Saṁyutta Nikāya
4. Saḷāyatana Vagga
41. Citta Saṁyutta

Sutta 5

Paṭhama Kāmabhū Suttaṁ

 

---

[291]

[1][pts][niza] Evaṁ me sutaṁ:|| ||

Ekaṁ samayaṁ āyasmā Kāmabhu Macchikāsaṇḍe viharati Ambāṭakavane.|| ||

Atha kho Citto gahapati yen'āyasmā Kāmabhu ten'upasaṅkami.|| ||

Upasaṅkamitvā āyasmantaṁ kāmabhuṁ abhivādetvā eka-m-antaṁ nisīdi.|| ||

Eka-m-antaṁ nisinnaṁ kho cittaṁ gahapatiṁ āyasmā kāmabhu etad avoca:|| ||

"Vuttam idaṁ gahapati:|| ||

Nelaṅgo setapacchādo||
ekāro vattatī ratho|| ||

Anīghaṁ passa āyantaṁ||
chinnasotaṁ abandhananti.|| ||

Imassa kho gahapati saṅkhittena bhāsitassa kathaṁ vitthārena attho daṭṭhabbo" ti?|| ||

"Kin nu kho etaṁ bhante Bhagavatā bhāsitan" ti?|| ||

"Evaṁ gahapatī" ti.|| ||

"Tena hi bhante muhuttaṁ āgamehi yāvassa atthaṁ pekkhāmī" ti.|| ||

Atha kho Citto gahapati muhuttaṁ tuṇhī hutvā āyasmantaṁ Kāmabhuṁ etad avoca:|| ||

[292] "'Nelaṅgan' ti kho bhante sīlānam etaṁ adhivacanaṁ.|| ||

'Setapacchādo' ti kho bhante vimuttiyā etaṁ adhivacanaṁ.|| ||

'Ekāro' ti kho bhante satiyā etaṁ adhivacanaṁ.|| ||

'Vattatī' ti kho bhante abhi-k-kama paṭikkamassetaṁ adhivacanaṁ.|| ||

'Ratho' ti kho bhante imassetaṁ cātu-m-mahā-bhutikassa kāyassa adhivacanaṁ||
mātā-petti-kasambhavassa||
odana-kummāsūpacayassa||
anicc'ucchādana-parimaddana-bhedana-viddhaṁsana dhammassa.|| ||

Rāgo kho bhante nīgho||
doso nīgho||
moho nīgho,||
te khīṇ'āsavassa bhikkhuno pahīnā ucchinna-mūlā tālā-vatthu-katā anabhāva-katā āyatiṁ anuppāda-dhammā,||
tasmā khīṇ'āsavo bhikkhu anīgho ti vuccati.|| ||

Āyantanti kho bhante arahato etaṁ adhivacanaṁ.|| ||

'Soto' ti kho bhante taṇhāya etaṁ adhivacanaṁ,||
sā khīṇ'āsavassa bhikkhuno pahīnā ucchinna-mūlā tālā-vatthu-katā anabhāva-katā āyatiṁ anuppāda-dhammā,||
tasmā khīṇ'āsavo bhikkhu chinnasoto ti vuccati.|| ||

Rāgo kho bhante bandhanaṁ,||
doso bandhanaṁ,||
moho bandhanaṁ,||
te khīṇ'āsavassa bhikkhuno pahīnā ucchinna-mūlā tālā-vatthu-katā anabhāva-katā āyatiṁ anuppāda-dhammā,||
tasmā khīṇ'āsavo bhikkhu abandhanoti vuccati.|| ||

Iti kho bhante yan taṁ Bhagavatā vuttaṁ:|| ||

Nelaṅgo setapacchādo||
ekāro vattatī ratho|| ||

Anīghaṁ passa āyantaṁ||
chinnasotaṁ abandhananti.|| ||

Imassa khv'āhaṁ bhante Bhagavatā saṅkhittena bhāsitassa evaṁ vitthārena atthaṁ ājānāmī" ti.|| ||

"Lābhā vata te gahapati,||
su-laddhante gahapati,||
yassa te gambhīre Buddha-vacane paññā-cakkhu kamatī" ti.|| ||