Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
3. Suññata Vagga

Sutta 122

Mahā Suññata Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][ntbb][than][olds][upal] Evaɱ me sutaɱ:|| ||

Ekaɱ samayaɱ Bhagavā Sakkesu viharati Kapilavatthusmiɱ Nigrodhārāme.|| ||

[2] [pts] [ntbb] [olds] Atha kho Bhagavā pubbaṇha-samayaɱ nivāsetvā pattacīvaraɱ ādāya Kapilavatthuɱ piṇḍāya pāvisi.|| ||

Kapilavatthusmiɱ piṇḍāya caritvā pacchābhattaɱ piṇḍapātapaṭikkanto yena Kāḷakhemakassa Sakkassa vihāro||
ten'upasaɱkami divāvihārāya.|| ||

Tena kho pana samayena Kāḷakhemakassa Sakkassa vihāre sambahulāni senāsanāni paññattāni honti.|| ||

Addasā kho Bhagavā Kāḷakhemakassa Sakkassa vihāre sambahulāni [110] senāsanāni paññattāni.|| ||

Disvāna Bhagavato etad ahosi:|| ||

'Sambahulāni kho Kāḷakhemakassa Sakkassa vihāre senāsanāni paññattāni.|| ||

Sambahulā nu kho idha bhikkhu viharantī' ti?|| ||

Tena kho pana samayena āyasmā Ānando sambahulehi bhikkhūhi saddhiɱ Ghaṭāya-Sakkassa vihāre civarakammaɱ karoti.|| ||

Atha kho Bhagavā sāyaṇhasamayaɱ patisallānā vuṭṭhito,||
yena Ghaṭāya-Sakkassa vihāro ten'upasaɱkami,||
upasaɱkamitvā paññatte āsane nisīdi.|| ||

Nisajja kho Bhagavā āyasmantaɱ Ānandaɱ āmantesi:|| ||

'Sambahulāni kho, Ānanda Kāḷakhemakassa Sakkassa vihāre senāsanāni paññattāni.|| ||

Samabahulā nu kho ettha bhikkhū viharantī' ti?|| ||

Sambahulāni bhante||
Kāḷakhemakassa Sakkassa vihāre senāsanāni paññattāni,||
sambahulā ettha bhikkhū viharanti.|| ||

Cīvarakārasamayo no bhante, vattatī ti.|| ||

[3] [pts] [ntbb] [olds] Na kho Ānanda, bhikkhu sobhani sangañikārāmo sangañikārato sangañikārāmataɱ||
anuyutto gaṇārāmo gaṇarato gaṇasammudito.|| ||

So vat', Ānanda||
bhikkhu sangañikārāmo sangañikārato sangañikārāmataɱ||
anuyutto gaṇārāmo gaṇarato gaṇasammudito,||
yan taɱ nekkhammasukhaɱ pavivekasukhaɱ upasamasukhaɱ sambodhasukhaɱ,||
tassa sukhassa nikāmalābhī bhavissati akicchalābhī akasiralābhī ti,||
— n'etaɱ ṭhānaɱ vijjati.|| ||

Yo ca kho so Ānanda,||
bhikkhu eko gaṇasmā vūpakaṭṭho viharati,||
tass'etaɱ bhikkhuno pāṭikaṅkhaɱ,||
yan taɱ nekkhammasukhaɱ pavivekasukhaɱ upasamasukhaɱ sambodhasukhaɱ,||
tassa sukhassa nikāmalābhī bhavissati akicchalābhī akasiralābhī ti,||
— ṭhānam etaɱ vijjati.|| ||

[4] [pts] [ntbb] [olds] So vat', Ānanda bhikkhu sangañikārāmo sangañikārāto sangañikārāmataɱ||
anuyutto gaṇārāmo gaṇarato gaṇasammudito,||
sāmayikaɱ vā kantaɱ ceto-vimuttiɱ upasampajja viharissati,||
asāmayikaɱ vā akuppan ti,||
— n'etaɱ ṭhānaɱ vijjati.|| ||

Yo ca kho so Ānanda,||
bhikkhu eko gaṇasmā vūpakaṭṭho viharati,||
tass'etaɱ bhikkhuno pāṭikaṅkhaɱ||
sāmayikaɱ vā kantaɱ [111] ceto-vimuttiɱ upasampajja viharissati,||
asāmayikaɱ vā akuppan ti,||
— ṭhānam etaɱ vijjati.|| ||

