Saṁyutta Nikāya
5. Mahā-Vagga
46. Bojjhaṅga Saṁyutta
6. Bojj'Aṅga-Sākacca Vagga

Sutta 52

Pariyāya Suttaṁ

 

---

[108]

[1][pts][bodh][than][olds] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati.|| ||

[2] Atha kho sambahulā bhikkhū pubbaṇha-samayaṁ nivāsetvā patta-cīvaram ādāya||
Sāvatthiṁ piṇḍāya pavisiṁsu.|| ||

[3] Atha kho tesaṇ bhikkhūnaṁ etad ahosi:|| ||

"Atippago kho tāva Sāvatthiyaṁ piṇḍāya carituṁ.|| ||

Yaṁ nūna mayaṁ yena añña-titthiyānaṁ ārāmo paribbājakānaṁ ten'upasaṅkameyyāmā" ti?|| ||

[4] Atha kho te bhikkhū yena añña-titthayānaṁ paribbājakānaṁ ārāmo ten'upasaṅkamiṁsu.|| ||

Upasaṅkamitvā tehi añña-titthiyehi paribbājakehi saddhiṁ sammodiṁsu.|| ||

Sammodanīyaṁ kathaṁ sārāṇīyaṁ vīti-sāretvā eka-m-antaṁ nisīdiṁsu.|| ||

Eka-m-antaṁ nisinne kho te bhikkhū te añña-titthiyā paribbājakā etad avocuṁ:|| ||

[5] "Samaṇo āvuso Gotamo sāvakānaṁ||
evaṁ Dhammaṁ deseti:|| ||

'Etha tumhe bhikkhave,||
pañca nīvaraṇe pahāya cetaso upakkilese paññāya dubbalī-karaṇe satta bojjh'aṅge yathā-bhūtaṁ bhāvethā' ti.|| ||

Mayam pi kho āvuso,||
sāvakānaṁ evaṁ dhammaṁ desema:|| ||

'Etha tumhe āvuso,||
pañca nīvaraṇe pahāya||
cetaso upakkilese paññāya dubbalī-karaṇe||
satta bojjh'aṅge yathā-bhūtaṁ bhāvethā' ti.|| ||

Idha no āvuso ko viseso,||
ko adhippāyo.|| ||

Kiṁ nānā-karaṇaṁ,||
samaṇassa vā Gotamassa amhākaṁ vā||
yad idaṁ Dhamma-desanāya vā Dhamma-desanaṁ||
anusāsaniyā vā anusāsanin" ti?|| ||

[6] Atha kho te bhikkhū tesam añña-titthiyānaṁ paribbājakānaṁ bhāsitaṁ||
n'eva abhinandiṁsu,||
na p-paṭikkosiṁsu.|| ||

Anabhinan'ditvā a-p-paṭikkositvā uṭṭhāy'āsanā pakkamiṁsu:|| ||

"Bhagavato santike etassa bhāsitassa atthaṁ ājānissāmā" ti.|| ||

 

§

 

[7] Atha kho te bhikkhū Sāvatthiyaṁ piṇḍāya caritvā pacchā-bhattaṁ piṇḍa-pāta-paṭikkantā||
yena Bhagavā ten'upasaṅkamiṁsu.|| ||

Upasaṅkamitvā Bhagavantaṁ abhivādetvā eka-m-antaṁ nisīdiṁsu.|| ||

[109] [8] Eka-m-antaṁ nisinnā kho te bhikkhū Bhagavantaṁ etad avocuṁ:|| ||

"Idha mayaṁ bhante pubbaṇha-samayaṁ nivāsetvā patta-cīvaram ādāya Sāvatthiṁ piṇḍāya pavisimha.|| ||

Tesaṇ no bhante, amhākaṁ etad ahosi:|| ||

'Atippago kho tāva Sāvatthiyaṁ piṇḍāya carituṁ.|| ||

Yaṁ nūna mayaṁ yena añña-titthiyānaṁ paribbājakānaṁ ārāmo ten'upasaṅkameyyāmā' ti.|| ||

Atha kho mayaṁ bhante,||
yena añña-titthiyānaṁ paribbājakānaṁ ārāmo ten'upasaṅkamimha.|| ||

Upasaṅkamitvā tehi añña-titthiyehi paribbājakehi saddhiṁ sammodimha.|| ||

Sammodanīyaṁ kathaṁ sārāṇīyaṁ vīti-sāretvā eka-m-antaṁ nisīdimha.|| ||

Eka-m-antaṁ nisinne kho amhe bhante,||
te añña-titthiyā paribbājakā etad avocuṁ:|| ||

