Saṁyutta Nikāya
II. Nidāna Vagga
12. Nidāna Saṁyutta
7. Mahā Vagga

Sutta 65

Nagara Suttaṁ

 

---

[104]

[1][pts][bodh][than][olds] Sāvatthi|| ||

[2] "Pubbe me bhikkhave, sambodhā anabhi-sambuddhassa bodhisattass'eva sato etad ahosi:|| ||

'Kicchaṁ vatāyaṁ loko āpanno jāyati ca||
jīyati ca||
mīyati ca||
cavati ca||
uppajjati ca||
atha ca||
panimassa dukkhassa nissaraṇaṁ na pajānāti jarā-maraṇassa.|| ||

Kudāssu nāma imassa dukkhassa nissaraṇaṁ paññāyissati jarā-maraṇassā' ti?|| ||

 

§

 

[3] Tassa mayhaṁ bhikkhave, etad ahosi:|| ||

'Kim hi nu kho sati jarā-maraṇaṁ hoti,||
kiṁpaccayā jarā-maraṇan' ti.|| ||

[4] Tassa mayhaṁ bhikkhave,||
yoniso mana-sikārā ahu paññāya abhisamayo.|| ||

'Jātiyā kho sati jarā-maraṇaṁ hoti.||
Jāti-paccayā jarā-maraṇan' ti.|| ||

[5] Tassa mayhaṁ bhikkhave, etad ahosi:|| ||

'Kim hi nu kho sati jāti hoti.||
Kiṁ paccayā jātī' ti?|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Bhavo kho sati jātiyā hoti.||
Bhava-paccayā jātī' ti.|| ||

■

Tassa mayhaṁ bhikkhave, etad ahosi:|| ||

'Kim hi nu kho sati bhavo hoti.||
Kiṁ paccayā bhavo' ti?|| ||

Tassa mayhaṁ bhikkhave,||
yoniso mana-sikārā ahu paññāya abhisamayo"|| ||

'Upādāne kho sati bhavo hoti.||
Upādāna-paccayā bhavo' ti.|| ||

■

Tassa mayhaṁ bhikkhave, etad ahosi:|| ||

'Kim hi nu kho sati upādānaṁ hoti.||
Kiṁ paccayā upādānan' ti?|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:

'Taṇhā kho sati upādānaṁ hoti.||
Taṇhā-paccayā upādānan' ti.|| ||

■

Tassa mayhaṁ bhikkhave, etad ahosi:|| ||

'Kim hi nu kho sati taṇhā hoti.||
Kiṁ paccayā taṇhā' ti?|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Vedanā kho sati taṇhā hoti.||
Vedanā-paccayā taṇhā' ti.|| ||

■

Tassa mayhaṁ bhikkhave, etad ahosi:|| ||

'Kim hi nu kho sati vedanā hoti.||
Kiṁ paccayā vedanā' ti.|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Phasse kho sati vedanā hoti.||
Phassa-paccayā vedanā' ti.|| ||

■

Tassa mayhaṁ bhikkhave, etad ahosi:|| ||

'Kim hi nu kho sati phasso hoti.||
Kiṁ paccayā phasso' ti.|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Saḷāyatane kho sati phasso hoti.||
saḷāyatana-paccayā phasso' ti.|| ||

■

Tassa mayhaṁ bhikkhave, etad ahosi:|| ||

'Kim hi nu kho sati saḷāyatanaṁ hoti.||
Kiṁ paccayā saḷāyatanan' ti?|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Nāma-rūpe kho sati saḷāyatanaṁ hoti.||
Nāma-rūpa-paccayā saḷāyatanan' ti.|| ||

■

Tassa mayhaṁ bhikkhave, etad ahosi:|| ||

'Kim hi nu kho sati nāma-rūpaṁ hoti.||
Kiṁ paccayā nāma-rūpan' ti?|| ||

[6] Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Viññāṇe kho sati nāma-rūpaṁ hoti.||
Viññāṇa-paccayā nāma-rūpan' ti.|| ||

[7] Tassa mayhaṁ bhikkhave, etad ahosi:|| ||

'Kim hi nu kho sati viññāṇaṁ hoti.||
Kim paccayā viññāṇan' ti.|| ||

[8] Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Nāma-rūpe kho sati viññāṇaṁ hoti.||
Nāma-rūpa-paccayā viññāṇan' ti.|| ||

