Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
5. Brāhmaṇa Vagga

Sutta 95

Caŋkī Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][than][ntbb][upal] Evaɱ me sutaɱ|| ||

Ekaɱ samayaɱ Bhagavā Kosalesu cārikaɱ caramāno mahatā bhikkhu-saŋghena saddhiɱ yena opasādaɱ1 nāma kosalānaɱ brāhmaṇagāmo tadavasari.|| ||

Tatra sudaɱ Bhagavā opasāde viharati uttarena opasādaɱ devavane sālavane.|| ||

Tena kho pana samayena Caŋkībrāhmaṇo opasādaɱ ajjhāvasati sattussadaɱ satiṇakaṭṭhodakaɱ sadhaññaɱ rājabhoggaɱ raññā Pasenadinā kosalena dinnaɱ rājadāyaɱ brahmadeyyaɱ.|| ||

Assosuɱ kho opasādakā brāhmaṇagahapatikā: 'samaṇo khalu bho Gotamo Sakyaputto Sakyakulā pabbajito Kosalesu cārikaɱ caramāno mahatā bhikkhu-saŋghena saddhiɱ opasādaɱ anuppatto opasāde viharati uttarena opasādaɱ devavane sālavane|| ||

Taɱ kho pana Bhagavantaɱ Gotamaɱ evaɱ kalyāṇo kittisaddo abbhuggato: 'Iti pi so Bhagavā arahaɱ Sammā-sambuddho vijjā-caraṇa-sampanno sugato loka-vidū anuttaro purisadammasārathi satthā deva-manussānaɱ buddho Bhagavā' ti.|| ||

So imaɱ lokaɱ sadevakaɱ samārakaɱ sabrahmakaɱ sassamaṇa-brāhmaṇiɱ pajaɱ sadeva-manussaɱ sayaɱ abhiññā sacchikatvā pavedeti,||
so dhammaɱ deseti ādi kalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāseti.|| ||

Sādhu kho pana tathārūpānaɱ arahataɱ dassanaɱ hotī' ti.|| ||

Atha kho opasādakā2 brāhmaṇagahapatikā opasādā nikkhamitvā saŋghāsaŋghī gaṇībhūtā uttarena mukhā4 gacchanti yena devavanaɱ sālavanaɱ.|| ||

Tena kho pana samayena Caŋkī brāhmaṇo upari pāsāde divāseyyaɱ upagato hoti.|| ||

Addasā kho Caŋkī brahmaṇo opasādake brāhmaṇagahapatike,||
opasādā nikkhamitvā saŋghāsaŋghī gaṇībhūte uttarena mukhe gacchante yena devavanaɱ sālavanaɱ,||
disvāna khattaɱ āmantesi: kin nu kho bho khatte,||
opasādakā brāhmaṇagahapatikā opasādā nikkhamitvā saŋghāsaŋghī gaṇībhūtā uttarena mukhā gacchanti yena devavanaɱ sālavananti.|| ||

Atthi bho Caŋkī,||
samaṇo bho Gotamo Sakyaputto Sakyakulā pabbajito Kosalesu cārikaɱ caramāno mahatā bhikkhu-saŋghena saddhiɱ opasādaɱ anuppatto opasāde viharati uttarena opasādaɱ devavane sālavane.|| ||

Taɱ kho pana Bhagavantaɱ Gotamaɱ evaɱ kalyāṇo kittisaddo abbhuggato: iti pi so Bhagavā arahaɱ Sammā-sambuddho vijjā-caraṇa-sampanno sugato loka-vidū anttaro purisadammasārathi satthā deva-manussānaɱ buddho Bhagavā' ti.|| ||

Tamete bhavantaɱ Gotamaɱ dassanāya upasaŋkaman' ti.|| ||

Tena hi bho khatte,||
yena opasādakā brāhmaṇagahapatikā ten'upasaŋkama,||
upasaŋkamitvā opasādake brāhmaṇagahapatike evaɱ vadehi: Caŋkī bho brāhmaṇo evam āha: āgamentu kira bhavanto,||
Caŋkīpi brāhmaṇo samaṇaɱ getamaɱ dassanāya upasaŋkamissa' ti.|| ||

Evaɱ bhoti kho so khatto1 caŋkissa brāhmaṇassa [165] paṭissutvā yena opasādakā brāhmaṇagahapatikā ten'upasaŋkami,||
upasaŋkamitvā opasādake brāhmaṇagahapatike etad avoca: Caŋkī bho brāhmaṇo evam āha: āgamentu kira bhavanto,||
Caŋkīpi brāhmaṇo samaṇaɱ Gotamaɱ dassanāya upasaŋkamissa' ti.|| ||

Tena kho pana samayena nānāverajjakānaɱ brāhmaṇānaɱ pañcamattāni brāhmaṇasatāni opasāde paṭivasanti kenacid-eva karaṇīyena.|| ||

Assosuɱ kho te brāhmaṇā Caŋkī kira brāhmaṇo samaṇaɱ Gotamaɱ dassanāya upasaŋkamissa' ti.|| ||

Atha kho te brāhmaṇā yena Caŋkī brāhmaṇo ten'upasaŋkamiɱsu,||
upasaŋkamitvā caŋkiɱ brāhmaṇaɱ etad avocuɱ: saccaɱ kira bhavaɱ Caŋkī samaṇaɱ Gotamaɱ dassanāya upasaŋkamissatī' ti.|| ||

Evaɱ kho me bho hoti,aham pi samaṇaɱ Gotamaɱ dassanāya upasaŋkamissāmīti.|| ||

Mā bhavaɱ Caŋkī samaṇaɱ Gotamaɱ dassanāya upasaŋkami.|| ||

Na arahati bhavaɱ Caŋkī samaṇaɱ Gotamaɱ dassanāya upasaŋkamituɱ,||
samaṇotv'eva Gotamo arahati bhavantaɱ caŋkiɱ dassanāya upasaŋkamituɱ.|| ||