'Samaṇo āvuso Gotamo sāvakānaṁ||
evaṁ dhammaṁ deseti:|| ||

"Etha tumhe bhikkhave, pañca nīvaraṇe pahāya cetaso upakkilese paññāya dubbalī-karaṇe satta bojjh'aṅge yathā-bhūtaṁ bhāvethā" ti.|| ||

Mayam pi kho āvuso, sāvakānaṁ evaṁ dhammaṁ desema:|| ||

"Etha tumhe āvuso, pañca nīvaraṇe pahāya cetaso upakkilese paññāya dubbalī-karaṇe satta bojjh'aṅge yathā-bhūtaṁ bhāvethā" ti.|| ||

Idha no āvuso ko viseso,||
ko adhippāyo.|| ||

Kiṁ nānā-karaṇaṁ,||
samaṇassa vā Gotamassa amhākaṁ vā||
yad idaṁ Dhamma-desanāya vā||
Dhamma-desanaṁ anusāsaniyā vā anusāsanin' ti?|| ||

Atha kho mayaṁ bhante,||
tesam añña-titthiyānaṁ paribbājakānaṁ bhāsitaṁ n'eva abhinandimha,||
na p-paṭikkosimha.|| ||

Anabhinan'ditvā a-p-paṭikkositvā uṭṭhāy'āsanā pakkamimha:|| ||

'Bhagavato santike etassa bhāsitassa atthaṁ ājānissāmā'" ti.|| ||

 

§

 

[9] "Evaṁ vādino bhikkhave,||
añña-titthiyā paribbājakā||
evam assu vacanīyā.|| ||

'Atthi pan'āvuso pariyāyo||
yaṁ pariyāyaṁ āgamma||
pañca nīvaraṇā dasa honti||
satta bojjh'aṅgā catuddasā' ti?|| ||

Evaṁ puṭṭhā bhikkhave,||
añña-titthiyā paribbājakā na c'eva sampāyissanti||
uttariñ ca vighātaṁ āpajji-s-santi.|| ||

[10] Taṁ kissa hetu?|| ||

Yathā taṁ bhikkhave, avisayasmiṁ.|| ||

Nāhaṁ taṁ bhikkhave,||
passāmi sa-devake loke sa-Mārake||
sa-brahmake||
sa-s-samaṇa-brāhmaṇiyā||
pajāya sadeva-manussāya||
yo imesam pañhānaṁ veyyākaraṇena cittaṁ ārādheyya aññatra Tathāgatena vā||
Tathāgata-sāvakena vā||
ito vā pana sutvā.|| ||

 

Pañca Dassa Honti

 

[110] [11] Katamo ca bhikkhave, pariyāyo yaṁ pariyāyaṁ āgamma pañca nīvaraṇā dasa honti?|| ||