[5] [pts] [ntbb] [olds] Nāhaɱ, Ānanda, ekaɱ rūpam pi samanupassāmi,||
yattha rattassa yatthābhirattassa rūpassa vipariṇāmaññathābhāvā na uppajjeyyuɱ soka-parideva-dukkha-domanass'-upāyāsā.|| ||

[6][pts] [ntbb] [olds] Ayaɱ kho pan'Ānanda, vihāro Tathāgatena abhisambuddho,||
yad idaɱ sabbanimittānaɱ amanasi-kārā ajjhattaɱ suññataɱ upasampajja viharituɱ|| ||

Tatra ce Ānanda, Tathāgataɱ iminā vihārena viharantaɱ bhavanti upasaɱkamitāro bhikkhū bhikkhuniyo upāsakā upāsikāyo rājāno rājamahāmattā titthiyā titthiyasāvakā,||
— Tatr'Ānanda, Tathāgato vivekaninnen'eva cittena vivekapoṇena vivekapabbhārena vūpakaṭṭhena nekkhammābhiratena byantībhutena sabbaso āsavaṭṭhāniyehi dhammehi aññadatthu uyyojaniyapaṭisaɱyuttaɱ yeva kathaɱ kattā hoti.|| ||

[7][pts] [ntbb] [olds] Tasmāt iha'Ānanda, bhikkhu ce pi ākaṅkheyya:|| ||

Ajjhattaɱ suññataɱ upasampajja vihareyyan ti.|| ||

Ten'Āananda, bhikkhunā ajjhattam eva cittaɱ saṇṭhapetabbaɱ||
sannisādetabbaɱ,||
ekodi kātabbaɱ||
samādahātabbaɱ.|| ||

[8][pts] [ntbb] [olds] Kathañ ca Ānanda, bhikkhu ajjhattam eva cittaɱ saṇṭhapeti sannisādeti ekodikaroti samādahati?|| ||

Idh'Ānanda, bhikkhu vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱajjhānaɱ upasampajja viharati.|| ||

Vitakkavicāranaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharati.|| ||

Sukhañ ca kāyena paṭisaŋvedeti.|| ||

Yan taɱ ariyā ācikkhanti:||
'Upekkhako satimā sukha-vihārī' ti,||
catuttha jhānaɱ upasampajja viharati.|| ||

Sukhassa ca pahānā dukkhassa ca pahānā pubbe va somanassadomanassaɱ atthaṅgamā adukkhaɱ-asukhaɱ upekkhā-sati-pārisuddhiɱ catutthaɱ-jhānaɱ upasampajja viharati.|| ||

Evaɱ kho Ānanda bhikkhu ajjhattam eva cittaɱ saṇṭhapeti,||
sannisādeti||
ekodi karoti||
samādahati.|| ||

[112] [9][pts] [ntbb] [olds] So ajjhattaɱ suññataɱ manasikaroti.|| ||

Tassa ajjhattaɱ suññataɱ manasikaroto ajjhattaɱ suññatāya cittaɱ na pakkhandati||
nappasīdati||
na santiṭṭhati||
na vimuccati.|| ||

Evaɱ santaɱ etaɱ Ānanda||
bhikkhu evaɱ pajānāti:|| ||

Ajjhattaɱ suññataɱ kho me manasikaroto ajjhattaɱ suññatāya cittaɱ na pakkhandati||
nappasidati||
na santiṭṭhati||
na vimuccatī ti.|| ||

Iti ha tattha sampajāno hoti.|| ||

So bahiddhā suññataɱ manasikaroti.|| ||

Tassa bahiddhā suññataɱ manasikaroto suññatāya cittaɱ na pakkhandati||
nappasidati||
na santiṭṭhati||
na vimuccati.|| ||

Evaɱ santaɱ etaɱ Ānanda||
bhikkhu evaɱ pajānāti:||
bahiddhā suññataɱ kho me manasikaroto bahiddhā suññatāya cittaɱ na pakkhandati||
nappasidati||
na santiṭṭhati||
na vimuccatī ti.|| ||