[9] Tassa mayhaṁ bhikkhave, etad ahosi:|| ||

'Paccudāvattati kho idaṁ viññāṇaṁ,||
nāma-rūpamhā naparaṁ gacchati.|| ||

Ettāvatā jīyetha vā||
jāyetha vā||
māyetha vā||
cavetha vā||
upapajjetha vā||
yad idaṁ||
nāma-rūpa-paccayā viññāṇaṁ,||
viññāṇa-paccayā nāma-rūpaṁ,||
nāma-rūpa-paccayā saḷāyatanaṁ,||
saḷāyatana-paccayā phasso,||
phassa-paccayā vedanā,||
vedanā-paccayā taṇhā,||
taṇhā-paccayā upādānaṁ,||
upādāna-paccayā bhavo,||
bhava-paccayā jāti,||
jāti-paccayā jarā-maraṇaṁ,||
soka-parideva-dukkha-domanass'upāyāsā sambhavanti.|| ||

[105] Evam etassa kevalassa dukkha-k-khandhassa samudayo hotī' ti.|| ||

[10] 'Samudayo, samudayo' ti||
kho me bhikkhave,||
pubbe ananussutesu dhammesu cakkhuṁ udapādi,||
ñāṇaṁ udapādi,||
paññā udapādi,||
vijjā udapādi,||
āloko udapādi.|| ||

[11] Tassa mayhaṁ bhikkhave, etad ahosi:|| ||

'Kim hi nu kho asati jarā-maraṇaṁ na hoti?|| ||

Kissa nirodhā jarā-maraṇa-nirodho' ti?|| ||

[12] Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Jātiyā kho asati jarā-maraṇaṁ na hoti,||
jāti-nirodhā jarā-maraṇa-nirodho' ti.|| ||

[13] Tassa mayhaṁ bhikkhave, etad ahosi:|| ||

'Kim hi nu kho asati jāti na hoti.||
Kissa nirodhā jāti-nirodho' ti?|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Bhavo kho asati jāti na hoti,||
bhava-nirodhā jāti-nirodho' ti.|| ||

Tassa mayhaṁ bhikkhave, etad ahosi:|| ||

'Kim hi nu kho asati bhavo na hoti.||
Kissa nirodhā bhava-nirodho' ti?|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Upādāne kho asati bhavo na hoti,||
upādāna-nirodhā bhava-nirodho' ti.|| ||

Tassa mayahaṁ bhikkhave, etad ahosi:|| ||

'Kim hi nu kho asati upādānaṁ na hoti.||
Kissa nirodhā upādāna-nirodho' ti.|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:

'Taṇhā kho asati upādānaṁ na hoti,||
taṇhā-nirodhā upādāna-nirodho ti.|| ||

Tassa mayhaṁ bhikkhave, etad ahosi:|| ||

'Kim hi nu kho asati taṇhā na hoti.||
Kissa nirodhā taṇhā-nirodho' ti?|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Vedanā kho asati taṇhā na hoti.||
Vedanā-nirodhā taṇhā-nirodho' ti.|| ||

Tassa mayhaṁ bhikkhave, etad ahosi:|| ||

'Kim hi nu asati vedanā na hoti.||
Kissa nirodhā vedanā-nirodho' ti?|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Phasse kho asati vedanā na hoti,||
phassa-nirodhā vedanā-nirodho' ti.|| ||

Tassa mayhaṁ bhikkhave, etad ahosi:|| ||

'Kim hi nu kho asati phasso na hoti.||
Kissa nirodhā phassa-nirodho' ti?|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Saḷāyatane kho asati phasso na hoti,||
saḷāyatana-nirodhā phassa-nirodho' ti.|| ||

Tassa mayhaṁ bhikkhave, etad ahosi:|| ||

'Kim hi nu kho asati saḷāyatanaṁ na hoti.||
Kissa nirodhā saḷāyatana-nirodho' ti.|| ||

Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Nāma-rūpe kho asati saḷāyatanaṁ na hoti,||
nāma-rūpa-nirodhā saḷāyatana-nirodho' ti.|| ||

Tassa mayhaṁ bhikkhave, etad ahosi:|| ||

'Kim hi nu kho asati nāma-rūpaṁ na hoti.||
Kissa nirodhā nāma-rūpa-nirodho' ti?|| ||

[14] Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Viññāṇe kho asati nāma-rūpaṁ na hoti,||
viññāṇa-nirodhā nāma-rūpa-nirodho' ti|| ||