[12] Yad api bhikkhave, ajjhattaṁ kāma-c-chando||
tad api nīvaraṇaṁ.|| ||

Yad api bahiddhā kāma-c-chando||
tad api nīvaraṇaṁ.|| ||

'Kāma-c-chanda nīvaraṇaṁ' ti||
iti h'idaṁ uddesaṁ āgacchati.|| ||

Tad aminā p'etaṁ pariyāyena dvayaṁ hoti.|| ||

■

[13] Yad api bhikkhave, ajjhattaṁ vyāpādo||
tad api nīvaraṇaṁ.|| ||

Yad api bahiddhā vyāpādo||
tad api nīvaraṇaṁ.|| ||

'Vyāpāda nīvaraṇan' ti||
iti h'idaṁ uddesaṁ āgacchati.|| ||

Tad aminā p'etaṁ pariyāyena dvayaṁ hoti.|| ||

■

[14] Yad api bhikkhave, thīnaṁ||
tad api nīvaraṇaṁ.|| ||

Yad api middhaṁ||
tad api nīvaraṇāṁ.|| ||

'Thīna-middha nīvaraṇaṁ' ti||
iti h'idaṁ uddesaṁ āgacchati.|| ||

Tad aminā p'etaṁ pariyāyena dvayaṁ hoti.|| ||

■

[15] Yad api bhikkhave, uddhaccaṁ||
tad api nīvaraṇaṁ.|| ||

Yad api kukkuccaṁ||
tad api nīvaraṇaṁ.|| ||

'Uddhacca-kukkucca nīvaraṇan' ti||
iti h'idaṁ uddesaṁ āgacchati.|| ||

Tad aminā p'etaṁ pariyāyena dvayaṁ hoti.|| ||

■

[16] Yad api bhikkhave, ajjhattaṁ dhammesu vicikicchā||
tad api nīvaraṇaṁ.|| ||

Yad api bahiddhā dhammesu vicikicchā||
tad api nīvaraṇaṁ.|| ||

'Vicikicchā nīvaraṇan' ti||
iti h'idaṁ uddesaṁ gacchati.|| ||

Tad aminā p'etaṁ pariyāyena dvayaṁ hoti.|| ||

[17] Ayaṁ kho bhikkhave, parāyāyo||
yaṁ pariyāyaṁ||
āgamma pañca nīvaraṇā dasa honti.|| ||

 

Satta Catu-d-dasa Honti

 

[18] Katamo ca bhikkhave, pariyāyo||
yaṁ pariyāyaṁ||
āgamma satta bojjh'aṅgā catuddasa honti?|| ||

[19] Yad api bhikkhave, ajjhattaṁ dhammesu sati||
tad api sati-sambojjh'aṅgo.|| ||

Yad api bahiddhā dhammesu sati tad api sati-sambojjh'aṅgo.|| ||

'Sati-sambojjhago' ti||
iti h'idaṁ uddesaṁ āgacchati.|| ||

Tad aminā p'etaṁ pariyāyena dvayaṁ hoti.|| ||

■

[111] [20] Yad api bhikkhave, ajjhattaṁ dhammesu paññāya||
pavicinati||
pavicarati||
parivīmaṁsam||
āpajjati||
tad api dhamma-vicaya-sambojjh'aṅgo.|| ||

Yad api bahiddhā dhammesu paññāya||
pavicanati||
pavicarati||
parivīmaṁsam||
āpajjati||
tad api dhamma-vicaya-sambojjh'aṅgo.|| ||

'Dhamma-vicaya-sambojjhago' ti||
iti h'idaṁ uddesaṁ gacchati.|| ||

Tad aminā p'etaṁ pariyāyena dvayaṁ hoti.|| ||

■

[21] Yad api bhikkhave, kāyikaṁ viriyaṁ||
tad api viriya-sambojjh'aṅgo.|| ||

Yad api cetasikaṁ viriyaṁ||
tad api viriya-sambojjh'aṅgā.|| ||

'Viriya-sambojjh'aṅgo' ti||
iti h'idaṁ uddesaṁ āgacchati.|| ||

Tad aminā p'etaṁ pariyāyena dvayaṁ hoti.|| ||

■

[22] Yad api bhikkhave, sa-vitakka-sa-vicārā pīti||
tad api pīti-sambojjh'aṅgo.|| ||

Yad api avitakka-avicārā pīti||
tad api pīti-sambojjh'aṅgo.|| ||

'Pīti-sambojjh'aṅgo' ti||
iti h'idaṁ uddesaṁ āgacchati.|| ||

Tad aminā p'etaṁ pariyāyena dvayaṁ hoti.|| ||

■

[23] Yad api bhikkhave, kāya-passaddhi||
tad api passaddhi-sambojjh'aṅgo.|| ||

Yad api citta-passaddhi,||
tad api passaddhi-sambojjh'aṅgo.|| ||

'Passaddhi-sambojjh'aṅgo' ti||
iti h'idaṁ uddesaṁ āgacchati.|| ||

Tad aminā p'etaṁ pariyāyena dvayaṁ hoti.|| ||

■

[24] Yad api bhikkhave, sa-vitakko sa-vicāro samādhi||
tad api samādhi-sambojjh'aṅgo.|| ||

Yad api avitakko avicāro samādhi||
tad api samādhi-sambojjh'aṅgā.|| ||

'Samādhi-sambojjh'aṅgo' ti||
iti h'idaṁ uddesaṁ gacchati.|| ||

Tad aminā p'etaṁ pariyāyena dvayaṁ hoti.|| ||

■

[25] Yad api bhikkhave, ajjhattaṁ dhammesu upekhā||
tad api upekhā-sambojjh'aṅgo.|| ||

Yad api bahiddhā dhammesu upekhā||
tad api upekhā-sambojjh'aṅgo.|| ||

'Upekhā-sambojjhago' ti||
iti h'idaṁ uddesaṁ gacchati.|| ||

Tad aminā p'etaṁ pariyāyena dvayaṁ hoti.|| ||

[26] Ayaṁ kho bhikkhave, pariyāyo||
yaṁ pariyāya||
āgamma satta-bojjh'aṅgā catuddasā" ti.|| ||