Iti ha tattha sampajāno hoti.|| ||

So ajjhattabahiddhā suññataɱ manasikaroti.|| ||

Tassa ajjhattabahiddhā suññataɱ manasikaroto suññatāya cittaɱ na pakkhandati,||
nappasidati,||
na santiṭṭhati,||
na vimuccati.|| ||

Evaɱ santaɱ etaɱ Ānanda||
bhikkhu evaɱ pajānāti:||
ajjhattabahiddhā suññataɱ kho me manasikaroto ajjhattabahiddhā suññatāya cittaɱ na pakkhandati,||
nappasidati,||
na santiṭṭhati,||
na vimuccatī ti.|| ||

Iti ha tattha sampajāno hoti.|| ||

So āneñjaɱ manasikaroti.|| ||

Tassa āneñjaɱ manasikaroto āneñjāya cittaɱ na pakkhandati,||
nappasīdati,||
na santiṭṭhati,||
na vimuccati.|| ||

Evaɱ santaɱ etaɱ Ānanda||
bhikkhu evaɱ pajānāti:||
Ānejjaɱ kho me manasikaroto āneñjāya cittaɱ na pakkhandati||
nappasīdati||
na santiṭṭhati||
na vimuccatī ti.|| ||

Iti ha tattha sampajāno hoti.|| ||

[10] [pts] [ntbb] [olds] Ten'āananda bhikkhunā tasmiɱ yeva purimasmiɱ samādhinimittena ajjhattaɱ eva cittaɱ saṇṭhapetabbaɱ,||
sannisādetabbaɱ,||
ekodikātabbaɱ,||
samādahātabbaɱ.|| ||

So ajjhattaɱ suññataɱ manasikaroti.|| ||

Tassa ajjhattaɱ suññataɱ manasikaroto ajjhattaɱ suññatāya cittaɱ pakkhandati,||
pasīdati,||
santiṭṭhati,||
vimuccati.|| ||

Evaɱ santaɱ etaɱ Ānanda,||
bhikkhu evaɱ pajānāti:|| ||

Ajjhattaɱ suññataɱ kho me manasikaroto ajjhattaɱ suññatāya cittaɱ pakkhandati pasīdati santiṭṭhati vimuccatī ti.|| ||

Iti ha tattha sampajāno hoti.|| ||

So bahiddhā suññataɱ masikaroti.|| ||

Tassa bahiddhā suññataɱ manasikaroto suññatāya cittaɱ na pakkhandati,||
nappasīdati||
na santiṭṭhati||
na vimuccati.|| ||

Evaɱ santaɱ etaɱ pajānāti:||
bahiddhā suññataɱ kho me manasikaroto bahiddhā suññatāya cittaɱ na pakkhanidati,||
nappasīdati,||
na santiṭṭhati,||
na vimuccatī ti.|| ||

Iti ha tattha sampajāno hoti.|| ||

So ajjhattabahiddhā suññataɱ masikaroti.|| ||

Tassa ajjhattabahiddhā suññataɱ manasikaroto suññatāya cittaɱ na pakkhandati||
nappasīdati||
na santiṭṭhati||
na vimuccati.|| ||

Evaɱ santaɱ etaɱ pajānāti:||
ajjhattabahiddhā suññataɱ kho me manasikaroto ajjhattabahiddhā suññatāya cittaɱ na pakkhanidati||
nappasīdati||
na santiṭṭhati||
na vimuccatī ti.|| ||

Iti ha tattha sampajāno hoti.|| ||

So āneñjaɱ manasikaroti.|| ||

Tassa āneñjaɱ manasikaroto āneñjāya cittaɱ pakkhandati pasīdati santiṭṭhati vimuccati.|| ||

Evaɱ santaɱ etaɱ Ānanda||
bhikkhu evaɱ pajānāti:|| ||

Āneñjaɱ kho me manasikaroto āneñjāya cittaɱ pakkhandati pasīdati santiṭṭhati vimuccatī ti.|| ||

Iti ha tattha sampajāno hoti.|| ||

[11] [pts] [ntbb] [olds] Tassa ce Ānanda, bhikkhuno iminā vihārena viharato caṅkamāya cittaɱ namati,||
so caṅkamati:|| ||

Evaɱ maɱ caṅkamantaɱ nābhijjhādomanassā pāpakā akusalā dhammā [113] anvāssavissantī ti.|| ||