Bhavaɱ hī Caŋkī ubhato sujāto mātito ca pitito ca,||
saɱsuddhagahaṇiko yāva sattamā pitāmahayugā akkhitto anupakkuṭṭho jātivādena,||
yam pi bhavaɱ Caŋkī ubhato sujāto mātito ca pītito ca,||
saɱsuddhagahaṇiko yāva sattamā pitāmahayugā akkhitto anupakkuṭṭho jātivādena.|| ||

Imināpaŋgena na arahati bhavaɱ Caŋkī samaṇaɱ Gotamaɱ dassanāya upasaŋkamituɱ,||
samaṇotv'eva Gotamo arahati bhavantaɱ caŋkiɱ dassanāya upasaŋkamituɱ.|| ||

Yam pi bhavaɱ hi Caŋkī aḍḍho mahaddhano mahābhogo imināpaŋgena na arahati bhavaɱ Caŋkī samaṇaɱ Gotamaɱ dassanāya upasaŋkamituɱ,||
samaṇotv'eva Gotamo arahati bhavantaɱ caŋkiɱ dassanāya upasaŋkamituɱ.|| ||

Yam pi bhavaɱ hi Caŋkī tiṇṇaɱ vedanānaɱ pāragu sanighaṇḍukeṭubhānaɱ sākkharappabhedānaɱ itihāsapañcamānaɱ,padako veyyākaraṇaṇo lokāyatamahāpurisalakkhaṇesu anavayo imināpaŋgena na arahati bhavaɱ ḍaŋki samaṇaɱ Gotamaɱ dassanāya upasaŋkamituɱ,||
yam pi bhavaɱ hi Caŋkī abhirūpo dassanīyo pāsādiko paramāya vaṇṇapokkharatāya samannāgato brahmavaṇṇī brahmavaccasī akkhuddāvakāso dassanāya imināpaŋgena na arahati bhavaɱ Caŋkī samaṇaɱ Gotamaɱ dasnāya upasaŋkamituɱ,||
samaṇotv'eva Gotamo arahati bhavantaɱ caŋkiɱ dassanāya upasaŋkamituɱ.|| ||

Yam pi bhavaɱ Caŋkī,||
sīlavā vuddhasīlī vuddhasīlena samannāgato imināpaŋgena na arahati bhavaɱ Caŋkī samaṇaɱ Gotamaɱ dassanāya upasaŋkamituɱ.|| ||

Yam pi bhavaɱ hi Caŋkī kalyāṇavāco kalyāṇavākkaraṇo [166] poriyā vācāya samannāgato vissaṭṭhāya aneḷaga'āya atthassa viññāpaniyā imināpaŋgena na arahati bhavaɱ Caŋkī samaṇaɱ Gotamaɱ dassanāya upasaŋkamituɱ,||
yam pi bhavaɱ Caŋkī,||
bahunnaɱ ācariyapācariyo tīṇi māṇavakasatāni mante vāceti imināpaŋgena na arahati bhavaɱ Caŋkī samaṇaɱ Gotamaɱ dassanāya upasaŋkamituɱ,||
yam pi bhavaɱ hi Caŋkī rañño Pasenadissa Kosalassa sakkato garukato mānito pūjito apacito imināpaŋgena na arahati bhavaɱ Caŋkī samaṇaɱ Gotamaɱ dassanāya upasaŋkamituɱ,||
yam pi bhavaɱ Caŋkī brāhmaṇassa pokkharasātissa sakkato garukato mānito pūjito apacito imināpaŋgena na arahati bhavaɱ Caŋkī samaṇaɱ Gotamaɱ dassanāya upasaŋkamituɱ,||
yam pi bhavaɱ Caŋkī opasādaɱ ajjhāvasati sattussadaɱ satiṇakaṭṭhodakaɱ sadhaññaɱ rājabhoggaɱ raññaɱ Pasenadinā kosalena dinnaɱ rājadāyaɱ brahmadeyyaɱ.|| ||

Yam pi bhavaɱ Caŋkī opasādaɱ ajjhāvasati sattussadaɱ satiṇakaṭṭhodakaɱ sadhaññaɱ rājabhoggaɱ raññā Pasenadinā kosalena dinnaɱ rājadāyaɱ brahmadeyyaɱ imināpaŋgena na arahati bhavaɱ Caŋkī samaṇaɱ Gotamaɱ dassanāya upasaŋkamituɱ.|| ||

Samaṇo tv'eva Gotamo arahati bhavantaɱ caŋkiɱ dassanāya upasaŋkamitun' ti.|| ||

Evaɱ vutte Caŋkī brāhmaṇo te brāhmaṇe etad avoca: tena hi bho,||
mama pi suṇātha yathā mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Na tv'eva arahati so bhavaɱ gātamo amhākaɱ dassanāya upasaŋkamituɱ.|| ||

Samaṇo khalū bho Gotamo ubhato sujāto mātito ca pitito ca,||
saɱsuddhagahaṇiko yāva sattamā pitāmahayugā akkhitto anupakkuṭṭho jātivādena.|| ||

Yam pi bho Samaṇo Gotamo ubhato sujāto mātito ca pitato ca,||
saɱsuddhagahaṇiko yāva sattamā pitāmahayugā akkhitto anupakkuṭṭho jātivādena,||
imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇo khalū bho Gotamo pahūtaɱ hiraññasuvaṇṇaɱ pahāya pabbajito bhumigatañ ca vehāsaṭṭhañca yam pi bho Samaṇo Gotamo pahutaɱ hiraññasuvaṇṇaɱ pahāya pabbajito bhūmigatañ ca vehāsaṭṭhañca imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ dassanāya upasaŋkamituɱ.|| ||

