Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
5. Brāhmaṇa Vagga

Sutta 97

Dhanañjāni Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][than][upal] Evaɱ me sutaɱ|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

Tena kho pana samayena āyasmā Sāriputto dakkhiṇāgirismiɱ cārikaɱ carati mahatā bhikkhu-saŋghena saddhiɱ.|| ||

Atha kho aññataro [185] bhikkhu Rājagahe vassaɱ vuttho yena dakkhiṇāgiri yen'āyasmā Sāriputto ten'upasaŋkami,||
upasaŋkamitvā āyasmatā Sāriputtena saddhiɱ sammodi,||
sammodanīyaɱ kathaɱ sāraṇīyaɱ vītisāretvā eka-m-antaɱ nisīdi,||
eka-m-antaɱ nisinnaɱ kho taɱ bhikkhuɱ āyasmā Sāriputto etad avoca:|| ||

Kaccāvuso, Bhagavā arogo ca balavā cā' ti?|| ||

Arogo cāvuso, Bhagavā balavā cā' ti.|| ||

Kacci pan'āvuso, bhikakkhusaŋgho arogo ca balavā cā' ti?|| ||

Bhikkhu-saŋgho pi kho āvuso,||
arogo ca balavā cā' ti.|| ||

Etthāvuso, taṇḍulapāladvārāyaɱ Dhanañjāni nāma brāhmaṇo atthi.|| ||

Kaccāvuso, Dhanañjāni nāma brāhmaṇo arogo ca balavā cā' ti.|| ||

Dhanañjāni pi kho avuso,||
brāhmaṇo arogo ca balavā cā' ti.|| ||

Kacci pan'āvuso Dhanañjāni brāhmaṇo appamattoti.|| ||

Kuto no āvuso, Dhanañjānissa brāhmaṇassa appamādo?|| ||

Dhanañjāni āvuso, brāhmaṇo rājānaɱ nissāya brāhmaṇagahapatike vilumpati.|| ||

Brāhmaṇagahapatike nissāya rājānaɱ vilumpati.|| ||

Yāpissa bhariyā saddhā saddhākulā ānītā,||
sāpissa kālakatā, añña'ssa bhariyā assaddhā assaddhākulā ānītā' ti.|| ||

Dussutaɱ vatāvuso assumhā,||
dussutaɱ vatāvuso assumhā,||
ye mayaɱ Dhanañjāniɱ brāhmaṇaɱ pamattaɱ assumhā.|| ||

Appeva nāma mayaɱ kadāci karahaci Dhanañjāninā brāhmaṇena saddhiɱ samāgaccheyyāma.|| ||

Appeva nāma siyā kocid-eva kathāsallāpo' ti.

Atha kho āyasmā Sāriputto dakkhiṇāgirismiɱ yathābhirantaɱ viharitvā yena Rājagahaɱ tena cārikaɱ pakkāmi.|| ||

Anupubbena cārikaɱ caramāno yena Rājagahaɱ tadavasari.|| ||

Tatra sudaɱ āyasmā Sāriputto Rājagahe viharati Veḷuvane Kalandakanivāpe.|| ||

Atha kho āyasmā Sāriputto pubbaṇha-samayaɱ nivāsetvā pattacīvaramādāya Rājagahaɱ piṇḍāya pāvisi.

[186]|| ||

Tena kho pana samayena Dhanañjāni brāhmaṇo bahinagare gāvo goṭṭhe dohāpeti1 atha kho āyasmā Sāriputto Rājagahe piṇḍāya caritvā pacchābhattaɱ piṇḍapātapaṭikkanto yena Dhanañjāni brāhmaṇo ten'upasaŋkami.|| ||

Addasā kho Dhanañjāni brāhmaṇo āyasmantaɱ Sāriputtaɱ dūrato va āgacchantaɱ.|| ||

Disvāna yenāsmā Sāriputto ten'upasaŋkami.|| ||

Upasaŋkamitvā āyasmantaɱ Sāriputtaɱ etad avoca:||
ito bho Sāriputta,||
payo pīyataɱ tāva bhattassa kālo bhavissatī' ti.|| ||

Alaɱ brāhmaṇa,||
katamme ajja bhattakiccaɱ.|| ||

Amukasmiɱ me rukkhamūle divāvihāro bhavissati.|| ||

Tattha āgaccheyyāsī' ti.|| ||

Evaɱ bhoti kho Dhanañjāni brāhmaṇo āyasmato Sāriputtassa paccassosi.|| ||

Atha kho Dhanañjāni brāhmaṇo pacchābhattaɱ bhuttapātarāso yenayasmā Sāriputto ten'upasaŋkami,||
upasaŋkamitvā āyasmatā Sāriputtena saddhiɱ sammodi,||
sammodanīyaɱ kathaɱ sāraṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinnaɱ kho Dhanañjāniɱ brāhmaṇaɱ āyasmā Sāriputto etad avoca:|| ||

