Saṃyutta Nikaya:
Sagatha Vagga:
Brahmana Saṃyutta
Suttas 1-22
Adapted from the 1995 edition of the digital version of the Sri Lanka Buddha Jayanti Tripitaka Series.
Sutta 1
Dhanañjānī Suttaṃ
[1.1][pts] Evaṃ me sutaṃ:|| ||
Ekaṃ samayaṃ Bhagavā Rājagahe viharati Veḷuvane Kalandakanivāpe.|| ||
2. Tena kho pana samayena aññatarassa Bhāradvājagotta-brāhmaṇassa Dhanañjānī nāma brāhmaṇī abhi-p-pasannā hoti Buddhe ca dhamme ca saṅghe ca.|| ||
3. Atha kho Dhanañjānī brāhmaṇī Bhāradvājagottassa brāhmaṇassa bhattaṃ upasaṃharantī upakkhalitvā ti-k-khattuṃ udānaṃ udānesi:|| ||
"Namo tassa Bhagavato arahato Sammā Sambuddhassa.|| ||
Namo tassa Bhagavato arahato Sammā Sambuddhassa.|| ||
Namo tassa Bhagavato arahato Sammā Sambuddhassā" ti.|| ||
4. Evaṃ vutte Bhāradvājagotto brāhmaṇo Dhanañjāniṃ brāhmaṇiṃ etad avoca:|| ||
"Evam eva panāyaṃ vasali yasmiṃ vā tasmiṃ vā tassa muṇḍakassa samaṇassa vaṇṇaṃ bhāsati.|| ||
Idāni tyāhaṃ vasali tassa Satthuno vādaṃ āropessāmī" ti.|| ||
5. "Na khv'āhaṃ taṃ brāhmaṇa passāmi sa-devake loke sa-Mārake sa-brahmake sa-s-samaṇa-brāhmaṇiyā pajāya sa-devaka-manussāya yo tassa Bhagavato vādaṃ āropeyya arahato Sammā Sambuddhassa.|| ||
Api ca tvaṃ brāhmaṇa gaccha.|| ||
Gantvā vijānissasī" ti.|| ||
6. Atha kho Bhāradvājagotto brāhmaṇo kupito anatta-mano yena Bhagavā ten'upasaṅkami.|| ||
Upasaṅkamitvā Bhagavatā saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
[161] 7. Eka-m-antaṃ nisinno kho Bhāradvājagotto brāhmaṇo Bhagavantaṃ gāthāya ajjhabhāsi:|| ||
"Kiṃ su chetvā sukhaṃ seti kiṃ su chetvā na socati,||
Kissa'ssa eka-dhammassa vadhaṃ rocesi Gotamā" ti.|| ||
"Kodhaṃ chetvā sukhaṃ seti kodhaṃ chetvā na socati,||
Kodhassa visamūlassa madhur'aggassa brāhmaṇa,||
Vadhaṃ ariyā pasaṃ-santi taṃ hi chetvā na socatī" ti.|| ||
9. Evaṃ vutte Bhāradvājagotto brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā||
akkujjeyya paṭi-c-channaṃ vā||
vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya 'cakkhu-manto rūpāni dakkhintī' ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi Dhammañ ca bhikkhu-saṅghañ ca.|| ||
Labheyyāhaṃ bhoto Gotamassa santike pabbajjaṃ,||
labheyyaṃ upasampadan" ti.|| ||
10. Alattha kho Bhāradvājagotto brāhmaṇo Bhagavato santike pabbajjaṃ,||
alattha upasampadaṃ.|| ||
11. Acir'ūpasampanno kho pan'āyasmā Bhāradvājo eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaṃ pabbajanti,||
tad anuttaraṃ Brahma-cariya-pariyosānaṃ diṭṭhe'va dhamme sayaṃ abhiññā sacchi-katvā upasampajja vihāsi.|| ||
"Khīṇā jāti,||
vusitaṃ Brahma-cariyaṃ,||
kataṃ karaṇīyaṃ.||
Nāparaṃ itthattāyā" ti abbhaññāsi.|| ||
12. Aññataro ca pan'āyasmā Bhāradvājo arahataṃ ahosī.|| ||
§
Sutta 2
Akkosa Suttaṃ
[2.1][pts][than] Evaṃ me sutaṃ:|| ||
Ekaṃ samayaṃ Bhagavā Rājagahe viharati Veḷuvane Kalandakanivāpe.|| ||
2. Assosi kho Akkosaka Bhāradvājo brāhmaṇo "Bhāradvāja-gotto kira brāhmaṇo samaṇassa Gotamassa santike āgārasmā anagāriyaṃ pabba-jito" ti.|| ||
3. Kupito anatta-mano yena Bhagavā ten'upasaṅkami.|| ||
[162] Upasaṅkamitvā Bhagavantaṃ asabbhāhi pharusāhi vācāhi akkosati paribhāsati.|| ||
4. Evaṃ vutte Bhagavā Akkosaka Bhāradvājaṃ brāhmaṇaṃ etad avoca:|| ||
"Taṃ kiṃ maññasi brāhmaṇa.|| ||
Api nu kho te āga-c-chanti mitt-ā-maccā ñātisā-lohitā atithayo" ti?|| ||
5. "App'ekadā me bho Gotama āga-c-chanti mitt-ā-maccā ñātisā-lohitā atithayo" ti.|| ||
6. "Taṃ kiṃ maññasi brāhmaṇa.|| ||
Api nu tesaṃ anuppadesi khādanīyaṃ vā bhojanīyaṃ sāyanīyaṃ" ti?|| ||
7. "App'ekadā nes'āhaṃ bho Gotama anuppademi khādanīyaṃ bhojanīyaṃ sāyanīyaṃ" ti.|| ||
8. "Sace kho pana te brāhmaṇa na paṭigaṇhanti kassa taṃ hotī.|| ||
9. Sace te bho Gotama na paṭigaṇhanti ambhākam eva taṃ hotī" ti.|| ||
10. "Evam eva kho brāhmaṇa yaṃ tvaṃ amhe anakkosante akkosasi,||
arosente rosesi,||
abhaṇḍante bhaṇḍasi,||
taṃ te mayaṃ na paṭiggaṇhāma.|| ||
Tav'ev'etaṃ brāhmaṇa hotī" ti.|| ||
"Yo kho brāhmaṇa akkosantaṃ paccakkosati,||
rosentaṃ paṭiroseti,||
bhaṇḍantaṃ paṭibhaṇḍati,||
ayaṃ vuccati brāhmaṇa sambhuñjati vītiharati.|| ||
Te mayaṃ tayā n'eva sambhuñjāma na vītiharāma.|| ||
Tav'ev'etaṃ brāhmaṇa hoti,||
tav'ev'etaṃ brāhmaṇa hotī" ti.|| ||
11. [Brāhmaṇo:]
"Bhavantaṃ kho Gotama sarājikā parisā evaṃ jānāti:|| ||
'Arahaṃ Samaṇo Gotamo' ti.|| ||
Atha ca pana bhavaṃ Gotamo kujjhatī" ti.|| ||
[Bhagavā:]
"Akko'dhassa kuto kodho dantassa samajīvino,||
Samma-d-aññā vimuttassa upasantassa tādino.||
Tass'eva tena pāpiyo yo kuddhaṃ paṭikujjhati,||
Kuddhaṃ appaṭikujjhanto saṅgāmaṃ jeti dujjayaṃ.||
Ubhinnam atthaṃ carati attano ca parassa ca,||
Paraṃ saṅkupitaṃ ñatvā yo sato upasammati.||
Ubhinnaṃ tikicchantaṃ attano ca parassa ca,||
Janā maññanti bālo ti ye Dhammassa akovidā" ti.|| ||
[163] 13. Evaṃ vutte Akkosaka Bhāradvājo brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā||
akkujjeyya paṭi-c-channaṃ vā||
vivareyya mūḷhassa vā||
Maggaṃ ācikkheyya,||
andha-kāre vā||
tela-pajjotaṃ dhāreyya cakkhu-manto 'rūpāni dakkhintī' ti.|| ||
Evam evaṃ bhotā Gotamena aneka-pariyāyena Dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi Dhammañ ca bhikkhu-saṅghañ ca.|| ||
Labheyyāhaṃ bhoto Gotamassa santike pabbajjaṃ,||
labheyyaṃ upasampadan" ti.|| ||
14. Alattha kho Akkosaka Bhāradvājo brāhmaṇo Bhagavato santike pabbajjaṃ,||
