Saɱyutta Nikāya
4. Saḷāyatana Vagga
40. Moggallāna Saɱyutta

Sutta 9

A-Nimitta Suttaɱ

 

---

[268]

[1][pts][olds] Evaɱ me sutaɱ:|| ||

Ekaɱ samayaɱ āyasmā Mahā Moggallāno Sāvatthiyaɱ viharati Jetavane Anāthapiṇḍikassa ārāme.|| ||

Tatra kho āyasmā Mahā Moggallāno bhikkhū āmantesi:|| ||

"Āvuso bhikkhavo" ti.|| ||

"Āvuso" ti kho te bhikkhū āyasmato Mahā Moggallānassa paccassosuɱ.|| ||

Āyasmā Mahā Moggallāno etad avoca:|| ||

"Idha mayhaɱ āvuso raho-gatassa paṭīsallīnassa
evaɱ cetaso parivitakko udapādi:|| ||

'"Animitto ceto-samādhi,||
animitto ceto-samādhī" ti vuccati.|| ||

Katamaɱ nu kho animitto ceto-samādhī' ti?|| ||

Tassa mayhaɱ āvuso etad ahosi:|| ||

'Idha bhikkhu [269] sabba nimittānaɱ amana-sikārā||
animittaɱ ceto-samādhiɱ upasampajja viharati.|| ||

Idaɱ vuccati animitto ceto-samādhī' ti.|| ||

So khvāhaɱ āvuso||
sabba nimittānaɱ amana-sikārā||
animittaɱ ceto-samādhiɱ upasampajja viharāmi,||
tassa mayhaɱ āvuso||
iminā vihārena viharato||
nimittānusārī viññāṇaɱ hoti.|| ||

Atha kho maɱ āvuso Bhagavā iddhiyā upasankamitvā etad avoca:|| ||

'Moggallāna!|| ||

Moggallāna!|| ||

Mā brāhmaṇa,||
animittaɱ ceto-samādhiɱ pamādo,||
animittena ceto-samādhismiɱ cittaɱ saṇṭhapehi,||
animittena ceto-samādhismiɱ cittaɱ ekodiɱ-karohi,||
animittena ceto-samādhismiɱ cittaɱ samādahā' ti.|| ||

So khvāhaɱ āvuso||
aparena samayena||
sabba nimittānaɱ amana-sikārā||
animittaɱ ceto-samādhiɱ upasampajja vihāsiɱ.|| ||

Yaɱ hi taɱ āvuso sammā vadamāno vadeyya:|| ||

'Satthārānuggahito sāvako mahābhiññataɱ patto' ti,|| ||

mamantaɱ sammā vadamāno vadeyya,|| ||

'Satthārānuggahito sāvako mahābhiññataɱ patto' ti" ti.|| ||