Majjhima Nikāya
III. Upari Paṇṇāsa
4. Vibhaṇga Vagga
Sutta 131
Bhadd'Eka-Ratta Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][chlm][pts][nana][ntbb][than][olds][upal] Evaṃ me sutaṃ:
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.||
Tatra kho Bhagavā bhikkhū āmantesi:||
'Bhikkhavo' ti.||
'Bhadante' ti te bhikkhū Bhagavato paccassosuṃ.||
Bhagavā etad avoca:|| ||
[2][pts][nana][ntbb][than] Bhaddekarattassa vo, bhikkhave, uddesañ ca vibhaṇgañ ca desissāmi. Taṃ suṇātha, sādhukaṃ manasi-karotha, bhāsissāmīti.|| ||
'Evaṃ bhante' ti kho bhikkhū Bhagavato paccassosuṃ.
[3][pts][nana][ntbb][than] Bhagavā etad avoca:|| ||
Atītaṃ nānvāgameyya||
nappaṭikaṇkhe anāgataṃ|| ||
Yadatītaṃ pahīnaṃ taṃ||
appattañ ca anāgataṃ|| ||
Paccuppannañca yo dhammaṃ||
tattha tattha vipassatī|| ||
Asaṃhīraṃ asaṇkuppaṃ||
taṃ viditvā manubrūhaye|| ||
Ajj'eva kiccaṃ ātappaṃ||
ko jaññā maraṇaṃ suve?|| ||
Na hi no saṇgāraṃ tena||
mahāsenena maccunā|| ||
Evaṃ vihāriṃ ātāpiṃ||
ahorattam atanditaṃ|| ||
Taṃ ve bhaddekaratto ti||
santo ācikkhate munī ti|| ||
[188] [4][pts][nana][ntbb][than] Kathañ ca bhikkhave, atītaṃ anvāgameti?|| ||
'Evaṃ rūpo ahosiṃ atītam addhānan' ti tattha nandiṃ samanvāneti;||
'evaṃ vedano ahosiṃ atītam addhānan' ti tattha nandiṃ samanvāneti;||
'evaṃ sañño ahosiṃ atītam addhānan' ti tattha nandiṃ samanvāneti;||
'evaṃ saṇkhāro ahosiṃ atītam addhānan' ti tattha nandiṃ samanvāneti;||
'evaṃ viññāṇo ahosiṃ atītam addhānan' ti tattha nandiṃ samanvāneti.|| ||
Evaṃ kho bhikkhave, atitaṃ anvāgameti.|| ||
[5][pts][nana][ntbb][than] Kathañ ca bhikkhave, atītaṃ nānvāgameti?|| ||
'Evaṃ rūpo ahosiṃ atītam addhānan' ti tattha nandiṃ na samanvāneti;||
'evaṃ vedano ahosiṃ atītam addhānan' ti tattha nandiṃ na samanvāneti;||
'evaṃ sañño ahosiṃ atītam addhānan' ti tattha nandiṃ na samanvāneti;||
'evaṃ saṇkhāro ahosiṃ atītam addhānan' ti tattha nandiṃ na samanvāneti;||
'evaṃ viññāṇo ahosiṃ atītam addhānan' ti tattha nandiṃ na samanvāneti.|| ||
Evaṃ kho bhikkhave, atītaṃ nānvāgameti.|| ||
[6][pts][nana][ntbb][than] Kathañ ca bhikkhave, anāgataṃ paṭikaṇkhati?|| ||
'Evaṃ rūpo siyaṃ anāgatam addhānan' ti tattha nandiṃ samanvāneti;||
'evaṃ vedano siyaṃ anāgatam addhānan' ti tattha nandiṃ samanvāneti;||
'evaṃ sañño siyaṃ anāgatam addhānan' ti tattha nandiṃ samanvāneti;||
'evaṃ saṇkhāro siyaṃ anāgatam addhānan' ti tattha nandiṃ samanvāneti;||
'evaṃ viññāṇo siyaṃ anāgatam addhānan' ti tattha nandiṃ samanvāneti.|| ||
Evaṃ kho bhikkhave, anāgataṃ paṭikaṇkhati.|| ||
[7][pts][nana][ntbb][than] Kathañ ca bhikkhave, anāgataṃ nappaṭikaṇkhati?|| ||
'Evaṃ rūpo siyaṃ anāgatam addhānan' ti tattha nandiṃ na samanvāneti;||
'evaṃ vedano siyaṃ anāgatam addhānan' ti tattha nandiṃ na samanvāneti;||