alattha upasampadaṃ.|| ||
15. Acir'ūpasampanno kho pan'āyasmā Akkosaka Bhāradvājo eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaṃ pabbajanti,||
tad anuttaraṃ Brahma-cariya-pariyosānaṃ diṭṭhe'va dhamme sayaṃ abhiññā sacchi-katvā upasampajja vihāsi.|| ||
'Khīṇā jāti,||
vusitaṃ Brahma-cariyaṃ,||
kataṃ karaṇīyaṃ.||
Nāparaṃ itthattāyā' ti abbhaññāsi.|| ||
16. Aññataro ca pan'āyasmā Bhāradvājo arahataṃ ahosī.|| ||
§
Sutta 3
Asurindaka Suttaṃ
[3.1][pts] Evaṃ me sutaṃ:|| ||
Ekaṃ samayaṃ Bhagavā Rājagahe viharati Veḷuvane Kalandakanivāpe.|| ||
2. Assosi kho Asurindaka Bhāradvājo brāhmaṇo "Bhāradvājagotto kira brāhmaṇo samaṇassa Gotamassa santike agārasmā anagāriyaṃ pabba-jito" ti.|| ||
3. Kupito anatta-mano yena Bhagavā ten'upasaṅkami.|| ||
Upasaṅkamitvā Bhagavantaṃ asabbhāhi pharusāhi vācāhi akkosati paribhāsati.|| ||
4. Evaṃ vutte Bhagavā tuṇhī ahosi.|| ||
5. Atha kho Asurindaka Bhāradvājo brāhmaṇo Bhagavantaṃ etad avoca:
"Jito'si samaṇa,||
jito'si samaṇā" ti.|| ||
6. [Bhagavā:]
"Jayaṃ ve maññati bālo vācāya pharusaṃ bhaṇaṃ,||
Jayañ c'ev'assa taṃ hoti yā titikkhā vijānato.||
Tass'eva tena pāpiyo yo kuddhaṃ paṭikujjhati,||
Kuddham appaṭikujjhanto saṅgāmaṃ jeti dujjayaṃ.||
Ubhinnam atthaṃ carati attano ca parassa ca,||
Paraṃ saṃkupitaṃ ñatvā yo sato upasammati.||
Ubhinnaṃ tikicchantaṃ attano ca parassa ca,||
Janā maññanti bālo ti ye Dhammassa akovidā" ti.|| ||
[164] 7. Evaṃ vutte Asurindaka Bhāradvājo brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rupāni dakkhintī ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi Dhammañ ca bhikkhu-saṅghañ ca.|| ||
Labheyyāhaṃ bhoto Gotamassa santike pabbajjaṃ,||
labheyyaṃ upasampadan" ti.|| ||
Alattha kho Asurindaka Bhāradvājo brāhmaṇo Bhagavato santike pabbajjaṃ,||
alattha upasampadaṃ.|| ||
Acir'ūpasampanno kho pan'āyasmā Asurindaka Bhāradvājo eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaṃ pabbajanti,||
tad anuttaraṃ Brahma-cariya-pariyosānaṃ diṭṭhe'va dhamme sayaṃ abhiññā sacchi-katvā upasampajja vihāsi.|| ||
"Khīṇā jāti,||
vusitaṃ Brahma-cariyaṃ,||
kataṃ karaṇīyaṃ.||
Nāparaṃ itthattāyā" ti abbhaññāsi.|| ||
8. Aññataro ca pan'āyasmā Bhāradvājo arahataṃ ahosī.|| ||
§
Sutta 4
Bilaṅgika Suttaṃ
[4.1][pts] Evaṃ me sutaṃ:|| ||
Ekaṃ samayaṃ Bhagavā Rājagahe viharati Veḷuvane Kalandakanivāpe.|| ||
2. Assosi kho BilaṅgikaBhāradvājo brāhmaṇo "Bhāradvājagotto kira brāhmaṇo samaṇassa Gotamassa santike agārasmā anagāriyaṃ pabba-jito" ti.|| ||
3. Kupito anatta-mano yena Bhagavā ten'upasaṅkami.|| ||
Upasaṅkamitvā tuṇhī-bhūto eka-m-antaṃ aṭṭhāsi.|| ||
4. Atha kho Bhagavā bilaṅgikassa Bhāradvājassa brāhmaṇassa cetasā ceto parivitakkam aññāya Bilaṅgikaṃ Bhāradvājaṃ brāhmaṇaṃ gāthāya ajjhabhāsi:|| ||
"Yo appaduṭṭhassa narassa dussati||
suddhassa posassa an-aṅgaṇassa,||
Tam eva bālaṃ pacceti pāpaṃ||
sukhumo rajo paṭivātaṃ va khitto" ti.|| ||
5. Evaṃ vutte Bilaṅgika Bhāradvājo brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rupāni dakkhintī ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi Dhammañ ca bhikkhu-saṅghañ ca.|| ||
Labheyyāhaṃ bhoto Gotamassa santike pabbajjaṃ,||
labheyyaṃ upasampadan" ti.|| ||
Alattha kho Bilaṅgika Bhāradvājo brāhmaṇo Bhagavato santike pabbajjaṃ,||
alattha upasampadaṃ.|| ||
Acir'ūpasampanno kho pan'āyasmā BilaṅgikaBhāradvājo eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaṃ pabbajanti,||
tad anuttaraṃ Brahma-cariya-pariyosānaṃ diṭṭhe'va dhamme sayaṃ abhiññā sacchi-katvā upasampajja vihāsi.|| ||
Khīṇā jāti,||
vusitaṃ Brahma-cariyaṃ,||
kataṃ karaṇīyaṃ.||
Nāparaṃ itthattāyāti abbhaññāsi.|| ||
6. Aññataro ca pan'āyasmā Bhāradvājo arahataṃ ahosī ti.|| ||
§
Sutta 5
Ahiṃsaka Suttaṃ
[5.1][pts] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ viharati.|| ||
2. Atha kho AhiṃsakaBhāradvājo brāhmaṇo yena Bhagavā ten'upasaṅkami.|| ||
Upasaṅkamitva Bhagavatā saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
[165] 3. Eka-m-antaṃ nisinno kho AhiṃsakaBhāradvājo brāhmaṇo Bhagavantaṃ etad avoca:
"Ahisaṃsakāhaṃ bho Gotama,||
Ahiṃsakāhaṃ bho gotamā" ti.|| ||
4. [Bhagavā:]|| ||
"Yathā nāmaṃ tathā c'assa siyā kho tvaṃ ahiṃsako,||
Yo ca kāyena vācāya manasā ca na hiṃsati,||
Sa ce ahiṃsako hoti yo paraṃ na vihiṃsatī" ti.|| ||
5. Evaṃ vutte Ahiṃsaka Bhāradvājo brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya 'cakkhu-manto rupāni dakkhintī' ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi Dhammañ ca bhikkhu-saṅghañ ca.|| ||
Labheyyāhaṃ bhoto Gotamassa santike pabbajjaṃ,||
labheyyaṃ upasampadan" ti.|| ||
Alattha kho Ahiṃsaka Bhāradvājo brāhmaṇo Bhagavato santike pabbajjaṃ,||
alattha upasampadaṃ.|| ||
Acir'ūpasampanno kho pan'āyasmā AhiṃsakaBhāradvājo eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaṃ pabbajanti,||
tad anuttaraṃ Brahma-cariya-pariyosānaṃ diṭṭhe'va dhamme sayaṃ abhiññā sacchi-katvā upasampajja vihāsi.|| ||
Khīṇā jāti,||
vusitaṃ Brahma-cariyaṃ,||
kataṃ karaṇīyaṃ.||
Nāparaṃ itthattāyāti abbhaññāsi.|| ||
6. Aññataro ca pan'āyasmā Bhāradvājo arahataṃ ahosī ti.|| ||
§
Sutta 6
Jaṭā Suttaṃ
[6.1][pts][than][olds] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
2. Atha kho JaṭāBhāradvājo brāhmaṇo yena Bhagavā ten'upasaṅkami.|| ||
Upasaṅkamitvā Bhagavatā saddhiṃ sammodi.
