Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Atthaka Nipāta

Sutta 80

Kusītārambhavatthu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


[322]

[1][pts][ati] Evaɱ me sutaɱ:|| ||

Sāvatthinidānaɱ.|| ||

Aṭṭh'imāni bhikkhave kusītavatthuni.|| ||

Katamāni aṭṭha?|| ||

2. Idha, bhikkhave, bhikkhunā kammaɱ kattabbaɱ hoti.|| ||

Tassa evaɱ hoti:||
kammaɱ kho me kattabbaɱ bhavissati.|| ||

Kammaɱ kho pana me karontassa kāyo kilamissati handāhaɱ nipajjāmī ti.|| ||

So nijjati, na viriyaɱ ārabhati appattassa pattiyā anadhigatassa adhigamāya asacchikatassa sacchikiriyāya.|| ||

Idaɱ, bhikkhave, paṭhamaɱ kusītavatthu.|| ||

3. Puna ca paraɱ bhikkhave bhikkhunā kammaɱ kataɱ hoti.|| ||

Tassa evaɱ hoti:||
ahaɱ kho kammaɱ akāsiɱ,||
kammaɱ kho pana me karontassa kāyo kilanto,||
handāhaɱ nipajjāmīti.|| ||

So nipajjati, na viriyaɱ ārabhati appattassa pattiyā anadhigatassa adhigamāya asacchikatassa sacchikiriyāya.|| ||

Idaɱ, bhikkhave, dutiyaɱ kusītavatthu.|| ||

4. Puna ca paraɱ bhikkhave bhikkhunā maggo gantabbo hoti.|| ||

Tassa evaɱ hoti: 'maggo me gantabbo bhavissati,||
maggaɱ kho pana me gacchantassa kāyo kilamissati.|| ||

Handāhaɱ nipajjāmī'ti.|| ||

So nipajjati na viriyaɱ ārabhati appattassa pattiyā anadhigatassa adhigamāya asacchikatassa sacchikiriyāya idaɱ bhikkhave,||
tatiyaɱ kusītavatthu.|| ||

5. Puna ca paraɱ bhikkhave bhikkhunā maggo gato hoti.|| ||

Tassa evaɱ hoti:||
ahaɱ kho maggaɱ agamāsiɱ,||
maggaɱ kho pana me gacchantassa kāyo kilānto,||
handāhaɱ nipajjāmī' ti.|| ||

So nipajjati, na viriyaɱ ārabhati appattassa pattiyā anadhigatassa adhigamāya asacchikatassa sacchikiriyāya.|| ||

Idaɱ, bhikkhave, catutthaɱ kusītatthu.|| ||

6. Puna ca paraɱ bhikkhave bhikkhu gāmaɱ vā nigamaɱ vā piṇḍāya varanto na labhati lūkhassa vā paṇitassa vā bhojanassa yāvadatthaɱ pāripūriɱ.|| ||

Tassa evaɱ [333] hoti:||
ahaɱ kho gāmaɱ vā nigamaɱ vā piṇḍāya caranto nālatthaɱ lūkhassa vā paṇitassa vā bhojanassa yāvadatthaɱ pāripūriɱ, tassa me kāyo kilanto, akammaññehaɱ, nipajjāmī' ti.|| ||

So nipajjati, na viriyaɱ ārabhati appattassa pattiyā anadhigatassa adhigamāya asaccikatassa sacchikiriyāya.|| ||

Idaɱ, bhikkhave, bhikkhave,||
pañcamaɱ kusītavatthu.|| ||

7. Puna ca paraɱ bhikkhave bhikkhu gāmaɱ vā nigamaɱ vā piṇḍāya caranto labhati lūkhassa vā paṇītassa vā bhojanassa yāvadatthaɱ pāripūriɱ.|| ||

Tassa evaɱ hoti:||
ahaɱ kho gāmaɱ vā nigamaɱ vā piṇḍāya caranto alatthaɱ lūkhassa vā paṇītassa vā bhojanassa yāvadatthaɱ pāripūriɱ.|| ||

