Saṁyutta Nikāya
4. Saḷāyatana Vagga
36. Vedanā Saṁyutta
2. Raho-Gata Vagga

Sutta 16

Dutiya Santakam (aka Ānanda) Suttaṁ

 

---

[221]

[1][pts][bodh] Evaṁ me sutaṁ:|| ||

Atha kho āyasmā Ānando yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho āyasmā Ānando Bhagavantaṁ etad avoca:|| ||

"Katamā nu kho Ānanda vedanā?|| ||

Katamo vedanā samudayo?|| ||

Katamo vedanā nirodho?|| ||

Katamā vedanā nirodha-gāminī-paṭipadā?|| ||

Ko vedanāya assādo?|| ||

Ko ādīnavo?|| ||

Kiṁ nissaraṇan" ti?|| ||

■

"Bhagava mūlakā no bhante dhammā Bhagavaṁ-ntettikā Bhagavam-paṭisaraṇā,||
sādhu vata bhante Bhagavantaṁ yeva paṭibhātu etassa bhāsitassa attho,||
Bhagavato sutvā bhikkhū dhāressantī" ti.|| ||

Tenah'Ānanda suṇohi||
sādhukaṁ mana-sikarohi||
bhāsissāmī" ti.|| ||

"Evaṁ bhante" ti kho āyasmā Ānando Bhagavato paccassosi.|| ||

■

Bhagavā etad avoca:|| ||

"Tisso imā Ānanda vedanā:||
sukhā vedanā,||
dukkhā vedanā||
adukkha-m-asukhā vedanā.|| ||

Imā vuccanti Ānanda vedanā.|| ||

Phassa-samudayā vedanā-samudayo||
phassa-nirodhā vedanā-nirodho.|| ||

Ayam-eva Ariyo Aṭṭhaṅgiko Maggo vedanā-nirodha-gāminī paṭipadā.|| ||

Seyyath'īdaṁ:||
sammā-diṭṭhi||
sammā-saṅkappa,||
sammā-vācā||
sammā-kammanta||
sammā-ājīvā||
sammā-vāyāma||
sammā-sati||
sammā-samādhi.|| ||

Yaṁ vedanaṁ paṭicca uppajjati sukhaṁ somanassaṁ,||
ayaṁ vedanāya assādo;||
yā vedanā aniccā dukkhā vipariṇāma-dhammā,||
ayaṁ vedanāya ādīnavo.|| ||

Yo vedanāya chanda-rāga-vinayo chanda-rāga-p-pahānaṁ,||
idaṁ vedanāya nissaraṇaṁ.|| ||

 

§

 

Atha kho pan'Ānanda, mayā anupubba-saṅkhārānaṁ nirodho akkhāto,||
paṭhamaṁ-jhānaṁ samāpannassa vācā niruddhā hoti,||
dutiyaṁ-jhānaṁ samāpannassa vitakka-vicārā niruddhā honti,||
tatiyaṁ-jhānaṁ samāpannassa pīti niruddhā hoti,||
catutthaṁ-jhānaṁ samāpannassa assāsa-passāsā niruddhā honti,||
Ākāsanañ-c'āyatanaṁ samāpannassa rūpa-saññā niruddhā hoti,||
Viññāṇañ-c'āyatanaṁ samāpannassa Ākāsanañ-c'āyatanasaññā niruddhā hoti,||
Ākiñcaññ'āyatanaṁ samāpannassa Viññāṇañ-c'āyatanasaññā niruddhā hoti,||
N'eva-saññā-nā-saññ'āyatanaṁ samāpannassa Ākiñ caññ'āyatanasaññā niruddhā hoti,||
saññā-vedayita-nirodhaṁ samāpannassa saññā ca vedanā ca niruddhā honti,||
khīṇ'āsavassa bhikkhuno||
rāgo niruddho hoti||
doso niruddho hoti,||
moho niruddho hoti.|| ||

 

§

 

Atha kho pan'Ānanda mayā anupubba-saṅkhārānaṁ vūpasamo akkhāto,||
paṭhamaṁ-jhānaṁ samāpannassa vācā vūpasantā hoti,||
dutiyaṁ-jhānaṁ samāpannassa vitakka-vicārā vūpasantā honti,||
tatiyaṁ-jhānaṁ samāpannassa pīti vūpasantā hoti,||
catutthaṁ-jhānaṁ samāpannassa assāsa-passāsā vūpasantā honti,||
Ākāsanañ-c'āyatanaṁ samāpannassa rūpa-saññā vūpasantā hoti,||
Viññāṇañ-c'āyatanaṁ samāpannassa Ākāsanañ-c'āyatanasaññā vūpasantā hoti,||
Ākiñcaññ'āyatanaṁ samāpannassa Viññāṇañ-c'āyatanasaññā vūpasantā hoti,||
N'eva-saññā-nā-saññ'āyatanaṁ samāpannassa Ākiñ caññ'āyatanasaññā vūpasantā hoti,||
saññā-vedayita-nirodhaṁ samāpannassa saññā ca vedanā ca vūpasantā honti,||
khīṇ'āsavassa bhikkhuno||
rāgo vūpasanto hoti||
doso vūpasanto hoti,||
moho vūpasanto hoti.|| ||

 

§

 

Atha kho pan'Ānanda mayā anupubba-saṅkhārānaṁ passaddhi.|| ||

Akkhātā paṭhamaṁ-jhānaṁ samāpannassa vācā paṭippassaddhā hoti,||
dutiyaṁ-jhānaṁ samāpannassa vitakka-vicārā paṭippassaddhā honiti,||
tatiyaṁ-jhānaṁ samāpannassa pīti paṭippassaddhā hoti,||
catutthaṁ samāpannassa assāsa-passāsā paṭippassaddhā honti,||
saññā-vedayita-nirodhaṁ samāpannassa saññā ca vedanā ca paṭippassaddhā honti,||
khīṇāsavassa bhikkhuno||
rāgo paṭi-p-passaddho hoti,||
doso paṭi-p-passaddho hoti,||
moho paṭi-p-passaddho hotī" ti.|| ||