Kaccisi Dhanañjāni, appamatto' ti?|| ||

'Kuto bho Sāriputta, amhākaɱ appamādo yesaɱ no mātā-pitaro posetabbā,||
puttadārā posetabbā,||
dāsakammakaraporisaɱ posetabbaɱ,||
mittāmaccānaɱ mittāmaccakaraṇīyaɱ kātabbaɱ ñātisālo hitānaɱ ñātisālohitakaraṇīyaɱ kātabbaɱ,||
atithīnaɱ atithikaraṇīyaɱ kātabbaɱ,||
pubbapetānaɱ pubbapetakaraṇīyaɱ kātabbaɱ,||
devatānaɱ devatākaraṇīyaɱ kātabbaɱ,||
rañño rājakaraṇīyaɱ kātabbaɱ,||
ayam pi kāyo pīnetabbo brūhetabbo' ti.|| ||

Taɱ kiɱ maññasi Dhanañjāni,||
idh'ekacco mātā-pitunnaɱ hetu adhammacārī visamacārī assa,||
tam enaɱ adhammacariyā visamacariyāhetu Nirayaɱ nirayapālā upakaḍḍheyyuɱ.|| ||

Labheyya nu kho so 'ahaɱ kho mātā-pitunnaɱ hetu adhammacārī visamacārī ahosiɱ,||
mā maɱ Nirayaɱ [187] nirayapālā' ti.|| ||

Mātāpitaro vā panassa labheyyuɱ 'eso kho amhākaɱ hetu adhammacārī visamacārī ahosi,||
mā naɱ Nirayaɱ nirayapālā' ti.|| ||

No h'idaɱ bho Sāriputta,||
atha kho naɱ vikkandantaɱ yeva niraye nirayapālā pakkhipeyyuɱ.|| ||

Taɱ kiɱ maññasi Dhanañjāni,||
idh'ekacco puttadārassa hetu dhammacārī visamacārī assa,||
tam enaɱ adhammacariyā visamacariyāhetu Nirayaɱ nirayapālā upakaḍḍheyyuɱ.|| ||

Labheyya nu kho so 'ahaɱ kho puttadārassa hetu adhammacārī visamacārī ahosiɱ.|| ||

Mā maɱ Nirayaɱ nirayapālā' ti.|| ||

Puttadārā vā panassa labheyyuɱ1 'eso kho amhākaɱ hetu adhammacārī visamacārī ahosi,||
mā naɱ Nirayaɱ nirayapālā' ti?|| ||

No h'idaɱ bho Sāriputta,||
atha kho naɱ vikkandantaɱyeva niraye nirayapālā pakkhipeyyuɱ.|| ||

Taɱ kiɱ maññasi Dhanañjāni,||
idh'ekacco dāsakammakaraporisassa hetu adhammacārī visamacārī assa,||
tam enaɱ adhammacariyā visamacariyāhetu Nirayaɱ nirayapālā upakaḍḍheyyuɱ.|| ||

Labheyya nu kho so 'ahaɱ kho dāsakammakaraporisassa hetu adhammacārī visamacārī ahosiɱ.|| ||

Mā maɱ Nirayaɱ nirayapālā' ti.|| ||

Dāsakammakaraporisaɱ vā panassa labheyya,'eso kho amhākaɱ hetu adhammacārī visamacārī ahosi,||
mā naɱ Nirayaɱ nirayapālā' ti?|| ||

No h'idaɱ bho Sāriputta,||
atha kho naɱ vikkandantaɱyeva niraye nirayapālā pakkhipeyyuɱ.|| ||

Taɱ kiɱ maññasi Dhanañjāni,||
idh'ekacco mittāmaccānaɱ hetu adhammacārī visamacārī assa,||
tam enaɱ adhammacariyā visamacariyāhetu Nirayaɱ nirayapālā upakaḍḍheyyuɱ.|| ||

Labheyya nu kho so 'ahaɱ kho mittāmaccānaɱ hetu adhammacārī visamacārī ahosiɱ.|| ||

Mā maɱ Nirayaɱ nirayapālā' ti.|| ||

Mittāmaccā vā panassa labheyyuɱ.|| ||

'Eso kho amhākaɱ hetu adhammacārī visamacārī ahosi,||
mā naɱ Nirayaɱ nirayapālā' ti?|| ||

No h'idaɱ bho Sāriputta,||
atha kho naɱ vikkandantaɱyeva niraye nirayapālā pakkhipeyyuɱ.