Iti ha tattha sampajāno hoti.|| ||

Tassa ce Ānanda, bhikkhuno iminā vihārena viharato ṭhānāya cittaɱ namati:||
So tiṭṭhati evaɱ maɱ tiṭṭhantaɱ nābhijjhā domanassā pāpakā akusalā dhammā anvāssavissantī ti.|| ||

Iti ha tattha sampajāno hoti.|| ||

Tassa ce Ānanda, bhikkhuno iminā vihārena viharato nissajjāya cittaɱ namati:||
So nisīdati evaɱ maɱ tiṭṭhantaɱ nābhijjhā domanassā pāpakā akusalā dhammā anvāssavissantī ti.|| ||

Iti ha tattha sampajāno hoti.|| ||

Tassa ce Ānanda, bhikkhuno iminā vihārena viharato sayanāya cittaɱ namati:||
So sayati evaɱ maɱ tiṭṭhantaɱ nābhijjhā domanassā pāpakā akusalā dhammā anvāssavissantī ti.|| ||

Iti ha tattha sampajāno hoti.|| ||

[12] [pts] [ntbb] [olds] Tassa ce Ānanda, bhikkhuno iminā vihārena viharato kathāya cittaɱ namati:|| ||

So yā'yaɱ kathā hīnā gammā pothujjanikā anariyā anatthasaɱhitā na nibbidāya na virāgāya na nirodhāya na upasamāya na abhiññāya na sambodhāya na nibbānāya saŋvattati.|| ||

Seyyathīdaɱ:||
rājakathā corakathā mahāmattakathā senākathā bhayakathā yuddhakathā annakathā pānakathā vatthakathā sayanakathā mālākathā gandhakathā ñātikathā yānakathā gāmakathā nigamakathā nagarakathā janapadakathā itthikathā purisakathā surākathā visikhākathā kumbhaṭṭhānakathā pubbapetakathā nānatthakathā lokakkhāyikā samuddakkhāyikā itibhavābhavakathā,||
iti vā iti evarūpiɱ kathaɱ na kathessāmiti.|| ||

Iti ha tattha sampajāno hoti.|| ||

Yā ca kho ayaɱ Ānanda, kathā abhisallekhikā cetovinīvaraṇasappāyā ekantanibbidāya virāgāya nirodhāya upasamāya abhiññāya sambodhāya nibbānāya saŋvattati.|| ||

Seyyathīdaɱ:
appicchakathā santuṭṭhikathā pavivekakathā||
asaɱsaggakathā||
viriyārambhakathā||
sīlakathā||
samādhikathā||
paññākathā||
vimuttikathā vimutti-ñāṇa-dassanakathā||
iti evarūpiɱ kathaɱ kathessāmīti.|| ||

Iti ha tattha sampajāno hoti.|| ||

[13] [pts] [ntbb] [olds] Tassa ce Ānanda, bhikkhuno iminā vihārena viharato [114] vitakkāya cittaɱ namatī.|| ||

So ye te vitakkā hīnā gammā pothujjanikā anariyā anatthasaɱhitā na nibbidāya na virāgāya na nirodhāya na upasamāya na abhiññāya na sambodhāya na nibbānāya saɱvattanti.|| ||

Seyyathīdaɱ:||
kāma-vitakko vyāpāda-vitakko vihiɱsā-vitakko||
iti evarūpe vitakke na vitakkessāmīti.|| ||

Iti ha tattha sampajāno hoti.|| ||

Ye ca kho ime Ānanda||
vitakkā ariyā niyyānikā niyyanti||
takkarassa sammā dukkhakkhayāya.|| ||

Seyyathīdaɱ:||
nekkhamma vitakko avyāpāda-vitakko avihiɱsā-vitakko iti evarūpe vitakke vitakkessāmīti.|| ||

Iti ha tattha sampajāno hoti.|| ||

[14] [pts] [ntbb] [olds] Pañca kho ime Ānanda kāmaguṇā.|| ||

Katame pañca?|| ||

Cakkhu viññeyyā rūpā iṭṭhā kantā manāpā piyarūpā kāmūpasaɱhitā rajanīyā,||
sotaviññeyyā saddhā iṭṭhā kantā manāpā piyarūpā kāmūpasaɱhitā rajanīyā,||
ghānaviññeyyā gandhā iṭṭhā kantā manāpā piyarūpā kāmūpasaɱhitā rajanīyā,||
jivhāviññeyyā rasā iṭṭhā kantā manāpā piyarūpā kāmūpaɱhitā rajanīyā,||
kāyaviññeyyā phoṭṭhabbā iṭṭhā kantā manāpā piyarūpā kāmūpasaɱhitā rajanīyā.|| ||

