Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Chakkanipata
V. Dhammika Vagga

Sutta 45

Iṇa suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts][than]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Dāliddiyaɱ bhikkhave dukkhaɱ lokasmiɱ kāmabhoginoti?|| ||

Evaɱ bhante.|| ||

(2) Yam pi bhikkhave da'iddo assako anā'hiyo iṇaɱ ādiyati.|| ||

Itādānampi bhikkhave dukkhaɱ lokasmiɱ kāmabhogino ti?|| ||

Evaɱ bhante.|| ||

(3) Yam pi bhikkhave da'iddo assako anā'hiyo iṇaɱ ādiyitvā vaḍḍhiɱ paṭisuṇāti.|| ||

Vaḍḍhipi bhikkhave dukkhā lokasmiɱ sāmabhoginoti?|| ||

Evaɱ bhante.|| ||

(4) Yam pi bhikkhave da'iddo assako anā'hiyo vaḍḍhiɱ paṭisuṇitvā kālābhataɱ vaḍḍhiɱ na deti.|| ||

Codentipi naɱ codanāpi bhikkhave dukkhā lokasmiɱ kāmabhoginoti?|| ||

Evaɱ bhante.|| ||

(5) Yam pi bhikkhave da'iddo assako anā'hiyo codiyamāno na deti.|| ||

Anucarantipi naɱ.|| ||

Anucariyāpi bhikkhave dukkhā lokasmiɱ kāmabhoginoti?|| ||

Evaɱ bhante.|| ||

(6) Yam pi bhikkhave da'iddo assako anā'hiyo anucariyamāno na deti.|| ||

Bandhantipi naɱ.|| ||

Bandhanampi bhikkhave dukkhaɱ lokasmiɱ kāmabhoginoti?|| ||

Evaɱ bhante.|| ||

Iti kho bhikkhave dā'iddiyampi dukkhaɱ lokasmiɱ kāmabhogino.|| ||

Iṇādānampi dukkhaɱ lokasmiɱ kāmabhogino.|| ||

Vaḍḍhīpi dukkhā lokasmiɱ kāmabhogino, codanāpi dukkhā lokasmiɱ kāmabhogino.|| ||

Anucariyāpi dukkhā lokasmiɱ kāmabhogino.|| ||

Bandhanampi dukkhaɱ lokasmiɱ kāmabhogino.|| ||

Evam eva kho bhikkhave yassa kassaci saddhā n'atthi kusalesu dhammesu, hiri n'atthi kusalesu dhammesu, ottappaɱ n'atthi kusalesu dhammesu, viriyaɱ n'atthi kusalesu dhammesu,||
paññā n'atthi kusalesu dhammesu,||
ayaɱ vuccati bhikkhave ariyassa vinaye da'iddo assako anā'hiyo.|| ||

Sa kho so bhikkhave dasiddo assako anā'hiyo,||
saddhāya asati kusalesu dhammesu,||
hiriyā asati kusalesu dhammesu,||
ottappe asati kusalesu dhammesu,||
viriye asati kusalesu dhammesu,||
paññāya asati kusalesu dhammesu,||
kāyena duccaritaɱ carati.|| ||

Vācāya duccaritaɱ carati.|| ||

Manasā duccaritaɱ carati.|| ||

Idamassa iṇādānasmiɱ vadāmi.|| ||

So tassa kāyanduccaritassa paṭicchādanahetu pāpikaɱ icchaɱ paṇidahati: mā maɱ jaññāti icchati,||
mā maɱ jaññāti saŋkappeti,||
mā maɱ jaññāti vācaɱ bhāsati,||
mā maɱ jaññāti kāyena parakkamati.|| ||

So tassa vacīduccaritassa paṭicchādanahetu pāpikaɱ icchaɱ paṇidahati: mā maɱ chaññāti icchati,||
mā maɱ jaññāti saŋkappeti,||
mā maɱ jaññāti vācaɱ bhāsati,||
mā maɱ jaññāti kāyena parakkamati.|| ||

So tassa manoduccaritassa paṭicchādanahetu pāpikaɱ icchaɱ paṇidahati: mā maɱ jaññāti icchati,||
mā maɱ jaññāti saŋkappeti,||
mā maɱ jaññāti vācaɱ bhāsati.|| ||

