Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 


Saɱyutta Nikaya:
Sagathavagga:

Bhikkhūnī Saɱyutta

Suttas 1-10

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

Sutta 1

Āḷavikā Suttaɱ

[1.1][pts][ati][bps] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Āḷavika bhikkhūnī pubbaṇhasamayaɱ nivāsetvā pattacīvaram ādāya Sāvatthiɱ piṇḍāya pāvisi.|| ||

Sāvatthiyaɱ piṇḍāya caritvā pacchābhattaɱ piṇḍapātapaṭikkantā yena Andhavanaɱ ten'upasaŋkami vivekatthinī.|| ||

3. Atha kho Māro pāpimā Āḷavikaya bhikkhūniyā bhayaɱ chambhitattaɱ lomahaɱsaɱ uppādetukāmo vivekamhā cāvetukāmo yena Āḷavika bhikkhunī ten'upasaŋkami.|| ||

Upasaŋkamitvā Āḷavikaɱ bhikkhuniɱ gāthāya ajjhabhāsi:|| ||

N'atthi nissaraṇaɱ loke kiɱ vivekena kāhasi,||
Bhuñjassu kāmāratiyo mā'hu pacchānutāpinī ti.|| ||

4. Atha kho Āḷavikaya bhikkhuniyā etad ahosi:|| ||

'Ko nu khvāyaɱ manusso vā amanusso vā gāthaɱ bhāsatī' ti?|| ||

5. Atha kho Āḷavikaya bhikkhuniyā etad ahosi:|| ||

'Māro kho ayaɱ pāpimā mama bhayaɱ chamhitattaɱ lomahaɱsaɱ uppādetukāmo vivekamhā cāvetukāmo gāthaɱ bhāsatī' ti.|| ||

6. Atha kho Āḷavika bhikkhunī Māro ayaɱ pāpimā iti viditvā Māraɱ pāpimantaɱ gāthāya paccabhāsi.|| ||

Atthi nissaraṇaɱ loke paññāya me suphassitaɱ,||
Pamattabandhu pāpima na tvaɱ jānāsi taɱ padaɱ.||
Sattisulūpamā kāmā khandhāsaɱ adhikuṭṭanā,||
Yaɱ tvaɱ kāmāratiɱ brūsi arati mayhaɱ sā ahū ti.|| ||

Atha kho Māro pāpimā jānāti maɱ Āḷavika bhikkhunī ti dukkhī dummano tatth'ev'antaradhāyī ti.|| ||

 

§

 

Sutta 2

Somā Suttaɱ

[2.1][pts][ati][bps][ati-olen] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Somā bhikkhunī pubbaṇhasamayaɱ nivāsetvā pattacīvaram ādāya Sāvatthiɱ piṇḍāya pāvisi.|| ||

2. Sāvatthiyaɱ piṇḍāya caritvā pacchābhattaɱ piṇḍapātapaṭikkantā yena andhavanaɱ ten'upasaŋkami divāvihārāya.|| ||

Andhavanaɱ ajjhogahetvā aññatarasmiɱ rukkhamūle divāvihāraɱ nisīdi.|| ||

3. Atha kho Māro pāpimā Somāya bhikkhuniyā bhayaɱ chamhitattaɱ lomahaɱsaɱ uppādetukāmo samādhimhā cāvetukāmo yena Somā bhikkhunī ten'upasaŋmi.|| ||

Upasaŋkamitvā somaɱ bhikkhuniɱ gāthāya ajjhabhāsi:|| ||

Yan taɱ isīhi pattabbaɱ ṭhānaɱ durabhisambhavaɱ,||
Na taɱ dvaŋgulapaññāya sakkā pappotum itthiyā ti.|| ||

4. Atha kho Somāya bhikkhuniyā etad ahosi:|| ||

'Ko nu khvāyaɱ manusso vā amanusso vā gāthaɱ bhāsatī' ti.|| ||

5. Atha kho Somāya bhikkhuniyā etad ahosi:|| ||

'Māro kho ayaɱ pāpimā mama bhayaɱ chambhitattaɱ lomahaɱsaɱ uppādetukāmo samādhimhā cāvetukāmo gāthaɱ bhāsatī' ti.|| ||

