Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
4. Natumhāka Vagga

Sutta 35

Paṭhama Bhikkhu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[34]

[1][wrrn][pts][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

[35] Atha kho aññataro bhikkhu yena Bhagavā ten'upasaɱkami,||
upasaɱkamitvā Bhagavantaɱ abhivādetvā eka-m-antaɱ nisīdi,||
eka-m-antaɱ nisinno kho so bhikkhu Bhagavantaɱ etad avoca:|| ||

"Sādhu me bhante,||
Bhagavā saɱkhittena dhammaɱ desetu,||
yamahaɱ Bhagavato dhammaɱ sutvā eko vūpakaṭṭho appamatto ātāpī pahitatto vihareyyan" ti.|| ||

"Yaɱ kho bhikkhu,||
anuseti tena saŋkhaɱ gacchati,||
yaɱ nānuseti na tena saŋkhaɱ gacchatī" ti.|| ||

"Aññātaɱ Bhagavā,||
aññātaɱ sugatā" ti.|| ||

"Yathā kathaɱ pana tvaɱ bhikkhu,||
mayā saɱkhittena bhāsitassa vitthārena atthaɱ ājānāsī" ti?|| ||

"Rūpaɱ ce bhante anuseti tena saɱkhaɱ gacchati,||
vedanaɱ ce anuseti tena saŋkhaɱ gacchati,||
saññaɱ ce anuseti tena saŋkhaɱ gacchati,||
saɱkhāre ce anuseti tena saŋkhaɱ gacchati,||
viññāṇaɱ ce anuseti tena saŋkhaɱ gacchati.|| ||

Rūpaɱ ce bhante nānuseti tena saŋkhaɱ gacchati,||
vedanaɱ ce nānuseti tena saŋkhaɱ gacchati,||
saññaɱ ce nānuseti tena saŋkhaɱ gacchati,||
saɱkhāre ce nānuseti tena saŋkhaɱ gacchati,||
viññāṇaɱ ce nānuseti tena saŋkhaɱ gacchati.|| ||

Imassa khohaɱ bhante,||
Bhagavatā saɱkhittena bhāsitassa evaɱ vitthārena atthaɱ ājānāmī" ti.|| ||

"Sādhu sādhu bhikkhu,||
sādhu kho tvaɱ bhikkhu,||
mayā saɱkhittena bhāsitassa vitthārena atthaɱ ājānāsi.|| ||

Rūpaɱ ce bhikkhu, anuseti tena saŋkhaɱ gacchati,||
vedanaɱ ce anuseti tena saŋkhaɱ gacchati,||
saññaɱ ce anuseti tena saŋkhaɱ gacchati,||
saɱkhāre ce anuseti tena saɱkhaɱ gacchati,||
viññāṇaɱ ce anuseti tena saɱkhaɱ gacchati.|| ||

Rūpaɱ ce bhikkhu, nānuseti na tena saŋkhaɱ gacchati,||
vedanaɱ ce nānuseti na tena saŋkhaɱ gacchati,||
saññaɱ ce nānuseti na tena saŋkhaɱ gacchati,||
saɱkhāre ce nānuseti na tena saŋkhaɱ gacchati,||
viññāṇaɱ ce nānuseti na tena saŋkhaɱ gacchati.|| ||

Imassa kho bhikkhu, mayā saɱkhittena bhāsitassa evaɱ vitthārena attho daṭṭhabboti.|| ||

Atha kho so bhikkhu Bhagavato bhāsitaɱ abhinanditvā [36] anumoditvā uṭṭhāy āsanā Bhagavantaɱ abhivādetvā padakkhiṇaɱ katvā pakkāmi.|| ||

Atha kho so bhikkhu eko vūpakaṭṭho appamatto ātāpī pahitatto viharanto na cirass'eva yassatthāya kulaputtā samma-d-eva agārasmā anagāriyaɱ pabbajanti,||
tadanuttaraɱ brahmacariyapariyosānaɱ diṭṭhe va dhamme sayaɱ abhiññā sacchikatvā upasampajja vihāsi|| ||

Khīṇā jāti,||
vusitaɱ brahmacariyaɱ,||
kataɱ karaṇīyaɱ,||
nāparaɱ itthattāyā ti abbhaññāsi.|| ||

Aññataro ca pana so bhikkhu arahataɱ ahositi.|| ||

 


Contact:
E-mail
Copyright Statement   Webmaster's Page