Saṁyutta Nikāya
I. Sagātha Vagga
1. Devatā-Saṁyutta
I. Naḷa Vagga

Suttas 1-10

Adapted from the 1995 edition of the digital version of the
Sri Lanka Buddha Jayanti Tripitaka Series.

 

Namo tassa Bhagavato arahato Sammā Sambuddhassa

 

---

[1]

Sutta 1

Ogha Suttaṁ

[1.1][pts][bodh][than][upal][olds][alvr] EVAṀ ME SUTAṀ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā ekam-antaṁ aṭṭhāsi.

Eka-m-antaṁ ṭhitā kho sā devatā Bhagavantaṁ etad avoca:|| ||

"Kathaṁ nu tvaṁ mārisa, ogham atarī" ti?|| ||

"Appatiṭṭhaṁ khv'āhaṁ āvuso anāyūhaṁ ogham atarin" ti.|| ||

Yathā kathaṁ pana tvaṁ mārisa appatiṭṭhaṁ anāyūhaṁ ogham atarī ti?|| ||

Yadā svāhaṁ āvuso santiṭṭhāmi,||
tadāssu saṇsīdāmi.||
Yadā svāhaṁ āvuso āyūhāmi||
tadāssu nibbuyhāmi.||
Evaṁ khv'āhaṁ āvuso appatiṭṭhaṁ anāyūhaṁ ogham atarin tī.|| ||

Cirassaṁ vata passāmi||
brāhmaṇaṁ parinibbutaṁ,||
Appatiṭṭhaṁ anāyūhaṁ||
tiṇṇaṁ loke visattikaṁ ti|| ||

Idam avoca sā devatā.||
Samanuñño Satthā ahosi.|| ||

Atha kho sā devatā samanuñño me Satthā' ti Bhagavantaṁ abhivādetvā padakkhiṇaṁ katvā tatth'ev'antara-dhāyī ti.|| ||

 

---

[2]

Sutta 2

Nimokkha Suttaṁ

[2.1][pts][bodh][upal][than] EVAṀ ME SUTAṀ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā ekam-antaṁ aṭṭhāsi.

Eka-m-antaṁ ṭhitā kho sā devatā Bhagavantaṁ etad avoca:|| ||

Jānāsi no tvaṁ mārisa,||
sattāṇaṁ nimokkhaṁ pamokkhaṁ vivekan ti?|| ||

(Bhagavā:)||
Jānāmi khv'āhaṁ āvuso sattāṇaṁ nimokkhaṁ pamokkhaṁ vivekan ti.|| ||

(Devatā:)||
Yathā katham pana tvaṁ mārisa jānāsi sattāṇaṁ nimokkhaṁ pamokkhaṁ vivekan ti?|| ||

(Bhagavā:)||
Nandī-bhava parikkhayā saññā-viññāṇa-saṅkhayā,||
Vedanānaṁ nirodhā upasamā evaṁ khv'āhaṁ āvuso jānāmi.||
Sattāṇaṁ nimokkhaṁ pamokkhaṁ vivekan ti.

 

---

 

Sutta 3

Upanīyati Suttaṁ

[3.1][pts][bodh][upal][wlsh] EVAṀ ME SUTAṀ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā ekam-antaṁ aṭṭhāsi.

Eka-m-antaṁ ṭhitā kho sā devatā Bhagavato santike imaṁ gātham abhāsi:|| ||

Upanīyati jīvitam appam āyu||
jarūpanītassa na santi tāṇā,||
Etaṁ bhayaṁ maraṇe pekkhamāno||
puññāni kayirātha sukhāvahānī ti.|| ||

(Bhagavā:)||
Upanīyati jīvitam appam āyu||
jarūpanītassa na santi tāṇā||
Etaṁ bhayaṁ maraṇe pekkhamāno||
lokāmisaṁ pajahe santipekkho ti.|| ||

 

---

[3]

Sutta 4

Accenti Suttaṁ

[4.1][pts][bodh][upal] EVAṀ ME SUTAṀ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā ekam-antaṁ aṭṭhāsi.

Eka-m-antaṁ ṭhitā kho sā devatā Bhagavato santike imaṁ gātham abhāsi:|| ||

Accenti kālā tarayanti rattiyo||
vayoguṇā anupubbaṁ jahanti.||
Etaṁ bhayaṁ maraṇe pekkhamāno||
puññāni kayirātha sukhāvahānī ti.|| ||

(Bhagavā:)||
Accenti kālā tarayanti rattiyo||
vayoguṇā anupubbaṁ jahanti,||
Etaṁ bhayaṁ maraṇe pekkhamāno||
lokāmisaṁ pajahe santipekkhoti.|| ||

 

---

 

Sutta 5

Kati Chinda Suttaṁ

[5.1][pts][bodh][upal] EVAṀ ME SUTAṀ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā ekam-antaṁ aṭṭhāsi.