Ime kho Ānanda pañcakāmaguṇā.|| ||

[15] [pts] [ntbb] [olds] Yattha bhikkhunā abhikkhaṇaɱ sakaɱ cittaɱ paccavekkhitabbaɱ.|| ||

Atthi nu kho me imesu pañcasu kāmaguṇesu aññatarasmiɱ vā aññatarasmiɱ vā āyatane uppajjati cetaso samudācāroti?|| ||

Sace Ānanda, bhikkhu paccavekkhamāno evaɱ pajānāti:||
Atthi kho me imesu pañcasu kāmaguṇesu aññatarasmiɱ vā aññatarasmiɱ vā āyatane uppajjati cetaso samudācāro ti.|| ||

Evaɱ santaɱ etaɱ Ānanda||
bhikkhu evaɱ pajānāti:||
Yo kho imesu pañcasu kāmaguṇesu chandarāgo,||
so me appahīnoti.|| ||

Iti ha tattha sampajāno hoti.|| ||

Sace pan'Ānanda, bhikkhu paccavekkhamāno evaɱ pajānāti:||
N'atthi kho me imesu pañcasu kāmaguṇesu aññatarasmiɱ vā aññatarasmiɱ vā āyatane uppajjati cetaso samudācāro ti.|| ||

Evaɱ santaɱ etaɱ Ānanda,||
bhikkhū evaɱ pajānāti:||
Yo kho imesu pañcasu kāmaguṇesu chandarāgo,||
so me pahīnoti.|| ||

Iti ha tattha sampajāno hoti.|| ||

[16] [pts] [ntbb] [olds] Pañca kho ime Ānanda upādānakkhandhā.|| ||

Yattha bhikkhunā udayabbayānupassinā vihātabbaɱ.|| ||

Iti rūpaɱ,||
iti rūpassa samudayo,||
iti rūpassa atthaṅgamo.|| ||

Iti vedanā,||
iti [115] vedanāya samudayo,||
iti vedanāya atthaṅgamo.|| ||

Iti saññā,||
iti saññāya samudayo,||
iti saññāya atthaṅgamo.|| ||

Iti saṅkhārā,||
iti saṅkhārassa samudayo,||
Iti saṅkhārassa atthaṅgamo.|| ||

Iti viññāṇaɱ,||
iti viññāṇassa samudayo,||
iti viññāṇassa atthaṅgamo ti.|| ||

[17] [pts] [ntbb] [olds] Tassa imesu pañcasupādānakkhandhesu udayabbayānupassino viharato||
yo pañcasupādānakkhandhesu asmimāno||
so pahīyati.|| ||

Evaɱ santaɱ etaɱ Ānanda||
bhikkhu evaɱ pajānāti:||
Yo kho imesu pañcasupādānakkhandhesu asmimāno||
so me pahīnoti.|| ||

Iti ha tattha sampajāno hoti.|| ||

[18] [pts] [ntbb] [olds] Ime kho te Ānanda,||
dhammā ekantakusalāyatikā ariyā lokuttarā anavakkantā pāpimatā.|| ||

[19] [pts] [ntbb] [olds] Taɱ kiɱ maññasi Ānanda?|| ||

Kaɱ atthavasaɱ sampassamāno arahati sāvako satthāraɱ anubandhituɱ api panujjamānoti.|| ||

Bhagavammūlakā no bhante||
dhammā Bhagavaɱnettikā Bhagavampapaṭisaraṇā. Sādhu vata bhante||
Bhagavantaɱyeva paṭibhātu etassa bhāsitassa attho||
Bhagavato sutvā bhikkhū dhāressantītī.|| ||