Samaṇo khalu bho Gotamo daharo samāno susukālakeso bhadrena yobbanena samannāgato paṭhamena vayasā agārasmā anagāriyaɱ pabbajito imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇo khalu bho Gotamo akāmakānaɱ mātā-pitunnaɱ assumukhānaɱ rudantānaɱ kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajito imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇo khalu bho Gotamo abhirūpo dassanīyo pasādiko paramāya vaṇṇapokkharatāya samannāgato [167] brahmavaṇṇī brahmavaccasī akkhuddāvakāso dassanāya imināpaŋgena na arahati kho bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇo khalu bho Gotamo sīlavā ariyasilī kusalasīlī kusalasīlena samannāgato imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇo khalu bho Gotamo kalyāṇavāco kalyāṇavākkaraṇo poriyā vācāya samannāgato vissaṭṭhāya aneḷaga'āya atthassa viññāpaniyā imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇo khalu bho Gotamo bahunnaɱ ācariyapācariyo imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇo khalu bho Gotamo khīṇakāmarāgo vigatacāpallo imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇo khalu bho Gotamo kammavādī kiriyavādī apāpapurekkhāro brahmaññāya pajāya imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇo khalu bho Gotamo uccākulā pabbajito asambhinnā khattiyakulā imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇo khalu bho Gotamo aḍḍhakulā pabbajito mahaddhanā mahābhogā imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇaɱ khalu bho Gotamaɱ tiroraṭṭhā tirojanapadā sampucchituɱ āgacchanti imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇaɱ khalu bho Gotamaɱ anekāni devatāsahassāni pāṇehi saraṇaɱ gatāni imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇaɱ khalu bho Gotamaɱ evaɱ kalyāṇo kittisaddo abbhuggato: iti pi so Bhagavā arahaɱ Sammā-sambuddho vijjācaranasampanno sugato loka-vidū anuttaro purisadammasārathi satthā deva-manussānaɱ buddho Bhagavāti imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇo khalu bho Gotamo dvattiɱsamahāpurisalakkhaṇehi samannāgato imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇaɱ khalu bho Gotamaɱ rājā Māgadho seniyo bimbisāro saputtadāro pāṇehi saraṇaɱ gato imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇaɱ khalu bho Gotamaɱ rāja Pasenadi kosalo saputtadāro pāṇehi saraṇaɱ gato imināpaŋgena na arahati so bhavaɱ Gotamo amhākaɱ dassanāya upasaŋkamituɱ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇaɱ khalu bho Gotamaɱ brāhmaṇo pokkharasāti saputtadāro pāṇehi saraṇaɱ gato imināpaŋgena na arahati so bhavaɱ Gotamo amhākaɱ dassanāya upasaŋkamituɱ ,||
atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Samaṇo khalu bho Gotamo opasādaɱ anuppatto opasāde viharati uttarena opasādaɱ devavane sālavane.|| ||

Ye pana kho keci samaṇā vā brāhmaṇā vā amhākaɱ gāmakkhettaɱ āgaccanti.|| ||

Atithi no te honti.|| ||

Atithi kho panamhehi sakkātabbā garukātabbā mānetabbā pūjetabbā,||
yam pi bho Samaṇo Gotamo opasādaɱ anuppatto opasāde viharati uttarena opasādaɱ devavane sālavane.|| ||

Atithi asmākaɱ Samaṇo Gotamo.|| ||

Atithi kho panambhehi sakkātabbā garukātabbo mānetabbo pūjetabbo.|| ||

[168] iminā paŋgena na arahati so bhavaɱ Gotamo amhākaɱ dassanāya upasaŋkamituɱ.|| ||

Atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Ettakaɱ kho ahaɱ bho tassa bhoto Gotamassa vaṇṇaɱ pariyāpuṇāmi.|| ||

Na ca so bhavaɱ Gotamo ettakavaṇṇo,||
aparimāṇavaṇṇo hi so bhavaɱGotamo.|| ||

Eka-m-ekena pi bho,||
aŋgena samannāgato na arahati so bhavaɱ Gotamo amhākaɱ dassanāya upasaŋkamituɱ.|| ||

Atha kho mayameva arahāma taɱ bhavantaɱ Gotamaɱ dassanāya upasaŋkamituɱ.|| ||

Tena hi bho sabbe va mayaɱ samaṇaɱ Gotamaɱ dassanāya upasaŋkamissāmā' ti.|| ||

Atha kho Caŋkī brāhmaṇo mahatā brāhmaṇagaṇena saddhiɱ yena Bhagavā ten'upasaŋkami.|| ||

Upasaŋkamitvā Bhagavatā saddhiɱ sammodi,||
sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Tena kho pana samayena Bhagavā vuddhehi vuddhehi brāhmaṇehi saddhiɱ kiñci kiñci kathaɱ sārāṇīyaɱ vītisāretvā nisinno hoti.|| ||

Tena kho pana samayena kāpaṭiko nāma māṇavo daharo vuttasiro so'asavassuddesiko jātiyā,||
tiṇṇaɱ vedānaɱ pāragu sanighanḍukeṭubhānaɱ sākkharappabhedānaɱ itihāsapañcamānaɱ padako veyyākaraṇo lokāyatamahāpurisalakkhaṇesu anavayo,||
tassaɱ parisāyaɱ nisinno hoti.|| ||

So vuḍḍhānaɱ brāhmaṇānaɱ Bhagavatā saddhiɱ mantayamānānaɱ antarantarā kathaɱ opāteti.|| ||

Atha kho Bhagavā kāpaṭikaɱ māṇavaɱ apasādesi: māyasmā bhāradvājo vuḍḍhānaɱ vuḍḍhānaɱ brāhmaṇānaɱ mantayamānānaɱ antarantarā kathaɱ opātetu3,||
kathāpariyosānaɱ āyasmā bharadvājo āgametu' ti.|| ||

