Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

Saɱyutta Nikāya
I. Sagātha Vagga
1. Devatā-Saɱyutta
I. Naḷa Vagga

Suttas 1-10

Adapted from the 1995 edition of the digital version of the
Sri Lanka Buddha Jayanti Tripitaka Series.

 

Namo tassa Bhagavato arahato Sammā-sambuddhassa

 


[1]

Sutta 1

Ogha Suttaɱ

[1.1][pts][bodh][than][upal][olds][alvr] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā ekam-antaɱ aṭṭhāsi.

Eka-m-antaɱ ṭhitā kho sā devatā Bhagavantaɱ etad avoca:|| ||

Kathaɱ nu tvaɱ mārisa, ogham atarī ti?|| ||

Appatiṭṭhaɱ khvāhaɱ āvuso anāyūhaɱ ogham atarin ti.|| ||

Yathā kathaɱ pana tvaɱ mārisa appatiṭṭhaɱ anāyūhaɱ ogham atarī ti?|| ||

Yadā svāhaɱ āvuso santiṭṭhāmi,||
tadāssu saŋsīdāmi.||
Yadā svāhaɱ āvuso āyūhāmi||
tadāssu nibbuyhāmi.||
Evaɱ khvāhaɱ āvuso appatiṭṭhaɱ anāyūhaɱ ogham atarin tī.|| ||

Cirassaɱ vata passāmi||
brāhmaṇaɱ parinibbutaɱ,||
Appatiṭṭhaɱ anāyūhaɱ||
tiṇṇaɱ loke visattikaɱ ti|| ||

Idam avoca sā devatā.||
Samanuñño satthā ahosi.|| ||

Atha kho sā devatā samanuñño me satthā' ti Bhagavantaɱ abhivādetvā padakkhiṇaɱ katvā tatth'ev'antaradhāyī ti.|| ||

 


[2]

Sutta 2

Nimokkha Suttaɱ

[2.1][pts][bodh][upal] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā ekam-antaɱ aṭṭhāsi.

Eka-m-antaɱ ṭhitā kho sā devatā Bhagavantaɱ etad avoca:|| ||

Jānāsi no tvaɱ mārisa,||
sattānaɱ nimokkhaɱ pamokkhaɱ vivekan ti?|| ||

(Bhagavā:)||
Jānāmi khvāhaɱ āvuso sattānaɱ nimokkhaɱ pamokkhaɱ vivekan ti.|| ||

(Devatā:)||
Yathā katham pana tvaɱ mārisa jānāsi sattānaɱ nimokkhaɱ pamokkhaɱ vivekan ti?|| ||

(Bhagavā:)||
Nandībhavaparikkhayā saññāviññāṇasaŋkhayā,||
Vedanānaɱ nirodhā upasamā evaɱ khvāhaɱ āvuso jānāmi.||
Sattānaɱ nimokkhaɱ pamokkhaɱ vivekan ti.

 


 

Sutta 3

Upanīyati Suttaɱ

[3.1][pts][bodh][upal] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā ekam-antaɱ aṭṭhāsi.

Eka-m-antaɱ ṭhitā kho sā devatā Bhagavato santike imaɱ gātham abhāsi:|| ||

Upanīyati jīvitam appam āyu||
jarūpanītassa na santi tāṇā,||
Etaɱ bhayaɱ maraṇe pekkhamāno||
puññāni kayirātha sukhāvahānī ti.|| ||

(Bhagavā:)||
Upanīyati jīvitam appam āyu||
jarūpanītassa na santi tāṇā||
Etaɱ bhayaɱ maraṇe pekkhamāno||
lokāmisaɱ pajahe santipekkho ti.|| ||

 


[3]

Sutta 4

Accenti Suttaɱ

[4.1][pts][bodh][upal] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā ekam-antaɱ aṭṭhāsi.

Eka-m-antaɱ ṭhitā kho sā devatā Bhagavato santike imaɱ gātham abhāsi:|| ||

Accenti kālā tarayanti rattiyo||
vayoguṇā anupubbaɱ jahanti.||
Etaɱ bhayaɱ maraṇe pekkhamāno||
puññāni kayirātha sukhāvahānī ti.|| ||

(Bhagavā:)||
Accenti kālā tarayanti rattiyo||
vayoguṇā anupubbaɱ jahanti,||
Etaɱ bhayaɱ maraṇe pekkhamāno||
lokāmisaɱ pajahe santipekkhoti.|| ||

 


 

Sutta 5

Kati Chinda Suttaɱ

[5.1][pts][bodh][upal] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā ekam-antaɱ aṭṭhāsi.

