Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
20. Opammasaɱyutta

Sutta 4

Ukkhāsata Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][rhyc][than][olds] EVAṂ ME SUTAṂ:|| ||

Ekaɱ samayaɱ Bhagavā Sāvatthiyaɱ viharati.||
Jetavane Anāthapiṇḍikassa ārāme.|| ||

[2] Yo bhikkhave, pubbaṇha-samayaɱ ukkhāsataɱ dānaɱ dadeyya,||
yo majjhantikaɱ-samayaɱ ukkhāsataɱ dānaɱ dadeyya,||
yo vā sāyaṇha-samayaɱ ukkhāsataɱ dānaɱ dadeyya,||
yo vā pubbaṇha-samayaɱ antamaso gadduhanamattam pi mettaɱ cittaɱ bhāveyya,||
yo vā majjhantikaɱ-samayaɱ antamaso gadduhanamattam pi mettaɱ cittaɱ bhāveyya,||
yo vā sāyaṇha-samayaɱ antamaso gadduhanamattam pi mettaɱ cittaɱ bhāveyya,||
idaɱ tato mahapphalataraɱ.|| ||

[3] Tasmā ti ha bhikkhave,||
evaɱ sikkhitabbaɱ:|| ||

Mettā no ceto-vimutti bhāvitā bhavissati||
bahulīkatā yānīkatā vatthukatā anuṭṭhitā paricitā susamāraddhā' ti.|| ||

Evaɱ hi vo bhikkhave sikkhitabbanti.|| ||

 


Contact:
E-mail
Copyright Statement   Webmaster's Page