6. Atha kho Somā bhikkhunī Māro ayaɱ pāpimā iti viditvā Māraɱ pāpimantaɱ gāthāhi ajjhabhāsi:|| ||

Itthibhāvo kiɱ kayirā cittamhi susamāhite,||
ñāṇamhi vattamānamhi sammā dhammaɱ vipassato.||
Yassa nūna siyā evaɱ itthāhaɱ puriso ti vā,||
Kiñci vā pana asmī ti taɱ Māro vattu Māra arahatī ti.|| ||

7. Atha kho Māro pāpimā jānāti maɱ Somā bhikkhunī ti dukkhī dummano tatth'ev'antaradhāyī ti.|| ||

 

§

 

Sutta 3

Kisā-Gotamī Suttaɱ

[3.1][pts][ati][bps]Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Kisā Gotamī bhikkhunī pubbaṇhasamayaɱ nivāsetvā pattacīvaramādāya Sāvatthiɱ piṇḍāya pāvisi.|| ||

2. Sāvatthiyaɱ piṇḍāya caritvā pacchābhattaɱ piṇḍapātapaṭikkantā yena Andhavanaɱ ten'upasaŋkami divāvihārāya.|| ||

Andhavanaɱ ajjhogahetvā aññatarasmiɱ rukkhamūle divāvihāraɱ nisīdi.|| ||

3. Atha kho Māro pāpimā Kisā-Gotamiyā bhikkhuniyā bhayaɱ chamhitattaɱ lomahaɱsaɱ uppādetukāmo samādhimhā cāvetukāmo yena Kisā-Gotamī bhikkhunī ten'upasaŋkami.|| ||

Upasaŋkamitvā Kisā-Gotamiɱ bhikkhuniɱ gāthāya ajjhabhāsi:|| ||

Kiɱ nu tvaɱ hataputtā va eka'm'āsi rudammukhī,||
Vanam ajjhagatā ekā purisaɱ nu gavesasī ti.|| ||

4. Atha kho Kisā-Gotamiyā bhikkhuniyā etad ahosi:|| ||

Ko nu khvāyaɱ manusso vā amanussā vā gāthaɱ bhāsatī ti.|| ||

5. Atha kho Kisā-Gotamiyā bhikkhuniyā etad ahosi:|| ||

Māro kho ayaɱ pāpimā mama bhayaɱ chamhitattaɱ lomahaɱsaɱ uppādetukāmo samādhimhā cāvetukāmo gāthaɱ bhāsatī ti.|| ||

6. Atha kho Kisā-Gotamī bhikkhunī Māro kho ayaɱ pāpimā iti viditvā Māraɱ pāpimantaɱ gāthāhi paccabhāsi:|| ||

Accantaɱ ataputtā'mhi purisā etadantikā,||
Na socāmi na rodāmi na taɱ bhāyāmi āvuso.||
Sabbattha vihatā nandi tamokkhandho padālito,||
Jetvāna maccuno senaɱ viharāmi anāsavā ti.|| ||

7. Atha kho Māro pāpimā jānātī maɱ kisāGotamī bhikkhunīti dukkhī dummato tatth'ev'antaradhāyī ti.|| ||

 

§

 

Sutta 4

Vijayā Suttaɱ

[4.1][pts][ati][bps] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Vijayā bhikkhunī pubbaṇhasamayaɱ nivāsetvā pattacīvaramādāya Sāvatthiɱ piṇḍāya pāvisi.|| ||

Sāvatthiyaɱ piṇḍāya caritvā pacchābhattaɱ piṇḍapātapaṭikkantā yena andhavanaɱ ten'upasaŋkami divāvihārāya.|| ||

Andhavanaɱ ajjhogahetvā aññatarasmiɱ rukkhamūle divāvihāraɱ nisīdi.|| ||

2. Atha kho Māro pāpimā Vijayā bhikkhuniyā bhayaɱ chamhitattaɱ lomahaɱsaɱ uppādetukāmo samādhimhā cāvetukāmo yena vijayā bhikkhunī ten'upasaŋkami.