Evaɱ vutte Caŋkī brāhmaṇo Bhagavantaɱ etad avoca: mā bhavaɱ Gotamo kāpaṭikaɱ māṇavaɱ apasādesi,||
kulaputto ca kāpaṭiko māṇavo bahussuto ca kāpaṭiko māṇavo kalyāṇavākkaraṇo va kāpaṭiko māṇavo paṇḍito ca kāpaṭiko māṇavo,||
pahoti ca kāpaṭiko māṇavo bhotā Gotamena saddhiɱ asmiɱ vacane patimantetun' ti.|| ||

Atha kho Bhagavato etad ahosi: ḷaddhā [169] kho kāpaṭikassa māṇavassa tevijjake pāvacane kataɱ4 bhavissati.|| ||

Tathā hi naɱ brāhmaṇā sampurekkharontī' ti.|| ||

Atha kho kāpaṭikassa māṇavassa etad ahosi: 'yadā me Samaṇo Gotamo cakkhunā cakkhuɱ upasaŋharissati,||
athāhaɱ samaṇaɱ Gotamaɱ pañhaɱ pucchissāmī' ti.|| ||

Atha kho Bhagavā kāpaṭikassa māṇavassa cetasā cetoparivitakkamaññāya yena kāpaṭiko māṇavo tena cakkhūni upasaɱhāsi.|| ||

Atha kho kāpaṭikassa māṇavassa etad ahosi: 'samannāharati kho maɱ Samaṇo Gotamo,||
yan nūnāhaɱ samaṇaɱ Gotamaɱ pañhaɱ puccheyyanti.|| ||

Atha kho kāpaṭiko māṇavo Bhagavantaɱ etad avoca: 'yam idaɱ bho Gotama,||
brāhmaṇānaɱ porāṇānaɱ mantapadaɱ itihitiha paramparāya piṭakasampadāya,||
tattha ca brāhmaṇā ekaɱsena niṭṭhaɱ gacchanti.|| ||

'Idam eva saccaɱ moghamañña'nti,||
idha bhavaɱ Gotamo kimāhā' ti.|| ||

Kiɱ pana Bhāradvāja,||
atthi koci brāhmaṇānaɱ ekabrāhmaṇo pi yo evam āhaɱ: 'ahame taɱ jānāmi,||
ahame taɱ passāmi: 'idam eva saccaɱ moghamaññan' ti.|| ||

No h'idaɱ bho Gotama.|| ||

Kiɱ pana Bhāradvāja,||
atthi koci brāhmaṇānaɱ ekācariyopi ekācariyapācariyopi yāva sattamā ācariyamahayugā pi,||
yo evam āha: ahame taɱ jānāmi,||
ahame taɱ passāmi,||
idam eva saccaɱ mogham aññan ti.|| ||

Kiɱ pana Bhāradvāja,||
ye pi te brāhmaṇānaɱ pubbakā isayo mantānaɱ kattāro mantānaɱ pavattāro,||
yesamidaɱ etarahi brāhmaṇā porāṇaɱ mantapadaɱ gītaɱ pavuttaɱ samihitaɱ tadanugāyanti tadanu bhāsanti,||
bhāsitamanubhāsanti,||
vācitamanuvācenti.|| ||

Seyyathīdaɱ: 'aṭṭako vāmako vāmadevo vessāmitto yamataggi aŋgīraso bhāradvājo vāseṭṭho Kassapo bhagu.|| ||

Te pi evam āhaɱsu: 'mayame taɱ jānāma,||
mayame taɱ passāma: 'idam eva saccaɱ moghamaññan' ti.|| ||

[170]No h'idaɱ bho Gotama.|| ||

Iti kira Bhāradvāja,||
n'atthi koci brāhmaṇānaɱ ekabrāhmaṇo pi yo evam āha: 'ahame taɱ jānāmi,||
ahame taɱ passāmi,||
idam eva saccaɱ moghamaññan' ti.|| ||

N'atthi koci brāhmaṇānaɱ ekācariyopi ekācariyapācariyopi yāva sattamā ācariyamahayugā,||
yo evam āha: 'ahame taɱ jānāmi,||
ahame taɱ passāmi,||
idam eva saccaɱ moghamaññan' ti.|| ||

Ye pi te brāhmaṇānaɱ pubbakā isayo mantānaɱ kattāro mantānaɱ pavattāro.|| ||

Yesamidaɱ etarahi brāhmaṇā porāṇaɱ mantapadaɱ gītaɱ pavuttaɱ samihitaɱ tadanugāyanti,||
tadanubhāsanti,||
bhāsitamanubhāsanti,||
vācitamanuvācenti.|| ||

Seyyathīdaɱ: 'aṭṭako vāmako vāmadevo vessāmitto yamataggi aŋgīraso bhāradvājo vāseṭṭho Kassapo bhagu' te pi na evam āhaɱsu: 'mayame taɱ jānāma,||
mayame taɱ passāma,||
idam eva saccaɱ moghamaññan' ti.|| ||

'Seyyathā pi Bhāradvāja,||
andhaveṇi paramparāsaɱsattā purimopi na passati,||
majjhimo pi na passati,||
pacchimo pi na passati.|| ||

Evam eva kho Bhāradvāja,||
andhaveṇūpamaɱ maññe brāhmaṇānaɱ bhāsitaɱ sampajjati.|| ||

Purimo pi na passati,||
majjhimo pi na passati,||
pacchimo pi na passati.|| ||

Taɱ kiɱ maññasi Bhāradvāja,||
na nu evaɱ sante brāhmanānaɱ amūlikā saddhā sampajja' ti.|| ||

Na khottha bho Gotama,||
brāhmaṇā saddhāyeva payirupāsanti,||
anussavāpettha brāhmaṇā payirupāsantī' ti.|| ||

