Tatiya Pabbat'Ūpama Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[138]

[1][pts] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuṁ|| ||

Bhagavā etad avoca:|| ||

[139] "Seyyathā pi bhikkhave, puriso sinerussa pabba-tarājassa satta mugga-mattiyo pāsāṇa-sakkharā upanikkhipeyya.|| ||

Taṁ kim maññatha bhikkhave?|| ||

Katamaṁ nu kho bahutaraṁ yā vā satta mugga-mattiyo pāsāṇa-sakkharā upanikkhittā,||
yo vā sineru pabba-tarājā" ti?|| ||

"Etad eva bhante, bahutaraṁ yad idaṁ sineru pabba-tarājā.|| ||

Appamattikā satta mugga-mattiyo pāsāṇa-sakkharā upanikkhittā.|| ||

N'eva satimaṁ kalaṁ upenti,||
na sahassimaṁ kalaṁ upenti,||
na sata-sahassimaṁ kalaṁ upenti,||
sineruṁ pabba-tarājānaṁ upanidhāya satta mugga-mattiyo pāsāṇa-sakkharā upanikkhittā" ti.|| ||

"Evam eva kho bhikkhave,||
ariya-sāvakassa diṭṭhi-sampannassa puggalassa abhisametāvino etad eva bahutaraṁ dukkhaṁ||
yad idaṁ parikkhīṇaṁ pariyādinnaṁ,||
appa-mattakaṁ avasiṭṭhaṁ.|| ||

N'eva satimaṁ kalaṁ upeti,||
na sahassimaṁ kalaṁ upeti,||
na sata-sahassimaṁ kalaṁ upeti,||
purimaṁ dukkha-k-khandhaṁ parikkhīṇaṁ pariyādinnaṁ upanidhāya||
yad idaṁ satta-k-khattūṁ paramatā.|| ||

Evaṁ mahatthiyo kho bhikkhave dhammābhisamayo,||
evaṁ mahatthiyo Dhamma-cakkhu paṭilābho" ti.|| ||