Upasaŋkamitvā vijayaɱ bhikkhuniɱ gāthāya ajjhabhāsi:|| ||

Daharā tvaɱ rūpavatī ahañ ca daharo susu,||
Pañcaŋgikena turiyena eh'ayye'bhiramāmase ti.|| ||

3. Atha kho Vijayāya bhikkhuniyā etad ahosi:|| ||

Ko nu kho ayaɱ manusso vā amanussā vā gāthaɱ bhāsatī ti.|| ||

4. Atha kho Vijayāya bhikkhuniyā etad ahosi:|| ||

Māro ayaɱ pāpimā mama bhayaɱ chambhitattaɱ lomahaɱsaɱ uppādetukāmo samādhimhā cāvetukāmo gāthaɱ bhāsatī ti.|| ||

5. Atha kho Vijayā bhikkhunī Māro ayaɱ pāpimā iti viditvā Māraɱ pāpimantaɱ gāthāhi paccabhāsi:|| ||

Rūpā saddā rasā gandhā phoṭṭhabbā ca manoramā,||
Niyyātayāmi tumh'eva Māra nā hi tena atthikā.||
Iminā pūtikāyena bhindanena pabhaŋgunā,||
Aṭṭīyāmi harāyāmi kāmataṇhā samūhatā,||
Ye ca rūpūpagā sattā ye ca āruppaṭhāyino,||
Yā ca santā samāpatti sabbattha vihato tamo ti.|| ||

Atha kho Māro pāpimā jānāti maɱ vijayā bhikkhunī ti dukkhī dummano tatth'ev'antaradhāyī ti.|| ||

 

§

 

Sutta 5

Uppalavaṇṇā Suttaɱ

[5.1][pts][ati][bps] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Uppalavaṇṇā bhikkhunī pubbaṇhasamayaɱ nivāsetvā pattacīvaramādāya Sāvatthiɱ piṇḍāya pāvisi.|| ||

Sāvatthiyaɱ piṇḍāya caritvā pacchābhattaɱ piṇḍapātapaṭikkantā yena Andhavanaɱ ten'upasaŋkami divāvihārāya.|| ||

Andhavanaɱ ajjhogahetvā aññatarasmiɱ supupphitasālarukkhamūle aṭṭhāsi.|| ||

2. Atha kho Māro pāpimā Uppalavaṇṇāya bhikkhuniyā bhayaɱ chambhitattaɱ lomahaɱsaɱ uppādetukāmo samādhimhā cāvetukāmo yena Uppalavaṇṇā bhikkhunī ten'upasaŋkami.|| ||

3. Upasaŋkamitvā Uppalavaṇṇaɱ bhikkhuniɱ gāthāya ajjhabhāsi:|| ||

Supupphitaggaɱ upagamma bhikkhunī||
ekā tvaɱ tiṭṭhasi sālamūle,||
Na c'atthi te dutiyā vaṇṇadhātu||
idhāgatā tādisikā bhaveyyuɱ||
Bāle na tvaɱ bhāyasi dhuttakānan ti.|| ||

4. Atha kho uppalavaṇṇāya bhikkhuniyā etad ahosi:|| ||

Ko nu khvāyaɱ manusso vā amanussā vā gāthaɱ bhāsatī ti.|| ||

5. Atha kho Uppalavaṇṇāya bhikkhuniyā etad ahosi:|| ||

Māro ayaɱ pāpimā mama bhayaɱ chambhitattaɱ lomahaɱsaɱ uppādetukāmo samādhimhā cāvetukāmo gāthaɱ bhāsatī ti.|| ||