[15] Tassa mayhaṁ bhikkhave, etad ahosi:|| ||

'Kim hi nu kho asati viññāṇaṁ na hoti.||
Kissa nirodhā viññāṇa-nirodho' ti?|| ||

[16] Tassa mayhaṁ bhikkhave,||
yoniso mana-sikārā ahu paññāya abhisamayo:|| ||

'Nāma-rūpe kho asati viññāṇaṁ na hoti,||
nāma-rūpa-nirodhā viññāṇa-nirodho' ti.|| ||

[17] Tassa mayhaṁ bhikkhave, etad ahosi:|| ||

'Adhigato kho myāyaṁ Maggo bodhāya||
yad idaṁ||
nāma-rūpa-nirodhā viññāṇa-nirodho,||
viññāṇa-nirodhā nāma-rūpa-nirodho,||
nāma-rūpa-nirodhā saḷāyatana-nirodho,||
saḷāyatana-nirodhā phassa-nirodho,||
phassa-nirodhā vedanā-nirodho,||
vedanā-nirodhā taṇhā-nirodho,||
taṇhā-nirodhā upādāna-nirodho,||
upādāna-nirodhā bhava-nirodho,||
bhava-nirodhā jāti-nirodho,||
jāti-nirodhā jarā-maraṇaṁ,||
soka-parideva-dukkha-domanass'upāyāsā nirujjhanti.|| ||

Evam etassa kevalassa dukkha-k-khandhassa nirodho hotī' ti.|| ||

[18] 'Nirodho, nirodho' ti||
kho me bhikkhave,||
pubbe ananussutesu dhammesu cakkhuṁ udapādi,||
ñāṇaṁ udapādi,||
paññā udapādi,||
vijjā udapādi,||
āloko udapādi.|| ||

[19] Seyyathā pi, bhikkhave, puriso araññe pavane caramāno||
passeyya purāṇaṁ Maggaṁ||
purāṇañjasaṁ pubbakehi manussehi anuyātaṁ.|| ||

So tam anugaccheyya,||
tam anugacchanto passeyya purāṇaṁ nagaraṁ,||
purāṇaṁ rāja-dhāniṁ [106] pubbakehi manussehi ajjhāvutthaṁ||
ārāma-sampannaṁ||
vana-sampannaṁ||
pokkharaṇi-sampannaṁ||
uddāpavantam ramaṇīyaṁ.|| ||

[20] Atha kho so bhikkhave,||
puriso rañño vā||
rāja-mahā-mattassa vā āroceyya|| ||

'Yagghe bhante, jāneyyāsi||
ahaṁ addasaṁ araññe pavane caramāno purāṇaṁ Maggaṁ purāṇañjasaṁ pubbakehi manussehi anuyātaṁ tam anugacchiṁ.|| ||

Tam anugacchanto addasaṁ purāṇaṁ nagaraṁ,||
purāṇaṁ rāja-dhāniṁ pubbakehi manussehi ajjhāvutthaṁ,||
ārāma-sampannaṁ,||
vana-sampannaṁ,||
pokkharaṇi-sampannaṁ,||
uddāpaṁvantaṁ ramaṇīyaṁ.|| ||

Tam bhante, nagaraṁ māpehī' ti.|| ||

[21] Atha kho bhikkhave, rājā vā rāja-mahā-matto vā||
taṁ nagaraṁ māpeyya,||
tad assa nagaraṁ aparena samayena iddhañ ce'va phītañ ca bāhu-jaññaṁ ākiṇṇa-manussaṁ vuḍḍhiṁ vepulla-p-pattaṁ.|| ||

Evam eva khv'āhaṁ bhikkhave,||
addasaṁ purāṇaṁ Maggaṁ purāṇañjasaṁ pubbakehi Sammā Sambuddhehi anuyātaṁ.|| ||

[22] Katamo ca so bhikkhave, purāṇa-maggo purāṇañjaso pubbakehi Sammā Sambuddhehi anuyāto?|| ||

Ayam eva Ariyo Aṭṭhaṅgiko Maggo.|| ||

Seyyathī pi:||
sammā-diṭṭhi||
sammā-saṅkappo||
sammā-vācā||
sammā-kammanto||
sammā ājīvo||
sammā-vāyāmo||
sammā-sati||
sammā-samādhi.|| ||

Ayaṁ kho so bhikkhave purāṇa-maggo purāṇañjaso pubbakehi Sammā Sambuddhehi anuyāto.|| ||