[188]|| ||

Taɱ kiɱ maññasi Dhanañjāni,||
idh'ekacco ñātisālohitānaɱ hetu adhammacārī visamacārī assa,||
tam enaɱ adhammacariyā visamacariyāhetu Nirayaɱ nirayapālā upakaḍḍheyyuɱ.|| ||

Labheyya nu kho so 'ahaɱ kho ñātisāḷohitānaɱ hetu adhammacārī visamacārī ahosiɱ.|| ||

Mā maɱ Nirayaɱ nirayapālā' ti.|| ||

ñātisāḷohitā vā panassa labheyyuɱ.|| ||

'Eso kho amhākaɱ hetu adhammacārī visamacārī ahosi,||
mā naɱ Nirayaɱ nirayapālā' ti?|| ||

No h'idaɱ bho Sāriputta,||
atha kho naɱ vikkandantaɱyeva niraye nirayapālā pakkhipeyyuɱ.|| ||

Taɱ kiɱ maññasi Dhanañjāni,||
idh'ekacco atithīnaɱ hetu adhammacārī visamacārī assa,||
tam enaɱ adhammacariyā visamacariyāhetu Nirayaɱ nirayapālā upakaḍḍheyyuɱ.|| ||

Labheyya nu kho so'ahaɱ kho atithīnaɱ hetu adhammacārī visamacārī ahosiɱ.|| ||

Mā maɱ Nirayaɱ nirayapālā' ti.|| ||

Atithi vā panassa labheyyuɱ.|| ||

'Eso kho amhākaɱ hetu adhammacārī visamacārī ahosi,||
mā naɱ Nirayaɱ nirayapālā' ti?|| ||

No h'idaɱ bho Sāriputta,||
atha kho naɱ vikkandantaɱyeva niraye nirayapālā pakkhipeyyuɱ.|| ||

Taɱ kiɱ maññasi Dhanañjāni,||
idh'ekacco pubbapetānaɱ hetu adhammacārī visamacārī assa,||
tam enaɱ adhammacariyā visamacariyāhetu Nirayaɱ nirayapālā upakaḍḍheyyuɱ.|| ||

Labheyya nu kho so 'ahaɱ kho pubbapetānaɱ hetu adhammacārī visamacārī ahosi,||
mā maɱ Nirayaɱ nirayapālā' ti.|| ||

Pubbapetā vā panassa labheyyuɱ.|| ||

'Eso kho amhākaɱ hetu adhammacārī visamacārī ahosi,||
mā naɱ Nirayaɱ nirayapālā' ti?|| ||

No h'idaɱ bho Sāriputta,||
atha kho naɱ vikkandantaɱ yeva niraye nirayapālā pakkhipeyyuɱ.|| ||

Taɱ kiɱ maññasi Dhanañjāni,||
idh'ekacco devatānaɱ hetu adhammacārī visamacārī assa,||
tam enaɱ adhammacariyā visamacariyāhetu Nirayaɱ nirayapālā upakaḍḍheyyuɱ.|| ||

Labheyya nu kho so'ahaɱ kho devatānaɱ hetu adhammacārī visamacārī ahosiɱ.|| ||

Mā maɱ Nirayaɱ nirayapālā' ti.|| ||

Devatā vā panassa labheyyuɱ 'eso kho amhākaɱ hetu adhammacārī visamacārī ahosi,||
mā naɱ Nirayaɱ nirayapālā' ti?|| ||

No h'idaɱ bho Sāriputta,||
atha kho naɱ vikkandantaɱyeva niraye nirayapālā pakkhipeyyuɱ.|| ||

Taɱ kiɱ maññasi Dhanañjāni,||
idh'ekacco rañño hetu adhammacārī visamacārī assa,||
tam enaɱ adhammacariyā visamacariyāhetu Nirayaɱ nirayapālā upakaḍḍheyyuɱ.|| ||

Labheyya nu kho so 'ahaɱ kho rañño hetu adhammacārī visamacārī ahosiɱ.|| ||

Mā maɱ Nirayaɱ nirayapālā' ti.|| ||

Rājā vā panassa labheyya 'eso kho amhākaɱ hetu adhammacārī visamacārī ahosi,||
mā naɱ Nirayaɱ nirayapālā' ti?|| ||

No h'idaɱ bho Sāriputta,||
atha kho naɱ vikkandantaɱyeva niraye nirayapālā pakkhipeyyuɱ.|| ||

Taɱ kiɱ maññasi Dhanañjāni,||
idh'ekacco kāyassa pīṇanahetu1 brūhanahetu adhammacārī visamacārī assa,||
tam enaɱ adhammacariyā visamacariyāhetu Nirayaɱ nirayapālā upakaḍḍheyyuɱ.|| ||

Labheyya nu kho so'ahaɱ kho kāyassa pīṇanahetu1 brūhanahetu adhammacārī visamacārī ahosiɱ.|| ||