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
3. Eka-m-antaṃ nisinno kho JaṭāBhāradvājo brāhmaṇo Bhagavantaṃ gāthāya ajjhabhāsi:|| ||
"Anto-jaṭā bahi-jaṭā jaṭāya jaṭitā pajā,||
Taṃ taṃ Gotama pucchāmi ko imaṃ vijaṭaye jaṭan" ti?|| ||
[Bhagavā:]|| ||
"Sīle patiṭṭhāya naro sapañño cittaṃ paññañ ca bhāvayaṃ,||
Ātāpī nipako bhikkhu so imaṃ vijaṭaye jaṭaṃ.|| ||
Yesaṃ rāgo ca doso ca avijjā ca virājitā,||
Khīṇ'āsavā Arahanto tesaṃ vijaṭitā jaṭā.|| ||
Yattha nāmañ ca rūpañ ca asesaṃ uparujjhati,||
Paṭighaṃ rūpa-saññā ca etthe sā chijjate jaṭā" ti.|| ||
Evaṃ vutte Jaṭā Bhāradvājo brāhmaṇo Bhagavantaṃ etad avoca:|| ||
Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rupāni dakkhintī ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi Dhammañ ca bhikkhu-saṅghañ ca.|| ||
Labheyy'āhaṃ bhoto Gotamassa santike pabbajjaṃ,||
labheyyaṃ upasampadan" ti.|| ||
Alattha kho Jaṭā Bhāradvājo brāhmaṇo Bhagavato santike pabbajjaṃ,||
alattha upasampadaṃ.|| ||
Acir'ūpasampanno kho pan'āyasmā Jaṭā Bhāradvājoeko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaṃ pabbajanti,||
tad anuttaraṃ Brahma-cariya-pariyosānaṃ diṭṭhe'va dhamme sayaṃ abhiññā sacchi-katvā upasampajja vihāsi.|| ||
'Khīṇā jāti,||
vusitaṃ Brahma-cariyaṃ,||
kataṃ karaṇīyaṃ.||
Nāparaṃ itthattāyā' ti abbhaññāsi.|| ||
Aññataro ca pan'āyasmā Bhāradvājo arahataṃ ahosī ti.|| ||
§
Sutta 7
Suddhika Suttaṃ
[7.1][pts] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ-|| ||
2. Atha kho SuddhikaBhāradvājo brāhmaṇo yena Bhagavā ten'upasaṅkami.|| ||
Upasaṅkamitvā Bhagavatā saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
[166] 3. Eka-m-antaṃ nisinno kho SuddhikaBhāradvājo brāhmaṇo Bhagavato santike imaṃ gāthaṃ abhāsi:|| ||
"Na brāhmaṇo sujjhati koci loke||
sīlavā pi tapo karaṃ,||
vijjā-caraṇa-sampanno so sujjhati||
na aññā itarā pajā" ti.|| ||
4. [Bhagavā:]|| ||
"Bahum pi palapaṃ jappaṃ na jaccā hoti brāhmaṇo,||
Anto kasambu-saṃkiliṭṭho kuhanaṃ upanissito.||
Khattiyo brāhmaṇo vesso suddo caṇḍāla-pukkuso,||
Āraddha-viriyo pahit'atto niccaṃ daḷha-parakkamo,||
Pappoti paramaṃ suddhiṃ evaṃ jānāhi brāhmaṇā" ti.|| ||
5. Evaṃ vutte SuddhikaBhāradvājo brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rupāni dakkhintī ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi Dhammañ ca bhikkhu-saṅghañ ca.|| ||
Labheyyāhaṃ bhoto Gotamassa santike pabbajjaṃ,||
labheyyaṃ upasampadan" ti.|| ||
Alattha kho SuddhikaBhāradvājo brāhmaṇo Bhagavato santike pabbajjaṃ,||
alattha upasampadaṃ.|| ||
Acir'ūpasampanno kho pan'āyasmā SuddhikaBhāradvājo vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaṃ pabbajanti,||
tad anuttaraṃ Brahma-cariya-pariyosānaṃ diṭṭhe'va dhamme sayaṃ abhiññā sacchi-katvā upasampajja vihāsi.|| ||
"Khīṇā jāti,||
vusitaṃ Brahma-cariyaṃ,||
kataṃ karaṇīyaṃ.||
Nāparaṃ itthattāyā" ti abbhaññāsi.|| ||
Aññataro ca pan'āyasmā Bhāradvājo arahataṃ ahosī ti.|| ||
§
Sutta 8
Aggika Suttaṃ
[8.1][pts] Evaṃ me sutaṃ:|| ||
Ekaṃ samayaṃ Bhagavā Rājagahe viharati Veḷuvane kalandaka nivāpe.|| ||
2. Tena kho pana samayena AggikaBhāradvājassa brāhmaṇassa sappinā pāyāso sannihito hoti:
"Aggiṃ juhissāmi aggihuttaṃ paricarissāmī" ti.|| ||
3. Atha kho Bhagavā pubbaṇha-samayaṃ nivāsetvā patta-cīvaram ādāya Rājagahaṃ piṇḍāya pāvisi.|| ||
Rāgahe sapadānaṃ piṇḍāya caramāno yena AggikaBhāradvājassa brāhmaṇassa nivesanaṃ ten'upasaṅkami.|| ||
Upasaṅkamitvā eka-m-antaṃ aṭṭhāsi.|| ||
4. Addasā kho AggikaBhāradvājo brāhmaṇo Bhagavantaṃ piṇḍāya carantaṃ.|| ||
Disvāna Bhagavantaṃ gāthāya ajjhabhāsi:
"Tīhi vijjāhi sampanno jātimā Sutavā bahu,||
vijjā-caraṇa-sampanno so'maṃ bhuñjeyya pāyasan" ti.|| ||
5. [Bhagavā:]|| ||
"Bahum pi palapaṃ jappaṃ na jaccā hoti brāhmaṇo,||
Anto kasambusaṃkiliṭṭho kuhanā parivārito.||
[167] pubbe-nivāsaṃ yo vedī saggāpāyañ ca passati,||
Atho jātikkhayaṃ patto abhiññā vosito muni.||
Etāhi tīhi vijjāhi tevijjo hoti brāhmaṇo,||
vijjā-caraṇa-sampanno so maṃ bhuñjeyya pāyasan" ti.|| ||
6. [Brāhmaṇo:]|| ||
"Bhuñjatu bhavaṃ bho Gotamo||
Brāhmaṇo bhavan" ti.|| ||
7. [Bhagavā:]|| ||
"Gāthābhigītaṃ me abhojaneyyaṃ||
sampassataṃ brāhmaṇa n'esa dhammo,||
Gāthābhigītaṃ panudanti buddhā||
dhamme sati brāhmaṇa vutti-r-esā.||
Aññena ce kevalinaṃ mahesiṃ||
khīṇ'āsavaṃ kukkuccavūpasantaṃ,||
Annena pānena upaṭṭhahassu||
khettaṃ hi taṃ puññapekkhassa hotī" ti.|| ||
8. Evaṃ vutte AggikaBhāradvājo brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rupāni dakkhintī ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi Dhammañ ca bhikkhu-saṅghañ ca.|| ||
Labheyyāhaṃ bhoto Gotamassa santike pabbajjaṃ,||
labheyyaṃ upasampadan" ti.|| ||
Alattha kho AggikaBhāradvājo brāhmaṇo Bhagavato santike pabbajjaṃ,||
alattha upasampadaṃ.|| ||
Acir'ūpasampanno kho pan'āyasmā AggikaBhāradvājo vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaṃ pabbajanti,||
tad anuttaraṃ Brahma-cariya-pariyosānaṃ diṭṭhe'va dhamme sayaṃ abhiññā sacchi-katvā upasampajja vihāsi.|| ||
"Khīṇā jāti,||
vusitaṃ Brahma-cariyaṃ,||
kataṃ karaṇīyaṃ.||
Nāparaṃ itthattāyā" ti abbhaññāsi.|| ||
Aññataro ca pan'āyasmā Bhāradvājo arahataṃ ahosī ti.|| ||
§
Sutta 9
Sundarika Suttaṃ
[9.1][pts] Evaṃ me sutaṃ:|| ||
Ekaṃ samayaṃ Bhagavā Kosalesu viharati Sundarikāya nadiyā tīre.|| ||
2. Tena kho pana samayena Sundarika Bhāradvājo brāhmaṇo Sundarikāya nadiyā tīre aggiṃ juhati aggihuttaṃ paricarati.|| ||
3. Atha kho Sundarika Bhāradvājo brāhmaṇo aggiṃ juhitvā aggihuttaṃ paricaritvā uṭṭhāy'āsanā samantā catu-d-disā anuvilokesi:|| ||
"Ko nu kho imaṃ havyasesaṃ bhuñjeyyāsī" ti?|| ||
4. Addasā kho Sundarika Bhāradvājo brāhmaṇo Bhagavantaṃ aññatarasmiṃ rukkha-mūle sasīsaṃ pārutaṃ nisinnaṃ.|| ||