Mā maɱ jaññāti kāyena parakkamati.|| ||

Idamassa vaḍḍhiyā vadāmi.|| ||

Tamenaɱ pesalā sabrahmavārī evam āhaɱsu: " ayañ ca so āyasmā evaɱkārī evaɱ samācāro" ti.|| ||

Idamassa codanāya vadāmi.|| ||

Tamenaɱ araññagataɱ vā rukkhamūlagataɱ vā sūññāgāragataɱ vā vippaṭisārasahagatā pāpakā akusalavitakkā samudācaranti.|| ||

Idamassa anucariyāya vadāmi.|| ||

Sa kho so bhikkhave da'iddo assako anā'hiyo kāyena duccaritaɱ caritvā vācāya duccaritaɱ caritvā manasā duccaritaɱ caritvā kāyassa bhedā param maraṇā nirayabandhane vā bajjhati,||
tiracchānayonibandhane vā.|| ||

Nāhaɱ bhikkhave aññaɱ ekadhammampi samanupassāmi evaɱdāruṇaɱ emaɱ kaṭukaɱ evaɱ antarāyakaraɱ anuttarassa yogakkhemassa adigamāya yathayidaɱ bhikkhave nirayabandhanaɱ vā tiracchānayonibandhanaɱ vā, ti.|| ||

 

Dā'iddiyaɱ dukkhaɱ loke iṇādānaɱ ca vuccati,||
Da'iddo iṇamādāya bhuñjamāno vihaññati.|| ||

Tato anucarantī naɱ bandhanampi nigacchati.||
Etaɱ hi bandhanaɱ dukkhaɱ kāmalābhābhijappinaɱ.|| ||

Tatheva ariyavinaye saddhā yassa na vijjati,||
Ahiriko anottappi pāpakammāvinicchayo|| ||

Kāyaduccaritaɱ katvā vacīduccaritāni ca,||
Manoduccataɱ katvā mā maɱ jaññāti icchati.|| ||

So saɱsappati kāyena vācāya udacetasā,||
Pāpakammā pavaḍḍhento tattha tattha punappunaɱ|| ||

So pāpakammo dummedho jānaɱ dukkaṭamattano,||
Da'iddo iṇamādāya bhuñjamāno vihaññati,|| ||

Tato anucarantī naɱ saŋkappā mānasā dukhā,||
Gāme vā yadi vā raññe yassa vippaṭisārajā.|| ||

So pāpakammo dummedho jānaɱ dukkaṭamattano,||
Yonimañññataraɱ gantvā niraye cāpi bajjhati.||
Etaɱ hi bandhanaɱ dukkhaɱ yamhā dhīro pamuccati.|| ||

Dhammaladdhehi bhogehi dadaɱ cittaɱ pasādayaɱ||
Ubhayattha kaṭaggāho saddhassa gharamesino.|| ||

Diṭṭhadhammahitatthāya samparāya sukhāya ca||
evam etaɱ gahaṭṭhānaɱ cāgo puññaɱ pavaḍḍhati.|| ||

Tatheva ariyavinaye saddhā yassa patiṭṭhitā||
Hirimano ca ottappī paññavā sīlasaɱvuto.|| ||

Eso kho ariyavinaye sukhaɱjīvīti1 vuccati||
Nirāmisaɱ sukhaɱ laddhā upekhaɱ adhitiṭṭati.|| ||

Pañcanīvaraṇe hitvā niccaɱ āraddhavīriyo||
Jhānāni upasampajja ekodi nipako sato.|| ||

Evaɱ ñatvā yathābhūtaɱ sabbasaññojanakkhaye||
Sabbaso anupādāya sammācittaɱ vimuccati.|| ||

Tassa sammā vimuttassa ñāṇaɱ ca hoti tādino||
Akuppā me vimuttīti bhavasaññojanakkhaye.|| ||

Etaɱ kho paramaɱ ñāṇaɱ etaɱ sukhamanuttaraɱ||
Asokaɱ virajaɱ khemaɱ etamānaṇyamuttamanti.|| ||

 


Contact:
E-mail
Copyright Statement   Webmaster's Page