Tassa me kāyo garuko akammañño, māsāvitaɱ.|| ||

Maññe, handāhaɱ nipajjāmī' ti||
so nipajja ti,||
na viriyaɱ ārabhati appattassa pattiyā anadhigatassa adhigamāya asaccikatassa sacchikiriyāya.|| ||

Idaɱ, bhikkhave, chaṭṭhaɱ kusītavatthu.|| ||

8. Puna ca paraɱ bhikkhave bhikkhuno uppanno hoti appamattako ābādho.|| ||

Tassa evaɱ hoti:||
"uppanno kho me ayaɱ appamattako ābādho, atthi kappo,||
nipajjituɱ, handāhaɱ nipajjajāmī" ti.|| ||

So nipajjati, na viriyaɱ ārabhati appattassa pattiyā anadhigatassa adhigamāya asaccikatassa sacchikiriyāya.|| ||

Idaɱ, bhikkhave, sattamaɱ kusītavatthu.|| ||

9. Puna ca paraɱ bhikkhave bhikkhu gilānā vuṭṭhito hoti,||
aciravuṭṭhito gelaññā.|| ||

Tassa evaɱ hoti:||
ahaɱ kho gilānā vuṭṭhito aciravuṭṭhito gelaññā,||
tassa me kāyo dubbalo akammaññā.|| ||

Handāhaɱ nipajjāmīti.|| ||

So nipajjati, na viriyaɱ ārabhati appattassa pattiyā anadhigatassa adhigamāya asacchikatassa sacchikiriyāya.|| ||

Idaɱ, bhikkhave, aṭṭhamaɱ kusītavatthu.|| ||

Imāni kho bhikkhave aṭṭha kusītavatthunī" ti.|| ||

[334] 10. "Aṭṭh'imāni bhikkhave ārambhavattūni.|| ||

Katamāni aṭṭha?|| ||

11. Idha, bhikkhave, bhikkhunā kammaɱ kattabbaɱ hoti.|| ||

Tassa evaɱ hoti;||
Kammaɱ kho me kattabbaɱ bhavissati,||
kammaɱ kho pana me karontena na sūkaraɱ buddhānaɱ sāsanaɱ manasikātuɱ,||
handāhaɱ paṭigacceva viriyaɱ ārabhāmi appattassa pattiyā anadhigatassa adhigamāya asacchikatassa sacchikiriyāyā' ti so viriyaɱ ārabhati appattassa pattiyā anadhigatassa adhigamāya asacchikatassa sacchikiriyāya.|| ||

Idaɱ, bhikkhave, paṭhamaɱ ārambhavatthu.|| ||

12. Puna ca paraɱ bhikkhave bhikkhunā kammaɱ kataɱ hoti.|| ||

Tassa evaɱ hoti:||
ahaɱ kho kammaɱ akāsiɱ,||
kammaɱ kho panāhaɱ karonto nāsakkhiɱ Buddha sāsanaɱ manasikātuɱ,||
handāhaɱ viriyaɱ ārabhāmi appattassa pattiyā anadhigatassa adhigamāya asacchikatassa sacchikiriyāya.|| ||

So viriyaɱ ārabhati appattassa pattiyā,||
anadhigatassa adhigamāya asacchikatassa sacchikiriyāya.|| ||

Idaɱ, bhikkhave, dutiyaɱ ārambhavatthu.|| ||

13. Puna ca paraɱ bhikkhave bhikkhunā maggo gantabbo hoti.|| ||

Tassa evaɱ hoti:||
maggo me gantabbo bhavissati,||
maggaɱ kho pana me gacchantena na sūkaraɱ buddhānaɱ sāsanaɱ manasikātuɱ.|| ||

Handāhaɱ vīriyaɱ ārabhāmi appattassa pattiyā anadhigatassa adhigamāya asaccikatassa saccikiriyāya.|| ||

So viriyaɱ ārabhati appattassa pattiyā,||
anadhigatassa adhigamāya asacchikatassa saccikiriyāya.|| ||