Mā maɱ Nirayaɱ nirayapālā' ti.|| ||

Pare vā panassa labheyyuɱ 'eso kho kāyassa pīṇanahetu brūhanahetu adhammacārī visamacārī ahosi,||
mā naɱ Nirayaɱ nirayapālā' ti?|| ||

No h'idaɱ bho Sāriputta,||
atha kho naɱ vikkandantaɱyeva niraye nirayapālā pakkhipeyyuɱ.|| ||

Taɱ kiɱ maññasi Dhanañjāni,||
yo vā mātā-pitunnaɱ hetu adhammacārī visamacārī assa.|| ||

Yo vā mātā-pitunnaɱ hetu dhammacārī samacārī assa,||
katamaɱ seyyo' ti?|| ||

Yo hi bho Sāriputta,||
mātā-pitunnaɱ hetu adhammacārī visamacārī assa,||
na taɱ seyyo yo ca kho bho Sāriputta,||
mātā-pitunnaɱ hetu dhammacārī samacārī assa,||
tadevettha seyyo.|| ||

Adhammacariyā visamacariyā hi bho Sāriputta,||
brahmacariyā samacariyā seyyo' ti.|| ||

Atthi kho Dhanañjāni,||
aññe sahetukā dhammikā kammantā,||
yehi sakkā mātā-pitaro c'eva posetuɱ.|| ||

Na ca pāpakammaɱ kattuɱ,||
puññañva paṭipadaɱ paṭipajjituɱ.|| ||

Taɱ kiɱ maññasi Dhanañjāni,||
yo vā puttadārassa hetu adhammacārī visamacārī assa,||
yo vā puttadārassa hetu dhammacārī samacārī assa.|| ||

Katamaɱ seyyo' ti?|| ||

Yo hi bho Sāriputta,||
puttadārassa hetu adhammacārī visamacārī assa,||
na taɱ seyyo.|| ||

Yo ca kho bho Sāriputta,||
puttadārassa hetu dhammacārī samacārī assa,||
tadevettha seyyo.|| ||

Adhammacariyā visamacariyā hi bho Sāriputta,||
dhammacariyā samacariyā seyyo' ti.|| ||

Atthi kho Dhanañjāni,||
aññe sahetukā dhammikā kammantā,||
ye hi sakkā puttadāre c'eva posetuɱ,||
na ca pāpakammaɱ kattuɱ,||
puññañca paṭipadaɱ paṭipajjituɱ.|| ||

Taɱ kiɱ maññasi Dhanañjāni,||
yo vā dāsakammakaraporisassa hetu adhammacārī visamacārī assa,||
yo vā dāsakammakaraporisassa hetu dhammacārī samacārī assa.|| ||

Katamaɱ seyyo' ti?|| ||

[189] Yo hi bho Sāriputta,||
dāsakammakaraporisassa hetu adhammacārī visamacārī assa,||
na taɱ seyyo.|| ||

Yo ca kho bho Sāriputta,||
dāsakammakaraporisassa hetu dhammacārī samacārī assa,||
tadevettha seyyo.|| ||

Adhammacariyā visamacariyā hi bho Sāriputta,||
dhammacariyā samacariyā seyyo' ti?|| ||

Atthi kho Dhanañjāni,||
aññe sahetukā dhammikā kammantā,||
ye hi sakkā dāsakammakaraporisañc'eva posetuɱ,||
na ca pāpakammaɱ kattuɱ,||
puññañca paṭipadaɱ paṭipajjituɱ.|| ||

Taɱ kiɱ maññasi Dhanañjāni,||
yo vā mittāmaccānaɱ hetu adhammacārī visamacārī assa,yo vā mittāmaccānaɱ hetu dhammacārī samacārī assa.|| ||

Katamaɱ seyyo' ti?|| ||

Yo hi bho Sāriputta,||
mittāmaccānaɱ hetu adhammacārī visamacārī assa,||
na taɱ seyyo.|| ||

Yo ca kho bho Sāriputta,||
mittāmaccānaɱ hetu dhammacārī samacārī assa,||
tadevettha seyyo.|| ||

Adhammacariyā visamacariyā hi bho Sāriputta,||
dhammacariyā samacariyā seyyo' ti?|| ||

Atthi kho Dhanañjāni,||
aññe sahetukā dhammikā kammantā,||
ye hi sakkā mittāmaccānañc'eva mittāmaccakaraṇīyaɱ kātuɱ,||
na ca pāpakammaɱ kattuɱ,||
puññañca paṭipadaɱ paṭipajjituɱ.|| ||

Taɱ kiɱ maññasi Dhanañjāni,||
yo vā ñātisālohitānaɱ hetu adhammacārī visamacārī assa,||
yo vā ñātisālohitānaɱ hetu dhammacārī samacārī assa.|| ||

Katamaɱ seyyo' ti?|| ||

[190] Yo hi bho Sāriputta,||
ñātisālehitānaɱ hetu adhammacārī visamacārī assa,||
na taɱ seyyo.|| ||

