Saṁyutta Nikāya
4. Saḷāyatana Vagga
37. Mātugāma Saṁyutta
3. Tatiya Vagga

Sutta 32

Ṭhāna Suttaṁ

 

---

[249]

[1][pts] Evaṁ me sutaṁ:|| ||

Ekaṁ samayaṁ Bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuṁ.|| ||

3. Bhagavā etad avoca:|| ||

"Pañc'imāni bhikkhave ṭhānāni||
dullabhāni akatapuññena mātu-gāmena.|| ||

Katamāni pañca?|| ||

'Patirūpe kule jāyeyyan' ti||
idaṁ bhikkhave paṭhamaṁ ṭhānaṁ dullabhaṁ akatapuññena mātu-gāmena.|| ||

'Patirūpa kule jāyitvā||
patirūpaṁ kulaṁ gaccheyyan' ti||
idaṁ bhikkhave dutiyaṁ ṭhānaṁ dullabhaṁ akatapuññena mātu-gāmena.|| ||

Patirūpa kule jāyitvā||
patirūpaṁ kulaṁ ganatvā||
asapatti āgāraṁ ajjhāvaseyyan' ti||
idaṁ bhikkhave tatiyaṁ ṭhānaṁ dullabhaṁ akatapuññena mātu-gāmena.|| ||

Patirūpa kule jāyitvā||
patirūpaṁ kulaṁ gantvā||
asapatti agāraṁ ajjhāvasanti||
puttavatī assan' ti||
idaṁ bhikkhave catutthaṁ ṭhānaṁ dullabhaṁ akatapuññena mātu-gāmena.|| ||

Patirūpa kule jāyitvā||
patirūpaṁ kulaṁ gantvā||
asapatti agāraṁ ajjhāvasanti||
puttavatī||
samānā sāmikaṁ abhibhuyya vatteyyan' ti||
idaṁ bhikkhave pañcamaṁ ṭhānaṁ dullabhaṁ akatapuññena mātu-gāmena.|| ||

Imāni kho bhikkhave pañca ṭhānāni||
dullabhāni akatapuññena mātu-gāmena.|| ||

 

§

 

Pañc'imāni bhikkhave ṭhānāni||
sulabhāni katapuññena mātu-gāmena.|| ||

Katamāni pañca?|| ||

'Patirūpa kule jāyeyyan' ti||
idaṁ bhikkhave paṭhamaṁ ṭhānaṁ sulabhaṁ katapuññena mātu-gāmena.|| ||

'Patirūpa kule jāyitvā||
patirūpaṁ kulaṁ gaccheyyan' ti||
idaṁ bhikkhave dutiyaṁ ṭhānaṁ sulabhaṁ katapuññena mātu-gāmena.|| ||

'Patirūpa kule jāyitvā||
patirūpaṁ kulaṁ gantvā||
asapatti agāraṁ ajjhāvaseyyan' ti||
idaṁ bhikkhave tatiyaṁ ṭhānaṁ sulabaṁ katapuññena mātu-gāmena.|| ||

'Patirūpa kule jāyitvā||
patirūpaṁ kulaṁ gantvā||
asapatti agāraṁ ajjhāvasanti||
puttavatī assan' ti||
idaṁ bhikkhave catutthaṁ ṭhānaṁ sulabhaṁ katapuññena mātu-gāmena.|| ||

'Patirūpa kule [250] jāyitvā||
patirūpaṁ kulaṁ gantvā||
asapatti agāraṁ ajjhāvasanti||
puttavatī samānā sāmikaṁ abhibhuyya vatteyyan' ti||
idaṁ bhikkhave pañcamaṁ ṭhānaṁ sulabhaṁ katapuññena mātu-gāmena.|| ||

Imāni kho bhikkhave pañca ṭhānāni sulabhāni katapuññena mātu-gāmenā" ti.|| ||