Eka-m-antaṁ ṭhitā kho sā devatā Bhagavantaṁ gāthāya ajjhabhāsi:|| ||

Kati chinde kati jahe kati cuttari bhāvaye,||
Kati saṅgātigo 'bhikkhu oghatiṇṇo' ti vuccatī ti:|| ||

(Bhagavā:)||
Pañca chinde pañca jahe pañca vuttari bhāvaye,||
Pañca saṅgātigo 'bhikkhu oghatiṇṇo' ti vuccatī ti.|| ||

 

---

 

Sutta 6

Jāgara Suttaṁ

[6.1][pts][bodh][upal] EVAṀ ME SUTAṀ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā ekam-antaṁ aṭṭhāsi.

Eka-m-antaṁ ṭhitā kho sā devatā Bhagavato santike imaṁ gāthaṁ abhāsi:|| ||

Kati jāgarataṁ suttā kati suttesu jāgarā,||
Katīhi rajam ādeti katīhi parisujjhatī ti.|| ||

(Bhagavā:)||
Pañca jāgarataṁ suttā pañca suttesu jāgarā,||
Pañcahi rajam ādeti pañcahi parisujjhatī ti.|| ||

 

---

[4]

Sutta 7

Appaṭividita Suttaṁ

[7.1][pts][bodh][upal][than] EVAṀ ME SUTAṀ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā ekam-antaṁ aṭṭhāsi.

Eka-m-antaṁ ṭhitā kho sā devatā Bhagavato santike imaṁ gāthaṁ abhāsi:|| ||

Yesaṁ dhammā appaṭividitā paravādesu nīyare,||
Suttā te na ppabujjhanti kālo tesaṁ pabujjhitun ti.|| ||

(Bhagavā:)||
Yesaṁ dhammā suppaṭi-viditā paravādesu na nīyare, Te sambuddhā samma'd'aññāya caranti visame saman ti.|| ||

 

---

 

Sutta 8

Susammuṭṭha Suttaṁ

[8.1][pts][bodh][upal][than] EVAṀ ME SUTAṀ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā ekam-antaṁ aṭṭhāsi.

Eka-m-antaṁ ṭhitā kho sā devatā Bhagavato santike imaṁ gāthaṁ abhāsi:|| ||

Yesaṁ dhammā susammuṭṭhā paravādesu nīyare,||
Suttā te na ppabujjhanti kālo tesaṁ pabujjhitun ti.|| ||

(Bhagavā:)||
Yesaṁ dhammā asammuṭṭhā paravādesu na nīyare,||
Te sambuddhā samma'd'aññāya caranti visame samaṁ ti.

 

---

 

Sutta 9

Namānakāma Suttaṁ

[9.1][pts][bodh][upal][wlsh] EVAṀ ME SUTAṀ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā ekam-antaṁ aṭṭhāsi.

Eka-m-antaṁ ṭhitā kho sā devatā Bhagavato santike imaṁ gāthaṁ abhāsi:|| ||

Na mānakāmassa damo idh'atthi||
na monam atthi asamāhitassa,||
Eko araññe viharaṁ pamatto||
na maccudheyyassa tareyya pāran ti.|| ||

(Bhagavā:)||
Mānaṁ pahāya susamāhitatto||
sucetaso sabbadhi vippamutto,||
Eko araññe viharaṁ appamatto||
sa maccudheyyassa tareyya pāran ti.|| ||

 

---

[5]

Sutta 10

Arañña Suttaṁ

[10.1][pts][than][bodh][upal][alvr] EVAṀ ME SUTAṀ.|| ||

Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaṁ Jetavanaṁ obhāsetvā yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā ekam-antaṁ aṭṭhāsi.

Eka-m-antaṁ ṭhitā kho sā devatā Bhagavantaṁ gāthāya ajjhabhāsi:|| ||

Araññe viharantānaṁ santānaṁ brahma-cārinaṁ,||
Ekabhattaṁ bhuñjamānānaṁ kena vaṇṇo pasīdatī ti.|| ||

(Bhagavā:)||
Atītaṁ nānusocanti na ppajappanti'nāgataṁ,||
Paccuppannena yāpenti tena vaṇṇo pasīdati.||
Anāgatappajappāya atītassānusocanā,||
Etena bālā sussanti naḷo va harito luto ti.|| ||

Na'avaggo paṭhamo