āyasmā Sāriputto.|| ||
Āraddha-viriyo bhante, āyasmā Sāriputto.|| ||
Vattā bhante, āyasmā sāri putto.|| ||
Vacanakkhamo bhante, āyasmā Sāriputto.|| ||
Codako bhante, āyasmā Sāriputto.|| ||
Pāpagarahī bhante, āyasmā Sāriputto.|| ||
Kassa hi nāma bhante,||
abālassa aduṭṭhassa amūḷhassa avipallatthacittassa āyasmā Sāriputto na rucceyyā?|| ||
Aham pi hi bhante, yañ ñad'eva deva-puttaparisaṅ upasaṅkamiṃ etad eva bahulaṃ saddaṃ suṇāmi:|| ||
'Paṇḍito bhante āyasmā Sāriputto.|| ||
Mahāpañño bhante, āyasmā Sāriputto.|| ||
Puthupañño bhante, āyasmā Sāriputto.|| ||
Hāsupañño bhante, āyasmā Sāriputto.|| ||
Javanapañño bhante, āyasmā Sāriputto.|| ||
Tikkhapañño bhante, āyasmā Sāriputto.|| ||
Nibbedhikapañño bhante, āyasmā Sāriputto.|| ||
Appiccho bhante, āyasmā Sāriputto.|| ||
Santuṭṭho bhante, āyasmā Sāriputto.|| ||
Pavivitto bhante, āyasmā Sāriputto.|| ||
Asaṃsaṭṭho bhante, āyasmā Sāriputto.|| ||
Āraddha-viriyo bhante, āyasmā Sāriputto.|| ||
Vattā bhante, āyasmā Sāriputto.|| ||
Vacanakkhamo bhante, āyasmā Sāriputto.|| ||
Codako bhante, āyasmā Sāriputto.|| ||
Pāpagarahī bhante, āyasmā Sāriputto.|| ||
Kassa hi nāma bhante,||
abālassa aduṭṭhassa amūḷhassa avipallatthacittassa āyasmā Sāriputto na rucceyyā' ti" ti?|| ||
7. Atha kho Susīmassa deva-puttassa deva-puttaparisā āyasmato Sāriputtassa vaṇṇe bhaññamāne atta-manā pamuditā pītisomanassajātā uccāvacā vaṇṇanibhā upadaṃ-seti.|| ||
8. Seyyathā pi nāma maṇiveḷuriyo subho jātimā aṭṭhaṃso suparikammakato paṇḍukambale nikkhitto bhāsate ca tapate ca virocati ca.|| ||
Evam evaṃ Susīmassa deva-puttassa deva-puttaparisā āyasmato Sāriputtassa vaṇṇe bhaññamāne atta-manā pamuditā pītisomanassajātā uccāvacā vaṇṇanibhā upadaṃ-seti.|| ||
9. Seyyathā pi nāma nekkhaṃ jambonadaṃ dakkhakammāraputtena ukkāmukhe sukusala sampahaṭṭhaṃ paṇḍukambale nikkhitto bhāsate ca tapate ca virocati ca.|| ||
Evam evaṃ Susīmassa deva-puttassa deva-puttaparisā [65] āyasmato Sāriputtassa vaṇṇe bhaññamāne atta-manā pamuditā pītisomanassajātā uccāvacā vaṇṇanibhā upadaṃ-seti.|| ||
10. Seyyathā pi nāma rattiyā paccūsa-samayaṃ osadhītārakā bhāsate ca tapate ca virocati ca.|| ||
Evam evaṃ Susīmassa deva-puttassa deva-puttaparisā āyasmato Sāriputtassa vaṇṇe bhaññamāne atta-manā pamuditā pītisomanassajātā uccāvacā vaṇṇanibhā upadaṃ-seti.|| ||
11. Seyyathā pi nāma sarada-samaye viddhe vigata-valāhake deve ādicco nabhaṃ abbhussu-k-kamāno sabbaṃ akāsagataṃ tamaṃ abhivihacca bhāsate ca tapate ca virocati ca.|| ||
Evam evaṃ Susīmassa deva-puttassa deva-puttaparisā āyasmato Sāriputtassa vaṇṇe bhaññamāne atta-manā pamuditā pītisomanassajātā uccāvacā vaṇṇanibhā upadaṃ-seti.|| ||
12. Atha kho Susimo deva-putto āyasmantaṃ Sāriputtaṃ ārabbha Bhagavato santike imaṃ gāthaṃ abhāsi:|| ||
