Saṁyutta Nikāya
5. Mahā-Vagga
45. Magga Saṁyutta
1. Avijjā Vagga

Sutta 3

Sāriputta Suttaṁ

 

---

[3]

[1][pts][bodh] Evam me sutaṁ:|| ||

Ekaṁ samayam Bhagavā Sakkesu viharati,||
nāgarakaṁ nāma Sakkānaṁ nigamo.|| ||

2. Atha kho āyasmā Sāriputto yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho āyasmā Sāriputto Bhagavantaṁ etad avoca:|| ||

"Sakalam ev'idaṁ bhante, Brahma-cariyaṁ||
yad idaṁ kalyāṇa-mittatā||
kalyāṇa-sahāyatā||
kalyāṇa-sampavaṅkatā" ti.|| ||

"Sādhu, sādhu Sāriputta.|| ||

Sakalam ev'idaṁ Sāriputta,||
Brahma-cariyaṁ||
yad idaṁ kalyāṇa-mittatā||
kalyāṇa-sahāyatā||
kalyāṇa-sampavaṅkatā.|| ||

Kalyāṇa-mittass'etaṁ Sāriputta,||
bhikkhuno pāṭikaṅkhaṁ||
kalyāṇa-sahāyassa||
kalyāṇa-sampavaṅkassa||
ariyaṁ aṭṭhaṅgikaṁ Maggaṁ bhāvessati||
ariyaṁ aṭṭhaṅgikaṁ Maggaṁ bahulī-karissati.|| ||

4. Kathañ ca Sāriputta, bhikkhu kalyāṇa-mitto||
kalyāṇa-sahāyo||
kalyāṇa-sampavaṅko||
ariyaṁ aṭṭhaṅgikaṁ Maggaṁ bhāveti,||
ariyaṁ aṭṭhaṅgikaṁ Maggaṁ bahulī-karoti?|| ||

Idha Sāriputta, bhikkhu||
sammā-diṭṭhiṁ bhāveti||
viveka-nissitaṁ||
virāga-nissitaṁ||
nirodha-nissitaṁ vossagga-pariṇāmiṁ;||
sammā-saṅkappaṁ bhāveti||
viveka-nissitaṁ||
virāga-nissitaṁ||
nirodha-nissitaṁ vossagga-pariṇāmiṁ;||
sammā-vācaṁ bhāveti||
viveka-nissitaṁ||
virāga-nissitaṁ||
nirodha-nissitaṁ vossagga-pariṇāmiṁ;||
sammā-kammantaṁ bhāveti||
viveka-nissitaṁ||
virāga-nissitaṁ||
nirodha-nissitaṁ vossagga-pariṇāmiṁ;||
sammā-ājīvaṁ bhāveti||
viveka-nissitaṁ||
virāga-nissitaṁ||
nirodha-nissitaṁ vossagga-pariṇāmiṁ;||
sammā-vāyāmaṁ bhāveti||
viveka-nissitaṁ||
virāga-nissitaṁ||
nirodha-nissitaṁ vossagga-pariṇāmiṁ;||
sammā-satiṁ bhāveti||
viveka-nissitaṁ||
virāga-nissitaṁ||
nirodha-nissitaṁ vossagga-pariṇāmiṁ;||
sammā-samādhiṁ bhāveti||
viveka-nissitaṁ||
virāga-nissitaṁ||
[4] nirodha-nissitaṁ vossagga-pariṇāmiṁ.|| ||

Evaṁ kho Sāriputta, bhikkhu kalyāṇa-mitto||
kalyāṇa-sahāyo||
kalyāṇa-sampaṅko||
ariyaṁ aṭṭhaṅgikaṁ Maggaṁ bhāveti||
ariyaṁ aṭṭhaṅgikaṁ Maggaṁ bahulī-karoti.|| ||

Tad aminā p'etaṁ Sāriputta, pariyāyena veditabbaṁ.|| ||

Yathā sakalam ev'idaṁ Brahma-cariyaṁ||
yad idaṁ kalyāṇa-mittatā||
kalyāṇa-sahāyatā||
kalyāṇa-sampavaṅkatā.|| ||

Mamaṁ hi Sāriputta, kalyāṇa-mittaṁ āgamma||
jāti-dhammā sattā jātiyā parimuccanti,||
jarā-dhammā sattā jarāya parimuccanti.|| ||

Maraṇa-dhammā sattā maraṇena parivuccanti,||
soka-parideva-dukkha-domanass'upāyā-sadhammā sattā||
soka-parideva-dukkha-domanass'upayāsehi parimuccanti.|| ||

Iminā kho etaṁ Sāriputta, pariyāyena veditabbaṁ.|| ||

Yathā sakalam ev'idaṁ Brahma-cariyaṁ||
yad idaṁ kalyāṇa-mittatā||
kalyāṇa-sahāyatā||
kalyāṇa-sampavaṅkatā" ti.|| ||