Tam anugacchiṁ,||
tam anugacchanto jarā-maraṇaṁ abbhaññāsiṁ,||
jarā-maraṇa samudayaṁ abbhaññāsiṁ,||
jarā-maraṇa-nirodhaṁ abbhaññāsiṁ,||
jarā-maraṇa-nirodha-gāminī-paṭipadaṁ abbhaññāsiṁ.|| ||

[23] Tam anugacchiṁ,||
tam anugacchanto jātiṁ abbhaññāsiṁ,||
jātisamudayaṁ abbhaññāsiṁ,||
jāti-nirodhaṁ abbhaññāsiṁ,||
jāti-nirodha-gāminī-paṭipadaṁ abbhaññāsiṁ.|| ||

[24] Tam anugacchiṁ,||
tam anugacchanto bhavaṁ abbhaññāsiṁ,||
bhavasamudayaṁ abbhaññāsiṁ,||
bhava-nirodhaṁ abbhaññāsiṁ,||
bhava-nirodha-gāminī-paṭipadaṁ abbhaññāsiṁ.|| ||

[25] Tam anugacchiṁ,||
tam anugacchanto, upādānaṁ abbhaññāsiṁ,||
upādānasamudayaṁ abbhaññāsiṁ,||
upādāna-nirodhaṁ abbhaññāsiṁ,||
upādāna-nirodha-gāminī-paṭipadaṁ abbhaññāsiṁ.|| ||

[26] Tam anugacchiṁ,||
tam anugacchanto taṇhaṁ abbhaññāsiṁ,||
taṇhāsamudayaṁ abbhaññāsiṁ,||
taṇhā-nirodhaṁ abbhaññāsiṁ,||
taṇhā-nirodha-gāminī-paṭipadaṁ abbhaññāsiṁ.|| ||

[27] Tam anugacchiṁ,||
tam anugacchanto vedanāṁ abbhaññāsiṁ,||
vedanādasamudayaṁ abbhaññāsiṁ,||
vedanā-nirodhaṁ abbhaññāsiṁ,||
vedanā-nirodha-gāminī-paṭipadaṁ abbhaññāsiṁ.|| ||

[28] Tam anugacchiṁ,||
tam anugacchanto phassaṁ abbhaññāsiṁ,||
phassa-samudayaṁ abbhaññāsiṁ,||
phassa-nirodhaṁ abbhaññāsiṁ,||
phassa-nirodha-gāminī-paṭipadaṁ abbhaññāsiṁ.|| ||

[29] Tam anugacchiṁ,||
tam anugacchanto saḷāyatanaṁ abbhaññāsiṁ,||
saḷāyatanasamudayaṁ abbhaññāsiṁ,||
saḷāyatana-nirodhaṁ abbhaññāsiṁ,||
saḷāyatana-nirodha-gāminī-paṭipadaṁ abbhaññāsiṁ.|| ||

[30] Tam anugacchiṁ,||
tam anugacchanto nāma-rūpaṁ abbhaññāsiṁ,||
nāma-rūpa-samudayaṁ abbhaññāsiṁ,||
nāma-rūpa-nirodhaṁ abbhaññāsiṁ,||
nāma-rūpa-nirodha-gāminī-paṭipadaṁ abbhaññāsiṁ.|| ||

[31] Tam anugacchiṁ,||
tam anugacchanto viññāṇaṁ abbhaññāsiṁ,||
viññāṇa-samudayaṁ abbhaññāsiṁ,||
viññāṇa-nirodhaṁ abbhaññāsiṁ,||
viññāṇa-nirodha-gāminī-paṭipadaṁ aubbhaññāsiṁ.|| ||

[32] Tam anugacchiṁ,||
tam anugacchanto saṅkhāre abbhaññāsiṁ,||
saṅkhārasamudayaṁ abbhaññāsiṁ,||
saṅkhāra-nirodhaṁ abbhaññāsiṁ,||
saṅkhāra-nirodha-gāminī-paṭipadaṁ abbhaññāsiṁ.|| ||

[107] [33] Tad abhiññā ācikkhiṁ bhikkhūnaṁ bhikkhunīnaṁ upāsakānaṁ upāsikānaṁ.|| ||

Ta-y-idaṁ, bhikkhave, Brahma-cariyaṁ iddhañ c'eva phītañ ca vitthārikaṁ bāhu-jaññaṁ puthubhūtaṁ||
yāva-d-eva manussehi suppakāsitan" ti.|| ||