6. Atha kho Uppalavaṇṇā bhikkhunī Māro ayaɱ pāpimā iti viditvā Māraɱ pāpimantaɱ gāthāhi paccabhāsi:|| ||

Sataɱ sahassāna pi dhuttakānaɱ||
Idhāgatā tādisikā bhaveyyuɱ,||
Lomaɱ na iñjāmi na santasāmi||
Na Māra bhāyāmi tam ekikā pi.||
Esā antaradhāyāmi kucchiɱ vā pavisāmi te,||
Pakhumantarikāyam pi tiṭṭhantiɱ maɱ na dakkhasi.||
Cittasmiɱ vasībhūtā'mhi iddhipādā subhāvitā,||
Sabbabandhanamuttā'mhi na taɱ bhāyāmi āvuso ti.|| ||

7. Atha kho Māro pāpimā jānāti maɱ uppalavaṇṇā bhikkhunīti dukkhī dummano tatthevantaradhāyīti.|| ||

 

§

 

Sutta 6

Cālā Suttaɱ

[6.1][pts][ati][bps] [128] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Cālā bhikkhunī pubbaṇhasamayaɱ nivāsetvā pattacīvaramādāya Sāvatthiɱ piṇḍāya pāvisi.|| ||

Sāvatthiyaɱ piṇḍāya caritvā pacchābhattaɱ piṇḍapātapaṭikkantā yena andhavanaɱ ten'upasaŋkami divāvihārāya.|| ||

Andhavanaɱ ajjhogahetvā aññatarasmiɱ rukkhamūle divāvihāraɱ nisīdi.|| ||

2. Atha kho Māro pāpimā yena Cālā bhikkhunī ten'upasaŋkami.|| ||

Upasaŋkamitvā Cālaɱ bhikkhuniɱ etad avoca:|| ||

Kiɱ nu tvaɱ bhikkhunī na rocesī ti?|| ||

(Cālābhikkhunī:)|| ||

Jātiɱ khvāhaɱ āvuso na rocemī ti.|| ||

(Māro:)|| ||

Kiɱ nu tvaɱ jātiɱ na rocesi||
jāto kāmāni bhūñjati.|| ||

Ko nu taɱ idam ādapayi jātiɱ mā rocesi bhikkhunī ti.|| ||

3. (Cālābhikkhunī:)|| ||

Jātassa Māraṇaɱ hoti jāto dukkhāni passati,||
Bandhaɱ vadhaɱ pariklesaɱ tasmā jātiɱ na rocaye.||
Buddho dhammam adesesi jātiyā samatikkamaɱ,||
Sabbadukkhappahāṇāya so maɱ sacce nivesayi.||
Ye ca rūpūpagā sattā ye ca āruppaṭṭhāyino,||
Nirodhaɱ appajānantā āgantāro punabbhavan ti.|| ||

4. Atha kho Māro pāpimā jānāti maɱ Cālā bhikkhunī ti dukkhī dummano tatth'ev'antaradhāyī ti.|| ||

 

§

 

Sutta 7

Upacālā Suttaɱ

[7.1][pts][ati][bps]Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Atha kho Upacālā bhikkhunī pubbaṇhasamayaɱ nivāsetvā pattacīvaramādāya Sāvatthiɱ piṇḍāya pāvisi.|| ||

Sāvatthiyaɱ piṇḍāya caritvā pacchābhattaɱ piṇḍapātapaṭikkantā yena Andhavanaɱ ten'upasaŋkami divāvihārāya.|| ||

Andhavanaɱ ajjhogahetvā aññatarasmiɱ rukkhamūle divāvihāraɱ nisīdi.|| ||

3. Atha kho Māro pāpimā yena Upacālā bhikkhunī ten'upasaŋkami.|| ||

Upasaŋkamitvā upacālaɱ bhikkhuniɱ etad avoca:|| ||

Kattha nu tvaɱ bhikkhunī uppajjitukāmā ti?|| ||

(Upacālā:)|| ||

Na khvāhaɱ āvuso katthaci uppajjitukāmāti.|| ||

4. (Māro:)|| ||

Tāvatiɱsā ca Yāmā ca Tusitā cāpi devatā,||
Nimmāṇaratino devā ye devā Vasavattino,||
Tattha cittaɱ paṇidhehi ratiɱ paccanubhossasī ti.|| ||