Yo ca kho bho Sāriputta,||
ñātisālohitānaɱ hetu dhammacārī samacārī assa,||
tadevettha seyyo.|| ||

Adhammacariyā visamacariyā hi bho Sāriputta,||
dhammacariyā samacariyā seyyo' ti?|| ||

Atthi kho Dhanañjāni,||
aññe sahetukā dhammikā kammantā,||
yehi sakkā ñātisālohitānañc'eva ñātisālohitakaraṇīyaɱ kātuɱ,||
na ca pāpakammaɱ kattuɱ,||
puññañca paṭipadaɱ paṭipajjituɱ.|| ||

Taɱ kiɱ maññasi Dhanañjāni,||
yo vā atithīnaɱ hetu adhammacārī visamacārī assa,||
yo vā atithīnaɱ hetu dhammacārī samacārī assa.|| ||

Katamaɱ seyyo' ti?|| ||

Yo hi bho Sāriputta,||
atithīnaɱ hetu adhammacārī visamacārī assa,||
na taɱ seyyo.|| ||

Yo ca kho bho Sāriputta,||
atithīnaɱ hetu dhammacārī samacārī assa,||
tadevettha seyyo.|| ||

Adhammacariyā visamacariyā hi bho Sāriputta,||
dhammacariyā samacariyā seyyo' ti.|| ||

Atthi kho Dhanañjāni,||
aññe sahetukā dhammikā kammantā,||
yehi sakkā atithīnañc'eva atithikaraṇīyaɱ kātuɱ,||
na ca pāpakammaɱ kattuɱ,||
puññañca paṭipadaɱ paṭipajjituɱ.|| ||

Taɱ kiɱ maññasi Dhanañjāni,||
yo vā pubbapetānaɱ hetu adhammacārī visamacārī assa,||
yo vā pubbapetānaɱ hetu dhammacārī samacarī assa.|| ||

Katamaɱ seyyo' ti?|| ||

Yo hi bho Sāriputta,||
pubbapetānaɱ hetu adhammacārī visamacārī assa,||
na taɱ seyyo.|| ||

Yo ca kho bho Sāriputta,||
pubbapetānaɱ hetu dhammacārī samacārī assa,||
tadevettha seyyo adhammacariyā visamacariyā hi bho Sāriputta,||
dhammacariyā samacariyā seyyo' ti.|| ||

Atthi kho dhanañajāni ,||
aññe sahetukā dhammikā kammantā,||
yehi sakkā pubbapetānañc'eva pubbapetakaraṇīyaɱ kātuɱ,||
na ca pāpakammaɱ kattuɱ,||
puññañca paṭipadaɱ paṭipajjituɱ.|| ||

Taɱ kiɱ maññasi Dhanañjāni,||
yo vā devatānaɱ hetu adhammacārī visamacārī assa,||
yo vā devatānaɱ hetu dhammacārī samacārī assa.|| ||

Katamaɱ seyyo' ti?|| ||

Yo hi bho Sāriputta,||
devatānaɱ hetu adhammacārī visamacārī assa,||
na taɱ seyyo.|| ||

Yo ca kho bho Sāriputta,||
devatānaɱ hetu dhammacārī samacārī assa,||
tadevettha [191] seyyo.|| ||

Adhammacariyā visamacariyā hi bho Sāriputta,||
dhammacariyā samacariyā seyyo' ti.|| ||

Atthi kho Dhanañjāni ,||
aññe sahetukā dhammikā kammantā,||
yehi sakkā devatānañc'eva devatākaraṇīyaɱ kātuɱ,||
na ca pāpakammaɱ kattuɱ,||
puññañca paṭipadaɱ paṭipajjituɱ.|| ||

Taɱ kiɱ maññasi Dhanañjāni,||
yo vā rañño hetu adhammacārī visamacārī assa,||
yo vā rañño hetu dhammacārī samacārī assa.|| ||

Katamaɱ seyyo' ti?|| ||

Yo hi bho Sāriputta,||
rañño hetu adhammacārī visamacārī assa,||
na taɱ seyyo.|| ||

Yo ca kho bho Sāriputta,||
rañño hetu dhammacārī samacārī assa,||
tadevettha seyyo.|| ||

Adhammacariyā visamacariyā hi bho Sāriputta,||
dhammacariyā samacariyā seyyo' ti.|| ||

Atthi kho Dhanañjāni,||
añño sahetukā dhammikā kammantā,||
yehi sakkā rañño c'eva rājakaraṇīyaɱ kātuɱ,||
na ca pāpakammaɱ kattuɱ,||
puññañca paṭipadaɱ paṭipajjituɱ.|| ||

