Saṁyutta Nikāya
4. Saḷāyatana Vagga
41. Citta Saṁyutta

Sutta 9

Acela Suttaṁ

 

---

[300]

[1][pts] Evaṁ me sutaṁ:|| ||

Tena kho pana samayena Acelo Kassapo Macchikāsaṇḍaṁ anuppatto hoti,||
Cittassa gahapatino purāṇagihī sahāyako.|| ||

Assosi kho Citto gahapati:|| ||

"Acelo kira Kassapo Macchikāsaṇḍaṁ anuppatto amhākaṁ purāṇagihī sahāyo" ti.

Atha kho Citta gahapati yena Acelo Kassapo ten'upasaṅkami.|| ||

Upasaṅkamitvā Acelena Kassapena saddhiṁ sammodi.|| ||

Sammodanīyaṁ kathaṁ sārāṇīyaṁ vīti-sāretvā eka-m-antaṁ nisīdi.|| ||

Eka-m-antaṁ nisinno kho Citto gahapati Acelaṁ Kassapaṁ etad avoca:

"Kīva ciraṁ pabba-jito si bhante Kassapā" ti?|| ||

"Tiṁsa mattāni kho me gahapati vassāni pabba-jitassā" ti.|| ||

"Imehi pana te bhante tiṁsa mattehi vassehi||
atthi koci uttari-manussa-dhammā||
alam ariya-ñāṇa-dassana-viseso||
adhigato phāsu-vihāro" ti?

"Imehi kho me gahapati tiṁsa mattehi vassehi||
n'atthī koci uttari-manussa-dhammā||
alam ariya-ñāṇa-dassana-viseso||
adhigato phāsu-vihāro,||
aññatra naggeyyā ca||
muṇḍeyyā ca||
pāvaḷani-p-phoṭanāya cā" ti.|| ||

Evaṁ vutte Citto gahapati Acelaṁ Kassapaṁ etad avoca:|| ||

"Acchariyaṁ vata bho||
abbhutaṁ vata bho||
Dhammassa svākkhātatā||
yatra hi nāma tiṁsa mattehi vassehi||
na [301] koci utarimanussa-dhammā||
alam ariya-ñāṇa-dassana-viseso||
adhigato bhavissati phāsu-vihāro||
aññatra naggeyyā ca||
muṇḍeyyā ca||
pāvaḷani-p-phoṭanāya cā" ti.|| ||

"Tuyhaṁ pana gahapati kīva ciraṁ upāsakattaṁ upagatassā" ti?|| ||

"Mayham pi kho bhante tiṁsa mattāni vassāni||
upāsakattaṁ upagatassā" ti.|| ||

"Imehi kho pana te gahapati,||
tiṁsa mattehi vassehi||
atthi koci uttari-manussa-dhammā||
alam ariya-ñāṇa-dassana-viseso||
adhigato phāsu-vihāro" ti?|| ||

"Kiṁ hi no siyā bhante?|| ||

Ahaṁ hi bhante yāva ākaṅkhāmi||
vivicc'eva kāmehi||
vivicca akusalehi dhammehi||
sa-vitakkaṁ sa-vicāraṁ||
viveka-jaṁ pītisukhaṁ||
paṭhamaṁ jhānaṁ upasampajja viharāmi.|| ||

Ahaṁ hi bhante yāva-d-eva ākaṅkhāmi||
vitakka-vicārānaṁ vūpasamā||
ajjhattaṁ sampasādanaṁ||
cetaso ekodi-bhāvaṁ||
avitakkaṁ avicāraṁ||
samādhi-jaṁ pītisukhaṁ||
dutiyaṁ jhānaṁ upasampajja viharāmi.|| ||

Pītiyā ca||
virāgā ca||
upekkhako ca||
viharati sato ca sampajāno,||
sukhañ ca kāyena paṭisaṁvedeti||
yaṁ taṁ ariyā ācikkhanti:|| ||

'Upekkhako satimā sukha-vihārī' ti,|| ||

tatiyaṁ jhānaṁ upasampajja viharāmi.|| ||

Ahaṁ kho bhante yāva-d-eva ākaṅkhāmi||
sukhassa ca||
pahāṇā dukkhassa ca||
pahāṇā pubbeva somanassadomanassānaṁ atthaṅgamā||
adukkhaṁ asukhaṁ||
upekkhāsati||
pārisuddhiṁ||
catutthaṁ jhānaṁ upasampajja viharāmi.|| ||

Sace kho panāhaṁ bhante||
Bhagavato paṭhama-taraṁ kālaṁ||
kareyyaṁ anacchariyaṁ||
kho pan'etaṁ yaṁ maṁ Bhagavā evaṁ vyākareyya:|| ||

'N'atthitaṁ saṁyojanaṁ yena saṁyojanena||
saṁyutto Citto gahapati puna imaṁ lokaṁ āgaccheyyā' ti."|| ||

Evaṁ vutte Acelo Kassapo Cittaṁ gahapatiṁ etad avoca:|| ||

"Acchariyaṁ vata bho||
abbhutaṁ vata bho||
Dhammassa svākkhātatā,||
yatra hi nāma gihī odātavasano||
eva-rūpaṁ uttari-manussa-dhammā||
alam ariya-ñāṇa-dassana-visesaṁ||
adhigamissati phāsu-vihāraṁ.|| ||

Labheyyāhaṁ [302] gahapati imasmiṁ Dhamma-Vinaye pabbajjaṁ,||
labheyyaṁ upasampadan" ti.|| ||

Atha kho Citto gahapati Acelaṁ Kassapaṁ ādāya||
yena therā bhikkhū ten'upasaṅkami.|| ||

Upasaṅkamitvā there bhikkhū etad avoca:|| ||

"Ayaṁ bhante Acelo Kassapo amhākaṁ purāṇagihīsahāyo,||
imaṁ therā pabbājentu upasampādentu||
ahamassa ussukkaṁ karissāmi cīvara-piṇḍa-pāta-sen'āsana-gilāna-paccaya-bhesajja-parikkhārānan" ti.|| ||

Alattha kho Acelo Kassapo imasmiṁ Dhamma-Vinaye pabbajjaṁ alattha upasampadaṁ||
acir'ūpasampanno ca pan'āyasmā Kassapo eko vūpakaṭṭho||
appamatto||
ātāpī||
pahit'atto viharanto||
na cirass'eva yass'atthāya kula-puttā samma-d-eva agārasmā anagāriyaṁ pabbajanti,||
tad anuttariyaṁ Brahma-cariya-pariyosānaṁ||
diṭṭhe'va dhamme sayaṁ abhiññā sacchi-katvā upasampajja vihāsi:|| ||

"Khīṇā jāti,||
vusitaṁ Brahma-cariyaṁ,||
kataṁ karaṇīyaṁ,||
nāparaṁ||
itthattāyā" ti abbhaññāsi,|| ||

Aññataro ca pan'āyasmā arahataṁ ahosīti.|| ||