Disvāna vāmena hatthena havyasesaṃ gahetvā dakkhiṇa hatthena kamaṇḍaluṃ gahetvā yena Bhagavā ten'upasaṅkami.|| ||
5. Atha kho Bhagavā Sundarika Bhāradvājassa brāhmaṇassa padasaddena sīsaṃ vivari.|| ||
6. Atha kho Sundarika Bhāradvājo brāhmaṇo muṇḍo [168] "Ayaṃ bhavaṃ muṇḍako ayaṃ bhavan" ti tato ca puna nivattitukāmo ahosi.|| ||
7. Atha kho Sundarika Bhāradvājassa brāhmaṇassa etad ahosi:|| ||
"Muṇḍā pi hi idh'ekacce brāhmaṇā bhavanti.|| ||
Yam nūn-ā-haṃ upasaṅkamitvā jātiṃ puccheyyan" ti.|| ||
8. Atha kho Sundarika Bhāradvājo brāhmaṇo yena Bhagavā ten'upasṅakami.|| ||
Upasaṅkamitvā Bhagavantaṃ etad avoca:|| ||
"Kiṃ jacco bhavan" ti.|| ||
9. [Bhagavā:]|| ||
"Mā jātiṃ puccha caraṇañ ca puccha||
kaṭṭhā have jāyati jātavedo,||
Nīcā kulīno pi munī dhitīmā||
ājāniyo hoti hirīnisedho.|| ||
Saccena danto damasā upeto||
vedantagū vusitabrahma-cariyo,||
Yaññūpanīto tam upavhayetha||
kālena so juhati dakkhiṇeyyo" ti.|| ||
10. [Brāhmaṇo:]|| ||
"Addhā suyiṭṭhaṃ suhutaṃ mama-y-idaṃ||
yaṃ tādisaṃ vedagum addasāmi,||
Tumhādisānaṃ hi adassanena||
añño jano bhuñjati havyasesan" ti.|| ||
Bhuñjatu bhavaṃ Gotamo.|| ||
Brāhmaṇo bhavan" ti.|| ||
11. [Bhagavā:)|| ||
"Gāthābhigītaṃ me abhojaneyyaṃ||
sampassataṃ brāhmaṇa n'esadhammo,||
Gāthābhigītaṃ panudanti Buddhā||
Dhamme sati brāhmaṇa vutti-r-esā.|| ||
Aññena ca kevalinaṃ mahesiṃ||
khīṇ'āsavaṃ kukkuccavūpasantaṃ,||
Annena pānena upaṭṭhahassu||
khettaṃ hi taṃ puññapekkhassa hotī" ti.|| ||
[Brāhmaṇo:]|| ||
12. "Atha kassa c'āhaṃ bho Gotama imaṃ havyasesaṃ dammī" ti.|| ||
13. [Bhagavā:]|| ||
"Na khv'āhaṃ brāhmaṇa passāmi sa-devake loke sa-Mārake sa-brahmake sa-s-samaṇa-brāhmaṇiyā pajāya sadeva-manussāya yass'eso havyaseso bhutto sammā pariṇāmaṃ [169] gaccheyya aññatra brāhmaṇa Tathāgatassa vā Tathāgata-sāvakassa vā.|| ||
Tena hi tvaṃ brāhmaṇa taṃ havyasesaṃ appaharite vā chaḍḍehi appāṇake vā udeka opilāpehī" ti.|| ||
14. Atha kho Sundarika Bhāradvājo brāhamaṇo taṃ havyasesaṃ1 appāṇake udake opilāpesi.|| ||
15. Atha kho so havyaseso udake pakkhitto cicciṭāyati,||
ciṭiciṭāyati,||
sandhūpāyati,||
sampadhūpāyati.|| ||
Seyyathā pi nāma phālo divasa1santatto udake pakkhitto cicciṭāyati,||
ciṭiciṭāyati,||
sandhūpāyati,||
sampadhūpāyati,||
evam eva so havyaseso udake pakkhitto cicciṭāyati,||
ciṭiciṭāyati,||
sandhūpāyati,||
sampadhūpāyati.|| ||
16. Atha kho Sundarika Bhāradvājo brāhmaṇo saṃviggo loma-haṭṭha-jāto yena Bhagavā ten'upasaṅkami.|| ||
Upasaṅkamitvā eka-m-antaṃ aṭṭhāsi.|| ||
17. Eka-m-antaṃ ṭhitaṃ kho Sundarika Bhāradvājaṃ brāhmaṇaṃ Bhagavā gāthāhi ajjhabhāsi:|| ||
"Mā brāhmaṇa dāru samādahāno||
suddhiṃ amaññi bahiddhā hi etaṃ,||
Na hi tena suddhiṃ kusalā vadanti||
yo bāhirena parisuddhim icche.|| ||
Hitvā ahaṃ brāhmaṇa dārudāhaṃ||
ajjhattam eva jalayāmi jotiṃ,||
Niccaggini niccasamāhitatto||
arahaṃ ahaṃ Brahma-cariyaṃ carāmi.|| ||
Māno hi te brāhmaṇa khāribhāro||
kodho dhūmo bhasmani mosavajjaṃ,||
jivhā sujā hadayaṃ jotiṭṭhānaṃ||
attā sudanto purisassa joti.|| ||
Dhammo rahado brāhmaṇa sīlatittho||
anāvilo sabbhi sataṃ pasattho,||
Yattha have vedaguno sinātā||
anallīnagattā va taranti pāraṃ.|| ||
Saccaṃ dhammo saṃyamo Brahma-cariyaṃ||
majjhesitā brāhmaṇa brahmapatti,||
[170] satujju-bhūtesu namo karohi||
tam ahaṃ naraṃ dhammasārīti brūmī" ti.|| ||
18. Evaṃ vutte Sundarika Bhāradvājo brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rupāni dakkhintī.|| ||
Evam evaṃ bhotā Gotamena aneka-pariyāyena dhammo pakāsito.|| ||
"Es'āhaṃ bhavantaṃ Gotamaṃ saraṇaṃ gacchāmi Dhammañ ca bhikkhu-saṅghañ ca.|| ||
Labheyyāhaṃ bhoto Gotamassa santike pabbajjaṃ,||
labheyyaṃ upasampadan" ti.|| ||
Alattha kho Sundarika Bhāradvājo brāhmaṇo Bhagavato santike pabbajjaṃ,||
alattha upasampadaṃ.|| ||
Acir'ūpasampanno kho pan'āyasmā Sundarika Bhāradvājo vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaṃ pabbajanti,||
tad anuttaraṃ Brahma-cariya-pariyosānaṃ diṭṭhe'va dhamme sayaṃ abhiññā sacchi-katvā upasampajja vihāsi.|| ||
"Khīṇā jāti,||
vusitaṃ Brahma-cariyaṃ,||
kataṃ karaṇīyaṃ.||
Nāparaṃ itthattāyā" ti abbhaññāsi.|| ||
Aññataro ca pan'āyasmā Bhāradvājo arahataṃ ahosī.|| ||
§
Sutta 10
Bahudhītu Suttaṃ
[10.1][pts] Evaṃ me sutaṃ:|| ||
Ekaṃ samayaṃ Bhagavā Kosalesu viharati aññatarasmiṃ vana-saṇḍe.|| ||
3. Tena kho pana samayena aññatarassa Bhāradvājagottassa brāhmaṇassa catuddasa balivaddā naṭṭhā honti.|| ||
3. Atha kho Bhāradvājagottā brāhmaṇo te balivadde gavesanto yena so vana-saṇḍo ten'upasaṅkami.|| ||
Upasaṅkamitvā addasa Bhagavantaṃ tasmiṃ vana-saṇḍe nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭha-petvā.|| ||
4. Disvāna yena Bhagavā ten'upasaṅkami.|| ||
Upasaṅkamitvā Bhagavato santike imā gāthāyo abhāsi:|| ||
"Na hi nūn'imassa samaṇassa balivaddā catuddasa,||
Ajja saṭṭhiṃ na dissanti ten'āyaṃ samaṇo sukhī.|| ||
Na hi nūn'imassa samaṇassa tilā khettasmiṃ pāpakā,||
Ekapaṇṇā dvipaṇṇā ca ten'āyaṃ samaṇo sukhī.|| ||
Na hi nūn'imassa samaṇassa tucachakoṭṭhasmiṃ mūsikā,||
Ussoḷhikāya naccanti ten'āyaṃ samaṇo sukhī.|| ||
Na hi nūn'imassa samaṇassa santhāro sattamāsiko,||
Uppāṭakehi saṃchanno ten'āyaṃ samaṇo sukhī.|| ||
Na hi nūn'imassa samaṇassa vidhavā satta dhitaro,||
Ekaputtā dviputtā ca ten'āyaṃ samaṇo sukhī.|| ||
Na hi nūn'imassa samaṇassa piṅgalā tilakā hatā,||
Sottaṃ pādena bodheti ten'āyaṃ samaṇo sukhī.|| ||
Na hi nūn'imassa samaṇassa paccūsamhi iṇāyikā,||
Detha dethā ti codenti ten'āyaṃ samaṇo sukhī" ti.|| ||
[171] 5. [Bhagavā:]|| ||
"Na hi mayhaṃ brāhmaṇa balivaddā catuddasa,||
Ajja saṭṭhi na dissanti tenāhaṃ brāhmaṇā sukhī.|| ||
Na hi mayhaṃ brāhmaṇa tilā khettasmim pāpakā||
Ekapaṇṇā dvipaṇṇā ca tenāhaṃ brāhmaṇā sukhī.|| ||
Na hi mayhaṃ brāhmaṇa tucchakoṭṭhasmiṃ mūsikā,||
Ussoḷahikāya naccanti tenāhaṃ brāhmaṇā sukhī.|| ||