'evaṃ sañño siyaṃ anāgatam addhānan' ti tattha nandiṃ na samanvāneti;||
'evaṃ saṇkhāro siyaṃ anāgatam addhānan' ti tattha nandiṃ na samanvāneti;||
'evaṃ viññāṇo siyaṃ anāgatam addhānan' ti tattha nandiṃ na samanvāneti.|| ||
Evaṃ kho bhikkhave, anāgataṃ nappaṭikaṇkhati.|| ||
[8][pts][nana][ntbb][than] Kathañ ca bhikkhave, pacc'uppannesu dhammesu Saṇhīrati?|| ||
Idha, bhikkhave, a-s-sutavā puthujjano||
ariyānaṃ adassāvī||
ariya-Dhammassa akovido||
ariya-Dhamme avinīto||
sappurisānaṃ adassāvī||
sappurisa-Dhammassa akovido||
sappurisa-Dhamme avinīto||
rūpaṃ attato samanupassati,||
rūpavantaṃ vā attāṇaṃ,||
attani vā rūpaṃ,||
rūpasmiṃ vā attāṇaṃ;||
Vedanaṃ attato samanupassati,||
vedanā-vantaṃ vā attāṇaṃ,||
attani vā vedanaṃ,||
vedanāya vā attāṇaṃ;||
saññaṃ attato samanupassati,||
saññā-vantaṃ vā attāṇaṃ,||
attani vā saññaṃ,||
saññāya vā attāṇaṃ;||
saṇkhāre attato samanupassati,||
[189] saṇkhāra-vantaṃ vā attāṇaṃ,||
attani vā saṇkhāre,||
saṇkhāresu vā attāṇaṃ;||
viññāṇaṃ attato samanupassati||
viññāṇa-vantaṃ vā attāṇaṃ,||
attani vā viññāṇaṃ,||
viññāṇasmiṃ vā attāṇaṃ.
Evaṃ kho bhikkhave, pacc'uppannesu dhammesu Saṇhīrati.|| ||
[9][pts][nana][ntbb][than] Kathañ ca bhikkhave, pacc'uppannesu dhammesu na Saṇhīrati?
Idha, bhikkhave, sutavā ariya-sāvako ariyānaṃ dassāvi||
ariya-Dhammassa kovido||
ariya-Dhamme suvinīto||
sappurisānaṃ dassāvī||
sappurisa-Dhammassa||
kovido sappurisa-Dhamme suvinīto||
na rūpaṃ attato samanupassati,||
na rūpavantaṃ vā attāṇaṃ,||
na attani vā rūpaṃ,||
na rūpasmiṃ vā attāṇaṃ;||
na vedanaṃ attato samanupassati,||
vedanā-vantaṃ vā attāṇaṃ,||
na attani vā vedanaṃ,||
na vedanāya vā attāṇaṃ;||
na saññaṃ attato samanupassati,||
na saññā-vantaṃ vā attāṇaṃ,||
na attani vā saññaṃ,||
na saññāya vā attāṇaṃ;||
na saṇkhāre attato samanupassati,||
na saṇkhāra-vantaṃ vā attāṇaṃ,||
na attani vā saṇkhāre,||
na saṇkhāresu vā attāṇaṃ;||
na viññāṇaṃ attato samanupassati,||
na viññāṇa-vantaṃ vā attāṇaṃ,||
na attati vā na viññāṇaṃ,||
na viññāṇasmiṃ vā attāṇaṃ.|| ||
Evaṃ kho bhikkhave, pacc'uppannesu dhammesu na Saṇhīrati.|| ||
[10][pts][nana][ntbb][than] Atītaṃ nānvāgameyya||
nappaṭikaṇkhe anāgataṃ|| ||
Yadatītaṃ pahīnaṃ taṃ||
appattañ ca anāgataṃ|| ||
Paccuppannañca yo dhammaṃ||
tattha tattha vipassatī|| ||
Asaṃhīraṃ asaṇkuppaṃ||
taṃ viditvā manubrūhaye|| ||
Ajj'eva kiccaṃ ātappaṃ||
ko jaññā maraṇaṃ suve?|| ||
Na hi no saṇgāraṃ tena||
mahāsenena maccunā|| ||
Evaṃ vihāriṃ ātāpiṃ||
ahorattam atanditaṃ|| ||
'Taṃ ve bhaddekaratto' ti||
santo ācikkhate munīti|| ||
[11][pts][nana][ntbb][than] Bhaddekarattassa vo bhikkhave, uddesañ ca vibhaṇgañ ca desissā miti iti yaṃ taṃ vuttaṃ idametaṃ paṭicca vuttan" ti.|| ||
Idam avoca Bhagavā.|| ||
Attamanā te bhikkhū Bhagavato bhāsitaṃ "abhinandun" ti.|| ||
Bhadd'Eka-Ratta Suttaṃ