Taɱ kiɱ maññasi Dhanañjāni,||
yo vā kāyassa pīṇanahetu brūhanahetu adhammacārī visamacārī assa,||
yo vā kāyassa pīṇanahetu brūhanahetu dhammacārī samacārī assa.|| ||

Katamaɱ seyyo' ti?|| ||

Yo hi bho Sāriputta,||
kāyassa piṇanahetu brūhanahetu adhammacārī visamacārī assa,||
na taɱ seyyo.|| ||

Yo ca kho bho Sāriputta,||
kāyassa piṇanahetu brūhanahetu dhammacārī samacārī assa,||
tadevettha seyyo,||
adhammacariyā visamacariyāhī bho Sāriputta,||
dhammacariyā samacariyā seyyoti.|| ||

Atthi kho Dhanañjāni,||
aññe sahetukā dhammikā kammantā,||
yehi sakkā kāyañc'eva pīṇetuɱ brūhetuɱ,||
na ca pāpakammaɱ kattuɱ,||
puññañca paṭipadaɱ paṭipajjitunti.|| ||

Atha kho Dhanañjāni brāhmaṇo āyasmato Sāriputtassa bhāsitaɱ abhinanditvā anumoditvā uṭṭhāy āsanā pakkāmi.|| ||

Atha kho Dhanañjāni brāhmaṇo aparena samayena ābādhiko ahosi dukkhito bāḷhagilāno.|| ||

Atha kho Dhanañjāni brāhmaṇo aññataraɱ purisaɱ āmantesi:||
ehi tvaɱ amho [192] purisa,||
yena Bhagavā ten'upasaŋkama,||
upasaŋkamitvā mama vacanena Bhagavato pāde sirasā vandāhī,||
'Dhanañjāni bhante,||
brāhmaṇo ābādhiko dukkhito bāḷhagilāno,||
so Bhagavato pāde sirasā vandatī' ti.|| ||

Yena c'āyasmā Sāriputto ten'upasaŋkama,||
upasaŋkamitvā mama vacanena āyasmato Sāriputtassa pāde sirasā vandāhi,'Dhanañjāni bhante,||
brāhmaṇo ābādhiko dukkhito bāḷhagilāno.|| ||

So āyasmato Sāriputtassa pāde sirasā vandatī' ti.|| ||

Evañ ca vadehi:||
'sādhu kira bhante,||
āyasmā Sāriputto yena Dhanañjānissa brāhmaṇassa nivesanaɱ ten'upasaŋkamatu anukampaɱ upādāyā' ti.|| ||

Evaɱ bhante' ti kho so puriso Dhanañjānissa brāhmaṇassa paṭissutvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi,||
eka-m-antaɱ nisinno kho so puriso Bhagavantaɱ etad avoca.|| ||

'Dhanañjāni bhante,||
brāhmaṇo ābādhiko dukkhito bāḷhagilāno so Bhagavato pāde sirasā vandatī' ti.|| ||

Yena c'āyasmā Sāriputto ten'upasaŋkami,||
upasaŋkamitvā āyasmantaɱ Sāriputtaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so puriso āyasmantaɱ Sāriputtaɱ etad avoca:||
'Dhanañjāni nte,||
brāhmaṇo ābādiko dukkhito bāḷhagilāno so āyasmato Sāriputtassa pāde sirasā vandati,||
evañca vadeti.|| ||

'Sādhu kira bhante,||
āyasmā Sāriputto yena Dhanañjānissa brāhmaṇassa nivesanaɱ ten'upasaŋkamatu anukampaɱ upādāyā' ti.|| ||

Adhivāsesi kho āyasmā Sāriputto tuṇhī-bhāvena.|| ||

Atha kho āyasmā Sāriputto nivāsetvā pattacīvaraɱ ādāya yena Dhanañjānissa brāhmaṇassa nivesanaɱ ten'upasaŋkami,||
upasaŋkamitvā paññatte āsane nisīdi,||
nisajja kho āyasmā Sāriputto Dhanañjāniɱ brāhmaṇaɱ etad avoca:||
'kacci te Dhanañjāni,||
khamanīyaɱ kacci yāpanīyaɱ kacci dukkhā vedanā paṭikkamanti no abhikkamanti,||
paṭikkamosānaɱ paññāyati,||
no abhikkamoti?|| ||

Na me bho Sāriputta,||
khamanīyaɱ na yāpanīya,||
bā'hā me dukkhā vedanā abhikkamanti no paṭikkamanti,||
abhikkamosānaɱ paññāyati no paṭikkamoti.|| ||

Seyyathā pi [193] bho Sāriputta,||
balavā puriso tiṇhena sikharena muddhani1 abhimantheyya.2 Evam eva kho me bho Sāriputta,||
adimattā vātā muddhani1 ūhananti3 na me ho Sāriputta,||
khamanīyaɱ na yāpanīyaɱ.|| ||

