Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
III. Saraṇāni Vagga

Sutta 27

Dutiya Dussilya or Anāthapiṇḍika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:

Ekaɱ samayam Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tena kho pana samayena Anāthapiṇḍiko gahapati ābādhiko hoti dukkhito bāḷhagilāno.|| ||

Atha kho Anāthapiṇḍiko gahapati aññataraɱ purisaŋ āmantesi:|| ||

"Ehi tvaɱ ambho purisa, yenāyasmā Ānando ten'upasaŋkama.|| ||

Upasaŋkamitvā mama vacanena āyasmato Ānandassa pāde sirasā vanda:|| ||

'Anāthapiṇḍiko bhante, gahapati ābādhiko hoti dukkhito bāḷhagilāko,||
so āyasmato Ānando pāde sirasā vandatī' ti.|| ||

Evañ ca vadehi:|| ||

'Sādhu kira bhante, āyasmā Ānando yena Anāthapiṇḍikassa gahapatissa nivesanaɱ ten'upasaŋkamatu anukampaɱ upādāyā'" ti.|| ||

"Evaɱ bhante" ti kho so puriso Anāthapiṇḍikassa gahapatissa paṭissutvā yenāyasmā Ānando ten'upasaŋkami.|| ||

Upasaŋkamitvā āyasmantaɱ Ānandaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so puriso āyasmantaɱ Ānandaɱ etad avoca:|| ||

"Anāthapiṇḍiko bhante, gahapati ābādhiko hoti dukkhito bāḷhagipāno.|| ||

So āyasmato Ānandassa pāde sirasā vandati, evañ ca vadeti:|| ||

'Sādhukira bhante, āyasmā Ānando yena aṇāthapiṇḍikassa gahapatissa nivesanaɱ ten'upasaŋkamatu anukampaɱ upādāyā' ti.|| ||

Adhivāsesi kho āyasmā Ānando tuṇhībhāvena.|| ||

Atha kho āyasmā Ānando pubbaṇhasamayaɱ nivāsetvā pattacīvaram,||
pacjāsamaṇena yena Anāthapiṇḍikassa gahapatissa nivesanaɱ ten'upasaŋkami.|| ||

Upasaŋkamitvā paññatte āsane nisīdi.|| ||

Nisajja kho āyasmā Ānando Anāthapiṇḍikaɱ gahapatiɱ etad avoca:|| ||

"Kacci te gahapati, khamanīyaɱ kacci yāpanīyaɱ kacci dukkhā vedanā paṭikkamanti no abhikkamanti?|| ||

Paṭikkamosānaɱ paññāyati no abhikkamo" ti?|| ||

"Na me bhante, khamanīyaɱ na yāpanīyaɱ bāḷhā me dukkhā vedanā abhikkamanti||
no paṭikkamanti abhikkamosānaɱ paññāyati||
no paṭikkamo" ti.|| ||

Catūhi kho gahapati, dhammehi samannāgatassa assutavato puthujjanassa hoti uttāso1 hoti chambhitattaɱ, hoti samaparāyikaɱ māraṇabhayaɱ.|| ||

Katamehi catūhi?|| ||

Idha gahapati, assutavā puthujjano||
buddhe appasādena samannāgato hoti.|| ||

Tañ ca panassa buddhe appasādaɱ attani samanupassato hoti uttāso||
hoti chambhitattaɱ||
hoti samparāyikaɱ||
māraṇabhayaɱ.|| ||

Puna ca'paraɱ gahapati, assutavā puthujjano dhamme appasādena samannāgato hoti.|| ||

Tañ ca panassa dhamme appasādaɱ attani samanupassato hoti uttāso||
hoti chambhitattaɱ||
hoti samparāyikaɱ||
māraṇabhayaɱ.|| ||

Puna ca'paraɱ gahapati, assutavā puthujjano saŋghe appasādena samannāgato hoti.|| ||

Tañ ca panassa saŋghe appasādaɱ attani samanupassato hoti uttāso||
hoti chambhitattaɱ||
hoti samparāyikaɱ||
māraṇabhayaɱ.|| ||

Puna ca'paraɱ gahapati, assutavā puthujjano dussīlyena samannāgato hoti.|| ||

Tañ ca panassa dussīlyaɱ attani samanupassato hoti uttāso,||
hoti chambhitattaɱ,||
hoti samparāyikaɱ||
māraṇabhayaɱ.|| ||

Imehi kho gahapati, catūhi dhammehi samannāgatassa assutavato puthujjanassa hoti uttāso,||
hoti chambhitattaɱ,||
hoti samparāyikaɱ||
māraṇabhayaɱ.|| ||

 


 

Catūhi kho gahapati, dhammehi samannāgatassa sutavato ariyasāvakassa na hoti uttāso,||
na hoti chambhitattaɱ,||
na hoti samparāyikaɱ||
māraṇabhayaɱ.|| ||

Katamehi catūhi?|| ||

Idha gahapati, Sutavā ariyasāvako buddhe avecca pasādena samannāgato hoti:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Tañ ca panassa buddhe aveccappasādaɱ attani samanupassato na hoti uttāso,||
na hoti chambhitattaɱ,||
na hoti samparāyikaɱ||
māraṇabhayaɱ.|| ||

Puna ca'paraɱ gahapati, Sutavā ariyasāvako dhamme avecca pasādena samannāgato hoti:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Tañ ca panassa dhamme aveccappasādaɱ attani samanupassato na hoti uttāso,||
na hoti chambhitattaɱ,||
na hoti samparāyikaɱ||
māraṇabhayaɱ.|| ||

Puna ca'paraɱ gahapati Sutavā ariyasāvako saŋghe avecca pasādena samannāgato hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Tañ ca panassa saŋghe aveccappasādaɱ attani samanupassato na hoti uttāso,||
na hoti chambhitattaɱ,||
na hoti samparāyikaɱ||
māraṇabhayaɱ.|| ||

Puna ca'paraɱ gahapati Sutavā ariyasāvako ariyakantehi sīlehi samannāgato hoti||
akhaṇḍehi||
acchiddehi||
asabalehi||
akammāsehi||
bhujissehi||
viññuppasatthehi||
aparāmaṭṭhehi||
samādhi-saɱvattanikehi.|| ||

Tāni ca panassa ariyakantāni sīlāni attani samanupassato [387] na hoti uttāso||
na hoti chambhitattaɱ,||
na hoti samparāyikaɱ||
māraṇabhayaɱ.|| ||

Imehi kho gahapati, catūhi dhammehi samannāgatassa sutavato ariyasāvakassa na hoti uttāso,||
na hoti chambhitattaɱ,||
na hoti samparāyikaɱ||
māraṇabhayan" ti.|| ||

"Nāhaɱ bhante, Ānanda, bhāyāmi.|| ||

Kyāhaɱ bhāyissāmi.|| ||

Ahaɱ hi bhante buddhe avecca pasādena samannāgato:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Dhamme avecca pasādena samannāgato:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe avecca pasādena samannāgato:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Yān imāni bhante, Bhagavatā gihīsāmīcikāni sikkhāpadāni paññattāni,||
nāhaɱ tesaŋ kiñci attani khaṇḍaɱ samanupassāmī" ti.|| ||

"Lābhā te gahapati,||
suladdhaɱ te gahapati,||
sotāpatti-phalaɱ gahapati,||
vyākatan" ti.|| ||

 


Contact:
E-mail
Copyright Statement   Webmaster's Page