Pubbeva kho tvaɱ Bhāradvāja,||
saddhaɱ agamāsi,||
anussavaɱ idāni vadesi.|| ||

Pañca kho ime Bhāradvāja,||
dhammā diṭṭh'evadhamme dvidhā vipākā.|| ||

Katame pañca?|| ||

Saddhā||
ruci||
anussavo||
ākāraparivitakko||
diṭṭhinijjhānakkhanti.|| ||

Ime kho Bhāradvāja,||
pañca dhammā diṭṭhe va dhamme dvidhā vipākā.|| ||

Api ca Bhāradvāja,||
susaddahitaɱ yeva hoti,||
tañ ca hoti rittaɱ tucchaɱ musā,||
no ce pi susaddahitaɱ hoti,||
bhūtaɱ tacchaɱ anaññathā.|| ||

Api ca Bhāradvāja,||
surucitaɱ yeva hoti.|| ||

Tañ ca hoti rittaɱ tucchaɱ musā,||
no ce pi susaddahitaɱ hoti,||
bhūtaɱ tacchaɱ anaññathā.|| ||

Api ca Bhāradvāja,||
svānussutaɱ yeva hoti.|| ||

Tañ ca hoti rittaɱ tucchaɱ musā,||
no ce pi susaddahitaɱ hoti,||
bhūtaɱ tacchaɱ anaññathā.|| ||

Api [171] ca Bhāradvāja suparivitakkitaɱ yeva hoti.|| ||

Tañ ca hoti rittaɱ tucchaɱ musā,||
no ce pi susaddahitaɱ hoti.|| ||

Api ca Bhāradvāja sunijjhāyitaɱ yeva hoti tañ ca hoti rittaɱ tucchaɱ musā,||
no ce pi sunijjhāyitaɱ hoti,||
bhūtaɱ tacchaɱ anaññathā.|| ||

Saccamanurakkhatā Bhāradvāja,||
viññunā purisena nālamettha ekaɱsena niṭṭhaɱ gantuɱ 'idam eva sacchaɱ moghamaññan' ti.|| ||

Kittāvatā pana bho Gotama,||
saccānurakkhanā hoti,||
kittāvatā saccamanurakkhati? Saccānurakkhanaɱ mayaɱ bhavantaɱ Gotamaɱ pucchāmā' ti.|| ||

Saddhā ce pi Bhāradvāja,||
purisassa hoti,||
'evaɱ me saddhā'ti iti vadaɱ saccamanurakkhati,||
na tv'eva tāva ekaɱsena niṭṭhaɱ gacchati: 'idam eva saccaɱ moghamaññan' ti.|| ||

Ettāvatā kho Bhāradvāja saccānurakkhanā hoti.|| ||

Ettāvatā saccamanurakkhati.|| ||

Ettāvatā ca mayaɱ saccānurakkhanaɱ paññāpema.|| ||

Na tve tāva saccānubodho hoti.|| ||

Ruci ce pi Bhāradvāja,||
purisassa hoti,||
'evaɱ me ruci'ti iti vadaɱ saccamanurakkhati,||
na tv'eva tāva ekaɱsena niṭṭhaɱ gacchati: 'idam eva saccaɱ moghamaññan' ti.|| ||

Ettāvatā kho Bhāradvāja saccānurakkhanā hoti.|| ||

Ettāvatā saccamanurakkhati.|| ||

Ettāvatā ca mayaɱ saccānurakkhanaɱ paññāpema.|| ||

Na tve tāva saccānubodho hoti.|| ||

Anussavo ce pi Bhāradvāja,purisassa hoti,'evaɱ me anussavo'ti iti vadaɱ saccamanurakkhati,||
na tv'eva tāva ekaɱsena niṭṭhaɱ gacchati: 'idam eva saccaɱ moghamaññan' ti.|| ||

Ettāvatā kho Bhāradvāja saccānurakkhanā hoti.|| ||

Ettāvatā saccamanurakkhati.|| ||

Ettāvatā ca mayaɱ saccānurakkhanaɱ paññāpema.|| ||

Na tve tāva saccānubodho hoti.|| ||

Ākāraparivitakko ce pi Bhāradvāja,||
purisassa hoti.|| ||

'Evaɱ me ākāraparivitakkan'ti iti vadaɱ saccamanurakkhati,na tv'eva tāva ekaɱsena niṭṭhaɱ gacchati:'idam eva saccaɱ moghamaññan' ti.|| ||

Ettāvatā kho Bhāradvāja saccānurakkhanā hoti.|| ||

Ettāvatā saccamanurakkhati.|| ||

Ettāvatā ca mayaɱ saccānurakkhanaɱ paññāpema.|| ||

Na tve tāva saccānubodho hoti.|| ||

Diṭṭhinijjhānakkhanti ce pi Bhāradvāja,||
purisassa hoti,||
'evaɱ me diṭṭhinijjhānakkhantī'ti iti vadaɱ saccamanurakkhati,||
na tv'eva tāva ekaɱsena niṭṭhaɱ gacchati:'idam eva saccaɱ moghamaññan' ti.|| ||

Ettāvatā kho Bhāradvāja saccānurakkhanā hoti.|| ||

Ettāvatā saccamanurakkhati.|| ||

Ettāvatā ca mayaɱ saccānurakkhanaɱ paññāpema.|| ||

Na tve tāva saccānubodho hoti.|| ||

Ettāvatā bho Gotama,||
saccānurakkhanā hoti,||
ettāvatā saccamanurakkhati,||
ettāvatā ca mayaɱ saccānurakkhanaɱ pekkhāma.|| ||

Kittāvatā pana bho Gotama,||
saccānubodho hoti,||
kittāvatā saccamanubujjhati?|| ||

Saccānubodhaɱ mayaɱ bhavantaɱ Gotamaɱ pucchamā' ti.|| ||

Idha Bhāradvāja bhikkhu aññataraɱ gāmaɱ vā nigamaɱ vā upanissāya viharati.|| ||

Tam enaɱ gahapati vā gahapatiputto vā upasaŋkamitvā tīsu dhammesu samannesati: [172] lobhanīyesu dhammesu dosanīyesu dhammesu mohanīyesu dhammesu.|| ||