Na hi mayhaṃ brāhmaṇa santhāro sattamāsiko,||
Uppāṭakehi saṃchanno tenāhaṃ brāhmaṇā sukhī.|| ||
Na hi mayhaṃ brāhmaṇa vidhavā sattadhītaro,||
Ekaputtā dviputtā ca tenāhaṃ brāhmaṇā sukhī.|| ||
Na hi mayhaṃ brāhmaṇa piṅgalā tilakā hatā,||
Sottaṃ pādena bodheti tenāhaṃ brāhmaṇā sukhī.|| ||
Na hi mayhaṃ brāhmaṇa paccūsamhi iṇāyikā,||
Detha dethā ti codenti tenāhaṃ brāhmaṇā sukhī" ti.|| ||
Evaṃ vutte Bhāradvājagotto brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rupāni dakkhintī ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi Dhammañ ca bhikkhu-saṅghañ ca.|| ||
Labheyyāhaṃ bhoto Gotamassa santike pabbajjaṃ,||
labheyyaṃ upasampadan" ti.|| ||
Alattha kho Bhāradvājagotto brāhmaṇo Bhagavato santike pabbajjaṃ,||
alattha upasampadaṃ.|| ||
Acir'ūpasampanno kho pan'āyasmā Bhāradvājagotto brāhmaṇo vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaṃ pabbajanti,||
tad anuttaraṃ Brahma-cariya-pariyosānaṃ diṭṭhe'va dhamme sayaṃ abhiññā sacchi-katvā upasampajja vihāsi.|| ||
"Khīṇā jāti,||
vusitaṃ Brahma-cariyaṃ,||
kataṃ karaṇīyaṃ.||
Nāparaṃ itthattāyā" ti abbhaññāsi.|| ||
Aññataro ca pan'āyasmā Bhāradvājo arahataṃ ahosī.|| ||
Upāsaka Vagga
Sutta 11
Kasī Suttaṃ
[11.1][pts][than][ati-piya] Evaṃ me sutaṃ:|| ||
Ekaṃ samayaṃ Bhagavā Magadhesu viharati Dakkhiṇāgirismiṃ Ekanālāyaṃ brāhmaṇa-gāme.|| ||
2. Tena kho pana samayena Kasī Bhāradvājassa brāhmaṇassa pañca-mattāni naṅgalasatāni payuttāni honti vappakāle.|| ||
3. Atha kho Bhagavā pubnhasamayaṃ nivāsetvā patta-cīvaram ādāya yena Kasī Bhāradvājassa brāhmaṇassa kammanto ten'upasaṅkami.|| ||
4. Tena kho pana samayena Kasī Bhāradvājassa brāhmaṇassa parivesanā vattati.|| ||
5. Atha kho Bhagavā yena parivesanā ten'upasaṅkami.|| ||
Upasaṅkamitvā eka-m-antaṃ aṭṭhāsi.|| ||
6. Addasā kho Kasī Bhāradvājo brāhmaṇo Bhagavantaṃ piṇḍāya ṭhitaṃ.|| ||
Disvāna Bhagavantaṃ etad avoca:|| ||
"Ahaṃ kho samaṇa kasāmi ca vapāmi ca.|| ||
Kasitvā ca vapitvā ca bhuñjāmi.|| ||
Tvam pi samaṇa kasassu ca vapassu ca.|| ||
Kasitvā ca vapitvā ca bhuñjassū" ti.|| ||
7. [Bhagavā:]
"Aham pi kho brāhmaṇa kasāmi ca vapāmi ca.
Kasitvā ca vapitvā ca bhūñjāmī" ti.|| ||
8. [Brāhmaṇo:]
"Na kho mayaṃ passāma bhoto Gotamassa yugaṃ vā naṅgalaṃ vā phālaṃ vā pācanaṃ vā balivadde vā.|| ||
Atha ca pana bhavaṃ Gotamo evam āha:
Aham pi kho brāhmaṇa kasāmi ca vapāmi ca kasitvā ca vapitvā ca bhuñjāmī" ti.|| ||
9. Atha kho Kasī Bhāradvājo brāhmaṇo Bhagavantaṃ gāthāya ajjhabhāsi:|| ||
"Kassako paṭijānāsi na ca passāmi te kasiṃ,||
Kassako pucchito brūhi kathaṃ jānemu taṃ kasin" ti?|| ||
10. [Bhagavā:]|| ||
"Saddhā bījaṃ tapo vuṭṭhī paññā me yuganaṅgalaṃ,||
Hiri īsā mano yottaṃ sati me phālapācanaṃ.||
Kāyagutto vacīgutto āhāre udare yato,||
Saccaṃ karomi niddānaṃ soraccaṃ me pamocanaṃ.||
[173] Viriyaṃ me dhuradhorayhaṃ yoga-k-khemādhivāhanaṃ,||
Gacchati anivattantaṃ yattha gantvā na socati,||
Evam esā kasī kaṭṭhā sā hoti amatapphalā,||
Etaṃ kasiṃ kasitvāna sabba-dukkhā pamuccatī" ti.|| ||
11. [Brāhmaṇo:]
"Bhuñjatu bhavaṃ Gotamo.|| ||
Kassako bhavaṃ Gotamo, yañ hi Gotamo amataphalaṃ pi kasiṃ kasatī" ti.|| ||
[Bhagavā:]
"Gāthābhigītam me abhojaneyyaṃ||
sampassataṃ brāhmaṇa n'esa dhammo,||
Gāthābhigītaṃ panudanti buddhā||
dhamme sati brāhmaṇa vutti-r-esā.||
Aññena ce kevalinaṃ mahesiṃ||
khīṇ'āsavaṃ kukkuccavūpasantaṃ,||
Annena pānena upaṭṭhahassu||
khettañ hi taṃ puññapekkhassa hotī" ti.|| ||
Evaṃ vutte Kasī Bhāradvājo brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rūpāni dakkhintī ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi||
Dhammañ ca||
bhikkhu-saṅghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
§
Sutta 12
Udaya Suttaṃ
[12.1][pts][olen][than] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ -|| ||
2. Atha kho Bhagavā pubbaṇha-samayaṃ nivāsetvā patta-cīvaram ādāya yena Udayassa brāhmaṇassa nivesanaṃ ten'upasaṅkami.|| ||
3. Atha kho Udayo brāhmaṇo Bhagavato pattaṃ odanena pūresi.|| ||
4. Dutiyam pi kho Bhagavā pubbaṇha-samayaṃ nivāsetvā patta-cīvaram ādāya yena Udayassa brāhmaṇassa nivesanaṃ ten'upasaṅkami.|| ||
Dutiyam pi kho Udayo brāhmaṇo Bhagavato pattaṃ odanena pūresi.|| ||
5. Tatiyami pi kho Bhagavā pubnhasamayaṃ nivāsetvā patta-cīvaram ādāya yena Udayassa brāhmaṇassa nivesanaṃ ten'upasaṅkami.|| ||
Tatiyam pi kho Udayo brāhmaṇo Bhagavato pattaṃ [174] odanena pūretvā Bhagavantaṃ etad avoca:|| ||
"Pakaṭṭhako'yaṃ samaṇo Gotamo puna-p-punaṃ āga-c-chatī" ti.|| ||
[Bhagavā:]|| ||
"Puna-p-punaṃ c'eva vapanti bījaṃ||
puna-p-punaṃ vassati devarājā,||
Puna-p-punaṃ khettaṃ kasanti kassakā||
puna-p-punaṃ dhaññamupeti raṭṭhaṃ||
Puna-p-punaṃ yā cakā yā cayanti||
puna-p-punaṃ dānapatī dadanti,||
Puna-p-punaṃ dānapatī daditvā||
puna-p-punaṃ saggamupenti ṭhānaṃ.||
Puna-p-punaṃ khīranikā duhanti||
puna-p-punaṃ vaccho upeti mātaraṃ,||
Puna-p-punaṃ kilamati phandati ca||
puna-p-punaṃ gabbhamupeti mando.||
Puna-p-punaṃ jāyati mīyati ca||
puna-p-punaṃ sīvathikaṃ haranti,||
Maggañ ca laddhā apuna-b-bhavāya||
na puna-p-punaṃ jāyati bhūripañño" ti.|| ||
Evaṃ vutte Udayo brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rūpāni dakkhintī.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi||
Dhammañ ca||
bhikkhu-saṅghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
§
Sutta 13
Devahita Suttaṃ
[13.1][pts] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ-|| ||
2. Tena kho pana samayena Bhagavā vātehi ābādhiko hoti.|| ||
Āyasmā ca Upavāno Bhagavato upaṭṭhāko hoti.|| ||
3. Atha kho Bhagavā āyasmantaṃ Upavānaṃ āmantesi:|| ||
"Iṅgha me tvaṃ Upavāna uṇhodakaṃ jānāhī" ti.|| ||
4. "Evaṃ bhante" ti kho āyasmā Upavāno Bhagavato paṭi-s-sutvā nivāsetvā patta-cīvaram ādāya yena Devahitassa brāhmaṇassa nivesanaṃ ten'upasaṅkami.|| ||