5. (Upacālā:)|| ||

Tāvatiɱsā ca Yāmā ca Tusitā cāpi devatā,||
Nimmāṇaratino devā ye devā Vasavattino,||
Kāmabandhanabaddhā te enti māravasaɱ puna.||
Sabbo ādipito loko sabbo loko padhūpito,||
Sabbo pajjalito loko sabbo loko pakampito,||
Akampitaɱ acalitaɱ aputhujjanasevitaɱ,||
Agati yattha Mārassa tattha me nirato mano ti.|| ||

Atha kho Māro pāpimā jānāti maɱ Upacālā bhikkhunīti dukkhī dummano tatth'ev'antaradhāyī ti.|| ||

 

§

 

Sutta 8

Sīsūpacālā Suttaɱ

[8.1][pts][ati][bps] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Sīsūpacālā bhikkhunī pubbaṇhasamayaɱ nivāsetvā pattacīvaramādāya Sāvatthiɱ piṇḍāya pāvisi.|| ||

Sāvatthiyaɱ piṇḍāya caritvā pacchābhattaɱ piṇḍapātapaṭikkantā yena Andhavanaɱ ten'upasaŋkami divāvihārāya.|| ||

Andhavanaɱ ajjhogahetvā aññatarasmiɱ rukkhamūle divāvihāraɱ nisīdi.|| ||

2. Atha kho Māro pāpimā Sīsūpacālā bhikkhunī ten'upasaŋkami.|| ||

Upasaŋkamitvā sīsūpacālaɱ bhikkhuniɱ etad avoca:|| ||

Kassa nu tvaɱ bhikkhunī pāsaṇḍaɱ rocesī ti?|| ||

3. (Sīsūpacālā:)|| ||

Na khvāhaɱ āvuso kassaci pāsaṇḍaɱ rocemi ti,|| ||

4. (Māro:)|| ||

Kiɱ nu uddissa muṇḍā'si samaṇī viya dissasi,||
Na ca rocesi pāsaṇḍaɱ kim iva carasi momuhā ti.|| ||

5. (Sisūpacālā:)|| ||

Ito bahiddhā pāsaṇḍā diṭṭhīsu pasīdanti ye,||
Na tesaɱ dhammaɱ rocemi na te Dhammassa kovidā.||
Atthi Sakyakule jāto Buddho appaṭipuggalo,||
Sabbābhibhū māranudo sabbattham aparājito,||
Sabbattha mutto asito sabbaɱ passati cakkhumā.||
Sabbakammakkhayaɱ patto vimutto upadisaŋkhaye,||
So mayhaɱ Bhagavā satthā tassa rocemi sāsanan ti.|| ||

Atha kho Māro pāpimā jānāti maɱ Sīsūpacālā bhikkhunīti dukkhī dummano tatth'ev'antaradhāyī ti.|| ||

 

§

 

Sutta 9

Selā Suttaɱ

[9.1][pts][ati][bps] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Selā bhikkhunī pubbaṇhasamayaɱ nivāsetvā pattacīvaramādāya Sāvatthiɱ piṇḍāya pāvisi.|| ||

Sāvatthiyaɱ piṇḍāya caritvā pacchābhattaɱ piṇḍapātapaṭikkantā yena Andhavanaɱ ten'upasaŋkami divāvihārāya.|| ||

Andhavanaɱ ajjhogahetvā aññatarasmiɱ rukkhamūle divāvihāraɱ nisīdi.|| ||

2. Atha kho Māro pāpimā selāya bhikkhuniyā bhayaɱ chambhitattaɱ lomahaɱsaɱ uppādetukāmo samādhimhā cāvetukāmo yena selā bhikkhunī ten'upasaŋkami.|| ||

Upasaŋkamitvā selaɱ bhikkhūniɱ gāthāya ajjhabhāsi:|| ||

Ken idaɱ pakataɱ bimbaɱ kvan nu bimbassa kārako,||
Kvaɱ ca bimbaɱ samuppannaɱ kvaɱ nu bimbaɱ nirujjhatī ti.|| ||