Idaɱ, bhikkhave, tatiyaɱ ārambhavatthu.|| ||

14. Puna ca paraɱ bhikkhave bhikkhunā maggo gato hoti.|| ||

Tassa evaɱ hoti:||
ahaɱ kho maggaɱ agamāsiɱ,||
maggaɱ kho panāhaɱ gacchanto nāsakkhiɱ buddhānaɱ sāsanaɱ manasikātuɱ,||
handāhaɱ viriyaɱ ārabhāmi appattassa pattiyā anadhigatassa adhigamāya asacchikatassa sacchikiriyāya.|| ||

So viriyaɱ ārabhati appattassa pattiyā,||
anadhigatassa adhigamāya asacchikatassa saccikiriyāya idaɱ bhikkhave catutthaɱ ārambhavatthu.|| ||

[335] 15. Puna ca paraɱ bhikkhave bhikkhu gāmaɱ vā nigamaɱ vā piṇḍāya varanto na labhati lūkhassa vā paṇitassa vā bhojanassa yāvadatthaɱ pāripūriɱ.|| ||

Tassa evaɱ hoti:||
ahaɱ kho gāmaɱ vā nigamaɱ vā piṇḍāya caranto nālatthaɱ lūkhassa vā paṇitassa vā bhojanassa yāvadatthaɱ pāripūriɱ,||
tassa me kāyo lahuko kammañño,||
handāhaɱ viriyaɱ ārabhāmi appattassa pattiyā anadhigatassa adhigamāya asacchikatassa sacchikiriyāya.|| ||

So viriyaɱ ārabhati appattassa pattiyā,||
anadhigatassa adhigamāya asacchikatassa sacchikiriyāya idaɱ bhikkhave pañcamaɱ ārambhavatthu.|| ||

16. Puna ca paraɱ bhikkhave bhikkhu gāmaɱ vā nigamaɱ vā piṇḍāya caranto labhati lūkhassa vā paṇītassa vā bhojanassa yāvadatthaɱ pāripūriɱ.|| ||

Tassa evaɱ hoti:||
ahaɱ kho gāmaɱ vā nigamaɱ vā piṇḍāya caranto alatthaɱ lūkhassa vā paṇītassa vā bhojanassa yāvadatthaɱ pāripūriɱ.|| ||

Tassa me kāyo balavā kammañño,||
handāhaɱ viriyaɱ ārabhati appattassa pattiyā anadhigatassa adhigamāya asaccikatassa sacchikiriyāya.|| ||

Idaɱ, bhikkhave, chaṭṭhaɱ ārambhavatthu.|| ||

17. Puna ca paraɱ bhikkhave, bhikkhuno uppanno hoti appamattako ābādho.|| ||

Tassa evaɱ hoti:||
uppanno kho me aya appamattako ābādho.|| ||

Ṭhānaɱ kho pan'etaɱ vijajati yaɱ me ābādho pavaḍḍeḍhayya,||
handāhaɱ paṭigacceva viriyaɱ ārabhāmi appattassa pattiyā anadhigatassa adhigamāya asacchikatassa sacchikiriyāya.|| ||

So viriyaɱ ārabhati appattassa pattiyā anadhigatassa adhigamāya asacchikatassa sacchikiriyāya.|| ||

Idaɱ, bhikkhave, sattamaɱ ārambhavatthu.|| ||

18. Puna ca paraɱ bhikkhave, bhikkhu gilānā vuṭṭhito hoti,||
acira vuṭṭhito gelaññā.|| ||

Tassa evaɱ hoti:||
ahaɱ kho gilānā vuṭṭhito,||
aciravuṭṭhito gelaññā.|| ||

Ṭhānaɱ kho pan'etaɱ vijjati yaɱ me ābādho paccudāvatteyya,||
handāhaɱ paṭigacceva viriyaɱ ārabhāmi appattassa pattiyā anadhigatassa adhigamāya asacchikatassa sacchikiriyāya.|| ||

So viriyaɱ ārabhati appattassa pattiyā anadhigatassa adhigamāya asacchikatassa sacchikiriyāya.|| ||

Idaɱ, bhikkhave, aṭṭhamaɱ ārambhavatthu.|| ||

Imāni kho bhikkhave, aṭṭha ārambhavattunī ti.|| ||

 


Contact:
E-mail
Copyright Statement   Webmaster's Page