Upasaṅkamitvā tuṇhī-bhūto eka-m-antaṃ aṭṭhāsi.|| ||
5. Addasā kho Devahito brāhmaṇo āyasmantaṃ Upavānaṃ tuṇhī-bhūtaṃ eka-m-antaṃ ṭhitaṃ.|| ||
Disvāna āyasmantaṃ Upavānaṃ gāthāya ajjhabhāsi:|| ||
[175] "Tuṇhībhuto bhavaṃ tiṭṭhaṃ muṇḍo saṅghāṭipāruto,||
Kiṃ patthayāno kiṃ esaṃ kiṃ nu yācitum āgato" ti?.|| ||
6. [Upavāno:]|| ||
"Arahaṃ Sugato loke vāteh'ābādhiko muni,||
Sace uṇhodakaṃ atthi munino dehi brāhmaṇa.||
Pūjito pūjaneyyānaṃ sakkareyyāna sakkato,||
Apacito apaceyyānaṃ tassa icchāmi hātave" ti.|| ||
7. Atha kho Devahito brāhmaṇo uṇhodakassa kājaṃ purisena gāhāpetvā phāṇitassa ca puṭaṃ āyasmato Upavānassa pādāsi.|| ||
8. Atha kho āyasmā Upavāno yena Bhagavā ten'upasaṅkami.|| ||
Upasaṅkamitvā Bhagavantaṃ uṇhodakena nahāpetvā uṇhodakena phāṇitaṃ āloḷetvā Bhagavato pādāsi.|| ||
9. Atha kho Bhagavato so ābādho paṭippassambhi.|| ||
10. Atha kho Devahito brāhmaṇo yena Bhagavā ten'upasaṅkami.|| ||
Upasaṅkamitvā Bhagavatā saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
11. Eka-m-antaṃ nisinno kho Devahito brāhmaṇo Bhagavantaṃ gāthāya ajjhabhāsi.|| ||
"Kattha dajjā deyya-dhammaṃ kattha dinnaṃ maha-p-phalaṃ,||
Kathaṃ hi yajamānassa katthaṃ ijjhati dakkhiṇā" ti?|| ||
12. [Bhagavā:]|| ||
"Pubbe-nivāsaṃ yo vedī saggāpāyañ ca passati,||
Atho jātikkhayaṃ patto abhiññāvosito muni.||
Ettha dajjā deyya-dhammaṃ ettha dinnaṃ maha-p-phalaṃ,||
Evaṃ hi yajamānassa evaṃ ijjhati dakkhiṇā" ti.|| ||
13. Evaṃ vutte Devahito brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rūpāni dakkhintī ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi||
Dhammañ ca||
bhikkhu-saṅghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
§
Sutta 14
Mahāsāḷa Suttaṃ
[14.1][pts][than] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ -|| ||
2. Atha kho aññataro brāhmaṇa-mahāsāḷo lūkho lūkhapā- [176] puraṇo yena Bhagavā ten'upasaṅkami.|| ||
Upasaṅkamitvā Bhagavatā saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
3. Eka-m-antaṃ nisinnaṃ kho taṃ brāhmaṇa-mahāsāḷaṃ Bhagavā etad avoca.|| ||
"Kin nu tvaṃ brāhmaṇa lūkho lūkhapāpuraṇo" ti?|| ||
4. [Brāhmaṇo:]|| ||
"Idha me bho Gotama cattāro puttā.|| ||
Te maṃ dārehi sampuccha gharā nikkhāmentī" ti.|| ||
5. [Bhagavā:]|| ||
"Tena hi tvaṃ brāhmaṇa imā gāthāyo pariyāpuṇitvā sabhāyaṃ mahā-jana-kāye sanni-patite puttesu ca sanni-sinnesu bhāsassu:
'Ye hi jātehi nandissaṃ yesañ ca bhavam icchisaṃ,||
Te maṃ dārehi sampuccha sā va vārenti sūkaraṃ.||
Asantā kira maṃ jammā tāta tātā ti bhāsare,||
Rakkhasā puttarūpena te jahanti vayogataṃ.
Asso va jiṇṇo nibbhogo khādanā apanīyati,||
Bālakānaṃ pitā thero parāgāresu bhikkhati.||
Daṇḍo va kira me seyyo yañ ce puttā anassavā||
Caṇḍam pi goṇaṃ vāreti atho caṇḍam pi kukkuraṃ.||
Andhakāre pure hoti gambhīre gādhaṃ edhati,||
Daṇḍassa anubhāvena khalitvā paṭitiṭṭhatī' ti.|| ||
6. Atha kho so brāhmaṇa mahāsāḷo Bhagavato santike imā gāthāyo pariyāpuṇitvā sabhāyaṃ mahā-jana-kāye sanni-patite puttesu ca sanni-sinnesu abhāsi.|| ||
"Ye hi jātehi nandissaṃ yesañ ca bhavam icchisaṃ,||
Te maṃ dārehi sampuccha sā va vārenti sūkaraṃ.||
Asantā kira maṃ jammā tāta tātā ti bhāsare,||
Rakkhasā puttarūpena TE jahanti vayogataṃ.||
Asso va jiṇṇo nibbhogo khādanā apanīyati,
Bālakānaṃ pitā thero parāgāresu bhikkhati.||
Daṇḍova kira me seyyo yañ ce puttā anassavā,||
Caṇḍam pi goṇaṃ vāreti atho caṇḍam pi kukkuraṃ.||
Andhakāre pure hoti gambhīre gādhaṃ edhati,||
Daṇḍassa anubhāvena khalitvā paṭitiṭṭhatī" ti.|| ||
[177] 7. Atha kho naṃ brāhmaṇa-mahāsāḷaṃ puttā gharaṃ netvā nāhāpetvā paccekaṃ dussayugena acchādesuṃ.|| ||
8. Atha kho so brāhmaṇa-mahāsāḷo ekaṃ dussayugaṃ ādāya yena Bhagavā ten'upasaṅkami.|| ||
Upasaṅkamitvā Bhagavatā saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
9. Eka-m-antaṃ nisinanno kho so brāhmaṇa-mahāsāḷo Bhagavantaṃ etad avoca:|| ||
"Mayaṃ bho Gotama brāhmaṇā nāma ācariyassa ācariyadhanaṃ pariyesāma.|| ||
Paṭigaṇhātu me bhavaṃ Gotamo ācariyadhanan" ti.|| ||
10. Paṭiggahesi Bhagavā anukampaṃ upādāya.|| ||
11. Atha kho brāhmaṇa-mahāsāḷo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rūpāni dakkhintī" ti.|| ||
Evam evaṃ bhotā Gotamena aneka-pariyāyena Dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi||
Dhammañ ca||
bhikkhu-saṅghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
§
Sutta 15
Mānatthaddha Suttaṃ
[15.1][pts] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ-|| ||
2. Tena kho pana samayena Mānatthaddho nāma brāhmaṇo Sāvatthiyaṃ paṭivasati.|| ||
So n'eva mātaraṃ abhivādeti||
na pitaraṃ abhivādeti,||
na ācariyaṃ abhivādeti,||
na jeṭṭhabhātaraṃ abhivādeti.|| ||
3. Tena kho pana samayena Bhagavā mahatiyā parisāya parivuto dhammaṃ desesi.|| ||
4. Atha kho Mānatthaddhassa brāhmaṇassa etad ahosi:|| ||
"Ayaṃ kho Samaṇo Gotamo mahatiyā parisāya parivuto dhammaṃ deseti.|| ||
Yaṃ nūn-ā-haṃ yena Samaṇo Gotamo ten'upasaṅkameyyaṃ.|| ||
Sace maṃ Samaṇo Gotamo ālapissati,||
aham pi taṃ ālapissāmi.|| ||
No ce maṃ Samaṇo Gotamo ālapissati||
aham pi taṃ n'ālapissasāmī" ti.|| ||
5. Atha kho Mānatthaddho brāhmaṇo yena Bhagavā ten'upasaṅkami.|| ||
Upasaṅkamitvā tuṇhī-bhūto eka-m-antaṃ aṭṭhāsi.|| ||
6. Atha kho Bhagavā taṃ n'ālapi.|| ||
7. Atha kho Mānatthaddho brāhmaṇo "nāyaṃ Samaṇo Gotamo kiñci jānātī" ti tato puna nivattitukāmo ahosi.|| ||
[178] 8. Atha kho Bhagavā Mānatthaddhassa brāhmaṇassa cetasā ceto-parivitakkam aññāya Mānatthaddhaṃ brāhmaṇaṃ gāthāya ajjhabhāsi:|| ||
"Na mānaṃ brūhmaṇā sādhu atthi kassīdha brāhmaṇā,||
Yena atthena āgacchi tam evam anubrūhaye" ti.|| ||
9. Atha kho Mānatthaddho brāhmaṇo "cittaṃ me Samaṇo Gotamo jānātī" ti tatth'eva Bhagavato pādesu sirasā nipatitvā Bhagavato pādāni mukhena paricumbati,||
pāṇīhī ca parisambāhati,||
