Aṅguttara Nikāya
Catukka Nipāta
XX: Mahā Vagga

Sutta 194

Sāpūgiya Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[194]

[1][pts] Evaṁ me sutaṁ:|| ||

Ekaṁ samayaṁ āyasmā Ānando Koḷiyesu viharati Sāpūgannama Koḷiyānaṁ nigame.|| ||

Atha kho sambahulā Sāpūgiyā Koḷiyaputtā yen'āyasmā Ānando ten'upasaṅkamiṁsu.|| ||

Upasaṅkamitvā āyasmantaṁ Ānandaṁ abhivādetvā eka-m-antaṁ nisīdiṁsu.|| ||

Eka-m-antaṁ nisinne kho Sāpūgiye Koḷiyaputte āyasmā Ānando etad avoca:|| ||

"Cattār'imāni Vyagghapajjā pārisuddhi-padhāniy-aṅgāni tena Bhagavatā jānatā passatā arahatāsammāsamābud- [195] dhena sammad akkhātāni sattāṇaṁ visuddhiyā soka-pari-d-davānaṁ samitikkamāya dukkha-domanassānaṁ attha-gamāya ñāyassa adhigamāya Nibbānassa sacchi-kiriyāya.|| ||

Katamāni cattāri?|| ||

Sīla-pārisuddhi-padhāniy-aṅgaṁ||
citta-pārisuddhi-padhāniy-aṅgaṁ||
diṭṭhi-pārisuddhi-padhāniy-aṅgaṁ||
vimutti-pārisuddhi-padhāniy-aṅgaṁ.|| ||

2. Katamaña ca Vyagghapajjā sīla-pārisuddhi-padhāniy-aṅgaṁ?|| ||

Idha Vyagghapajjā bhikkhu sīlavā hoti sikkhati sikkhā-padesu.|| ||

Ayaṁ vuccati Vyagghapajjā sīla-pārisuddhi.|| ||

Iti eva-rūpiṁ sīla-pārisuddhiṁ aparipūriṁ vā paripūressāmi,||
paripūriṁ vā tattha tattha paññāya anuggahessāmīti.|| ||

Yo tattha chando ca||
vāyāmo ca||
ussāho ca||
ussoḷhi ca||
appaṭivānī ca||
sati ca||
sampajaññaṁ ca,||
idaṁ vuccati Vyagghapajjā||
sīla-pārisuddhi-padhāniy-aṅgaṁ.|| ||

 

§

 

3. Katamañ ca Vyagghapajjā citta-pārisuddhi-padhāniy-aṅgaṁ?|| ||

Idha Vyagghapajjā bhikkhu vivicc'eva kāmehi vivicca akusalehi dhamamehi sa-vitakkaṁ sa-vicāraṁ viveka-jaṁ pīti-sukhaṁ paṭhamaṁ jhānaṁ upasampajja viharati.|| ||

Vitakka-vicārānaṁ vupasamā ajjhattaṁ sampasādanaṁ cetaso ekodī-bhāvaṁ avitakkaṁ avicāraṁ samādhi-jaṁ pīti-sukhaṁ dutiyaṁ jhānaṁ upasampajja viharati.|| ||

Pītiyā ca virāgā upekkhako ca viharati||
sato ca sampajāno,||
sukhañ ca kāyena paṭisaṁvedeti yaṁ taṁ ariyā āvikkhanti|| ||

'upekkhako satimā sukha-vihārī'|| ||

ti tatiyaṁ jhānaṁ upasampajja viharati.|| ||

Sukhassa ca pahānā dukkhassa ca pahānā pubb'eva somanassa-domanassānaṁ attha-gamā adukkha-ṁ-asukhaṁ upekkhā-sati-pārisuddhiṁ catutthaṁ jhānaṁ upasampajja viharati.|| ||

Ayaṁ vuccati Vyagghapajjā citta-pārisuddhi.|| ||

Iti eva-rūpiṁ citta-pārisuddhiṁ aparipūriṁ vā paripūressāmi,||
paripūriṁ vā tattha tatthā paññāya anuggahessāmīti.|| ||

Yo tattha chando ca||
vāyāmo ca||
ussāho ca||
ussoḷhi ca||
appaṭivānī ca||
sati ca||
sampajaññaṁ ca,||
idaṁ vuccati Vyagghapajjā||
citta-pārisuddhi-padhāniy-aṅgaṁ.|| ||

 

§

 

4. Katamañ ca Vyagghapajjā diṭṭhi-pārisuddhi-padhāniy-aṅgaṁ?|| ||

Idha Vyagghapajjā bhikkhu|| ||

'Idaṁ dukkhan' ti yathā-bhūtaṁ pajānāti.|| ||

'Ayaṁ dukkha-samudayo' ti yathā-bhūtaṁ pajānāti.|| ||

'Ayaṁ dukkha-nirodho' ti yathā-bhūtaṁ pajānāti.|| ||

'Ayaṁ dukkha-nirodha-gāminī paṭipadā' ti yathā-bhūtaṁ pajānāti.|| ||

Ayaṁ vuccanati Vyagghapajjā diṭṭhi-pārisuddhi.|| ||

Iti eva-rūpiṁ diṭṭhi-pārisuddhiṁ aparipūriṁ vā paripūressāmi paripūriṁ vā tattha tattha paññāya anuggahessāmīti.|| ||

Yo tattha chando ca||
vāyāmo ca||
ussāho ca||
ussoḷhi ca||
appaṭivānī ca||
sati ca||
sampajaññaṁ ca,||
idaṁ vuccati Vyagghapajjā||
diṭṭhi-pārisuddhi-padhāniy-aṅgaṁ.|| ||

 

§

 

5. Katamañ ca Vyagghapajjā vimutti-pārisuddhi-padhāniy-aṅgaṁ?|| ||

Sa kho so Vyagghapajjā ariya-sāvako||
iminā ca sīla-pārisuddhipadhāniy-aṅgena samannāgato||
iminā cacitta-pāri- [196] suddhipadhāniy-aṅgena samannāgato||
iminā ca diṭṭhi-pārisuddhipadhāniy-aṅgena samannāgato||
rajanīyesu dhammesu cittaṁ virājeti,||
vimocanīyesu dhammesu cittaṁ vimoceti.|| ||

So rajanīyesu dhammesu cittaṁ virāchetvā vimocanīyesu dhammesu cittaṁ vimocetvā sammā vimuttaṁ phusati.|| ||

Ayaṁ vuccati Vyagghapajjā vimutti-pārisuddhi.|| ||

Iti eva-rūpiṁ vimutti-pārisuddhiṁ aparipūriṁ vā paripūressāmi paripūriṁ vā tattha tattha paññāya anuggahessāmīti.|| ||

Yo tattha chando ca||
vāyāmo ca||
ussāho ca||
ussoḷhi ca||
appaṭivānī ca||
sati ca||
sampajaññaṁ ca,||
idaṁ vuccati Vyagghapajjā||
vimutti-pārisuddhi-padhāniy-aṅgaṁ.|| ||

Imāni kho Vyagghapajjā cattāri pārisuddhi-padhāniy-aṅgāni,||
tena Bhagavatā jānatā passatā arahatā Sammā-SamBuddhena sammad akkhātāni sattāṇaṁ visuddhiyā soka-pari-d-davānaṁ samitikkamāya dukkha-domanassānaṁ attha-gamāya ñāyassa adhigamāya Nibbānassa sacchi-kiriyāyā" ti.|| ||