[20] [pts] [ntbb] [olds] Na kho Ānanda, arahati sāvako satthāraɱ anubandhituɱ yad idaɱ suttaɱ geyyaɱ veyyākaraṇaɱ tassa hetu taɱ kissa hetu: dīgharattassa hi vo Ānanda||
dhammā sutā dhatā vacasā paricitā manasānupekkhitā diṭṭhiyā suppaṭividdhā.
Yā ca kho Ānanda||
kathā abhisallekhikā ceto-vinīvaraṇasappāyā ekantanibbidāya virāgāya nirodhāya upasamāya abhiññāya sambhodhāya nibbānāya saŋvattati,
Seyyathīdaɱ:
Appicchakathā santuṭṭhikathā pavivekakathā asaɱsaggakathā viriyārambhakathā sīlakathā samādhikathā paññākathā vimuttikathā vimuttiñāṇa-dassanakathā. Evarūpiyā kho Ānanda kathāya hetu arahati sāvako satthāraɱ anubandhituɱ api panujjamāno.|| ||

[21] [pts] [ntbb] [olds] Evaɱ sante kho Ānanda, ācariyūpaddavo hoti;||
Evaɱ sante antevāsūpaddavo hoti;||
Evaɱ sante brahmacārūpaddavo hoti.|| ||

[22] [pts] [ntbb] [olds] Kathaɱ c'Ānanda ācariyūpaddavo hoti?|| ||

Idh'Ānanda ekacco satthā vivittaɱ senāsanaɱ bhajati araññaɱ rukkhamūlaɱ pabbataɱ kandaraɱ giriguhaɱ susānaɱ [116] vanapatthaɱ abbhokāsaɱ palālapuñjaɱ.|| ||

Tassa tathā vūpakaṭṭhassa viharato anvāvaṭṭanti brāhamaṇagahapatikā negamā c'eva jānapadā ca.|| ||

So anvāvaṭṭantesu brāhmaṇagahapatikesu negamesu c'eva jānapadesu ca mucchati||
nikāyamati||
gedhaɱ āpajjati||
āvaṭṭati bāhullāya.|| ||

Ayaɱ vuccat'Ānanda, upaddavo ācariyo.|| ||

Ācariyūpaddavena avadhiɱsu naɱ pāpakā akusalā dhammā saɱkilesikā ponobhavikā sadarā dukkhavipākā āyatiɱ jātijarāmaraṇiyā|| ||

Evaɱ kho Ānanda ācariyūpaddavo hoti.|| ||

[23] [pts] [ntbb] [olds] Kathaɱ c'Ānanda, antevāsūpaddavo hoti?|| ||

Tass'eva kho pan'Ānanda||
satthu sāvako tassa satthu vivekamanubrūhayamāno vivittaɱ senāsanaɱ bhajati araññaɱ rukkhamūlaɱ pabbataɱ kandaraɱ giriguhaɱ susānaɱ vanapatthaɱ abbhokāsaɱ palālapuñjaɱ.
Tassa tathā vūpakaṭṭhassa viharato anvāvaṭṭanti brāhmaṇagahapatikā negamā c'eva jānapadā ca.|| ||

Yo anvāvaṭṭantesu brāhmaṇagahapatikesu negamesu c'eva jānapadesu ca mucchati||
nikāyamati||
gedhaɱ āpajjati||
āvaṭṭati bāhullāya.|| ||

Ayaɱ vuccat'Ānanda, upaddavo antevāsī.|| ||

Antevāsupaddavena avadhiɱsu naɱ pāpakā akusalā dhammā saṅkilesikā ponobhavikā sadarā dukkhavipākā āyatiɱ jātijarāmaraṇiyā.|| ||

Evaɱ kho Ānanda, antevāsūpaddavo hoti.|| ||

[24] [pts] [ntbb] [olds] Kathaɱ c'Ānanda, brahmacārūpaddavo hoti.|| ||

Idh'Ānanda Tathāgato loke upapajjati arahaɱ Sammā-sambuddho vijjā-caraṇa-sampanno sugato lokavidu anuttaro purisa-damma-sārathī satthā deva-manussānaɱ buddho Bhagavā.|| ||

So vivittaɱ senāsanaɱ bhajati araññaɱ rukkhamūlraɱ pabbataɱ kandaraɱ giriguhaɱ susānaɱ vanapatthaɱ abbhokāsaɱ palālapuñjaɱ.|| ||