3. Atha kho Selāya bhikkhuniyā etad ahosi:|| ||

Ko nu khvāyaɱ manusso vā amanussā vā gāthaɱ bhāsatī ti.|| ||

4. Atha kho Selāya bhikkhuniyā etad ahosi:|| ||

Māro kho ayaɱ pāpimā mama bhayaɱ chambhitattaɱ lomahaɱsaɱ uppādetukāmo samādhimhā cāvetukāmo gāthaɱ bhāsatī ti.|| ||

5. Atha kho Selā bhikkhunī Māro kho ayaɱ pāpimā iti viditvā Māraɱ pāpimantaɱ gāthāhi paccabhāsi:|| ||

Na-y-idaɱ attakataɱ bimbaɱ na-y-idaɱ parakataɱ aghaɱ,||
Hetuɱ paṭicca sambhūtaɱ hetubhaŋgā nirujjhati.||
Yathā aññataraɱ bījaɱ khette vuttaɱ virūhati,||
Paṭavīrasañ c'āgamma sinehañ ca tad ūbhayaɱ.||
Evaɱ khandhā ca dhātuyo cha ca āyatanā ime,||
Hetuɱ paṭicca sambhūtā hetubhaŋgā nirujjhare ti.|| ||

Atha kho Māro pāpimā jānāti maɱ Selā bhikkhunīti dukkhī dummano tatthevantaradhāyīti.|| ||

 

§

 

Sutta 10

Vajirā Suttaɱ

[10.1][pts][ati][bps] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Vajirā bhikkhunī pubbaṇhasamayaɱ nivāsetvā pattacīvaramādāya Sāvatthiɱ piṇḍāya pāvisi.|| ||

Sāvatthiyaɱ piṇḍāya caritvā pacchābhattaɱ piṇḍapātapaṭikkantā yena Andhavanaɱ ten'upasaŋkami divāvihārāya.|| ||

Andhavanaɱ ajjhogahetvā aññatarasmiɱ rukkhamūle divāvihāraɱ nisīdi.|| ||

2. Atha kho Māro pāpimā Vajirāya bhikkhuniyā bhayaɱ chambhitattaɱ lomahaɱsaɱ uppādetukāmo samādhimhā cāvetukāmo yena vajirā bhikkhunī ten'upasaŋkami.|| ||

3. Upasaŋkamitvā Vajiraɱ bhikkhuniɱ gāthāya ajjhabhāsi:|| ||

Kenāyaɱ pakato satto kuvaɱ sattassa kārako,||
Kuvaɱ satto samuppanno kuvaɱ satto nirujjhatī ti.|| ||

4. Atha kho Vajirāya bhikkhuniyā etad ahosi:|| ||

Ko nu khvāyaɱ manusso vā amanussā vā gāthaɱ bhāsatī ti.|| ||

5. Atha kho Vajirāya bhikkhuniyā etad ahosi:|| ||

Māro kho ayaɱ pāpimā mama bhayaɱ chambhitattaɱ lomahaɱsaɱ uppādetukāmo samādhimhā cāvetukāmo gāthaɱ bhāsatī ti.|| ||

6. Atha kho Vajirā bhikkhunī Māro kho ayaɱ pāpimā iti viditvā Māraɱ pāpimantaɱ gāthāya paccabhāsi:|| ||

Kiɱ nu satto ti paccesi Māra diṭṭhigataɱ nu te,||
Suddhasankhārapuñjo'yaɱ na-y-idha sattūpalabbhati.||
Yathā hi aŋgasambhārā hoti saddo ratho iti,||
Evaɱ khandhesu santesu hoti satto ti sammuti.||
Dukkham eva hi sambhoti dukkhaɱ tiṭṭhati veti ca,||
Nāññatra dukkhā sambhoti nāññaɱ dukkhā nirujjhatī ti.|| ||

Atha kho Māro pāpimā jānāti maɱ Vajirā bhikkhunīti dukkhī dummano tatthevantaradhāyīti.|| ||

Bhikkhunīvaggo paṭhamo.

 


Contact:
E-mail
Copyright Statement   Webmaster's Page