Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
2. Bhikkhu Vagga

Sutta 69

Gulissāni Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ:

Ekaɱ samayaɱ Bhagavā Rājagahe viharati Veluvane Kalandakanivāpe.|| ||

Tena kho pana samayena Gulissāni nāma bhikkhu āraññako padarasamācāro saŋghamajjhe osaṭo hoti kenacid-eva karaṇīyena.|| ||

Tatra kho āyasmā Sāriputto gulissāniɱ bhikkhuɱ ārabbha bhikkhū āmantesi.|| ||

"Āraññakena h'āvuso bhikkhunā saŋghagatena saŋghe viharantena sabrahmacārīsu sagāravena bhavitabbaɱ sappatissena.|| ||

Sace āvuso āraññako bhikkhu saŋghagato saŋghe viharanto sabrahmacārīsu agāravo hoti appatisso.|| ||

Tassa bhavanti vattāro:|| ||

'Kim pan'imass'āyasmat āraññakassa ekassāraññe serivihārena,||
yo ayamāyasmā sabrahmacārīsu agāravo appatisso'tissa bhavanti vattāro.|| ||

Tasmā āraññakena bhikkhunā saŋghagatena saŋghe viharantena sabrahmacārīsu sagāravena bhavitabbaɱ sappatissena.|| ||

Āraññakena h'āvuso bhikkhunā saŋghagatena saŋghe viharantena āsanakusalena bhavitabbaɱ 'Iti there ca bhikkhū nānupakhajja nisīdissāmi.|| ||

Nave ca bhikkhū na āsanena paṭibāhissāmī' ti.|| ||

Sace āvuso āraññako bhikkhu saŋghagato saŋghe viharanto na āsanakusalo hoti.|| ||

Tassa bhavanti vattāro:|| ||

Kim pan'imass'āyasmat āraññakassa ekassāraññe serivihārena,||
yo ayamāyasmā ābhisamācārikampi dhammaɱ na jānātī'tissa bhavanti vattāro.|| ||

Tasmā āraññakena bhikkhunā saŋghagatena saŋghe viharantena āsanakusalena bhavitabbaɱ.|| ||

Āraññakena h'āvuso bhikkhunā saŋghagatena saŋghe viharantena nātikālena gāmo pavisitabbo.|| ||

Nāti divā paṭikkamitabbaɱ.|| ||

Sace āvuso āraññako bhikkhu saŋghagato saŋghe viharanto atikālena gāmaɱ pavisati,||
atidivā7 paṭikkamati.|| ||

Tassa bhavanti vattāro.|| ||

Kim pan'imass'āyasmat āraññakassa ekassāraññe serivihārena,||
yo ayamāyasmā atikālena gāmaɱ pavisati,||
atidivā paṭikkamatī'tissa6 bhavanti vattāro.|| ||

Tasmā āraññakena bhikkhunā saŋghagatena saŋghe viharantena nātikālena gāmo pavisitabbo.|| ||

Nāti divā paṭikkamitabbaɱ.|| ||

Āraññakena h'āvuso bhikkhunā saŋghagatena saŋghe viharantena na purebhattaɱ [470] pacchābhattaɱ kulesu cārittaɱ āpajjitabbaɱ.|| ||

Sace āvuso āraññako bhikkhu saŋghagato saŋghe viharanto purebhattaɱ pacchābhattaɱ kulesu cārittaɱ āpajjati,||
tassa bhavanti vattāro:||
ayannūnimassāyasmato āraññakassa ekassāraññe serivihārena viharato vikālacariyā bahulīkatā,||
tam enaɱ saŋghagatampi samudācaratī'tissa bhavanti vattāro.|| ||

Tasmā āraññakena bhikkhunā saŋghagatena saŋghe viharantena na purebhattaɱ pacchābhattaɱ kulesu cārittaɱ āpajjitabbaɱ.|| ||

Āraññakena h'āvuso bhikkhunā saŋghagatena saŋghe viharantena anuddhatena bhavitabbaɱ acapalena.|| ||

Sace āvuso āraññako bhikkhu saŋghagato saŋghe viharanto uddhato hoti.|| ||

Capalo tassa bhavanti vattāro:|| ||

'Idannūnimassāyasmato āraññakassa ekassāraññe serivihārena viharato uddhaccaɱ cāpalyaɱ bahulīkataɱ,||
tam enaɱ saŋghagatam pi samudācaratī'tissa bhavanti vattāro.|| ||