Tassa tathā vūpakaṭṭhassa viharato anvāvaṭṭanti brāhmaṇagahapatikā negamā c'eva jānapadā ca.|| ||

So anvāvaṭṭantesu brāhmaṇagahapatikesu negamesu c'eva jānapadesu ca na mucchati||
kāmayati||
na gedhaɱ āpajjati na [117] āvaṭṭati bāhullāya.|| ||

Tasse kho pan'Ānanda, satthu sāvako tassa satthu vivekamanubrūhayamāno vivittaɱ senāsanaɱ bhajati āraññaɱ rukkhamūlaɱ pabbataɱ kandaraɱ giriguhaɱ susānaɱ vanapatthaɱ abbhokāsaɱ palālapuñjaɱ||
tassa tathā vūpakaṭṭhassa viharato anvāvaṭṭanti brāhmaṇagahapatikā negamā c'eva jānapadā ca.|| ||

So anvāvaṭṭantesu brāhmaṇagahapatikesu negamesu c'eva jānapadesu ca mucchati||
nikāmayati||
gedhaɱ āpajjati||
āvaṭṭati bāhullāya.|| ||

Ayaɱ vuccat'Ānanda, upaddavo brahmacārī.|| ||

Brahmacārūpaddavena avadhiɱsu naɱ pāpakā akusalā dhammā saṅkilesikā ponobhavikā sadarā dukkhavipākā āyatiɱ jātijarāmaraṇiyā.|| ||

Evaɱ kho Ānanda||
brahmacārūpaddavo hoti|| ||

Tatr'Ānanda, yo c'evāyaɱ ācariyūpaddavo yo ca antevāsūpaddavo||
ayaɱ tehi brahmacārūpaddavo dukkhavipākataro c'eva kaṭukavipākataroca||
api ca vinipātāya saŋvattati.|| ||

[25] [pts] [ntbb] [olds] Tasmāt iha maɱ Ānanda, mittavatāya samudācaratha||
mā sapattavatāya,||
taɱ vo bhavissati dīgha-rattaɱ hitāya sukhāya.|| ||

[26] [pts] [ntbb] [olds] Kathañ c'Ānanda, satthāraɱ sāvakā sapattavatāya samudācaranti no mittavatāya?|| ||

Idh'Ānanda, satthā sāvakānaɱ dhammaɱ deseti anukampako hitesī anukampaɱ upādāya||
"Idaɱ vo hitāya idaɱ vo sukhāyāti."||
Tassa sāvakā na sussūsanti||
na sotaɱ odahanti na aññā-cittaɱ upaṭṭhapenti. Vokkamma ca satthusāsanā vattanti.|| ||

Evaɱ kho Ānanda, satthāraɱ sāvakā sapattavatāya samudācaranti no mittavatāya.|| ||

[27] [pts] [ntbb] [olds] Kathañ c'Ānanda, satthāraɱ sāvakā mittavatāya samudācaranti no sapattavatāya?|| ||

Idh'Ānanda, satthā sāvakānaɱ dhammaɱ deseti anukampako hitesī anukampaɱ upādāya: idaɱ vo hitāya idaɱ vo sukhāyāti.|| ||

Tassa sāvakā sussūsanti||
sotaɱ odahanti||
aññā-cittaɱ upaṭṭhapenti.|| ||

Na ca vokkamma satthusāsanā vattanti.|| ||

Evaɱ kho Ānanda, satthāraɱ sāvakā mittavatāya samudācaranti no sapattavatāya.|| ||

Tasmā- [118] tīha maɱ Ānanda||
mittavatāya samudācaratha||
mā sapattavatāya|| ||

Taɱ vo bhavissati dīgha-rattaɱ hitāya sukhāya.|| ||

[28] [pts] [ntbb] [olds] Na vo ahaɱ Ānanda, tathā parakkamissāmi.|| ||

Yathā kumbhakāro āmake āmakamatte.|| ||

Niggayha niggayhāhaɱ Ānanda vakkhāmi.|| ||

Pavayha Ānanda pavayha vakkhāmi.|| ||

Yo sāro so ṭhassatī ti.|| ||

Idam avoca Bhagavā attamano āyasmā Ānando Bhagavato bhāsitaɱ abhinandīti.|| ||

 


 

More Suññata Resources


 

Contact:
E-mail
Copyright Statement   Webmaster's Page