Saṃyutta Nikāya
4. Saḷāyatana Vagga
40. Moggallāna Saṃyutta

Sutta 5

Ākāsanañ-c'Āyatana Suttaṃ

 

---

[266]

[1][pts][olds] Evaṃ me sutaṃ:|| ||

Ekaṃ samayaṃ āyasmā Mahā Moggallāno Sāvatthiyaṃ viharati Jetavane Anāthapiṇḍikassa ārāme.|| ||

Tatra kho āyasmā Mahā Moggallāno bhikkhū āmantesi:|| ||

"Āvuso bhikkhavo" ti.|| ||

"Āvuso" ti kho te bhikkhū āyasmato Mahā Moggallānassa paccassosuṃ.|| ||

Āyasmā Mahā Moggallāno etad avoca:|| ||

"Idha mayhaṃ āvuso raho-gatassa paṭīsallīnassa
evaṃ cetaso parivitakko udapādi:|| ||

'"Ākāsanañ-c'āyatanaṃ,||
Ākāsanañ-c'āyatanan" ti vuccati.|| ||

Katamaṃ nu kho Ākāsanañ-c'āyatanan' ti?|| ||

Tassa mayhaṃ āvuso etad ahosi:|| ||

'Idha bhikkhu||
sabbaso rūpa-saññānaṃ samatikkamā||
paṭigha-saññānaṃ attha-gamā||
nānatta-saññānaṃ amana-sikārā||
"Ananto ākāso" ti||
Ākāsanañ-c'āyatanaṃ upasampajja viharati.|| ||

Idaṃ vuccati "Ākāsanañ-c'āyatanan" ti' ti.|| ||

So khv'āhaṃ āvuso||
sabbaso rūpa-saññānaṃ samatikkamā||
paṭigha-saññānaṃ attha-gamā||
nānatta-saññānaṃ amana-sikārā||
'Ananto ākāso' ti||
Ākāsanañ-c'āyatanaṃ upasampajja viharāmi||
tassa mayhaṃ āvuso||
iminā vihārena viharato||
rūpa-sahagatā saññā-mana-sikārā samud'ācaranti.|| ||

Atha kho maṃ āvuso Bhagavā iddhiyā upasaṇkamitvā etad avoca:|| ||

'Moggallāna!|| ||

Moggallāna!|| ||

Mā brāhmaṇa,||
Ākāsanañ-c'āyatanaṃ pamādo,||
ākāsānāñcāyatane cittaṃ saṇṭhapehi,||
ākāsānāñcāyatane cittaṃ ekodiṃ-karohi,||
ākāsānāñcāyatane cittaṃ samādahā' ti.|| ||

So khv'āhaṃ āvuso||
aparena samayena||
sabbaso rūpa-saññānaṃ samatikkamā||
paṭigha-saññānaṃ attha-gamā||
nānatta-saññānaṃ amana-sikārā||
'Ananto ākāso' ti||
Ākāsanañ-c'āyatanaṃ upasampajja vihāsiṃ.|| ||

Yaṃ hi taṃ āvuso sammā vadamāno vadeyya:|| ||

'Satthārānuggahito sāvako mahābhiññataṃ patto' ti,|| ||

mamantaṃ sammā vadamāno vadeyya,|| ||

'Satthārānuggahito sāvako mahābhiññataṃ patto' ti" ti.|| ||