Atthi nu kho imassa āyasmato tathārūpā lobhanīyā dhammā yathārūpehi lobhanīyehi dhammehi pariyādinnacitto ajānaɱ vā vadeyya jānāmīti,||
apassaɱ vā vadeyya passāmīti,||
paraɱ vā tathattāya samādapeyya yaɱ paresaɱ assa dīgha-rattaɱ ahitāya dukkhāyāti.|| ||

Tam enaɱ samannesamāno evaɱ jānāti: n'atthi kho imassāyasmato tathārūpā lobhanīyā dhammā yathārūpehi lobhanīyehi dhammehī pariyādinnacitto ajānaɱ vā vadeyya jānāmīti apassaɱ vā vadeyya passāmīti,||
paraɱ vā tathattāya samādapeyya,||
yaɱ paresaɱ assa dīgha-rattaɱ ahitāya dukkhāyāti,||
tathā5 kho panimassāyasmato kāyasamācāro,||
tathā vacīsamācāro,||
yathā taɱ aluddhassa.|| ||

Yaɱ kho pana ayamāyasmā dhammaɱ deseti,||
gambhīro so dhammo duddaso duranubodho santo paṇīto atakkāvacaro nipuṇo paṇḍitavedanīyo,||
na so dhammo sudesiyo luddhenāti.|| ||

Yato naɱ samannesamāno visuddhaɱ lobhanīyehi dhammehi samanupassati.|| ||

Tato naɱ uttariɱ samannesati dosanīyesu dhammesu: atthi nu kho imassa āyasmato tathārūpā dosanīyā dhammā yathārūpehi dosanīyehi dhammehi pariyādinnacitto ajānaɱ vā vadeyya jānāmīti,||
apassaɱ vā vadeyya passāmīti,||
paraɱ vā tathattāya samādapeyya,||
yaɱ paresaɱ assa digharattaɱ ahitāya dukkhāyāti.|| ||

Tam enaɱ samannesamāno evaɱ jānāti: n'atthi kho imassāyasmato tathārūpā dosanīyā dhammā,||
yathārūpehi dosanīyehi dhammehi pariyādinnacitto ajānaɱ vā vadeyya jānāmīti,||
apassaɱ vā vadeyya passāmīti,||
paraɱ vā tathattāya samādapeyya yaɱ paresaɱ assa dīgha-rattaɱ ahitāya dukkhāyā' ti.|| ||

Tathā kho panimassāyasmato kāyasamācāro,||
tathā vacīsamācāro,||
yathā taɱ aduṭṭhassa.|| ||

Yaɱ kho pana ayamāyasmā dhammaɱ deseti.|| ||

Gambhīro so dhammo duddaso duranubodho santo paṇīto atakkāvacaro nipuṇo paṇḍitavedanīyo,||
na so dhammo sudesiyo duṭṭhenāti.|| ||

Yato naɱ samannesamāno visuddhiɱ dosanīyehi dhammehi [173] samanupassati.|| ||

Tato naɱ uttariɱ samannesati mohanīyesu dhammesu: atthi nu kho imassa āyasmato tathārūpā mohanīyā dhammā,||
yathā rūpehi mohanīyehi dhammehi pariyādinnacitto ajānaɱ vā vadeyya jānāmīti,||
apassaɱ vā vadeyya passāmīti.|| ||

Paraɱ vā tathattāya samādapeyya,||
yaɱ paresaɱ assa dīgha-rattaɱ ahitāya dukkhāyāti.|| ||

Tam enaɱ samannesamāno evaɱ jānāti: n'atthi kho imassāyasmato tathārūpā mohanīyā dhammā,||
yathārūpehi mohanīyehi dhammehi pariyādinnacitto ajānaɱ vā vadeyya jānāmīti,||
apassaɱ vā vadeyya passāmīti.|| ||

Paraɱ vā tathattāya samādapeyya yaɱ paresaɱ assa dīgha-rattaɱ ahitāya dukkhāya.|| ||

Tathā kho panimassāyasmato kāyasamācāro,||
tathā vacīsamācāro,||
yathā taɱ amūḷhassa.|| ||

Yaɱ kho pana ayamāyasmā dhammaɱ deseti.|| ||

Gambhīro so dhammo duddaso duranubodho santo paṇīto atakkāvacaro nipuṇo paṇḍitavedanīyo na so dhammo sudesiyo mūḷhenā' ti.|| ||

Yato naɱ samannesamāno visuddhaɱ mohanīyehi dhammehi samanu passati;|| ||

atha tamhi saddhaɱ niveseti;|| ||

saddhājāto upasaŋkamanto payirupāsati;|| ||

payirupāsanto sotaɱ odahati;|| ||

ohitasoto dhammaɱ suṇāti;|| ||

sutvā dhammaɱ dhāreti;|| ||

dhāritānaɱ dhammānaɱ atthaɱ upaparikkhati;|| ||

atthaɱ upaparikkhato dhammā nijjhānaɱ khamanti;|| ||

dhamma-nijjhānakkhantiyā sati chando jāyati;|| ||

chanda-jāto ussahati;|| ||

ussahitvā tuleti;|| ||

tūlayitvā pahadati;|| ||

pahitatto samāno kāyena c'eva paramasaccaɱ sacchikaroti,||
paññāya ca taɱ ativijjha passati.|| ||

Ettāvatā kho Bhāradvāja,||
saccānubodho hoti.|| ||

Ettāvatā saccamanubujjhati.|| ||

Ettāvatā ca mayaɱ saccānubodhaɱ paññāpema.|| ||

Na tv'eva tāva saccānupatti hotī ti.|| ||

Ettāvatā bho Gotama,||
saccānubodho hoti,||
ettāvatā saccamanubujjhati,||
ettāvatā ca mayaɱ saccānubodhaɱ pekkhāma.|| ||

