Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
VI. Sacitta Vagga

Sutta 58

Mūlaka Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


[106]

[1][pts][ati][bd][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Sace bhikkhave aññatitthiyā paribbājakā evaɱ puccheyyuɱ:

'Kiɱmūlaka āavuso sabbe dhammā,
kiɱsambhavā sabbe dhammā,
kiɱsamudayā sabbe dhammā,
kiɱsamosaraṇā sabbe dhammā,
kiɱpamukhā sabbe dhammā,
kiɱ-ādhipateyyā sabbe dhammā,
kiɱ-uttarā sabbe dhammā,
kiɱsārā sabbe dhammā,
kiɱ-ogadhā sabbe dhammā,
kiɱpariyosānā sabbe dhammā' ti.

Evaɱ puṭṭhā tumhe bhikkhave tesaɱ aññatitthiyānaɱ paribbājakānaɱ kinti vyākareyyāthā ti?

'Bhagavaɱmūlakā no bhante dhammā Bhagavaɱnettikā Bhagavaɱpaṭisaraṇā. Sādhu vata bhante Bhagavantaɱ yeva paṭibhātu etassa bhāsitassa attho, Bhagavato sutvā bhikkhū dhāressantī' ti.

Tena hi bhikkhave suṇātha sādhukaɱ manasikarotha, bhāsissāmī ti.

'Evaɱ bhante' ti kho te bhikkhū Bhagavato paccassosuɱ.

Bhagavā etad avoca: —

2. Sace bhikkhave aññatitthiyā paribbājakā evaɱ puccheyyuɱ:

'Kiɱmūlaka āavuso sabbe dhammā,
kiɱsambhavā sabbe dhammā,
kiɱsamudayā sabbe dhammā,
kiɱsamosaraṇā sabbe dhammā,
kiɱpamukhā sabbe dhammā,
kiɱ-ādhipateyyā sabbe dhammā,
kiɱ-uttarā sabbe dhammā,
kiɱsārā sabbe dhammā,
kiɱ-ogadhā sabbe dhammā,
kiɱpariyosānā sabbe dhammā' ti.

'Chandamūlakā āavuso sabbe dhammā,
manasikārasambhavā sabbe dhammā,
phassasamudayā sabbe dhammā,
vedanā samosaraṇā sabbe dhammā,
samādhipāmukhā sabbe dhammā,
satādhipateyyā sabbe dhammā,
paññuttarā sabbe dhammā,
vimuttisārā sabbe dhammā,
amatogadhā sabbe dhammā,
nibbānapariyosāā sabbe dhammā' ti.

Evaɱ puṭṭhā tumhe bhikkhave tesaɱ aññatitthiyānaɱ paribbājakānaɱ evaɱ vyākareyyāthā ti.

 


Contact:
E-mail
Copyright Statement   Webmaster's Page