nāmañ ca sāveti:|| ||
"Mānatthaddhohaṃ bho Gotama||
Mānatthaddhohaṃ bho gotamā" ti.|| ||
10. Atha kho sā parisā abbhutacittajātā ahosi.|| ||
"Acchariyaṃ vata bho||
abbhūtaṃ vata bho.|| ||
Ayaṃ hi Mānatthaddho brāhmaṇo n'eva mātaraṃ abhivādeti||
na pitaraṃ abhivādeti||
na ācariyaṃ abhivādeti||
na jeṭṭhabhātaraṃ abhivādeti.|| ||
Atha ca pana Samaṇe Gotame eva-rūpaṃ paramaṃ nipaccākāraṃ karotī" ti.|| ||
11. Atha kho Bhagavā Mānatthaddhaṃ brāhmaṇaṃ etad avoca:|| ||
"Alaṃ brāhmaṇa.|| ||
Uṭṭhehi sake āsane nisīda,||
yato te mayi cittaṃ pasannan" ti.|| ||
12. Atha kho Mānatthaddhaṃ brāhmaṇo sake āsane nisīditvā Bhagavantaṃ gāthāya ajjhabhāsi:|| ||
"Kesu na mānaṃ kayirātha kesu assa sagāravo,||
Ky assa apacitā assu ky assa sādhu supūjitā" ti.|| ||
[Bhagavā:]|| ||
"Mātari pitari vā pi atho jeṭṭhamhi bhātari,||
Ācariye catutthaṃhi tesu na mānaṃ kayirātha.||
Tesu assa sagāravo ty assu apacitā assu||
ty assu sādhu supūjitā.||
Arahante sītibhūte katakicce anāsave,||
Nihacca mānaṃ atthaddho te namassa anuttare" ti.|| ||
14. Evaṃ vutte Mānatthaddho brāhamaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto 'rūpāni dakkhintī' ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi||
Dhammañ ca||
bhikkhu-saṅghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
§
Sutta 16
Paccanīka Suttaṃ
[16.1][pts][than] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
2. Tena kho pana samayena Paccanīkasāto nāma brāhmaṇo Sāvatthiyaṃ paṭivasati.|| ||
3. Atha kho Paccanīkasātassa brāhmaṇassa etad ahosi.|| ||
"Yaṃ nūn-ā-haṃ yena Samaṇo Gotamo ten'upasaṅkameyyaṃ,||
yaṃ yad eva Samaṇo Gotamo bhāsissati,||
taṃ tad ev'assāhaṃ paccanīkāssan" ti.|| ||
4. Tena kho pana samayana Bhagavā ajjhokāse caṅkamati.|| ||
5. Atha kho Paccanīkasāto brāhmaṇo yena Bhagavā ten'upasaṅkami.|| ||
Upasaṅkamitvā Bhagavantaṃ caṅkamantaṃ anucaṅkamamāno Bhagavantaṃ etad avoca:|| ||
"Bhaṇa samaṇa dhamman" ti.|| ||
6. [Bhagavā:]|| ||
"Na Paccanīkasātena suvijānaṃ su-bhāsitaṃ,||
Upakkiliṭṭhacittena sārambhabahulena ca||
Yo ca vineyya sārambhaṃ a-p-pasādañ ca cetaso,||
Āghātaṃ paṭinissajja sa ve jaññā su-bhāsitan" ti.|| ||
7. Evaṃ vutte Paccanīkasāto brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto 'rūpāni dakkhintī' ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi||
Dhammañ ca||
bhikkhu-saṅghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
§
Sutta 17
Nava-Kammika Suttaṃ
[17.1][pts][than] Evaṃ me sutaṃ:|| ||
Ekaṃ samayaṃ Bhagavā Kosalesu viharati aññatarasmiṃ vana-saṇḍe.|| ||
2. Tena kho pana samayena Navakammika Bhāradvājo brāhmaṇo tasmiṃ vana-saṇḍe kammantaṃ kārāpeti.|| ||
3. Addasā kho Navakammika Bhāradvājo brāhmaṇo Bhagavantaṃ aññatarasmiṃ sālarukkha-mūle nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭha-petvā.|| ||
4. Disvān'assa etad ahosi:
"Ahaṃ kho pana imasmiṃ vana-saṇḍe kammantaṃ kārāpento ramāmi.|| ||
Ayaṃ Samaṇo Gotamo kiṃ kārāpento ramatī" ti?|| ||
5. Atha kho Navakammika Bhāradvājo brāhmaṇo yena [180] Bhagavā ten'upasaṅkami.|| ||
Upasaṅkamitvā Bhagavantaṃ gāthāya ajjhabhāsi.|| ||
"Ke nu kammantā kayiranti bhikkhu sālavane tava,||
Yad ekako araññasmiṃ ratiṃ vindati Gotamā" ti?|| ||
6. [Bhagavā:]|| ||
"Na me vanasmiṃ karaṇīyam atthi ucchinna-mūlaṃ me vanaṃ visūkaṃ,||
So'haṃ vane nibbanatho visallo||
eko rame aratiṃ vippahāyā" ti.|| ||
7. Evaṃ vutte Navakammika Bhāradvājo brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto 'rūpāni dakkhintī' ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi||
Dhammañ ca||
bhikkhu-saṅghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
§
Sutta 18
Kaṭṭhahāra Suttaṃ
[18.1][pts][than] Evaṃ me sutaṃ:|| ||
Ekaṃ samayaṃ Bhagavā Kosalesu viharati aññatarasmiṃ vana-saṇḍe.|| ||
2. Tena kho pana samayena aññatarasmiṃ Bhāradvājagottassa brāhmaṇassa sambahulā antevāsikā kaṭṭhahārakā māṇavakā yena so vana-saṇḍo ten'upasaṅkamiṃsu.|| ||
3. Upasaṅkamitvā addasaṃsu Bhagavantaṃ tasmiṃ vana-saṇḍe nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭha-petvā.|| ||
Disvāna yena Bhāradvājagotto brāhmaṇo ten'upasaṅkamiṃsu.|| ||
4. Upasaṅkamitvā Bhāradvājagottaṃ brāhmaṇaṃ etad avocuṃ:|| ||
"Yagghe bhavaṃ jāneyya asukasmiṃ vana-saṇḍe samaṇo nisinno pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭha-petvā" ti.|| ||
5. Atha kho Bhāradvājagotto brāhmaṇo tehi māṇavakehi saddhiṃ yena so vana-saṇḍo ten'upasaṅkami.|| ||
Upasaṅkamitvā addasā kho Bhagavantaṃ tasmiṃ vana-saṇḍe nisinnaṃ pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭha-petvā.|| ||
Disvāna yena Bhagavā ten'upasaṅkami.|| ||
Upasaṅkamitvā Bhagavantaṃ gāthāhi ajjhabhāsi:|| ||
"Gamhīrarūpe bahubherave vane||
suññaṃ araññaṃ vijanaṃ vigāhiya,||
[181] aniñjamānena ṭhitena vaggunā||
sucārurūpaṃ vata bhikkhu jhāyasi.|| ||
Na yattha gītā na pi yattha vāditaṃ||
eko araññe vanamassito muni,||
accherarūpaṃ paṭibhāti maṃ idaṃ||
yad ekako pītimano vane vase.|| ||
Maññā mahaṃ lokādhipatī saha-vyataṃ||
ākaṅkha-māno tidivaṃ anuttaraṃ,||
kasmā bhavaṃ vijanam araññam assito||
tapo idha kubbasi brahmapattiyā" ti.|| ||
6. [Bhagavā:]|| ||
"Yā kāci kaṅkhā abhinandanā vā||
aneka-dhātusu puthū sadā sitā,||
aññāṇamūlappabhavā pajappitā||
sabbā mayā byantikatā samūlikā.|| ||
So'haṃ akaṅkho apiho anūpayo||
sabbesu dhammesu visuddhadassano,||
Pappuyya sambodhim anuttaraṃ sivaṃ||
jhāyām'ahaṃ brāhmaṇa raho vīsārado" ti.|| ||
Evaṃ vutte Bhāradvājagotto brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto 'rūpāni dakkhintī' ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi||
Dhammañ ca||
bhikkhu-saṅghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
§
Sutta 19
Mātu-Posaka Suttaṃ
[19.1][pts] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ -|| ||