Tasmā āraññakena bhikkhunā saŋghagatena saŋghe viharantena anuddhatena bhavitabbaɱ acapalena.|| ||

Āraññakena h'āvuso bhikkhunā saŋghagatena saŋghe viharantena amukharena bhavitabbaɱ avikiṇṇavācena.|| ||

Sace āvuso āraññako bhikkhu saŋghagato saŋghe viharanto mukharo hotivikiṇṇavāco.|| ||

Tassa bhavanti vattāro:|| ||

'Kam pan'imass'āyasmato āraññakassa ekassāraññe serivihārena,||
yo ayamāyasmā mukharo vikiṇṇavāco'tissa bhavanti vattāro.|| ||

Tasmā āraññakena bhikkhunā saŋghagatena saŋghe viharantena amukharena bhavitabbaɱ avikiṇṇavācena.|| ||

Āraññakena h'āvuso bhikkhunā saŋghagatena saŋghe viharantena subbacena bhavitabbaɱ kalyāṇamittena.|| ||

Sace āvuso āraññako bhikkhu saŋghagato saŋghe viharanto dubbaco hoti pāpamitto|| ||

Tassa bhavanti vattāro:|| ||

'Kim pan'imass'āyasmato āraññakassa ekassāraññe serivihārena.|| ||

Yo ayamāyasmā dubbaco pāpamitto tissa bhavanti vattāro.|| ||

Tasmā āraññakena bhikkhunā saŋghagatena saŋghe viharantena subbacena bhavitabbaɱ kalyāṇamittena.|| ||

Āraññakena h'āvuso bhikkhunā indriyesu guttadvārena bhavitabbaɱ.|| ||

Sace āvuso āraññako bhikkhu indriyesu aguttadvāro hoti.|| ||

Tassa bhavanti vattāro:|| ||

'Kim pan'imass'āyasmato āraññakassa ekassāraññe serivihārena,||
yo ayamāyasmā [471] indriyesu aguttadvāro'tissa bhavanti vattāro.|| ||

Tasmā āraññakena bhikkhunā indriyesu guttadvārena bhavitabbaɱ.|| ||

Āraññakena h'āvuso bhikkhunā bhojane mattaññunā bhavitabbaɱ.|| ||

Sace āvuso āraññako bhikkhu bhojane amattaññū hoti.|| ||

Tassa bhavanti vattāro:|| ||

'Kim pan'imass'āyasmato āraññakassa ekassāraññe serivihārena,||
yo ayamāyasmā bhojane amattaññū' tissa bhavanti vattāro.|| ||

Tasmā āraññakena bhikkhunā bhojane mattaññunā bhavitabbaɱ.|| ||

Āraññakena h'āvuso bhikkhunā jāgariyaɱ anuyuttena bhavitabbaɱ.|| ||

Sace āvuso āraññako bhikkhu jāgariyaɱ ananuyutto hoti.|| ||

Tassa bhavanti vattāro:|| ||

'Kim pan'imass'āyasmato āraññakassa ekassāraññe serivihārena,||
yo ayamāyasmā jāgariyaɱ ananuyuttotissa bhavanti vattāro.|| ||

Tasmā āraññakena bhikkhunā jāgariyaɱ anuyuttena bhavitabbaɱ.|| ||

Āraññakena h'āvuso bhikkhunā āraddhaviriyena bhavitabbaɱ.|| ||

Sace āvuso āraññako bhikkhu kusīto hoti.|| ||

Tassa bhavanti vattāro:|| ||

'Kim pan'imass'āyasmato āraññakassa ekassāraññe serivihārena,||
yo ayamāyasmā kusīto'tissa bhavanti vattāro.|| ||

Tasmā āraññakena bhikkhunā āraddhaviriyena bhavitabbaɱ.|| ||

Āraññakena h'āvuso bhikkhunā upaṭṭhitasatinā bhavitabbaɱ.|| ||

Sace āvuso āraññako bhikkhu muṭṭhassatī hoti.|| ||

Tassa bhavanti vattāro:|| ||

'Kim pan'imass'āyasmato āraññakassa ekassāraññe serivihārena,||
yo ayamāyasmā muṭṭhassatī' tissa bhavanti vattāro.|| ||