Bā'hā me dukkhā vedanā abhikkamanti no paṭikkamanti,||
abhikkamosānaɱ paññāyati no paṭikkamoti.|| ||

Seyyathā pi bho Sāriputta,||
balavā puriso daḷhena varattabandhanena4 sīse sīsaveṭhanaɱ5 bandheyya6,||
evam eva kho me bho Sāriputta,||
adhimattā sīse sīsavedanā hoti.|| ||

Na me bho Sāriputta,||
khamanīyaɱ na yāpanīyaɱ.|| ||

Bā'hā me dukkhā vedanā.|| ||

Abhikkamanti no paṭikkamanti,||
abhikkamosānaɱ paññāyati no paṭikkamoti.|| ||

Seyyathā pi bho Sāriputta,||
dakkho goghātako vā goghātakantevāsī vā tiṇhena govikattanena kucchiɱ parikanteyya.|| ||

Evam eva kho me bho Sāriputta,||
adhimattā vātā kucchiɱ parikantanti.|| ||

Na me bho Sāriputta,||
khamanīyaɱ na yāpanīyaɱ,||
bā'hā me dukkhā vedanā abhikkamanti no paṭikkamanti,||
abhikkamosānaɱ paññāyati no paṭikkamoti.|| ||

Seyyathā pi bho Sāriputta,||
dve balavanto purisā dubbalataraɱ purisaɱ nānā bāhāsu gahetvā aŋgārakāsuyā santāpeyyuɱ samparitāpeyyuɱ,||
evam eva kho me bho Sāriputta,||
adhimatto kāyasmiɱ dāho,||
na me bho Sāriputta,||
khamanīyaɱ na yāpanīyaɱ bā'hā me dukkhā vedanā abhikkamantī no paṭikkamanti,||
abhikkamosānaɱ paññāyati no paṭikkamoti.|| ||

Taɱ kiɱ maññasi Dhanañjāni,||
katamaɱ seyyo,||
nirayo vā tiracchānayoni vā' ti?|| ||

Nirayā bho Sāriputta,||
tiracchānayoni seyyoti.|| ||

Taɱ kiɱ maññasi Dhanañjāni,||
katamaɱ seyyo,||
tiracchānayoni vā pettivisayo7 vā' ti?|| ||

Tiracchānayoniyā bho Sāriputta,||
pettivisayo seyyoti.|| ||

Taɱ kiɱ maññasi Dhanañjāni,||
katamaɱ seyyo,||
pettivisayo vā manusso vā' ti?|| ||

Pettivisayā bho Sāriputta,||
manussā seyyoti.|| ||

[194]|| ||

Taɱ kiɱ maññasi Dhanañjāni,||
katamaɱ seyyo,||
manussā vā cātummahārājikā devā vā' ti?|| ||

Manussehi bho Sāriputta,||
cātummahārājikā devā seyyoti.|| ||

Taɱ kiɱ maññasi Dhanañjāni,||
katamaɱ seyyo,||
cātummahārājikā vā devā Tāvatiɱsā vā devā' ti?|| ||

Cātummahārājikehi bho Sāriputta,||
devehi Tāvatiɱsā devā seyyoti.|| ||

Taɱ kiɱ maññasi Dhanañjāni,||
katamaɱ seyyo,Tāvatiɱsā vā devā yāmā vā devā' ti?|| ||

Tāvatiɱsehi bho Sāriputta,||
devehi yāmā devā seyyoti.|| ||

Taɱ kiɱ maññasi Dhanañjāni,||
katamaɱ seyyo,yāmā vā devā tusitā vā

Devāti?|| ||

Yāmehi bho Sāriputta,||
devehi tusitā devā yyoti.|| ||

Taɱ kiɱ maññasi Dhanañjāni,||
katamaɱ seyyo,||
tusitā vā devā nimmānaratī vā devā' ti?|| ||

Tusitehi bho Sāriputta,||
devehi nimmānaratī devā seyyoti.|| ||

Taɱ kiɱ maññasi Dhanañjāni,||
katamaɱ seyyo,||
nimmānaratī vā devā paranimmitavasavattī vā devā' ti?|| ||

Nimmānaratīhi bho Sāriputta,||
devehi paranimamitavasavattī devā seyyoti.|| ||

Taɱ kiɱ maññasi Dhanañjāni,||
katamaɱ seyyo,||
paranimmitavasavattī vā devā brahmaloko vā' ti?|| ||

Brahmalokoti bhavaɱ Sāriputte,||
āha,||
brahmalokoti bhavaɱ Sāriputto āhāti.|| ||

Atha kho āyasmato Sāriputtassa etad ahosi:||
ime kho brāhmaṇā brahmalokādhimuttā.|| ||