Eka-m-antaɱ ṭhitā kho sā devatā Bhagavantaɱ gāthāya ajjhabhāsi:|| ||

Kati chinde kati jahe kati cuttari bhāvaye,||
Kati saŋgātigo 'bhikkhu oghatiṇṇo' ti vuccatī ti:|| ||

(Bhagavā:)||
Pañca chinde pañca jahe pañca vuttari bhāvaye,||
Pañca saŋgātigo 'bhikkhu oghatiṇṇo' ti vuccatī ti.|| ||

 


 

Sutta 6

Jāgara Suttaɱ

[6.1][pts][bodh][upal] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā ekam-antaɱ aṭṭhāsi.

Eka-m-antaɱ ṭhitā kho sā devatā Bhagavato santike imaɱ gāthaɱ abhāsi:|| ||

Kati jāgarataɱ suttā kati suttesu jāgarā,||
Katīhi rajam ādeti katīhi parisujjhatī ti.|| ||

(Bhagavā:)||
Pañca jāgarataɱ suttā pañca suttesu jāgarā,||
Pañcahi rajam ādeti pañcahi parisujjhatī ti.|| ||

 


[4]

Sutta 7

Appaṭividita Suttaɱ

[7.1][pts][bodh][upal] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā ekam-antaɱ aṭṭhāsi.

Eka-m-antaɱ ṭhitā kho sā devatā Bhagavato santike imaɱ gāthaɱ abhāsi:|| ||

Yesaɱ dhammā appaṭividitā paravādesu nīyare,||
Suttā te na ppabujjhanti kālo tesaɱ pabujjhitun ti.|| ||

(Bhagavā:)||
Yesaɱ dhammā suppaṭividitā paravādesu na nīyare, Te sambuddhā samma'd'aññāya caranti visame saman ti.|| ||

 


 

Sutta 8

Susammuṭṭha Suttaɱ

[8.1][pts][bodh][upal] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā ekam-antaɱ aṭṭhāsi.

Eka-m-antaɱ ṭhitā kho sā devatā Bhagavato santike imaɱ gāthaɱ abhāsi:|| ||

Yesaɱ dhammā susammuṭṭhā paravādesu nīyare,||
Suttā te na ppabujjhanti kālo tesaɱ pabujjhitun ti.|| ||

(Bhagavā:)||
Yesaɱ dhammā asammuṭṭhā paravādesu na nīyare,||
Te sambuddhā samma'd'aññāya caranti visame samaɱ ti.

 


 

Sutta 9

Namānakāma Suttaɱ

[9.1][pts][bodh][upal] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā ekam-antaɱ aṭṭhāsi.

Eka-m-antaɱ ṭhitā kho sā devatā Bhagavato santike imaɱ gāthaɱ abhāsi:|| ||

Na mānakāmassa damo idh'atthi||
na monam atthi asamāhitassa,||
Eko araññe viharaɱ pamatto||
na maccudheyyassa tareyya pāran ti.|| ||

(Bhagavā:)||
Mānaɱ pahāya susamāhitatto||
sucetaso sabbadhi vippamutto,||
Eko araññe viharaɱ appamatto||
sa maccudheyyassa tareyya pāran ti.|| ||

 


[5]

Sutta 10

Arañña Suttaɱ

[10.1][pts][than][bodh][upal][alvr] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā ekam-antaɱ aṭṭhāsi.

Eka-m-antaɱ ṭhitā kho sā devatā Bhagavantaɱ gāthāya ajjhabhāsi:|| ||

Araññe viharantānaɱ santānaɱ brahmacārinaɱ,||
Ekabhattaɱ bhuñjamānānaɱ kena vaṇṇo pasīdatī ti.|| ||

(Bhagavā:)||
Atītaɱ nānusocanti na ppajappanti'nāgataɱ,||
Paccuppannena yāpenti tena vaṇṇo pasīdati.||
Anāgatappajappāya atītassānusocanā,||
Etena bālā sussanti na'o va harito luto ti.|| ||

Na'avaggo paṭhamo

 


Contact:
E-mail
Copyright Statement   Webmaster's Page