Tasmā āraññakena bhikkhunā upaṭṭhitasatinā bhavitabbaɱ.|| ||

Āraññakena h'āvuso bhikkhunā samāhitena bhavitabbaɱ.|| ||

Sace āvuso āraññako bhikkhu asamāhito hoti.|| ||

Tassa bhavanti vattāro:|| ||

'Kim pan'imass'āyasmato āraññakassa ekassāraññe serivihārena,||
yo ayamāyasmā asamāhito'tissa bhavanti vattāro.|| ||

Tasmā āraññakena bhikkhunā samāhitena bhavitabbaɱ.|| ||

Āraññakena h'āvuso bhikkhunā paññavatā bhavitabbaɱ.|| ||

Sace āvuso āraññako bhikkhu duppañño hoti.|| ||

Tassa bhavanti [472] vattāro:|| ||

'Kim panimassāyasmato āraññakassa ekassāraññe serivihārena,||
yo ayamāyasmā duppañño'tissa bhavanti vattāro.|| ||

Tasmā āraññakena bhikkhunā paññavatā bhavitabbaɱ.|| ||

Āraññakena h'āvuso bhikkhunā abhidhamme abhivinaye yogo karaṇīyo.|| ||

Santāvuso āraññakaɱ bhikkhuɱ abhidhamme abhivinaye pañhaɱ pucchitāro.|| ||

Sace āvuso āraññako bhikkhu abhidhamme abhivinaye pañhaɱ puṭṭho na sampāyati.|| ||

Tassa bhavanti vattāro:|| ||

'Kim pan'imass'āyasmato āraññakassa ekassāraññe serivihārena,||
yo ayamāyasmā abhidhamme abhivinaye pañhaɱ puṭṭho na sampāyatī'tissa bhavanti vattāro.|| ||

Tasmā āraññakena bhikkhunā abhidhamme abhivinaye yogo karaṇīyo|| ||

Āraññakena h'āvuso bhikkhunā ye te santā vimokkhā atikkamma rūpe āruppā,||
tattha yogo karaṇīyo.|| ||

Santāvuso āraññakaɱ bhikkhuɱ ye te santā vimokkhā atikkamma rūpe āruppā,||
tattha pañhaɱ pucchitāro.|| ||

Sace āvuso āraññako bhikkhu ye te santā vimokkhā atikkamma rūpe āruppā tattha pañhaɱ puṭṭho na sampāyati.|| ||

Tassa bhavanti vattāro:|| ||

'Kim pan'imass'āyasmato āraññakassa ekassāraññe serivihārena,||
yo ayamāyasmā ye te santā vimokkhā atikkamma rūpe āruppā,||
tattha pañhaɱ puṭṭho na sampāyatī'tissa bhavanti vattāro.|| ||

Tasmā āraññakena bhikkhunā ye te santā vimokkhā atikkamma rūpe āruppā,||
tattha yogo karaṇīyo.|| ||

Āraññakena hāvuso bhikkhunā uttarimanussadhamme yogo karaṇīyo.|| ||

Santāvuso āraññakaɱ bhikkhuɱ uttarimanussadhamme pañhaɱ pucchitāro.|| ||

Sace āvuso āraññako bhikkhu uttarimanussadhamme pañhaɱ puṭṭho na sampāyati.|| ||

Tassa bhavanti vattāro:|| ||

'Kim pan'imass'āyasmato āraññakassa ekassāraññe serivihārena,||
yo ayamāyasmā yassatthāya pabbajito tamatthaɱ na jānātī'tissa bhavanti vattāro.|| ||

Tasmā āraññakena bhikkhunā uttarimanussadhamme yogo karaṇīyoti.|| ||

Evaɱ vutte āyasmā Mahā Moggallāno āyasmantaɱ Sāriputtaɱ etad avoca:|| ||

"Āraññaken'eva nu kho āvuso Sāriputta bhikkhunā ime dhammā samādāya vattitabbā udāhu [473] gāmantavihārinā pī" ti?|| ||

"Āraññakenā pi kho āvuso Moggallāna bhikkhunā ime dhammā samādāya vattitabbā||
pageva gāmantavihārinā" ti.|| ||

Gulissāni suttaɱ navamaɱ


Contact:
E-mail
Copyright Statement   Webmaster's Page