Saṁyutta Nikāya
II. Nidāna Vagga
20. Opamma Saṁuttaṁ

Sutta 2

Nakha-Sikhā Suttaṁ

 

---

[263]

[1][than][rhyc][olds] EVAṀ ME SUTAṀ:|| ||

Ekaṁ samayaṁ Bhagavā Sāvatthiyaṁ viharati.||
Jetavane Anāthapiṇḍikassa ārāme.|| ||

[2][than][rhyc][olds] Atha kho Bhagavā parittaṁ nakha-sikhāyaṁ paṁsum āropetvā bhikkhū āmantesi:|| ||

[3][than][rhyc][olds] "Taṁ kim maññatha bhikkhave?|| ||

Katamaṁ nu kho bahutaraṁ yo c'āyaṁ mayā paritto nakha-sikhāyaṁ paṁsu āropito,||
ya cāyam mahā-paṭhavī" ti?|| ||

[4][than][rhyc][olds] "Etad eva bhante,||
bahutaraṁ yad idaṁ mahā-paṭhavī.|| ||

Appamattako yaṁ Bhagavatā paritto nakha-sikhāyaṁ paṁsu āropito.|| ||

Saṅkham pi na upeti,||
upanidhim pi na upeti,||
kalabhāgam pi na upeti||
mahā-paṭhaviṁ upanidhāya Bhagavatā paritto nakha-sikhāyaṁ paṁsu āropito" ti.|| ||

[5][than][rhyc][olds] "Evam eva kho bhikkhave,||
appakā te sattā ye manussesu paccājāyanti.|| ||

Atha kho ete yeva bahutarā sattā ye aññatra manussehi paccājāyanti.|| ||

[6][than][rhyc][olds] Tasmātiha bhikkhave,||
evaṁ sikkhitabbaṁ:|| ||

'Appamattā viharissāmā' ti.|| ||

Evaṁ hi vo bhikkhave, sikkhitabban" ti.|| ||