Kittāvatā pana bho Gotama,||
saccānupatti hoti? Kittāvatā saccamanupāpuṇāti? Saccānupattiɱ mayaɱ bhavantaɱ Gotamaɱ pucchamāti.|| ||

[174]Tesaɱyeva kho Bhāradvāja,||
dhammānaɱ āsevanā bhāvanā bahulī kammā saccānupatti hoti,||
ettāvatā kho Bhāradvāja,||
saccānupatti hoti,||
ettāvatā saccamanupāpuṇāti,||
ettāvatā ca mayaɱ saccānupattiɱ paññāpemāti.|| ||

Ettāvatā bho Gotama,||
saccānupatti hoti,||
ettāvatā saccamanupāpuṇāti,||
ettāvatā ca mayaɱ saccānupattiɱ pekkhāma.|| ||

Saccānupattiyā pana bho Gotama,||
katamo dhammo bahukāro?|| ||

Saccānupattiyā bahukāraɱ dhammaɱ mayaɱ bhavantaɱ Gotamaɱ pucchamāti.|| ||

Saccānupattiyā kho Bhāradvāja,||
padhānaɱ bahukāraɱ.|| ||

No c'etaɱ padaheyya,||
na-y-idaɱ saccaɱ anupāpuṇeyya.|| ||

Yasmā ca kho padahati,||
tasmā saccaɱ anupāpuṇāti.|| ||

Tasmā saccānupattiyā padhānaɱ bahukāranti.|| ||

Padhānassa pana bho Gotama,||
katamo dhammo bahukāro?|| ||

Padhānassa bahukāraɱ dhammaɱ mayaɱ bhavantaɱ Gotamaɱ pucchāmāti.|| ||

Padhānassa kho Bhāradvāja,||
tulanā bahukārā.|| ||

No c'etaɱ tuleyya,||
na-y-idaɱ padaheyya.|| ||

Yasmā ca kho tuleti,||
tasmā padahati.|| ||

Tasmā padhānassa tulanā bahukārāti.|| ||

Tulanāya pana bho Gotama,||
katamo dhammo bahukāro?|| ||

Tulanāya bahukāraɱ dhammaɱ mayaɱ bhavantaɱ Gotamaɱ pucchāmāti.|| ||

Tulanāya kho Bhāradvāja,||
ussāho bahukāro.|| ||

No c'etaɱ ussaheyya,||
na-y-idaɱ tuleyya.|| ||

Yasmā ca kho ussahati,||
tasmā tuleti.|| ||

Tasmā tulanāya ussāho bahukāroti.|| ||

Ussāhassa pana bho Gotama,||
katamo dhammo bahukāro?|| ||

Ussāhassa bahukāraɱ dhammaɱ mayaɱ bhavantaɱ Gotamaɱ pucchāmāti.|| ||

Ussāhassa kho Bhāradvāja,||
chando bahukāro.|| ||

No c'etaɱ chando jāyetha,||
na-y-idaɱ ussaheyya.|| ||

Yasmā ca kho chando jāyati,||
tasmā ussahati.|| ||

Tasmā ussāhassa chando bahukāroti.|| ||

Chandassa pana bho Gotama,||
katamo dhammo bahukāro?|| ||

[175] chandassa bahukāraɱ dhammaɱ mayaɱ bhavantaɱ Gotamaɱ puchchāmāti.|| ||

Chandassa kho Bhāradvāja,||
dhammanijjhānakkhanti bahukārā.|| ||

No c'etaɱ dhammanijjhānaɱ khameyyuɱ,||
na-y-idaɱ chando jāyetha.|| ||

Yasmā ca kho dhammanijjhānaɱ khamanti,||
tasmā chando jāyati.|| ||

Tasmā chandassa dhammanijjhānakkhanti bahukārāti.|| ||

Dhammanijjhānakkhantiyā pana bho Gotama,||
katamo dhammo bahukāro? Dhammanijjhānakkhantiyā bahukāraɱ dhammaɱ mayaɱ bhavantaɱ Gotamaɱ pucchāmāti.|| ||

Dhammanijjhānakkhantiyā kho Bhāradvāja,||
atthūpaparikkhā bahukārā.|| ||

No c'etaɱ atthaɱ upaparikkheyya,||
na-y-idaɱ dhammanijjhānaɱ khameyyuɱ.|| ||

Yasmā ca kho atthaɱ upaparikkhati,||
tasmā dhammanijjhānaɱ khamanti.|| ||

Tasmā dhammanijjhānakkhantiyā atthupaparikkhā bahukārāti.|| ||

Atthūpaparikkhāya pana bho Gotama,||
katamo dhammo bahukāro atthūpaparikkhāya bahukāraɱ dhammaɱ mayaɱ bhavantaɱ Gotamaɱ pucchāmāti.|| ||

Atthūpaparikkhāya kho Bhāradvāja,||
dhammadhāraṇā bahukārā.|| ||

No c'etaɱ dhammaɱ dhāreyya,||
na-y-idaɱ atthaɱ upaparikkheyya.|| ||

Yasmā ca kho dhammaɱ dhāreti,||
tasmā atthaɱ upaparikkhati.|| ||

Tasmā atthupaparikkhāya dhammadhāraṇā bahukārāti.|| ||

Dhammadhāraṇāya pana bho Gotama,||
katamo dhammo bahukāro?