"'Paṇḍito' ti samaññāto Sāriputto akodhano,||
Appiccho sorato danto Satthuvaṇṇābhato isī" ti.|| ||
13. Atha kho Bhagavā āyasmantaṃ Sāriputtaṃ ārabbha Susimaṃ deva-puttaṃ gāthāya paccabhāsi:|| ||
"'Paṇḍito' ti samaññāto Sāriputto akodhano,||
Appiccho sorato danto kālaṃ kaṅkhati bhatiko sudanto" ti.|| ||
Sutta 30
Nānā-Titthiyasāvaka Suttaṃ
[30.1][rhyc] Evam me sutaṃ ekaṃ samayaṃ Bhagavā Rājagahe viharati Veḷuvane Kalandakanivāpe.|| ||
2. Atha kho sambahulā Nānā-Titthiyasāvakā deva-puttā Asamo ca Sahalī ca Niṃko ca Ākoṭako ca Veṭambarī ca Māṇavagāmiyo ca abhikkantāya rattiyā abhikkanta-vaṇṇā.|| ||
[66] Kevalakappaṃ Veḷuvanaṃ obhāsetvā yena Bhagavā ten'upasaṅkamiṃsu.|| ||
Upasaṅkamitvā Bhagavantaṃ abhivādetvā eka-m-antaṃ aṭṭhaṃsu.|| ||
3. Eka-m-antaṃ ṭhito kho Asamo deva-putto Pūraṇaṃ Kassapaṃ ārabbha Bhagavato santike imaṃ gāthaṃ abhāsi:|| ||
"Idha chinditamārite hatajānīsu Kassapo||
Pāpaṃ na pan'upassati puññaṃ vā pana attano,||
Sa ce vissāsam ācikkhi Satthā arahati mānanan" ti.|| ||
4. Atha kho Sahalī deva-putto Makkhaliṃ-Gosālaṃ ārabbha Bhagavato santike imaṃ gāthaṃ abhāsi:|| ||
"Tapojigucchāya susaṃvutatto||
vācaṃ pahāya kalahaṃ janena,||
Sa mosavajjā virato sacca-vādī||
na hi nūna tādīsaṃ karoti pāpan" ti.|| ||
5. Atha kho Niṅko deva-putto Nigaṇṭhaṃ Nātaputtaṃ ārabbha Bhagavato santike imaṃ gāthaṃ abhāsi:|| ||
"Jegucchi nipako bhikkhu cātuyāmasusaṃvuto,||
Diṭṭhaṃ sutañ ca ācikkhaṃ na hi nūna kibbisī siyā" ti.|| ||
6. Atha kho Ākoṭako deva-putto nānātitthiye ārabbha Bhagavato santike imaṃ gāthaṃ abhāsi:|| ||
"Pakudhako Kātiyāno Nigaṇṭhā||
ye cā p'ime Makkhalī Puraṇāse,||
Gaṇassa Satthāro sāmaññappattā||
na hi nūna te sappurisehi dūre" ti.|| ||
7. Atha kho Veṭambarī deva-putto Ākoṭakaṃ deva-puttaṃ gāthāya paccabhāsi:|| ||
"Sagāravenāpi chavo sigālo||
Na kotthako sīhasamo kadāci,||
Naggo musā-vādī gaṇassa Satthā||
Saṅkassarācāro na sataṃ sarikkho" ti.|| ||
[67] 8. Atha kho Māro pāpimā Veṭambariṃ deva-puttaṃ anvāvisitvā Bhagavato santike imaṃ gāthaṃ abhāsi:|| ||
"Tapo jigucchāya āyuttā pālayaṃ pavivekiyaṃ,||
Rūpe ca ye niviṭṭhāse deva-lokābhinandino,||
Te ve sammā'nusāsanti paralokāya mātiyā" ti.|| ||
9. Atha kho Bhagavā Māro ayaṃ pāpimā iti viditvā Māraṃ pāpimantaṃ gāthāya paccabhāsi:|| ||
"Ye keci rūpā idha vā huraṃ vā||
Ye antalikkhasmiṃ pabhāsavaṇṇā,||
Sabbe va'ete NamucippaSatthā||
Āmisaṃ va macchānaṃ vadhāya khittā" ti.|| ||
10. Atha kho Māṇavagāmiyo deva-putto Bhagavantaṃ ārabbha Bhagavato santike imā gāthāyo abhāsi:|| ||
"Vipulo Rājagahīyānaṃ giri seṭṭho pavuccati,||
Seto Himavataṃ seṭṭho ādicco aghagāminaṃ.|| ||
Samuddo udadhinaṃ seṭṭho nakkhattāṇaṃ va candimā,||
Sadevakassa lokassa Buddho aggo pavuccatī" ti.|| ||
Nānātitthiya Vagga Tatiya