2. Atha kho Mātu-posako brāhmaṇo yena Bhagavā ten'upasaṅkami.|| ||
Upasaṅkamitvā Bhagavatā saddhiṃ sammodi.|| ||
Sammodinīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
3. Eka-m-antaṃ nisinno kho Mātu-posako brāhmaṇo Bhagavantaṃ etad avoca:|| ||
"Ahaṃ hi bho Gotama dhammena bhikkhaṃ pariyesāmi.|| ||
Dhammena bhikkhaṃ pariyesitvā mātā-pitaro posemi.|| ||
Kacc'āhaṃ bho Gotama evaṃ-kārī kicca-kārī homī" ti?|| ||
4. "Taggha tvaṃ brāhmaṇa evaṃ-kārī kicca-kārī hosi.|| ||
Yo kho brāhmaṇa dhammena bhikkhaṃ pariyesati||
dhammena [182] bhikkhaṃ pariyesitvā mātā-pitaro poseti||
bahuṃ so puññaṃ pasavatī" ti.|| ||
[Bhagavā:]|| ||
"Yo mātaraṃ vā pitaraṃ vā macco dhammena posati,||
Tāya naṃ pāricariyāya mātā-pitusu paṇḍitā,||
Idh'eva naṃ pasaṃ-santi pecca sagge pamodatī" ti.|| ||
Evaṃ vutte Mātu-posako brāhmaṇo Bhagavantaṃ etad avoca:
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto 'rūpāni dakkhintī' ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi||
Dhammañ ca||
bhikkhu-saṅghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
§
Sutta 20
Bhikkhaka Suttaṃ
[20.1][pts] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ-|| ||
2. Atha kho Bhikkhako brāhmaṇo yena Bhagavā ten'upasaṅkami.|| ||
Upasaṅkamitvā Bhagavatā saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
3. Eka-m-antaṃ nisinno kho Bhikkhako brāhmaṇo Bhagavantaṃ etad avoca:|| ||
"Aham pi kho bho Gotama bhikkhako bhavam pi bhikkhako.|| ||
Idha no kiṃ nānā-karaṇan" ti?|| ||
[Bhagavā:]|| ||
"Na tena bhikkhako hoti yāvatā bhikkhavo pare,||
Vissaṃ dhammaṃ samādāya bhikkhu hoti na tāvatā.||
Yo'dha puññañ ca pāpañ ca bāhitvā Brahma-cariyaṃ,||
Saṅkhāya loke carati sa ve bhikkhū" ti vuccati.|| ||
Evaṃ vutte bhikkhako brāhmaṇo Bhagavantaṃ etad avoca:|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto 'rūpāni dakkhintī' ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi||
Dhammañ ca||
bhikkhu-saṅghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
§
Sutta 21
Saṅgārava Suttaṃ
[21.1][pts] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ-|| ||
2. Tena kho pana samayena Saṅgāravo nāma brāhmaṇo Sāvatthiyaṃ paṭivasati.|| ||
Udakasuddhiko udakena suddhiṃ pacceti.|| ||
Sāyapātaṃ udakorohaṇānuyogam anuyutto viharati.|| ||
3. Atha ko āyasmā Ānando pubbaṇha-samayaṃ nivāsetvā patta-cīvaram ādāya Sāvatthiṃ piṇḍāya pāvisi.|| ||
Sāvatthiyaṃ piṇḍāya caritvā pacchā-bhattaṃ piṇḍa-pāta-paṭikkanto yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ nisīdi.|| ||
[183] 4. Eka-m-antaṃ nisinno kho āyasmā Ānando Bhagavantaṃ etad avoca:|| ||
"Idha bhante Saṅgāravo nāma brāhmaṇo Sāvatthiyaṃ paṭivasati,||
udakasuddhiko udakena suddhiṃ pacceti.|| ||
Sāyapātaṃ udakorohaṇānuyogam anuyutto viharati.|| ||
Sādhu bhante Bhagavā yena Saṅgāravassa brāhmaṇassa nivesanaṃ ten'upasaṅkamatu anukampaṃ upādāyā" ti.|| ||
5. Adhivāsesi Bhagavā tuṇhī-bhāvena.|| ||
6. Atha kho Bhagavā pubbaṇha-samayaṃ nivāsetvā patta-cīvaram ādāya yena Saṅgāravassa brāhmaṇassa nivesanaṃ ten'upasaṅkami.|| ||
Upasaṅkamitvā paññatte āsane nisīdi.|| ||
7. Atha kho Saṅgāravo brāhmaṇo yena Bhagavā ten'upasaṅkami.|| ||
Upasaṅkamitvā Bhagavatā saddhiṃ sammodi.|| ||
Sammodanīyaṃ kathaṃ vīti-sāretvā eka-m-antaṃ nisīdi.|| ||
8. Eka-m-antaṃ nisnaṃ kho Saṅgāravaṃ brāhmaṇaṃ Bhagavā etad avoca:|| ||
"Saccaṃ kira tvaṃ brāhmaṇa udakasuddhiko udakena suddhiṃ paccesi?|| ||
Sāyapātaṃ udakorohaṇānuyogam anuyutto viharasī" ti?|| ||
9. "Evaṃ bho Gotamā" ti.|| ||
10. "Kam pana tvaṃ brāhmaṇa attha-vasaṃ sampassamāno udakasuddhiko udakasuddhiṃ paccesi.|| ||
Sāyapātaṃ udakorohaṇānuyogam anuyutto viharasī" ti?|| ||
11. "Idha me bho Gotama ahaṃ yaṃ divā pāpa-kammaṃ kataṃ hoti,||
taṃ sāya nahānena pavāhemi.|| ||
Yaṃ rattiṃ pāpa-kammaṃ kataṃ hoti,||
taṃ pātaṃ nahānena pavāhemi.|| ||
Imaṃ khv'āhaṃ bho Gotama attha-vasaṃ sampassamāno udakasuddhiko udakena suddhiṃ paccemi.|| ||
Sāyapātaṃ udakorohaṇānuyogam anuyutto viharāmī" ti.|| ||
12. [Bhagavā:]|| ||
"Dhammo rahado brāhmaṇa sīlatittho||
Anāvilo sabbhi sataṃ pasattho,||
Yattha have vedaguno sinātā||
Anallagattā'va taranti pāran" ti.|| ||
13. Evaṃ vutte saṅgāravo brāhmaṇo Bhagavantaṃ etad avoca:
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto 'rūpāni dakkhintī' ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi||
Dhammañ ca||
bhikkhu-saṅghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
§
Sutta 22
Khomadussa Suttaṃ
[22.1][pts] Evaṃ me sutaṃ:|| ||
Ekaṃ samayaṃ Bhagavā Sakkesu viharati Khomadussaṃ nāma Sakkānaṃ nigamo.|| ||
2. Atha kho Bhagavā pubbaṇha-samayaṃ nivāsetvā patta-cīvaram ādāya Khomadussaṃ nigamaṃ piṇḍāya pāvisi.|| ||
3. Tena kho pana samayena Khomadussakā brāhmaṇa-gahapatikā sabhāyaṃ santipatitā honti kenaci-d-eva karaṇīyena.|| ||
Devo ca ekam ekaṃ phusāyati.|| ||
4. Atha kho Bhagavā yena sā sabhā ten'upasaṅkami.|| ||
5. Addasaṃsu kho Khomadussakā brāhmaṇa-gahapatikā Bhagavantaṃ dūrato va āga-c-chantaṃ.|| ||
6. Disvā etad avocuṃ:|| ||
"Ke ca muṇḍakā samaṇakā ke ca sabhādhammaṃ jānissantī" ti?|| ||
7. Atha kho Bhagavā Khomadussake brāhmaṇa-gahapatike gāthāya ajjhabhāsi|| ||
"N'esā sabhā yattha na santi santo||
santo na te ye na vadanti dhammaṃ,||
Rāgañ ca dosañ ca pahāya mohaṃ||
dhammaṃ vadantā va bhavanti santo" ti.|| ||
"Abhikkantaṃ bho Gotama,||
abhikkantaṃ bho Gotama.|| ||
Seyyathā pi bho Gotama nikkujjitaṃ vā ukkujjeyya paṭi-c-channaṃ vā vivareyya mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya cakkhu-manto rūpāni dakkhintī ti.|| ||
Evam evaṃ bhotā Gotamena aneka-pariyāyena dhammo pakāsito.|| ||
Es'āhaṃ bhavantaṃ Gotamaṃ saraṇaṃ gacchāmi||
Dhammañ ca||
bhikkhu-saṅghañ ca.|| ||
Upāsakaṃ maṃ bhavaṃ Gotamo dhāretu ajja-t-agge pāṇupetaṃ saraṇaṃ gatan" ti.|| ||