Dhammadhāraṇāya bahukāraɱ dhammaɱ mayaɱ bhavantaɱ Gotamaɱ pucchāmāti.|| ||

Dhammadhāraṇāya kho Bhāradvāja,||
dhammasavanaɱ bahukāraɱ no c'etaɱ dhammaɱ suṇeyya,||
na-y-idaɱ dhammaɱ dhāreyya.|| ||

Yasmā ca kho dhammaɱ suṇāti,||
tasmā dhammaɱ dhāreti tasmā dhammadhāraṇāya dhammasavanaɱ bahukāranti.|| ||

Dhammasavanassa pana bho Gotama,||
katamo dhammo bahukāro? Dhammasavanassa bahukāraɱ dhammaɱ mayaɱ bhavantaɱ Gotamaɱ pucchāmāti.|| ||

Dhammasavanassa kho Bhāradvāja,||
sotāvadhānaɱ [176] bahukāraɱ.|| ||

No c'etaɱ sotaɱ odaheyya,||
na idaɱ dhammaɱ suṇeyya.|| ||

Yasmā ca kho sotaɱ odahati,||
tasmā dhammaɱ suṇāti tasmā dhammasavanassa sotāvadhānaɱ bahukāranti.|| ||

Sotāvadhānassa pana bho Gotama,||
katamo dhammo bahukāro? Sotāvadhānassa bahukāraɱ dhammaɱ mayaɱ bhavantaɱ Gotamaɱ pucchāmāti.|| ||

Sotāvadhānassa kho Bhāradvāja,||
payirupāsanā bahukārā.|| ||

No c'etaɱ payirupāseyya,||
na-y-idaɱ sotaɱ odaheyya.|| ||

Yasmā ca kho payirupāsati.|| ||

Tasmā sotaɱ odahati.|| ||

Tasmā sotāvadhānassa payirupāsanā bahukārāti.|| ||

Payirupāsanāya pana bho Gotama,||
katamo dhammo bahukāro?|| ||

Payirupāsanāya bahukāraɱ dhammaɱ mayaɱ bhavantaɱ Gotamaɱ pucchāmāti.|| ||

Payirupāsanāya kho Bhāradvāja,||
upasaŋkamanaɱ bahukāraɱ.|| ||

No c'etaɱ upasaŋkameyya,||
na-y-idaɱ payirupāseyya.|| ||

Yasmā ca kho upasaŋkamati,||
tasmā payirupāsati.|| ||

Tasmā payirupāsanāya upasaŋkamanaɱ bahukāranti.|| ||

Upasaŋkamanassa pana bho Gotama,||
katamo dhammo bahukāro?|| ||

Upasaŋkamanassa bahukāraɱ dhammaɱ mayaɱ bhavantaɱ Gotamaɱ pucchāmāti.|| ||

Upasaŋkamanassa kho Bhāradvāja,||
saddhā bahukārā.|| ||

No c'etaɱ saddhā jāyetha,||
na-y-idaɱ upasaŋkameyya.|| ||

Yasmā ca kho saddhā jāyati,||
tasmā upasaŋkamati.|| ||

Tasmā upasaŋkamanassa saddhā bahukārāti.|| ||

Saccānurakkhanaɱ mayaɱ bhavantaɱ Gotamaɱ apucchimha.|| ||

Saccānurakkhanaɱ bhavaɱ Gotamo byākāsi.|| ||

Tañ ca pan amhākaɱ ruccati c'eva khamati ca,||
tena c'amhā attamanā.|| ||

Saccānubodhaɱ mayaɱ bhavantaɱ Gotamaɱ apucchimha.|| ||

Saccānubodhaɱ bhavaɱ Gotamo byākāsi.|| ||

Tañ ca pan amhākaɱ ruccati c'eva khamati ca,||
tena c'amhā attamanā.|| ||

Saccānupattiɱ mayaɱ bhavantaɱ Gotamaɱ apucchimha.|| ||

Saccānupattiɱ bhavaɱ Gotamo byākāsi.|| ||

Tañ ca pan amhākaɱ ruccati c'eva khamati ca,||
tena c'amhā attamanā.|| ||

Saccānupattiyā bahukāraɱ dhammaɱ mayaɱ bhavantaɱ [177] Gotamaɱ apucchimha.|| ||

Saccānupattiyā bahukāraɱ dhammaɱ bhavaɱ Gotamo byākāsi.|| ||

Tañ ca pan amhākaɱ ruccati c'eva khamati ca,||
tena c'amhā attamanā.|| ||

Yaɱ yadeva ca pana mayaɱ bhavantaɱ Gotamaɱ apucchimha,||
taɱ tad eva bhavaɱ Gotamo byākāsi.|| ||

Tañ ca pan amhākaɱ ruccati c'eva khamati ca,||
tena c'amhā attamanā.|| ||

Mayaɱ hi bho Gotama,||
pubbe evaɱ jānāma: ke ca muṇḍakā samaṇakā ibbhā kaṇhā bandhupādāpaccā,||
ke ca Dhammassa aññātāroti.|| ||

Ajanesi vata me bhavaɱ Gotamo samaṇesu samaṇapemaɱ,||
samaṇesu samaṇapasādaɱ,||
samanesu samaṇagāravaɱ.|| ||

Abhikkantaɱ bho Gotama abhikkantaɱ bho Gotama,||
seyyathā pi bho Gotama nikkujjitaɱ vā ukkujjeyya,||
paṭicchannaɱ vā vivareyya,mūḷhassa vā maggaɱ ācikkheyya' andhakāre vā telapajjotaɱ dhāreyya,||
'cakkhumanto rūpāni dakkhintī'ti,||
evam evaɱ bhotā Gotamena aneka-pariyāyena dhammo pakāsito.|| ||

Esāhaɱ Bhagavantaɱ Gotamaɱ saraṇaɱ gacchāmi dhammañca bhikkhu-saŋghañ ca.|| ||

Upāsakaɱ maɱ bhavaɱ Gotamo dhāretu ajjatagge pāṇupetaɱ saraṇaɱ gatanti.|| ||

Caŋkīsuttaɱ pañcamaɱ


 

Contact:
E-mail
Copyright Statement   Webmaster's Page