Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

Saɱyutta Nikāya:
III. Khandha Vagga:
22: Khandha Saɱyutta
2.1. Upāya Vagga

Sutta 54

Bīja Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[54]

[1][pts][than][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

Bhagavā etad avoca:|| ||

"Pañcamāni bhikkhave bījajātāni.|| ||

Katamāni pañca?|| ||

Mūla bījaɱ||
khandha-bījaɱ||
agga-bījaɱ||
phalu-bījam||
bījabījaññ'eva pañcamaɱ.|| ||

Imāni cassu bhikkhave pañca bīja jātāni akhaṇḍāni apūtikāni avātātapahatāni sārādāyīni sukhasayitāni paṭhavī ca nāssa āpo ca nāssa api nu imāni bhikkhave pañca bījajātāni vuḍḍhiɱ virūḷhiɱ vepullaɱ āpajjeyyan" ti.|| ||

"No h'etaɱ bhante."|| ||

"Imāni cassu bhikkhave pañca bījajātāni khaṇḍāti pūtikāni vātātapahatāni asārādāyīni na sukhasayitāni paṭhavi ca assa,||
āpo ca assa,||
api nu imāni bhikkhave pañca bījajātāni vuḍḍhiɱ virūḷhiɱ vepullaɱ āpajjeyyun" ti?|| ||

"No h'etaɱ bhante."|| ||

"Imāni cassu bhikkhave pañca bījajātāni akhaṇḍāni apūtikāni sārādāyīni sukhasayitāni paṭhavi ca assa,||
āpo ca assa,||
api nu imāni bhikkhave pañca bijajātāni vuḍḍhiɱ virūḷhiɱ vepullaɱ āpajjeyyun" ti?|| ||

"Evaɱ bhante".|| ||

"Seyyathā pi, bhikkhave,||
paṭhavi-dhātu evaɱ catasso viññāṇaṭṭhitiyo daṭṭhabbā|| ||

Seyyathā pi bhikkhave āpodhātu evaɱ nandirāgo daṭṭhabbo.|| ||

Seyyathā pi, bhikkhave,||
pañca bijajātāni evaɱ viññāṇaɱ sāhāraɱ daṭṭhabbaɱ.|| ||

Rūpūpayaɱ bhikkhave viññāṇaɱ tiṭṭhamānaɱ [55] tiṭṭheyya.|| ||

Rūpā-rammaṇaɱ rūpappatiṭṭhaɱ nandupasecanaɱ vuḍḍhiɱ virūḷhiɱ vepullaɱ āpajjeyya.|| ||

Vedanūpayaɱ vā bhikkhave||
viññāṇaɱ tiṭṭhamānaɱ tiṭṭheyya.|| ||

Vedanā-rammaṇaɱ vedanappatiṭṭhaɱ nandupasecanaɱ vuḍḍhiɱ virūḷhiɱ vepullaɱ āpajjeyya.|| ||

Saññūpayaɱ vā bhikkhave||
viññāṇaɱ tiṭṭhamānaɱ tiṭṭheyya.|| ||

Saññā-rammaṇaɱ saññappatiṭṭhaɱ nandupasecanaɱ vuḍḍhiɱ virūḷhiɱ vepullaɱ āpajjeyya.|| ||

Sankhārūpayaɱ vā bhikkhave||
viññāṇaɱ tiṭṭhamānaɱ tiṭṭheyya.|| ||

Sankhārā-rammaṇaɱ sankhārappatiṭṭhaɱ nandupasecanaɱ vuḍḍhiɱ virūḷhiɱ vepullaɱ āpajjeyya,|| ||

Yo bhikkhave evaɱ vadeyya.|| ||

Aham aññatra rūpā||
aññatra vedanāya||
aññatra saññāya||
aññatra saɱkhārehi||
viññāṇassa āgatiɱ vā gatiɱ vā||
cutiɱ vā uppattiɱ vā||
vuḍḍhiɱ vā virūḷhiɱ vā||
vepullaɱ vā paññāpessāmīti n'etaɱ ṭhānaɱ vijjati.|| ||

Rūpadhātuyā ce bhikkhave bhikkhuno rāgo pahīno hoti,||
rāgassa pahānā vocchijjatārammaṇaɱ patiṭṭhā viññāṇassa na hoti.|| ||

Vedanādhātuyā ce bhikkhave bhikkhuno rāgo pahīno hoti,||
rāgassa pahānā vocchijjatārammaṇaɱ patiṭṭhā viññāṇassa na hoti.|| ||

Saññādhātuyā ce bhikkhave bhikkhuno rāgo pahīno hoti,||
rāgassa pahānā vocchijjatārammaṇaɱ patiṭṭhā viññāṇassa na hoti.|| ||

Sankhāradhātuyā ce bhikkhave bhikkhuno rāgo pahīno hoti,||
rāgassa pahānā vocchitārammaṇaɱ patiṭṭhā viññāṇassa na hoti.|| ||

Sankhāradhātuyā ce bhikkhave bhikkhuno rāgo pahīno hoti,||
rāgassa pahānā vocchitārammaṇaɱ patiṭṭhā viññāṇassa na hoti.|| ||

Viññāṇadhātuyā ce bhikkhave bhikkhuno rāgo pahīno hoti,||
rāgassa pahānā vocchitārammaṇaɱ patiṭṭhā viññāṇassa na hoti.|| ||

Tad appatiṭṭhitaɱ viññāṇaɱ avirūḷhaɱ anabhisaŋkharañ ca vimuttaɱ||
vimuttattā ṭhitaɱ,||
ṭhitattā santusitaɱ,||
santusitattā na paritassati,||
aparitassaɱ paccattaññeva parinibkhāyati:|| ||

'Khīṇā jāti||
vusitaɱ brahmacariyaɱ||
kataɱ karaṇīyaɱ||
nāparaɱ itthattāyā' ti pajānātī" ti.|| ||

 


Contact:
E-mail
Copyright Statement   Webmaster's Page