Yan'nūnāhaɱ Dhanañjānissa brāhmaṇassa Brahmānaɱ sahavyatāya maggaɱ deseyyanti.|| ||

Brahmānaɱ te Dhanañjāni sahavyatāya maggaɱ desissāmi.|| ||

Taɱ suṇāhi sādhukaɱ manasi karohī bhāsissāmī' ti.|| ||

'Evam bho' ti kho Dhanañjāni brāhmaṇo āyasmato Sāriputtassa paccassosi.|| ||

[195] Āyasmā Sāriputto etad avoca:||
'katamo ca Dhanañjāni,||
Brahmānaɱ sahavyatāya maggo? Idha Dhanañjāni,||
bhikkhu mettā-sahagatena cetasā ekaɱ disaɱ pharitvā viharati.|| ||

Tathā dutiyaɱ,||
tathā tatiyaɱ,||
tathā catutthiɱ.|| ||

Iti uddham-adho tiriyaɱ sabbadhi sabbattatāya1 sabbāvantaɱ lokaɱ mettā-sahagatena cetasā vipulena mahaggatena appamāṇena averena avyāpajjhena eritvā viharati.|| ||

Ayam pi kho Dhanañjāni,||
Brahmānaɱ sahavyatāya maggo.|| ||

Puna ca paraɱ Dhanañjāni,||
bhikkhu karuṇā-sahagatena cetasā ekaɱ disaɱ pharitvā viharati.|| ||

Tathā dutiyaɱ,||
tathā tatiyaɱ,||
tathā catutthiɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena avyāpajjhena eritvā viharati.|| ||

Ayam pi kho Dhanañjāni,||
Brahmānaɱ sahavyatāya maggo' ti.|| ||

Puna ca paraɱ Dhanañjāni,||
bhikkhu muditā-sahagatena cetasā ekaɱ disaɱ pharitvā viharati.|| ||

Tathā dutiyaɱ,||
tathā tatiyaɱ,||
tathā catutthiɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ muditā-sahagatena cetasā vipulena mahaggatena appamāṇena averena avyāpajjhena eritvā viharati.|| ||

Ayam pi kho dhanañāni,||
brāhmānaɱ sahavyatāya maggo' ti.|| ||

Puna ca paraɱ Dhanañjāni ,||
bhikkhu upekkhā-sahagatena cetasā ekaɱ disaɱ pharitvā viharati.|| ||

Tathā dutiyaɱ,||
tathā tatiyaɱ,||
tathā catutthiɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena avyāpajjhena eritvā viharati.|| ||

Ayam pi kho dhanañajāni,||
Brahmānaɱ sahavyatāya maggo' ti.|| ||

Tena hi bho Sāriputta,||
mama vacanena Bhagavato pāde sirasā vandāhi,||
'Dhanañjāni bhante,||
brāhmaṇo ābādhiko dukkhito bāḷhagilāno,||
so Bhagavato pāde sirasā vandatī' ti.|| ||

Atha kho āyasmā Sāriputto Dhanañjāniɱ brāhmaṇaɱ sati uttariɱ karaṇiye hīne brahmaloke patiṭṭhāpetvā uṭṭhāy āsanā pakkāmi.|| ||

Atha kho Dhanañjāni brāhmaṇo acirapakkante āyasmante Sāriputte kālamakāsi,||
brahmalokañ ca upapajji.|| ||

Atha kho Bhagavā bhikkhū āmantesi:||
eso bhikkhave,||
Sāriputto Dhanañjāniɱ brāhmaṇaɱ sati uttariɱ karaṇīye,||
hīne brahmaloke patiṭṭhāpetvā uṭṭhāy āsanā pakkanto' ti.|| ||

Atha kho āyasmā Sāriputto yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi,||
eka-m-antaɱ nisinno kho āyasmā Sāriputto Bhagavantaɱ etad avoca:||
Dhanañjāni bhante,||
brāhmaṇo ābādiko dukkhito bāḷhagilāno,||
so Bhagavato pāde sirasā vandatī' ti.|| ||

Kiɱ pana tvaɱ Sāriputta,||
Dhanañjāniɱ brāhmaṇaɱ [196] sati uttariɱ kariṇīye,||
hīne brahmaloke patiṭṭhāpetvā uṭṭhāy āsanā pakkantoti?|| ||

Mayhaɱ kho bhante,||
evaɱ ahosi:||
ime kho brāhmaṇā brahmalokādhimuttā yan nūnāhaɱ Dhanañjānissa brāhmaṇassa Brahmānaɱ sahavyatāya maggaɱ deseyyanti.|| ||

Kālakato ca Sāriputta,||
Dhanañjāni brāhmaṇo brahmalokañ ca upapannoti.|| ||

Dhanañjānisuttaɱ sattamaɱ


Contact:
E-mail
Copyright Statement   Webmaster's Page